Davidi dɩ Abigayɛlɩ taanɩ dɩm
25
Samowɛlɩ dɛɛn ma ba o tɩ. Yisɩrayɛlɩ tiinə bam maama ma jeeri o tɩʋ kʋm nɩ, sɩ ba di o luə. Ba ma kwe‑o ba kɩ o tɩtɩ tɩʋ Rama nɩ.Kʋ kwaga nɩ, mʋ Davidi ve o wʋ Paran kagʋa kam wʋnɩ. 2-3 Kalɛbɩ dwi tu wʋdoŋ dɛɛn zʋʋrɩ Maon tɩʋ kʋm nɩ, o yɩrɩ mʋ Na-balɩ. O dɛɛn yɩ nadum cɩga cɩga. O maa jɩgɩ peeni mʋrrʋ tɩtɔ, yɩ o bʋnɩ dɩ yɩ mʋrʋ. O maa jɩgɩ tɩga Karmɛlɩ seeni o nii o vara baŋa nɩ. O kaanɩ yɩrɩ dɛɛn mʋ yɩ Abigayɛlɩ. O maa yɩ wʋbʋŋa tu yɩ o yibiyə tiini ya lamma. Kʋ daarɩ Na-balɩ tɩtɩ, wʋntʋ wʋʋ lʋna zanzan yɩ o yɩ nɔn-balɔrɔ. Kʋ ma maŋɩ dɩdaanɩ Na-balɩ dɩ o nɔɔna bam wʋ Karmɛlɩ nɩ ba wʋra ba fanɩ o vara bam kʋrʋ.
4 Davidi dɛɛn na wʋ kagʋa kam nɩ kʋntʋ tɩn, mʋ o ni nɩ Na-balɩ tu sɩ o fanɩ o vara bam kʋrʋ. 5 O ma lɩ o nɔn-dʋnnʋ tɩm fugə, o tʋŋɩ-ba Na-balɩ tee nɩ yɩ o wɩ: «Ve-na Na-balɩ te Karmɛlɩ nɩ á da amʋ ŋwaanɩ á war‑o. 6 Ta-na dɩd-o nɩ: ‹Wɛ wʋ́ pa nmʋ dɩ n sɔŋɔ tiinə maama yazurə dɩ mʋmwɛ-dɛɛrɩ! Wɛ wʋ́ pa n jɩŋa wǝǝnu maama kɩ lanyɩranɩ! 7 Amʋ nan ni nɩ nmʋ wʋra n pa ba fanɩ n vara bam kʋrʋ mʋ. A maa lagɩ sɩ n maanɩ nɩ: nmʋ nayɩra bam ya na wʋ dɩbam tee nɩ tɩn, dɩ́ wʋ yaarɩ-ba. Maŋa kalʋ maama ba na wʋ Karmɛlɩ seeni tɩn, ba kʋlʋkʋlʋ wʋ je. 8 Nan bwe n tɩntʋŋna bam n nii, sɩ baá ta kʋntʋ mʋ. Zɩm na yɩ candiə dim dɛ tɩn mʋ a loori‑m sɩ n kɩ a nɔn-dʋnnʋ tɩm lanyɩranɩ, dɩ́ ciloŋo kʋm ŋwaanɩ. Pa dɩbam zənə yalʋ maama n na jɩgɩ n jɩŋa nɩ tɩn.› »
9 Davidi nɔɔna bam ma ja o kwǝrǝ kam ba vu ba pa Na-balɩ. Ba laan ma zɩgɩ sɩ ba joŋi lərə. 10 Na-balɩ ma lǝri-ba o wɩ: «Davidi mʋ yɩ wɔɔ? Amʋ yǝr-o. Zese bu wʋntʋ nɛ o tɩtɩ na? Lele kʋntʋ, tɩntʋŋnʋ wʋlʋ maama na jǝni o bʋŋɩ ga, oó zaŋɩ mʋ o lɔ o tu kwaga nɩ sɩ o taa te o tɩtɩ. 11 Amʋ bá sɛ sɩ a kwe a wʋdiu dɩdaanɩ a na a pa nɔn-yɔɔrʋ tɩlʋ a na yǝri mɛ ba na nuŋi tɩn. A bá kwe vara balʋ a na gʋ sɩ a tɩntʋŋna di tɩn a pa abam.»
12 Davidi nɔɔna bam ma joori ba vu Davidi te, yɩ ba ta kʋlʋ maama Na-balɩ na tagɩ tɩn ba brɩ-o. 13 Davidi ma ta dɩ o nɔɔna bam o wɩ: «Nɔɔnʋ maama kwe o sʋ-lɔŋɔ o vɔ o təŋə nɩ diŋ-diŋ!» Ba ma kwe ba sʋ-lwaanʋ tɩm ba vɔ. Davidi tɩtɩ dɩ ma vɔ o sʋ-lɔŋɔ kʋm o təŋə nɩ. O maa tɔgɩ nɔɔna biə-yana yigə o maa ve Na-balɩ baŋa. Nɔɔna biə-yale ma daarɩ, sɩ bantʋ taa yɩrɩ ba zɩla yam.
14 Na-balɩ tɩntʋŋnʋ wʋdoŋ ma ta dɩ Na-balɩ kaanɩ Abigayɛlɩ o wɩ: «Davidi mʋ zɩgɩ kagʋa kam nɩ o tʋŋɩ nɔɔna dɩbam tu Na-balɩ tee nɩ sɩ ba war‑o, yɩ o twɩ-ba lanyɩranɩ. 15 Cɩga ŋwaanɩ nan, nɔɔna bantʋ ya yɔɔrɩ ba kɩ dɩbam lanyɩranɩ mʋ. Ba wʋ daanɩ dɩbam. Maŋa kalʋ maama dɩ́ na wʋ ba tee nɩ dɩ́ beeri gaa kʋm wʋnɩ tɩn, dɩ́ kʋlʋkʋlʋ wʋ je. 16 Dɩ́ na jɩgɩ dɩ́ peeni sɩm dɩ́ yɩrɩ gaa kʋm wʋnɩ tɩn, Davidi nɔɔna bam mʋ kwǝli dɩbam, wɩa dɩdaanɩ tɩtɩ maama wʋnɩ. 17 Kʋntʋ tɩn, fɔgɩ n jeeli sɩ n nii n na wʋ́ kɩ kʋlʋ n wǝli dɩ́ maama tɩn. Bɛŋwaanɩ lɛɛrʋ mʋ lagɩ tɩ yi dɩ́ tu wʋm dɩ o sɔŋɔ kʋm maama, dɩ o na tiini o yɩ nɔn-balɔrɔ, yɩ o ba sɛ o joŋi kwiə tɩn ŋwaanɩ.»
18 Abigayɛlɩ ma kɩ lɩla o kɩ woŋo maama daanɩ. O maa jɩgɩ dɩpwa biə-yale (200), dɩ sana lɔɔrʋ tɩle, dɩ peeni sɩnu ba ya na wɔgɩ-sɩ tɩn, dɩ mɩn-wɔa yolo-kamunu, dɩ maasa bwɛ bi (100), dɩ kapɩrɩ-kʋra maasa biə-yale (200). O ma kwe wǝǝnu tɩm kʋntʋ maama o vɔ bɩnɛ baŋa nɩ. 19 O ma ta dɩ o tɩntʋŋna bam o wɩ: «Ja-na wǝǝnu tɩntʋ á taá wʋ yigə nɩ sɩ amʋ dɩ wʋ́ saŋɩ á kwaga a ba.» Kʋntʋ maama tɩn, o wʋ pɛ o barʋ wʋm maanɩ kʋ ni nɩ.
20 Abigayɛlɩ ma di o bɩnaga baŋa nɩ o kwe cwǝŋǝ o maa veǝ. O wʋ cwǝŋǝ kam nɩ mʋ, sɩ kʋ maŋɩ dɩdaanɩ mɛ na gugwǝli kʋ kaagɩ piu kʋm tɩn. Davidi dɩ o nɔɔna bam maa tu piu kʋm yuu nɩ ba bɩɩna. Ba ma jeeri daanɩ. 21 Davidi ya bʋŋɩ o ja wɩ: «A yɔɔrɩ a yaarɩ a tɩtɩ mʋ kafɛ yɩ a dɛɛn wʋra a yɩrɩ Na-balɩ jɩa wǝǝnu kagʋa kam wʋnɩ. Amʋ kɩ-o lanyɩranɩ pa o kʋlʋkʋlʋ wʋ je. Laan nan nii o na mɛ balɔrɔ mʋ o joori o lǝni lanyɩranɩ dɩlʋ a na kɩ-o tɩn. 22 Amʋ nan dugi dɩ Wɛ sɩ o pa lɛɛrʋ yi amʋ, nɩnɛɛnɩ tɩga daa na pʋʋrɩ yɩ a wʋ gʋ baara balʋ maama na yɩ o dwi tiinə tɩn pa ba wʋlʋwʋlʋ wʋ daarɩ dɩ dɩdʋa dɩ.»
23 Abigayɛlɩ na yɔɔrɩ o na Davidi tɩn, mʋ o zɩgɩ o bɩnaga kam yuu nɩ o faŋɩ o cu. O laan ma cɔɔlɩ o yibiyə tɩga nɩ o warɩ Davidi. 24 O ma ja Davidi nadooni yɩ o wɩ:
«Amʋ tu, pa-nɩ pwələ sɩ a ŋɔɔnɩ fɩɩn dɩ nmʋ. A loori-m! Sɛ sɩ kʋ maama taa yɩ amʋ yigə, sɩ n daarɩ n cəgi a taanɩ. 25 Amʋ tu, yɩ pa Na-balɩ na kɩ te tɩn daanɩ‑m, sɩ o yɩ nɔn-balɔrɔ mʋ. O yɩrɩ na yɩ Na-balɩ tɩn, dɩ kuri mʋ yɩ ‹nɔn-joro›. Cɩga tɩn, o ma sɩɩnɩ o tʋŋɩ jwərim. Sɩ kʋ na yɩ amʋ, a wʋ nɛ nɔɔna balʋ nmʋ na tʋŋɩ a barʋ tee nɩ tɩn.
26 Amʋ tu, a nɛ nɩ kʋ yɩ Baŋa-Wɛ mʋ cɩgɩ nmʋ, sɩ n yɩ ma lwarɩm n ma n ŋwɩ n dʋna. DƖ ma cɩ-m sɩ n yɩ ma n jɩŋa n gʋ-ba. Ŋwɩa Tu Baŋa-Wɛ na sɩɩnɩ DƖ wʋra tɩn, amʋ dugi Dɩntʋ yɩrɩ ŋwaanɩ, dɩ nmʋ tɩtɩ yɩrɩ ŋwaanɩ nɩ: nmʋ dʋna maama dɩ balʋ dwi maama na bʋŋɩ balɔrɔ ba pa‑m tɩn wʋ́ guri nɩnɛɛnɩ Na-balɩ na lagɩ o guri te tɩn mʋ. 27 Amʋ nan loori‑m mʋ sɩ n joŋi pɛɛra yantʋ n tɩntʋŋ-kana jɩŋa nɩ, a na jaanɩ a ba tɩn, n pɔɔrɩ-ya n pa n nɔɔna bam. 28 Amʋ tu, a nan loori‑m mʋ sɩ n ma n cɛ-nɩ dɩ a na kɩ kʋlʋ a ja a cɔgɩ. Amʋ ye nɩ Baŋa-Wɛ wʋ́ pa n paarɩ dɩm fɔgɩ dɩ zɩgɩ taan, nmʋ na yɩ wʋlʋ na jaŋɩ Baŋa-Wɛ najara n pa‑DƖ tɩn ŋwaanɩ. Wɛ bá sɛ sɩ n kɩ lwarɩm n ŋwɩa maama wʋnɩ. 29 Nɔɔnʋ na zəli nmʋ sɩ o gʋ-m, n Tu Baŋa-Wɛ mʋ wʋ́ taa kwǝli‑m sɩ cam yɩ yi n ŋwɩa. Kʋ nan na yɩ n dʋna bam, o ta maa wʋ́ pa ba ŋwɩa yɔɔrɩ ka je, nɩnɛɛnɩ nɔɔnʋ na kwe kandwɛ o kɩ napana wʋnɩ, yɩ o laan dʋlɩ-ka pa kandwɛ dɩm je te tɩn. 30 A ye nɩ Baŋa-Wɛ wʋ́ sɩɩnɩ DƖ kɩ wo-laarʋ tɩlʋ maama DƖ na goni ni sɩ DƖ kɩ o pa‑m tɩn. DƖ ta wʋ́ pa n ji Yisɩrayɛlɩ tiinə pɛ. 31 Kʋ maama na kɩa, nmʋ wʋbʋŋa daa bá cɔgɩ, nɩnɛɛnɩ n ya na gʋ nɔɔna kafɛ yɩranɩ. Nmʋ wʋbʋŋa bá daanɩ‑m dɩ n na mɛ n tɩtɩ jɩŋa n ŋwɩ n jɩnɩ nɔn-gwiə baŋa nɩ tɩn. Amʋ tu, Baŋa-Wɛ na tu DƖ kɩ-m lanyɩranɩ kʋntʋ, sɩ n guli amʋ dɩ gulə.»
32 Davidi ma ta Abigayɛlɩ o wɩ:
«Amʋ wʋ́ zuli Yisɩrayɛlɩ tiinə Baŋa-Wɛ dɩm mʋ, bɛŋwaanɩ, Dɩntʋ mʋ tʋŋɩ-m sɩ n ba n jeeri-nɩ zɩm dɛ dɩntʋ. 33 A nan ta kɩ Wɛ le nmʋ dɩ ŋwaanɩ. N yɩ wʋbʋŋa tu. Swan taanɩ dɩlʋ n na tagɩ tɩn ŋwaanɩ, amʋ ta wʋ mɛ a jɩŋa a gʋ nɔɔna sɩ a ŋwɩ a jɩnɩ ba baŋa nɩ. 34 Cɩga tɩn, Baŋa-Wɛ mʋ cɩgɩ amʋ cwǝŋǝ sɩ a yɩ cɔgɩ abam. Nmʋ ya na wʋ kɩ lɩla n ba n jeeri dɩbam, tɩntʋ n barʋ wʋm dɩ o nɔɔna maama na yɩ baara naa bəkəri tɩn ya tɩga. Dɩ́ yaá gʋ baarʋ dwi maama na wʋ o sɔŋɔ kʋm nɩ tɩn, sɩ tɩga daa ba ka pʋʋrɩ. Amʋ dugi dɩ Yisɩrayɛlɩ tiinə Ŋwɩa Tu Baŋa-Wɛ dɩm mʋ nɩ a tɛ cɩga mʋ kʋntʋ.»
35 Davidi ma joŋi Abigayɛlɩ pɛɛra yam yɩ o daarɩ o ta dɩd-o o wɩ: «Joori n vu sɔŋɔ, sɩ n daarɩ n pa n wʋʋ taa tigə. Amʋ wʋ́ kɩ n na tagɩ te n brɩ-nɩ tɩn.»
36 Abigayɛlɩ ma joori o vu sɔŋɔ. O na nɛ o barʋ Na-balɩ tɩn, o ma maanɩ nɩ o kɩ wʋdi-fɔrɔ nɩnɛɛnɩ pɛ na wʋ́ kɩ te tɩn mʋ. O kɩ candiə mʋ o pa nɔɔna sɩ ba tɔgɩ ba di. O ma di ywəəni o ba o bugi dɩ sana. Kʋntʋ ŋwaanɩ Abigayɛlɩ wʋ tagɩ kʋlʋkʋlʋ dɩ o barʋ wʋm dɩntʋ tɩtɩɩ dɩm nɩ. 37 Tɩga laan na pʋʋrɩ yɩ sana bam nuŋi Na-balɩ yiǝ nɩ tɩn, mʋ o kaanɩ wʋm tʋlɩ kʋlʋ maama na kɩ tɩn o brɩ-o. Na-balɩ na ni tɩn, o bɩcarɩ ma tiini dɩ baanɩ, yɩ o yɩra yam maama puli sɩ ya taa tʋa. 38 Da fugə na kɩ ya wǝli da tɩn mʋ Baŋa-Wɛ magɩ Na-balɩ pa o tɩ.
39 Davidi na ni nɩ Na-balɩ tɩgɩ tɩn, o ma zuli Wɛ yɩ o wɩ: «Amʋ wʋ́ kɩ Baŋa-Wɛ le, bɛŋwaanɩ, DƖ brɩ nɩ a jɩgɩ cɩga Na-balɩ yigə nɩ dɩdaanɩ o na twɩ-nɩ tɩn. DƖ ta ma cɩ a jɩŋa pa a wʋ tʋŋɩ lwarɩm, yɩ DƖ daarɩ DƖ pa Na-balɩ kǝm-balɔrɔ kʋm joori kʋ tʋ o tɩtɩ yuu nɩ.» Davidi laan ma tʋŋɩ kwǝrǝ o pa Abigayɛlɩ nɩ: o lag‑o mʋ sɩ o ma o kɩ o kaanɩ.
40 Davidi nɔɔna bam ma vu Karmɛlɩ ba ta dɩ Abigayɛlɩ ba wɩ: «Davidi mʋ tʋŋɩ dɩbam n tee nɩ sɩ dɩ́ ja‑m dɩ́ ba sɩ n ta n yɩ o kaanɩ.» 41 O ma cɔɔlɩ o yibiyə tɩga nɩ yɩ o lǝri-ba o wɩ: «Amʋ yɩ Davidi tɩntʋŋ-kana mʋ. A maa wʋ́ sɛ sɩ a zarɩ o tɩntʋŋna bam nɛ.» 42 Abigayɛlɩ ma kɩ lɩla o zaŋɩ o din bɩnaga, yɩ o pa o tɩntʋŋ-kaana banu tɔg-o ba vu. Ba ma pɛ Davidi nɔɔna bam kwaga ba pu ba vu ba yi Davidi te, pa o ji o kaanɩ.