Davidi joŋi Keyila tɩʋ kʋm o yagɩ
23
Dɛ dɩdwɩ mʋ ba tagɩ ba brɩ Davidi ba wɩ: «Filisi tiinə bam mʋ ve sɩ ba kɩ najara dɩ Keyila tiinə. Ba nan vrɩ ba mɩna yɩ ba ta wʋra ba fɩrɩ-ya mʋ.» 2 Davidi ma bwe Baŋa-Wɛ o wɩ: «A ve a jeeri Filisi tiinə bam dɩ najara na?» Baŋa-Wɛ ma ləri DƖ wɩ: «Zaŋɩ n vu n jeeri-ba sɩ n joŋi Keyila tɩʋ ba jɩŋa nɩ n yagɩ.»3 Davidi nɔɔna bam ma ta ba wɩ: «Nii dɩ́ na maŋɩ dɩ́ wʋ Zuda laŋa kam nɩ mʋ yo seeni, yɩ dɩ́ fʋna dɩ Filisi tiinə bam. Sɩ dɩ́ laan nan na lagɩ dɩ́ jeeri-ba Keyila nɩ, kʋ bá taa yɩ lɛɛrʋ kʋ pa dɩbam na?» 4 Davidi daa ma vu Baŋa-Wɛ yigə nɩ sɩ o bwe o lwarɩ o na wʋ́ kɩ te tɩn. Baŋa-Wɛ ma lǝr-o DƖ wɩ: «Nan ve Keyila lele kʋntʋ, sɩ amʋ wʋ́ kɩ Filisi tiinə bam nmʋ jɩŋa nɩ sɩ n di-ba.»
5 Davidi dɩ o nɔɔna bam ma zaŋɩ ba vu Keyila ba jeeri Filisi tiinə bam dɩ najara. Ba ma wanɩ-ba yɩ ba vrɩ ba vara ba ja ba viiri. Ba ma gʋ Filisi tiinə bam zanzan, yɩ ba daarɩ ba joŋi Keyila tiinə bam ba yagɩ. 6 Ayimelɛkɩ bu Abɩatarɩ dɛɛn ya na duri o vu Davidi te Keyila nɩ tɩn, o ya kwe Wɛ kaanɩm gwar-wʋgʋ mʋ o wǝli da.a
7 Sooli dɛɛn ma ni nɩ Davidi ve Keyila mʋ o wʋra. O ma ta o wɩ: «Wɛ laan mʋ kwe Davidi DƖ kɩ amʋ jɩŋa nɩ, bɛŋwaanɩ o ve o pɩ o tɩtɩ mʋ tɩʋ kʋlʋ ba na yǝni ba ma bwəəru kamunə ba pɩ kʋ niə yam tɩn wʋnɩ.» 8 Sooli ma bəŋi o jar-kərə bam sɩ ba la daanɩ, ba vu ba gilimi tɩʋ kʋm ba kɩ tɩtarɩ nɩ, sɩ ba daarɩ ba ja Davidi dɩ o nɔɔna bam.
9 Davidi na ni nɩ Sooli wʋbʋŋa jaanɩ mʋ sɩ o ba o ja-o tɩn, o ma ta dɩ Wɛ kaanɩm tu Abɩatarɩ o wɩ: «Kwe kaanɩm gwar-wʋgʋ n ja n ba, sɩ dɩ́ ma dɩ́ lwarɩ Wɛ wʋbʋŋa na yɩ te tɩn.» 10 Davidi laan ma loori Wɛ o wɩ: «Yisɩrayɛlɩ tiinə Baŋa-Wɛ dɩm, amʋ ni nɩ Sooli lagɩ o ba yo seeni mʋ o cɔgɩ tɩʋ kʋm amʋ ŋwaanɩ. 11 A lagɩ a bwe a nii, Sooli wʋ́ sɩɩnɩ o ba yo, nɩ amʋ na ni te tɩn na? Keyila tiinə bam wʋ́ ja amʋ ba kwe ba kɩ o jɩŋa nɩ na? Popo a loori‑m sɩ n pa a lwarɩ kʋ na wʋ́ kɩ te tɩn.» Baŋa-Wɛ ma ləri DƖ wɩ: «Sooli wʋ́ ba.» 12 Davidi daa ma bwe o wɩ: «Sɩ Keyila tiinə bam, baá kwe amʋ dɩ a nɔɔna bam ba kɩ Sooli jɩŋa nɩ na?» Baŋa-Wɛ ma lǝr-o DƖ wɩ: «Ɛɛn, baá kwe abam ba pa‑o.»
13 Davidi na ni kʋntʋ tɩn, o dɩdaanɩ o nɔɔna bam ma kɩ lɩla ba duri ba nuŋi Keyila nɩ. Ba maa kaagɩ ba ve je sɩlʋ maama ba na wʋ́ wanɩ ba vu tɩn. Sooli na ni nɩ Davidi daa tǝri Keyila nɩ tɩn, o ma ləni o wʋbʋŋa yɩ o wʋ ve da.
Davidi lugi Sooli jɩŋa nɩ
14 Davidi dɛɛn maa wʋ Zifi kagʋa kam nɩ o səgi pweeru laŋa kam gugwəəru tɩm wʋnɩ. Sooli dɩ ma yɔɔrɩ o beer‑o mʋ sɩ o wan‑o o ja. Wɛ maa wʋ pɛ Sooli na o jəgə.
15 Davidi dɛɛn wʋ Zifi kagʋa kam je sɩdoŋ nɩ, Horesi nɩ mʋ. O na wʋra tɩn, o ma maanɩ nɩ Sooli nuŋi o ba sɩ o gʋ-o. 16 Sooli bu Zonatan dɩ nan ya ve Horesi. O ma vu Davidi te, o daarɩ o pa o na baarɩ Baŋa-Wɛ dam ŋwaanɩ. 17 Zonatan ma ta dɩd-o o wɩ: «Yɩ ta n fʋna, sɩ a ko Sooli bá yi‑m o ja. O maŋɩ o ye nɩ: nmʋ mʋ lagɩ n ta n yɩ Yisɩrayɛlɩ tiinə Pɛ, sɩ amʋ laan saŋɩ n kwaga a taa wʋ n tikəri nɩ.» 18 Bantʋ bale daa ma kɩ ni-mɔrɔ Baŋa-Wɛ yigə nɩ sɩ ba taa jɩgɩ cɩga ba pa daanɩ. Kʋntʋ kwaga nɩ mʋ Zonatan joori o vu sɔŋɔ. Davidi maa maŋɩ Horesi nɩ.
19 Zifi tiinə badonnǝ ma zaŋɩ ba vu Sooli te Gibea nɩ. Ba ma ta dɩd-o ba wɩ: «Pɛ, Davidi tu o səgi dɩbam laŋa kam Horesi zwəənu tɩm nɩ. O wʋ Hakila piu kʋm na wʋ Yesimɔn jagwiə seeni tɩn yuu nɩ mʋ. 20 Nmʋ na kwaanɩ n beer‑o sɩ n ja tɩn, nan lagɩ dɛ sɩ n ba dɩ́ tɩʋ kʋm, sɩ dɩ́ ja-o dɩ́ kɩ nmʋ jɩŋa nɩ.»b
21 Sooli ma ləri o wɩ: «Á kɩ cɩga. Baŋa-Wɛ yu-yoŋo taa wʋ á yuu nɩ, dɩ á na lagɩ a lanyɩranɩ tɩn! 22 Nan ta kwaanɩ-na á wǝli-nɩ fɩɩn. Joori-na á vu á lwarɩ o na wʋ mɛ cɩga cɩga tɩn, dɩdaanɩ nɔɔna balʋ na nɛ‑o dáanɩ tɩn. Amʋ ni nɩ o tiini o jɩgɩ sɩsɩɩna zanzan kʋ ja kʋ gaalɩ. 23 Ve-na á fɔgɩ á beeri á lwarɩ o səgim je sɩm maama, sɩ á laan ba á ta á brɩ-nɩ jaja. Kʋ kwaga nɩ, a laan wʋ́ da dɩ abam a vu. O ta na wʋ laŋa kam kʋntʋ nɩ, a wʋ́ beeri a na o jǝgǝ. Kʋ na maŋɩ kʋ yɩ sɩ a beeri Zuda sɔ-yuni tɩm maama wʋnɩ mʋ dɩ, a ta wʋ́ ja-o.»
24 Nɔɔna bam ma kɩ lɩla ba loori Sooli ba vu Zifi, yɩ Sooli laan saŋɩ kwaga o yi da. Davidi dɩ o nɔɔna bam dɛɛn ya səgi Maon kagʋa kam nɩ mʋ. Ba maa wʋ Araba bolo kʋm na wʋ Yesimɔn jagwiə seeni tɩn nɩ mʋ. 25 Sooli dɩ o nɔɔna bam ma nuŋi sɩ ba beeri Davidi je. Davidi dɩ ma ni Sooli ŋwa. O dɩ o nɔɔna bam ma vu pu-kamunu kʋdoŋ na wʋ Maon kagʋa kam nɩ tɩn ba səgi da. Sooli ma lwarɩ Davidi na wʋ mɛ tɩn. O ma vu Maon kagʋa kam nɩ o pu o kwaga virə-virə. 26 Sooli dɩ o nɔɔna bam maa wʋ piu kʋm daa dɩdʋa nɩ mʋ ba veǝ. Davidi dɩ o nɔɔna bam dɩ maa wʋ kʋ daa kadoŋ nɩ ba kwaanɩ sɩ ba lu Sooli jɩŋa nɩ. Sooli dɩ o nɔɔna bam ma daarɩ fɩɩn sɩ ba yi Davidi dɩ o nɔɔna bam te sɩ ba li-ba. 27 Kʋ nɛ ni nɩ mʋ nɔɔnʋ duri o vu o yi Sooli te yɩ o wɩ: «Kɩ-na lɩla á ba! Filisi tiinə bam mʋ cugi ba puri dɩbam tɩʋ kʋm baŋa nɩ!»