Davidi yagɩ Sooli o pa o lu
24
Najara yalʋ dɛɛn na wʋ Sooli dɩdaanɩ Filisi tiinə bam tɩtarɩ nɩ tɩn ma ti. Sooli na joori sɔŋɔ tɩn mʋ o ni nɩ Davidi wʋ En-Gedi kagʋa kam seeni. 2 O ma kuri jar-kərə mʋrrʋ tɩtɔ Yisɩrayɛlɩ tiinə bam wʋnɩ, balʋ na ye najara laŋa lanyɩranɩ tɩn. O ma kɩ-ba o kwaga nɩ yɩ ba nuŋi ba vu sɩ ba beeri Davidi dɩ o nɔɔna bam je. Ba ma vu ba yi pweeru tɩdonnǝ seeni ba na bəi-tɩ nɩ ‹Kagʋa wʋ bʋnɩ pweeru› tɩn.3 Ba na wʋ cwǝŋǝ nɩ tɩn, mʋ ba yi je sɩlʋ nayɩra na yǝni ba pɩ ba peeni da tɩn. Piu bɔɔnɩ maa wʋra dɩ na bwələ dɩ cwǝŋǝ kam ni. Sooli ma ywəri o zʋ bɔɔnɩ dɩm wʋnɩ sɩ o fʋ fɩan. Piu bɔɔnɩ dɩm kʋntʋ nɩ mʋ Davidi dɩ o nɔɔna bam dɩ dɛɛn səgi. Bantʋ nan joori ba wʋ yigə nɩ mʋ dáa dáa. 4 Davidi nɔɔna bam na nɛ Sooli tɩn ba ma ta dɩ Davidi ba wɩ: «Nii pwələ na tigi jaja ka pa‑m te! Zɩm dɛ dɩntʋ mʋ yɩ dɛ dɩlʋ Baŋa-Wɛ na tagɩ dɩ taanɩ, dɩ DƖ na taga DƖ wɩ: DƖ wʋ́ kwe n dʋnʋ wʋm DƖ kɩ n jɩŋa nɩ sɩ nmʋ kɩ-o n na lagɩ te tɩn.» Davidi ma vwɛ kʋntʋ mɛmɛ o vu o ja Sooli gɔrɔ kʋm kuri seeni o goni, yɩ Sooli yǝri kʋ ni nɩ.
5 Kʋ kwaga nɩ mʋ Davidi wʋbʋŋa daanɩ‑o zanzan dɩ kʋlʋ o na kɩ tɩn. 6 O ma ta dɩ o nɔɔna bam o wɩ: «Baŋa-Wɛ wʋ́ cɩ sɩ amʋ kwe a jɩŋa a ma a kɩ wʋlʋ na te amʋ tɩn zʋnnɩ. Kʋ yɩ Baŋa-Wɛ mʋ kur‑o. Wɛ wʋ́ cɩ sɩ a cɔgɩ a tu wʋm, wʋlʋ Wɛ na pwəri paarɩ nugə o yuu nɩ tɩn.» 7 Kʋ yɩ bɩtarɩ sɩntʋ mʋ Davidi mɛ o ja o nɔɔna bam, o cɩ-ba sɩ ba yɩ zaŋɩ ba kɩ Sooli kʋlʋkʋlʋ. Sooli ma zaŋɩ piu bɔɔnɩ dɩm wʋnɩ o nuŋi sɩ o kɛ.
8 Davidi dɩ laan ma ba o nuŋi piu bɔɔnɩ dɩm wʋnɩ yɩ o zɩgɩ dáa nɩ o bəŋi Sooli o wɩ: «Pɛ! Amʋ tu, dɩnle!» Sooli ma pipiri sɩ o nii. Davidi ma vin o yibiyə tɩga nɩ o pa‑o zulə, 9 yɩ o ta o wɩ:
«Amʋ ko, bɛŋwaanɩ mʋ n kaagɩ n cəgi balʋ na tɛ ba wɩ amʋ kwaanɩ sɩ a cɔgɩ‑m tɩn taanɩ? 10 Nmʋ zɩm nɛ nɩ: n na zʋ piu bɔɔnɩ dɩm wʋnɩ tɩn, Baŋa-Wɛ kwe nmʋ DƖ kɩ amʋ jɩŋa nɩ mʋ. A nɔɔna bam badonnǝ ya wɩ dɩ́ gʋ-m mʋ, yɩ amʋ wʋ pɛ-ba cwǝŋǝ. Amʋ ma ta dɩ ba a wɩ: ‹A bá sɛ a kɩ a tu wʋm zʋnnɩ, o na yɩ wʋlʋ Baŋa-Wɛ na kuri tɩn ŋwaanɩ.› 11 A ko, fɔgɩ n nii gwar-zɩnzwarɩ dɩntʋ a ze a jɩŋa nɩ tɩn! Dɩ nuŋi nmʋ gɔrɔ kʋm kuri seeni mʋ. Amʋ na yi n yɩra tɩn, a yaá wanɩ‑m a gʋ. A na goni n gɔrɔ kʋm, yɩ a daarɩ n tɩtɩ a yagɩ tɩn, laan nan lwarɩ nɩ a ba jɩgɩ nmʋ lwarɩm pugə a je. A brɩ a wʋ lɔgɩ nmʋ kwaga nɩ. Nmʋ laan ma n pu amʋ kwaga sɩ n lɩ a mʋmwɛ, yɩ a wʋ kɩ-m kʋlʋkʋlʋ a cɔgɩ. 12 Baŋa-Wɛ nan mʋ wʋ́ brɩ dɩbam bale wʋnɩ wʋlʋ na jɩgɩ bʋra tɩn. Baŋa-Wɛ mʋ wʋ́ ŋwɩ amʋ jɩnɩ nmʋ yuu nɩ, dɩdaanɩ n na jɩgɩ amʋ n kɩ te maama tɩn. Sɩ kʋ na yɩ amʋ, a bá kwe a jɩŋa a ma a dwe‑m dɩ fɩɩn dɩ. 13 Faŋa tiinə maa wɩ: ‹Kǝm tɔgɩ dɩ tu mʋ.› Kʋntʋ tɩn, amʋ bá kɩ nmʋ lwarɩm.
14 Amʋ nan yɩ wɔɔ mʋ yɩ Yisɩrayɛlɩ tiinə pɛ zəli-nɩ sɩ o gʋ? Amʋ yɩ kakur-tɩka, naa kasɩla mʋ nmʋ jɩgɩ n zələ? Kʋ ba jɩgɩ kuri. 15 Baŋa-Wɛ mʋ wʋ́ zʋ taanɩ dɩntʋ wʋnɩ sɩ DƖ di-dɩ dɩbam bale laŋa nɩ. Dɩntʋ mʋ wʋ́ zɩgɩ amʋ kwaga nɩ DƖ wǝli-nɩ. DƖ ta wʋ́ pa a na bʋra yɩ a lu nmʋ jɩŋa nɩ.»
16 Davidi na tagɩ kʋntʋ maama o ti tɩn, mʋ Sooli bwe‑o o wɩ: «Amʋ bu Davidi, nmʋ kwǝrǝ mʋ kʋntʋ na?» Sooli laan ma keeri baŋa baŋa. 17 O ta ma ta o wɩ: «Yagɩ, sɩ n jɩgɩ cɩga, amʋ mʋ tʋŋɩ vwan. Nmʋ nan kɩ amʋ lanyɩranɩ, yɩ amʋ lagɩ nmʋ cɔgɩm.a 18 Nmʋ zɩm pɛ a lwarɩ nɩ n lagɩ a ni-taanɩ. Bɛŋwaanɩ, Baŋa-Wɛ ya pɛ‑m pwələ sɩ n gʋ-nɩ, yɩ n wʋ sɛ sɩ n gʋ-nɩ. 19 Nɔɔnʋ na jeeri o dʋnʋ yɩ o ja-o, o daa wʋ́ yag-o sɩ o kɛ mwalɩ mwalɩ mʋ na? Nmʋ zɩm na kɩ-nɩ lanyɩranɩ tɩn, Baŋa-Wɛ mʋ wʋ́ kɩ nmʋ yu-yoŋo. 20 Amʋ laan lwarɩ nɩ nmʋ mʋ wʋ́ sɩɩnɩ n ji Yisɩrayɛlɩ tiinə Pɛ, yɩ n paarɩ dɩm wʋ́ zɩgɩ lanyɩranɩ. 21 A nan loori‑m mʋ sɩ n ta n du dɩ Baŋa-Wɛ yɩrɩ nɩ: n na tu n di paarɩ, n bá cɔgɩ a dwi dɩm sɩ dɩ ti maama. Yɩ pa a yɩrɩ dɩm je a ko sɔŋɔ kʋm wʋnɩ.»
22 Davidi ma sɩɩnɩ o ta o du kʋntʋ Sooli yigə nɩ. Sooli ma zaŋɩ o joori sɔŋɔ. Davidi dɩ o nɔɔna bam dɩ ma joori ba vu ba səgim je sɩm nɩ.