Zonatan na wǝli Davidi te tɩn
20
Davidi dɛɛn ma zɩgɩ Rama tɩʋ Nayɔtɩ nɩ o duri sɩ o lu Sooli, yɩ o daarɩ o vu Zonatan te. O ma bwe Zonatan o wɩ: «Amʋ brɩ a kɩ bɛɛ mʋ a cɔgɩ yɩ n ko kwaanɩ sɩ o gʋ-nɩ? Bɛ lwarɩm mʋ a kɩ-o?» 2 Zonatan ma lǝr-o o wɩ: «Wɛ bá sɛ sɩ kʋ kɩ kʋntʋ. Nmʋ bá tɩ. Amʋ ko bá kɩ woŋo yɩ o wʋ tagɩ o pa a maanɩ kʋ ni nɩ. Kʋ na maŋɩ kʋ yɩ wo-balaŋa naa wo-kamunu, o yǝni o ba səgi-nɩ. Kʋ bá wanɩ kʋ kɩ kʋntʋ!»3 Davidi ma ta o du yɩ o wɩ: «Zonatan, kʋ sɩɩnɩ kʋ yɩ cɩga mʋ nɩ n ko beeri sɩ o gʋ-nɩ mʋ. O nan ye nɩ nmʋ yigə tiini ka wʋ amʋ wʋnɩ. Kʋntʋ ŋwaanɩ o wʋ pɛ n lwarɩ o wʋbʋŋa, o na ba lagɩ sɩ o cɔgɩ nmʋ wʋʋ tɩn ŋwaanɩ. Ŋwɩa Tu Baŋa-Wɛ na sɩɩnɩ DƖ wʋra tɩn, amʋ dugi Dɩntʋ yɩrɩ ŋwaanɩ, dɩ nmʋ tɩtɩ yɩrɩ ŋwaanɩ nɩ: amʋ tiini a bwələ dɩ tʋʋnɩ.» 4 Zonatan maa wɩ: «Nmʋ na lagɩ sɩ a kɩ kʋlʋ maama tɩn, a wʋ́ kɩ a pa‑m.»
5 Davidi ma ləri o wɩ: «Nmʋ ye nɩ jwa nɩ mʋ can-dʋŋa candiə kam di. Kʋ maa maŋɩ sɩ a taa tɔgɩ a wʋ balʋ na jǝni dɩdaanɩ pɛ ba di wʋdiu tɩn mʋ. Nan sɛ sɩ a vu pwələ a səgi da sɩ kʋ vu kʋ yi jwa yigə dɩdaan-ni nɩ. 6 Nmʋ ko na maanɩ nɩ a tǝrǝ yɩ o bwe a bwiə, sɩ n ta nɩ: ‹Davidi ya loori cwǝŋǝ mʋ a tee nɩ sɩ o kɩ lɩla o vu Betelɩhɛm o wǝli dɩ o digə tiinə sɩ ba tɔgɩ daanɩ ba kɩ kaanɩm, nɩnɛɛnɩ ba na yǝni ba kɩ bɩnɩ maama wʋnɩ o dwi kʋm maama ŋwaanɩ tɩn.› 7 Tɔ. Nmʋ na tagɩ kʋntʋ, yɩ n ko na wɩ: ‹Kʋ lamma›, ta n ye nɩ kʋlʋkʋlʋ bá yi-nɩ. Sɩ n taanɩ dɩm baŋa nɩ, o banɩ na zaŋɩ, lwarɩ sɩ o wʋbʋŋa jaanɩ sɩ o gʋ-nɩ mʋ. 8 A loori-m! Nan kɩ woŋo kʋntʋ n pa-nɩ, dɩbam na kɩ ni-mɔrɔ daanɩ Baŋa-Wɛ yigə nɩ tɩn ŋwaanɩ. Nmʋ nan daa n na maanɩ nɩ a sɩɩnɩ a kɩ lwarɩm mʋ, sɩ nmʋ tɩtɩ gʋ-nɩ. Yɩ ja-nɩ n vu n pa n ko.»
9 Zonatan ma ləri o wɩ: «Wɛ bá sɛ sɩ kʋ kɩ kʋntʋ. Amʋ ya na maanɩ nɩ a ko wʋbʋŋa jaanɩ sɩ o gʋ-m mʋ, a ya bá ta a brɩ-m na?» 10 Davidi ma bwe‑o o wɩ: «Kʋntʋ tɩn, n ko na ləri nmʋ dɩ ban-zɔŋɔ, wɔɔ mʋ wʋ́ pa a lwarɩ kʋ ni nɩ?» 11 Zonatan maa wɩ: «Pa dɩ́ nuŋi dɩ́ vu pwələ kam wʋnɩ.» Ba ma tɔgɩ daanɩ ba kɛ.
12 Ba na zɩgɩ da kʋntʋ tɩn, Zonatan ma ta dɩ Davidi o wɩ: «Yisɩrayɛlɩ tiinə Baŋa-Wɛ dɩm taa yɩ maana tu dɩbam bale laŋa nɩ sɩ: kʋ na kɩ da yale, amʋ wʋ́ bwe a ko a lwarɩ o wʋbʋŋa na yɩ te dɩ nmʋ tɩn. O wʋbʋŋa yam na lamma, a wʋ́ pa n maanɩ. 13 O wʋbʋŋa nan na jaanɩ sɩ o cɔgɩ‑m, a ta wʋ́ pa‑m kwǝrǝ, yɩ a daarɩ a yagɩ cwǝŋǝ a pa‑m sɩ n duri n lu. Baŋa-Wɛ nan wʋ́ pa kʋ tiini kʋ ni amʋ, nɩnɛɛnɩ a na wʋ kɩ kʋlʋ a na wɩ a wʋ́ kɩ tɩn. Amʋ ta loori Baŋa-Wɛ mʋ a pa‑m, sɩ DƖ taa wʋra dɩ nmʋ nɩnɛɛnɩ DƖ dɛɛn na wʋ amʋ ko tee nɩ te tɩn. 14 Amʋ dɩ loori‑m sɩ n yɩ swe a swiə. Amʋ ta na ŋwɩ: ta ta n jɩgɩ amʋ sono kʋm, nɩ Baŋa-Wɛ na jɩgɩ dɩbam sono te tɩn. Amʋ nan na tɩgɩ dɩ, 15 sɩ n ta ta n jɩgɩ amʋ biə bam sono sɩ kʋ taa ve wuu. Baŋa-Wɛ na tu DƖ ba DƖ cɔgɩ nmʋ dʋna bam maama pa ba yɩra saarɩ lʋgʋ baŋa nɩ, sɩ n yɩ yagɩ sono kʋm kʋntʋ dɩ a dwi dɩm.»a
16 Zonatan dɛɛn tɔgɩ kʋntʋ mʋ o ma o fɔgɩ o kɩ ni-mɔrɔ dɩdaanɩ Davidi dɩ o dwi dɩm. O ma ta o wɩ: «Baŋa-Wɛ nan wʋ́ mɔ Davidi jɩm o dʋna bam maama baŋa nɩ!» 17 Zonatan ta ma pa Davidi tɔgɩ o sono kʋm baŋa nɩ o du durə ba ni-mɔrɔ dɩm ŋwaanɩ. Bɛŋwaanɩ, o dɛɛn tiini o soe Davidi mʋ nɩnɛɛnɩ o na soe o tɩtɩ te tɩn.
18 Kʋ kwaga nɩ, Zonatan ma ta dɩ Davidi o wɩ: «Jwa dɛ dɩm mʋ yɩ can-dʋŋa candiə kam. Nɔɔna bam wʋ́ lwarɩ nɩ nmʋ tǝrǝ, nmʋ jǝŋǝ je sɩm na wʋ́ taa zɩgɩ kafɛ tɩn ŋwaanɩ. 19 Tɩga daa na wʋ́ pʋʋrɩ tɩn, sɩ n zaŋɩ n kɛ yigə yigə n vu mɛ n na səgi pulim kam nɩ tɩn, sɩ kʋ maŋɩ dɩdaanɩ Ezɛlɩ kandwɛ dɩm təŋə nɩ. Laan ta n cəgi-nɩ daanɩ. 20 Amʋ na tuǝ, a wʋ́ kwe a taŋa a kɩ nɩnɛɛnɩ a lagɩ a ta cɩna mʋ a jeeri kandwɛ dɩm kʋntʋ. Cɩna yatɔ mʋ a wʋ́ ma a ta. 21 A maa wʋ́ pa bu wʋlʋ na wʋ a tee nɩ tɩn vu o beeri cɩna yam. Amʋ na tagɩ dɩ bu wʋm a wɩ: ‹Nii mʋ! Cɩna yam wʋ n saŋa kantʋ nɩ mʋ ya twɛ yo seeni. Kwe-ya na ja n ba.› Sɩ n ta n ye nɩ kʋ yɩ yazurə mʋ. Kʋntʋ, nń wanɩ n nuŋi n na səgi mɛ tɩn n ba. Bɛŋwaanɩ, ŋwɩa Tu Baŋa-Wɛ yɩrɩ ŋwaanɩ kʋlʋkʋlʋ bá kɩ-m. 22 A nan daa na tagɩ dɩ bu wʋm a wɩ: ‹Cɩna yam wʋ nmʋ yigə nɩ mʋ ya kɛ ya gaalɩ‑m,› sɩ n lagɩ je n duri n viiri. Kʋntʋ yɩ sɩ n lwarɩ nɩ Baŋa-Wɛ mʋ pɛ‑m cwǝŋǝ sɩ n viiri. 23 Nan yɩ swe dɩbam bale ni-mɔrɔ dɩm swiə! Baŋa-Wɛ mʋ yɩ maana tu dɩbam laŋa nɩ maŋa maama, sɩ dɩ́ wanɩ dɩ́ kɩ dɩ́ su ni-mɔrɔ dɩm.»
24 Davidi dɛɛn ma vu o səgi pwələ kam nɩ. Can-dʋŋa candiə dɛ dɩm na yi tɩn, pɛ Sooli ma jǝni dɩ o dɩdɛɛra bam sɩ o di candiə kam wʋdiu. 25 O ma jǝni o na maŋɩ o yǝni o je mɛ tɩn yɩ o salɩ kəbrə. Zonatan ma jǝni o jeer-o. Abenɩra dɩ ma jǝni Sooli tikəri nɩ. Yɩ kʋ daarɩ Davidi jǝŋǝ je sɩm mʋ tigi kafɛ. 26 Sooli ma na, yɩ o wʋ tagɩ kʋlʋkʋlʋ dɛ dɩm kʋntʋ nɩ. Bɛŋwaanɩ o ya bʋŋɩ nɩ: «Dɛdoŋ woŋo mʋ cɩgɩ Davidi yigə pa o wʋ tu. Tɩntʋ o lagɩ o kwɛ o tɩtɩ sɩ kʋ maŋɩ dɩ cullu tɩm mʋ, sɩ o laan ba o di candiə kam.» 27 Tɩga daa na pʋʋrɩ can-dʋŋa da yale dɛ dɩm nɩ tɩn, Sooli ma maanɩ nɩ Davidi daa ta tǝrǝ. O ma ga ga o bwe o bu Zonatan o wɩ: «Bɛɛ mʋ kɩ yɩ Zese bu wʋm wʋ tu sɩ o di candiə kam wʋdiu diin dɩdaanɩ zɩm maama?»
28 Zonatan ma lǝr-o o wɩ: «Davidi sɩɩnɩ o loori cwǝŋǝ mʋ amʋ tee nɩ sɩ o liisi fɩɩn o vu Betelɩhɛm. 29 O tagɩ dɩ amʋ nɩ: ‹A loori-m! Dɩbam digə kam mʋ jɩgɩ kaanɩm sɩ dɩ́ kɩ dɩ́ ma di candiə dɩ́ tɩʋ kʋm nɩ. Amʋ zɩmbaarʋ ma tʋŋɩ o bǝŋi-nɩ. Nan sɛ dɩ́ ciloŋo kʋm ŋwaanɩ, sɩ n pa a vu sɩ a joori.› Kʋntʋ ŋwaanɩ nan mʋ pɛ Davidi zɩm tǝri yo seeni sɩ o di wʋdiu nmʋ tee nɩ.»
30 Sooli na ni Zonatan na tagɩ kʋlʋ tɩn, o banɩ ma zaŋɩ o baŋa nɩ yɩ o wɩ: «Nmʋ daɩ amʋ bu cɩga cɩga! N jɩgɩ yi-dɛɛrɩ nɩ n nu mʋ te! A maanɩ nɩ n lɔgɩ amʋ kwaga nɩ, yɩ n daarɩ n tɔgɩ Zese bu Davidi kwaga mʋ. Nmʋ na kɩ te tɩn yɩ n tɩtɩ dɩ n nu wʋm cavɩɩra mʋ. 31 Ta n ye nɩ Zese bu wʋm ta na ŋwɩ: nmʋ bá wanɩ n di ywəəni. N bá na cwǝŋǝ sɩ n di paarɩ dɩm. Kɩ lɩla n tʋŋɩ nɔɔna sɩ ba ja-o ba ba yo seeni, sɩ o maŋɩ sɩ o tɩ mʋ!» 32 Zonatan ma ləri o ko o bwe o wɩ: «Bɛŋwaanɩ mʋ o maŋɩ sɩ o tɩ? O kɩ kɔɔ mʋ o ja o cɔgɩ?» 33 Kʋntʋ baŋa nɩ mʋ Sooli kwe o cicwe o dʋlɩ Zonatan sɩ o kwaanɩ o gʋ. Zonatan laan ma maanɩ nɩ Sooli sɩɩnɩ yiǝ mʋ sɩ o gʋ Davidi. 34 Zonatan ma pɛ o zaŋɩ wʋdiu kʋm baŋa nɩ dɩ ban-zɔŋɔ, yɩ o daa wʋ di kʋlʋkʋlʋ can-dʋŋa da yale dɛ dɩm nɩ. O wʋ dɛɛn ma tiini kʋ cɔgɩ dɩ o ko na jɩgɩ kʋlʋ o tʋŋɩ Davidi yɩra nɩ tɩn.
35 Tɩga na pʋʋrɩ tɩn, Zonatan ma zaŋɩ o da dɩdaanɩ bu o vu pwələ kalʋ Davidi na səgi tɩn, nɩ ba na maŋɩ ba banɩ ba tiŋi te tɩn. 36 O ma ta dɩ bu wʋm o wɩ: «Duri n vu n twɛ cɩna yalʋ a na wʋ́ ta tɩntʋ tɩn n ja n ba n pa-nɩ.» Bu wʋm na puli sɩ o duri tɩn, mʋ Zonatan vaŋɩ taŋa o ta cɩnɩ o pa dɩ gaal‑o dɩ kɛ yigə nɩ. 37 Bu wʋm na yi cɩnɩ dɩm na tʋ je sɩlʋ nɩ tɩn, Zonatan ma tɔɔlɩ o ta dɩd-o wɩ: «Ta n veǝ! Cɩnɩ dɩm kɛ dɩ wʋ n yigə nɩ mʋ.» 38 O ta ma tɔɔlɩ o wɩ: «Kɩ lɩla! Yɩ ta n zɩga! Ta n veǝ!» Bu wʋm ma twɛ cɩnɩ dɩm yɩ o joori o pa o tu wʋm. 39 Bu wʋm nan wʋ lwarɩ kǝm dɩm kʋntʋ kuri. Zonatan dɩdaanɩ Davidi yɩranɩ mʋ ye kʋlʋ na wʋra tɩn. 40 Zonatan laan ma kwe taŋa kam dɩ ka cɩna yam o pa bu wʋm. O ma ta sɩ o ja-ya o joori tɩʋ kʋm wʋnɩ.
41 Bu wʋm na kɛ o daarɩ tɩn, Davidi ma zaŋɩ kandwa yalʋ kwaga nɩ o ya na səgi tɩn, o nuŋi o vu o yi Zonatan te yɩ o daarɩ o vin o yibiyə tɩga nɩ kuni bɩtɔ. O dɩ Zonatan ma kukwəri daanɩ yɩ ba keerǝ. Davidi nan mʋ tiini o keeri o dwǝni Zonatan. 42 Zonatan laan ma ta dɩ Davidi o wɩ: «Wɛ taa wʋ n tee nɩ! Za n yɩ swe nɩ dɩ́ kɩ ni-mɔrɔ mʋ daanɩ Baŋa-Wɛ yɩrɩ ŋwaanɩ nɩ: Baŋa-Wɛ yɩ maana tu dɩbam bale laŋa nɩ, dɩdaanɩ dɩ́ dwiə yam laŋa nɩ sɩ kʋ taa ve wuu.» Ba na ŋɔɔnɩ ba ti tɩn, Davidi ma zaŋɩ o kɛ. Zonatan dɩ ma joori o vu tɩʋ kʋm wʋ.