Davidi səgi o tɩtɩ Sooli tee nɩ
22
Davidi dɛɛn ma zɩgɩ Gatɩ tɩʋ kʋm nɩ, o duri o vu o səgi piu kʋdoŋ bɔɔnɩ wʋnɩ. Je sɩm kʋntʋ bwələ dɩdaanɩ Adulamɩ tɩʋ mʋ.a O cʋrrʋ dɩ o sɔŋɔ tiinə bam maama na ni nɩ o wʋ dáanɩ tɩn, ba ma vu o te. 2 Kʋ ta wǝli da, nɔɔna balʋ maama na wʋ cam wʋnɩ tɩn, dɩ balʋ na jɩgɩ nɔɔna jɩna tɩn, kʋ wǝli dɩdaanɩ balʋ maama ŋwɩa na ba ywəmmə tɩn maama ma la ba vu Davidi tee nɩ. Ba maama kɔgɔ dɛɛn yɩ biə-yana mʋ. Davidi ma ji bantʋ maama yigə tu.3 Davidi dɛɛn ma zɩgɩ dáanɩ o vu Moabɩ tɩʋ Mitspa. O ma ta dɩ Moabɩ pɛ wʋm o wɩ: «A loori‑m mʋ sɩ n pa a ko dɩdaanɩ a nu taa wʋ nmʋ tee nɩ, sɩ kʋ taa nii a na tu a lwarɩ Wɛ na jɩgɩ kʋlʋ sɩ DƖ kɩ DƖ pa-nɩ tɩn.» 4 Davidi ma ja-ba o vu o yagɩ Moabɩ pɛ wʋm sɔŋɔ nɩ. Ba maa wʋ pɛ wʋm tee nɩ maŋa kalʋ maama Davidi dɛɛn na kaagɩ o səgi o tɩtɩ je sɩm kʋntʋ nɩ tɩn.
5 Dɛ dɩdwɩ Wɛ nijoŋnu Gaadɩ ma ba o ta dɩ Davidi o wɩ: «Daa n yɩ maŋɩ gugoro kʋm nɩ yo seeni! Zaŋɩ n nuŋi n vu Zuda.»b Davidi ma pɛ o zaŋɩ o vu o zʋʋrɩ Erɛtɩ kagʋa kam wʋnɩ.
Sooli pɛ ba gʋ Nobi tɩʋ kaanɩm tiinə
6 Sooli dɛɛn maa wʋ Gibea tɩʋ zoŋo kʋdoŋ yuu nɩ. O maa je sana kuri nɩ, yɩ o ze cicwe o jɩŋa nɩ. O dɩdɛɛra bam maama maa kaag‑o ba zɩga. Sooli laan ma ba o lwarɩ nɩ ba ni Davidi ŋwa mʋ. 7 O ma ta dɩ o nɔɔna bam o wɩ: «Abam, Bɛnzamɛn tiinə bam, á bʋŋɩ nɩ Zese bu Davidi na di paarɩ, o ta wʋ́ taa ye á ni nɩ, sɩ o pa abam karɩ dɩ kadwi yɩ o daarɩ o pa á taa wʋ o jar-kərə bam yigə nɩ na? 8 Kʋ yɩ kʋntʋ ŋwaanɩ mʋ á kɩ ni daanɩ sɩ á lɔ amʋ kwaga nɩ na? Amʋ tɩtɩ bu Zonatan mʋ kɩ ni dɩdaanɩ Zese bu wʋm sɩ ba cɔge-nɩ, yɩ abam wʋlʋwʋlʋ wʋ pɛ a lwarɩ kʋ ni nɩ. Abam brɩ nɩ á yigə tǝri amʋ wʋnɩ. Amʋ bu wʋm maŋɩ o sʋgɩ a tɩntʋŋnʋ pa o kwaanɩ o na pwələ o gʋ-nɩ, yɩ á wʋ tagɩ á brɩ-nɩ!»
9 Edɔm tu Doɛgɩ dɩ dɛɛn tɔgɩ o wʋ Sooli nɔɔna bam tee nɩ. O na ni Sooli na tagɩ kʋlʋ tɩn, o maa wɩ: «Maŋa kam a na wʋ Nobi nɩ tɩn, mʋ a nɛ Zese bu wʋm na tu Asituba bu Ayimelɛkɩ te. 10 Ayimelɛkɩ ma bwe Baŋa-Wɛ sɩ o lwarɩ Davidi yigə na yɩ te tɩn. O ta pɛ Davidi wʋdiiru, yɩ o daarɩ o kwe Filisi tu Goliatɩ sʋ-lɔŋɔ kʋm o wǝli da o pa‑o.»c
11 Sooli na ni kʋntʋ tɩn, o ma tʋŋɩ o bəŋi Ayimelɛkɩ dɩdaanɩ o sɔŋɔ tiinə maama sɩ ba ba o te. Bantʋ dɛɛn yɩ Wɛ kaanɩm tiinə mʋ Nobi tɩʋ nɩ. Ba maama na yi Sooli te tɩn, 12 o ma ta o wɩ: «Asituba bu, cəgi yo!» O dɩ ma ləri o wɩ: «Pɛ, a cǝgǝ.» 13 Sooli ma bwe‑o o wɩ: «Bɛɛ mʋ kɩ yɩ nmʋ kɩ ni dɩdʋa dɩdaanɩ Zese bu wʋm, sɩ á kɩ á cɔge-nɩ? Nmʋ pɛ‑o wʋdiu, dɩ sʋ-lɔŋɔ, yɩ n ta ma n sɔɔlɩ Wɛ n kwɛ o cwǝŋǝ. Kʋntʋ ma pa o lɔ amʋ kwaga nɩ, yɩ o zɩm tɔgɩ amʋ nɛ tɩntʋ sɩ o gʋ-nɩ!»
14 Ayimelɛkɩ ma ləri pɛ wʋm o wɩ: «Pɛ, nɔɔn-nɔɔnʋ tǝri nmʋ tɩntʋŋna bam wʋnɩ yɩ o jɩgɩ cɩga o pa‑m nɩnɛɛnɩ Davidi na jɩgɩ nmʋ cɩga te tɩn. O ta maa yɩ n bukɔ barʋ. Nɔn-babɛ sɩlʋ na yɩrɩ nmʋ tɩn maama wʋnɩ, o wʋ ba yigə nɩ mʋ. O ta maa jɩgɩ yɩrɩ nmʋ sɔŋɔ kʋm maama wʋnɩ. 15 Cɩga tɩn, kʋ daɩ dɩntʋ dɛ nɩ mʋ a puli sɩ a sɔɔlɩ Wɛ a pa‑o. A nan kɩ a cɔgɩ mʋ na? Yɩ ja taanɩ dɩntʋ n jeeri amʋ dɩ a sɔŋɔ tiinə bam, sɩ amʋ yǝri taanɩ dɩm kʋlʋkʋlʋ ni nɩ.»
16 Sooli ta maa wɩ: «Ayimelɛkɩ, nmʋ dɩdaanɩ n dwi dɩm maama maŋɩ sɩ á tɩ mʋ.» 17 O ma ta dɩ balʋ na zɩgɩ ba yɩr-o tɩn o wɩ: «Zaŋɩ-na á gʋ Baŋa-Wɛ kaanɩm tiinə bam! Bɛŋwaanɩ, ba sɔgɩ ni dɩdaanɩ Davidi sɩ ba cɔge-nɩ. Ba maanɩ nɩ Davidi maa duri sɩ o lu amʋ mʋ, yɩ ba wʋ tagɩ ba brɩ-nɩ.» Pɛ dɩdɛɛra bam maa wʋ sɛ sɩ ba ma ba jɩn ba dwe Baŋa-Wɛ kaanɩm tiinə bam.
18 Sooli ma pipiri o ta dɩ Edɔm tu Doɛgɩ o wɩ: «Nmʋ nan zaŋɩ n gʋ Baŋa-Wɛ kaanɩm tiinə bam!» Doɛgɩ ma sɩɩnɩ o magɩ-ba o gʋ. Wɛ kaanɩm tiinə funɔnɔ banu mʋ tɩgɩ dɩ dɛ dɩm kʋntʋ nɩ, yɩ ba maama zʋʋrɩ kaanɩm gwar-wʋgʋ kʋm mʋ. 19 Sooli ma vu Nobi tɩʋ kʋm, mɛ kaanɩm tiinə bam na zʋʋrɩ da tɩn. O ma gʋ tɩʋ kʋm nɔɔna bam maama. O pɛ ba gʋ baara, dɩ kaana, dɩ ba biə, kʋ brɩ kʋ wǝli bu-sɩsɩn dɩ mʋ. Ba ta ma gʋ ba naanɩ, dɩ ba bɩnɛ, kʋ wǝli dɩ ba peeni maama.
20 Wʋlʋ yɩranɩ dɛɛn na lugi tɩn mʋ yɩ Abɩatarɩ. O maa yɩ Ayimelɛkɩ bu mʋ, yɩ o ko-nakwɩ yɩ Asituba. O ma duri o vu o wǝli Davidi kɔgɔ kʋm wʋnɩ. 21 O ma lwǝni o brɩ-o Sooli na gʋ Baŋa-Wɛ kaanɩm tiinə bam te tɩn. 22 Davidi ma lǝr-o o wɩ: «Dɩntʋ dɛ dɩm a na maŋɩ a na Doɛgɩ na wʋra tɩn, a maanɩ nɩ oó vu o ta o brɩ Sooli o na nɛ kʋlʋ tɩn. Abam sɔŋɔ kʋm maama na tɩgɩ tɩn, kʋ yɩ amʋ yigə mʋ. 23 Kʋntʋ ŋwaanɩ, ta n wʋ amʋ tee nɩ. Yɩ ta n kwarɩ fʋʋnɩ. A ye nɩ Sooli beeri dɩbam bale mʋ sɩ o gʋ. Nmʋ nan na wʋ amʋ tee nɩ, cam bá yi‑m.»