Sooli na tɔgɩ Davidi nɛ te tɩn
21
Davidi dɛɛn ma vu Nobi. Wɛ kaanɩm tu maa wʋra, o yɩrɩ mʋ Ayimelɛkɩ. Davidi na tu o te tɩn, Ayimelɛkɩ ma nuŋi sɩ o jeer-o yɩ o yɩra saɩ. O ma bwe Davidi o wɩ: «Bɛɛ mʋ yɩ n ve n yɩranɩ yɩ nɔɔn-nɔɔnʋ ba tɔgɩ dɩ nmʋ?» 2 Davidi ma lǝr-o o wɩ: «Pɛ mʋ tʋŋɩ-nɩ. O nan wɩ a yɩ pa nɔɔn-nɔɔnʋ lwarɩ ni dɩlʋ o na pɛ-nɩ tɩn. Kʋ na yɩ a nɔɔna bam, a tagɩ dɩ ba sɩ ba taa cəgi-nɩ je sɩdoŋ nɩ mʋ. 3 N jɩgɩ wʋdiu n tee nɩ na? Lagɩ dɩpwa tɩnu naa woŋo kʋlʋ maama dwi n na jɩgɩ tɩn n pa-nɩ.»4 Kaanɩm tu wʋm ma lǝr-o o wɩ: «Dɩpɛ dɩlʋ yɩranɩ na wʋ amʋ tee nɩ tɩn yɩ kʋlʋ na yǝni kʋ tigi da Baŋa-Wɛ ŋwaanɩ tɩn mʋ. Nmʋ dɩ n nɔɔna bam nan na wʋ pəni dɩ kaana da yantʋ nɩ, á wʋ́ wanɩ á kwe-kʋ á di.» 5 Davidi maa wɩ: «Cɩga tɩn, dɩbam dɩ kaana wʋ yi daanɩ. Amʋ nɔɔna bam na maŋɩ ba yǝni ba beeri yɔɔ yɩranɩ mʋ dɩ, baá taa cʋ ba tɩtɩ dɩ kaana Wɛ ŋwaanɩ. Kʋntʋ laan na yɩ wo-cɛɔ tɩn, kʋ tiini kʋ kɩ dono mʋ!»
6 Kaanɩm tu Ayimelɛkɩ ma kwe dɩpɛ dɩlʋ ya na tigi da Wɛ ŋwaanɩ tɩn o pa Davidi. Dɩpɛ dɩm dɩntʋ nan yǝni dɩ wʋ Baŋa-Wɛ yigə nɩ mʋ. Ba maa yǝni ba joori ba kwe-dɩ yɩ ba daarɩ ba ləri ba tiŋi dɩpwa-lʋm da. Kʋntʋ tɩn, dɩpɛ dɩlʋ ba na joori ba kwe Baŋa-Wɛ yigə nɩ tɩn yɩranɩ mʋ wʋ kaanɩm tu wʋm tee nɩ.a 7 Sooli tɩntʋŋnʋ dɩdʋa dɛɛn maa wʋra, o yɩrɩ na yɩ Doɛgɩ. O maa yɩ Edɔm tu yɩ o kwǝri o yɩ Sooli nayɩra bam yigə tu. Dɛ dɩm kʋntʋ nɩ wʋntʋ dɛɛn wʋ Ayimelɛkɩ tee nɩ, o na maŋɩ sɩ o kwɛ o tɩtɩ Baŋa-Wɛ yigə nɩ tɩn ŋwaanɩ.b
8 Davidi ta ma bwe Ayimelɛkɩ o wɩ: «Nmʋ wʋ́ ta n jɩgɩ cicwe naa sʋ-lɔŋɔ n tee nɩ na? Pɛ wʋm tʋntʋŋa kam tiini ka lʋmma mʋ pa a wʋ nɛ pwələ sɩ a kwe a sʋ-lɔŋɔ kʋm. A maa ba jɩgɩ najara zɩlɩ dɩ zɩlɩ.» 9 Ayimelɛkɩ ma ləri o wɩ: «Sʋ-lɔŋɔ kʋdoŋ wʋra. Kʋ yɩ Filisi tu Goliatɩ wʋlʋ nmʋ dɛɛn na gʋ Ela bolo kʋm nɩ tɩn nyɩm mʋ. Kʋ nan kukuli dɩ gɔrɔ kʋ tigi a kaanɩm gwar-wʋgʋ kʋm kwaga nɩ. N na lagɩ-kʋ sɩ n kwe. Sʋ-lɔŋɔ kʋdoŋ daa tǝrǝ.» Davidi ma ləri o wɩ: «Sʋ-lɔŋɔ tǝrǝ kʋ na dwe-kʋ. Amʋ wʋ́ joŋi-kʋ.»
10 Dɛ dɩm kʋntʋ nɩ Davidi dɛɛn ma zaŋɩ o duri sɩ o lu Sooli yigə nɩ. O ma vu o yi Gatɩ tɩʋ pɛ Akisi te. 11 Pɛ Akisi dɩdɛɛra bam na nɛ Davidi tɩn, ba ma ta dɩ Abimelɛkɩ ba wɩ: «Nɔɔnʋ wʋntʋ yɩ Davidi mʋ, ba tɩʋ pɛ wʋm. Kʋ daɩ kʋntʋ na? O tɩʋ kʋm nɔɔna bam yǝni ba saɩ yɩ ba leeni ba tee-o mʋ ba wɩ:
‹Sooli gʋ o dʋna bam
mʋrʋ dɩ mʋrʋ.
Sɩ kʋ na yɩ Davidi,
wʋntʋ ma gʋ o dʋna bam
mʋrrʋ fugə dɩ fugə.› »
12 Davidi na ni kʋntʋ tɩn, o ma jeeli nɔɔna bam taanɩ dɩm maama, yɩ kʋ pa fʋʋnɩ tiini dɩ ja-o dɩ Gatɩ tɩʋ pɛ Abimelɛkɩ. 13 Kʋntʋ ŋwaanɩ, Davidi na yǝni o wʋ ba tee nɩ tɩn, o maa kɩ nɩnɛɛnɩ o yirisi mʋ. O dɛɛn kaagɩ o kɩ yuu-vuvugə kikiə mʋ, yɩ o jɩgɩ ba tɩʋ kʋm manchoŋo ni bwəəru o kwɛɛra yɔɔ yɔɔ yɩ o bəri tɩ yɩra nɩ. O ta maa yagɩ o twana yam pa o lileeru nuŋi tɩ bɔɔrɩ ya maama. 14 Pɛ Akisi ma ta dɩ o nɔɔna bam o wɩ: «Abam wʋ nɛ nɩ nɔɔnʋ wʋntʋ yɩ cicoo mʋ na? Bɛŋwaanɩ mʋ á nan jaan‑o á ba amʋ te? 15 Amʋ gɛ cicooru mʋ yɩ á ja-o á ba amʋ te na? A ba lagɩ sɩ wʋntʋ taa wʋ a sɔŋɔ nɩ o jɩgɩ-nɩ o daana!»c