Sooli na culi Davidi te tɩn
19
Sooli dɛɛn zaŋɩ dɛ dɩdwɩ mʋ o ta Zonatan dɩdaanɩ o nakwa bam maama nɩ: ba kwaanɩ ba gʋ Davidi. Zonatan yigə dɛɛn nan maa tiini ka wʋ Davidi wʋnɩ. 2 O ma vu o ta dɩ Davidi o wɩ: «Amʋ ko bʋŋɩ sɩ o gʋ-m mʋ. Kʋntʋ tɩn, ta n jɩgɩ n tɩtɩ. Jwa zɩzɩŋa nɩ, sɩ n vu n səgi pwələ nɩ n ta n wʋra. 3 Amʋ wʋ́ da dɩ a ko sɩ dɩ́ ba nmʋ na səgi mɛ tɩn dɩ́ taa zɩga. A laan wʋ́ taa tɛ nmʋ taanɩ dɩd-o, sɩ a nii o na wʋ́ ləri kʋlʋ tɩn sɩ a laan ba a ta a brɩ-m.»4 Tɩga na pʋʋrɩ tɩn, Zonatan ma tee Davidi o ko Sooli yigə nɩ. O ma ta dɩ Sooli o wɩ: «A loori-m! Yɩ zaŋɩ n kɩ Davidi n ja n cɔgɩ, sɩ o wʋ kɩ-m lwarɩm. Cɩga tɩn, kʋlʋ maama o na kɩ tɩn yɩ sɩ kʋ zǝni nmʋ mʋ. 5 Yɩ swe nɩ o dɛɛn na ve sɩ o gʋ Goliatɩ tɩn, kʋ yɩ o tɩtɩ ŋwɩa mʋ o dʋlɩ o yagɩ. Baŋa-Wɛ ma da wʋntʋ baŋa nɩ DƖ di wɔnɔ DƖ pa Yisɩrayɛlɩ tiinə bam maama. Nmʋ na nɛ kʋntʋ tɩn, n wʋʋ poli mʋ. Bɛ nan daa mʋ kɩa yɩ nmʋ lagɩ sɩ n ja nɔɔnʋ wʋlʋ na wʋ kɩ kʋlʋkʋlʋ tɩn n cɔgɩ? Nmʋ na gʋ Davidi, kʋ bá taa jɩgɩ kuri.»
6 Zonatan taanɩ dɩm tiini dɩ dwe Sooli bɩcarɩ. O ma du durə o wɩ: «Amʋ tɛ cɩga dɩ ŋwɩa Tu Baŋa-Wɛ yɩrɩ nɩ: Davidi daa bá tɩ.» 7 Zonatan laan ma bəŋi Davidi yɩ o ta kʋlʋ maama na kɩ o dɩ o ko laŋa nɩ tɩn, o brɩ-o. O dɛɛn ta jaan‑o mʋ o vu Sooli te, pa o tʋŋɩ o pa Sooli nɩnɛɛnɩ pulim kam nɩ o ya na maŋɩ o tʋŋɩ o pa‑o te tɩn.
8 Kʋ kwaga nɩ, najara daa joori ya cu Yisɩrayɛlɩ tiinə dɩ Filisi tiinə tɩtarɩ nɩ. Davidi dɛɛn ma di-ba yɩ o fɩn-ba pa ba duri o yigə nɩ.
9 Dɛ dɩdwɩ mʋ Sooli wʋ o sɔŋɔ nɩ, yɩ o ze cicwe o jɩŋa nɩ. Davidi maa wʋ o tee nɩ o jɩgɩ kɔnɔ o taɩ. Baŋa-Wɛ ma pa jor-lɔŋɔ ba kʋ joŋi Sooli. 10 O ma kwaanɩ sɩ o dʋlɩ Davidi dɩ o cicwe dɩm o tanɩ kəbrə yɩra nɩ. Davidi ma lʋʋrɩ pa cicwe dɩm mʋʋrɩ dɩ maŋɩ kəbrə kam yɩra nɩ. Tɩtɩɩ dɩm kʋntʋ nɩ Davidi ma duri o lu.
11 Sooli ma tʋŋɩ nɔɔna sɩ ba vu ba gilimi Davidi sɔŋɔ ba yɩrɩ-kʋ tɩtɩɩ dɩm kʋntʋ, sɩ tɩga na pʋʋrɩ, sɩ ba gʋ-o. Davidi kaanɩ Mikalɩ ma kaan‑o o wɩ: «Nmʋ na wʋ kɩ lɩla n lagɩ je n vu, jwa nɩ n lagɩ n tɩ mʋ.» 12 O ma ja Davidi o pa o tɔgɩ takoro nɩ o cu, yɩ o duri o lu. 13 Mikalɩ ma daarɩ o kwe jwəm o tiŋi Davidi sara nɩ. O ma kwe bʋŋʋ kʋrʋ o kwɛ kwɛ o kɩ yuu kʋm seeni, yɩ o laan kwe gar-jalɩ o ma kwǝli kʋ maama. 14 Sooli tɩntʋŋna bam na zʋ sɔŋɔ kʋm sɩ ba ja Davidi tɩn, Mikalɩ ma ta dɩ ba o wɩ: Davidi ba jɩgɩ yazurə mʋ. 15 Dɩ kʋntʋ maama dɩ, Sooli tʋŋɩ-ba mʋ sɩ ba joori ba vu ba na Davidi yɩra. O maa wɩ: «Ja-o-na á ba yo seeni dɩ o sara kam maama, sɩ a gʋ-o.»
16 Nɔɔna bam na joori ba vu ba na tɩn, ba maanɩ nɩ jwəm yɩranɩ mʋ tigi sara kam nɩ, yɩ bʋŋʋ kʋrʋ mʋ wʋ jwəm dɩm yuu seeni. 17 Sooli na lwarɩ kʋlʋ na kɩ tɩn mʋ o bwe Mikalɩ o wɩ: «Bɛɛ mʋ kɩ yɩ n ganɩ-nɩ, yɩ n pa a dʋnʋ wʋm cwǝŋǝ sɩ o duri o lu?» Mikalɩ ma lǝr-o o wɩ: «Davidi tagɩ o wɩ: a na wʋ yagɩ cwǝŋǝ a pa‑o sɩ o lu, oó gʋ-nɩ mʋ.»
18 Davidi dɛɛn na duri o lu kʋntʋ tɩn, o ma vu Samowɛlɩ te Rama nɩ. O ma tʋlɩ kʋlʋ maama Sooli na kɩ-o tɩn o brɩ Samowɛlɩ. Ba laan ma da daanɩ ba vu Nayɔtɩ ba zʋʋrɩ da. 19 Nɔɔna ma vu ba ta dɩ Sooli ba wɩ: «Davidi wʋ Rama tɩʋ kʋdoŋ nɩ mʋ, kʋ yɩrɩ yɩ Nayɔtɩ.» 20 Sooli na ni kʋntʋ tɩn, o ma tʋŋɩ nɔɔna sɩ ba vu ba ja Davidi. Ba na yi da tɩn, ba ma na Wɛ nijoŋnə sɩdonnǝ na zɩgɩ ba pwərisə, yɩ Samowɛlɩ wʋ ba yigə nɩ. Baŋa-Wɛ Joro ma cu Sooli nɔɔna bam maama baŋa nɩ. Ba dɩ ma da ba tʋ pwərisim nɩ. 21 Ba ma ta ba brɩ Sooli kʋlʋ na kɩ tɩn. O daa ma tʋŋɩ nɔɔna badonnǝ. Ba na yi da tɩn, ba dɩ puli sɩ ba taa pwərisə mʋ. O daa ta ma tʋŋɩ nɔɔna o kɩ kuni bɩtɔ, yɩ ba dɩ tʋ pwərisim nɩ.
22 Sooli tɩtɩ laan ma zaŋɩ o kwe Rama cwǝŋǝ, sɩ o da ba kwaga. O na ve o yi vʋlɩ-kamunu kʋm na wʋ Seku nɩ tɩn, mʋ o bwe nɔɔna o wɩ: «Samowɛlɩ dɩdaanɩ Davidi wʋ yən nɩ mʋ?» Ba ma lǝr-o ba wɩ: «Ba wʋ Rama tɩʋ Nayɔtɩ nɩ mʋ.»
23 Sooli ta na wʋ cwǝŋǝ nɩ o maa ve Nayɔtɩ tɩn, Wɛ Joro ma cu o dɩ baŋa nɩ. O maa pwərisi o veǝ kʋntʋ taa o vu o yi Nayɔtɩ. 24 O na yi Samowɛlɩ te tɩn, mʋ o lɩ o gwaarʋ, yɩ o ta wʋra o pwərisə dɛ dɩm maama wʋnɩ. O ma tigi da tɩtɩɩ dɩm kʋntʋ maama nɩ, sɩ tɩga ba ka pʋʋrɩ. Kʋ dɛɛn kɩ kʋntʋ mʋ yɩ ba seeri sinsərə kam ba wɩ: «Sooli dɩ tɔgɩ o wʋ sampwəri sɩm wʋnɩ mʋ na?»