Davidi dɩ Zonatan ciloŋo kʋm
18
Sooli dɩdaanɩ Davidi ma ti ba lara yam. Sooli bu Zonatan bɩcarɩ dɩdaanɩ Davidi bɩcarɩ dɛɛn ma ba ya məəli daanɩ. Zonatan maa jɩgɩ Davidi sono nɩ o na soe o tɩtɩ te tɩn. 2 Kʋ dɛɛn zɩgɩ dɛ dɩm kʋntʋ nɩ, Sooli lɛɛrɩ o cəŋi Davidi mʋ pa o tʋŋɩ o pa‑o. Davidi daa wʋ joori o ko wʋm sɔŋɔ. 3 Zonatan na soe Davidi nɩ o na soe o tɩtɩ te tɩn ŋwaanɩ, o pɛ ba goni ni mʋ daanɩ. 4 Zonatan ma lɩ o gwar-bwərə kam, yɩ o kwe-ka o pa Davidi. O ta ma lɩ o najara gwaarʋ tɩm o kwe o pa‑o, kʋ wǝli dɩ o sʋ-lɔŋɔ kʋm, dɩ o taŋa kam, dɩdaanɩ o kilǝ kam dɩ.5 Sooli dɛɛn na tʋŋɩ Davidi je sɩlʋ maama nɩ, kʋ yǝni kʋ ve yigə lanyɩranɩ mʋ. Kʋntʋ ŋwaanɩ Sooli ma pa‑o dam o jar-kərə bam tɩtarɩ nɩ. Sooli kǝm dɩm kʋntʋ ma poli nɔɔna bam maama wʋʋ, yɩ kʋ ta poli o nakwa bam dɩ wʋʋ.
6 Davidi dɛɛn na gʋ Filisi tu wʋm yɩ jar-kərə bam maa joori sɔŋɔ tɩn, mʋ kaana nuŋi Yisɩrayɛlɩ tɩɩnɩ dɩm maama wʋnɩ ba ba sɩ ba jeeri Pɛ Sooli. Ba maa leeni dɩ wʋpolo, ya ba saɩ. Ba maa jɩgɩ sɩnyɛ ba maga yɩ ba taɩ kwaanʋ.a 7 Ba ma di ywəəni yɩ ba leeni ba pa daanɩ ba wɩ:
«Sooli gʋ o dʋna bam
mʋrʋ dɩ mʋrʋ mʋ.
Sɩ kʋ na yɩ Davidi,
wʋntʋ ma gʋ o dʋna bam
mʋrrʋ fugə dɩ fugə.»
8 Sooli na ni ba ləŋə kam tɩn, o wʋʋ dɛɛn wʋ dɛ ka taanɩ dɩm. O banɩ ma zaŋɩ. O ma jeeli o wʋnɩ o wɩ: «Ta n nii te! Ba pɛ Davidi gʋ nɔɔna mʋrrʋ fugə fugə mʋ, yɩ Kʋ daarɩ amʋ, a gʋ mʋrʋ mʋrʋ yɩranɩ mʋ. Kʋ laan nan daarɩ paarɩ dɩm mʋ sɩ ba joŋi ba pa wʋntʋ.» 9 Kʋ na zɩgɩ dɛ dɩm kʋntʋ nɩ kʋ maa ve tɩn, Sooli dɛɛn daa ba jɩgɩ Davidi cɩga. O wʋʋ ta ma zaŋɩ dɩ Davidi kǝm maama.
10 Tɩga dɛɛn na pʋʋrɩ tɩn, Wɛ ma pa jor-lɔŋɔ ba kʋ joŋi Sooli dɩ dam. O maa wʋ o tɩtɩ digə kam nɩ o kaagɩ o yirisə. Davidi maa jɩgɩ o kɔnɔ kʋm o taɩ nɩ o na yǝni o kɩ te tɩn. Sooli dɩ maa ze cicwe o jɩŋa nɩ. 11 O ma bʋŋɩ o ja nɩ: «A lagɩ a dʋl-o mʋ a tanɩ dɩ kəbrə kam.» O ma dʋl-o kuni bɩle, yɩ Davidi dɩ lʋʋrɩ kuni bɩle wʋm maama.
12 Sooli dɛɛn ma kwarɩ Davidi, bɛŋwaanɩ Baŋa-Wɛ wʋ Davidi tee nɩ mʋ yɩ DƖ lɔ wʋntʋ kwaga nɩ. 13 Sooli ma lɩ jar-kərə mʋrʋ o kɩ Davidi kwaga nɩ yɩ o pa o nuŋi da o tee nɩ. Davidi dɩ maa yǝni o tʋ o nɔɔna bam yigə nɩ yɩ ba vu jara-kǝm nɩ. 14 O na kɩ woŋo kʋlʋ maama, kʋ ve yigə mʋ lanyɩranɩ, Baŋa-Wɛ na wʋ o tee nɩ tɩn ŋwaanɩ. 15 Sooli ma maanɩ nɩ Davidi yɔɔrɩ o di wɔnɔ o dʋna maama baŋa nɩ. Kʋ ma pa o tiini o kwarɩ Davidi zanzan. 16 Sɩ kʋ na yɩ Yisɩrayɛlɩ tiinə bam dɩdaanɩ Zuda tiinə bam, bantʋ maama soe Davidi mʋ, o na tɔgɩ ba yigə pa ba di ba dʋna tɩn ŋwaanɩ.
Davidi di Sooli bukɔ o ma kɩ o kaanɩ
17 Dɛ dɩdwɩ mʋ Sooli tagɩ dɩ Davidi o wɩ: «Nii a bukɔ-nakwɩn kam Merabɩ. Nmʋ na jaŋɩ Baŋa-Wɛ najara yam dɩdaanɩ baarɩ, yɩ n jɩgɩ cɩga n pa-nɩ, amʋ dɩ wʋ́ pa‑m Merabɩ, sɩ n ma n kɩ n kaanɩ.» Sooli dɛɛn tagɩ kʋntʋ yɩ o bʋŋɩ o tɩtɩ nɩ o wɩ: «Amʋ bá ma a tɩtɩ jɩŋa a ma a gʋ Davidi. A nan wʋ́ pa Filisi tiinə bam cwǝŋǝ sɩ ba gʋ-o.»
18 Davidi ma ləri Sooli o wɩ: «Amʋ yɩ wɔɔ mʋ yɩ a ko dwi dɩm dɩ yɩ bɛɛ mʋ Yisɩrayɛlɩ dwiə yam wʋnɩ sɩ a wanɩ a ji pɛ bukɔ barʋ?» 19 Maŋa kam ma ba ka yi sɩ ba kwe Sooli bukɔ Merabɩ ba pa Davidi. Ba ma joori ba kwe‑o ba pa Mehola tu wʋdoŋ, o yɩrɩ na yɩ Adriyɛlɩ.
20 Sooli dɛɛn ta jɩgɩ bukɔ wʋdoŋ, o yɩrɩ na yɩ Mikalɩ. O maa lagɩ Davidi ni-taanɩ. Sooli na lwarɩ kʋ ni nɩ tɩn, o wʋʋ ma poli. 21 Sooli daa ma bʋŋɩ o tɩtɩ yɩra nɩ o wɩ: «A na kwe Mikalɩ a pa Davidi sɩ o ma o kɩ o kaanɩ, a wʋ́ wanɩ a tɔgɩ o ŋwaanɩ a ganɩ Davidi, sɩ Filisi tiinə bam na cwǝŋǝ sɩ ba gʋ-o.» O ma ta dɩ Davidi o wɩ: «Pwələ ta wʋra sɩ n di amʋ bukɔ wʋdoŋ.»
22 Sooli ma pa o nakwa bam ni sɩ ba sʋgɩ Davidi wʋbʋŋa yɩ ba wɩ: «N kikiə yam su Pɛ wʋm yi mʋ. O nakwa bam wʋbʋŋa dɩ dɛ‑m. Kʋntʋ tɩn, sɛ sɩ n di o bukɔ Mikalɩ n ma n kɩ n kaanɩ.» 23 Ba ma sɩɩnɩ ba ta bɩtarɩ sɩm kʋntʋ ba brɩ Davidi, yɩ o ləri o wɩ: «Abam na wʋ lwarɩ! Á bʋŋɩ nɩ kʋ yɩ mwalɩ mʋ sɩ nɔɔnʋ wanɩ o ji pɛ bukɔ barʋ na? Amʋ daɩ kʋlʋkʋlʋ yigə da, yɩ a ta yɩ yinigə tu.»
24 Sooli nakwa bam ma lwǝni kʋlʋ maama Davidi na tagɩ tɩn ba brɩ-o. 25 Sooli ma joori o ta dɩ ba o wɩ: «Ta-na á brɩ Davidi nɩ: ‹Filisi tiinə bam na yaarɩ pɛ zanzan tɩn, o ma lagɩ sɩ o ŋwɩ jɩnɩ ba baŋa nɩ. Kʋntʋ, pɛɛrɩ dɩlʋ yɩranɩ pɛ na lagɩ sɩ n pa‑o o bukɔ wʋm ŋwaanɩ tɩn mʋ yɩ Filisi tiinə bi fwǝli-twaanʋ.› » Sooli dɛɛn tagɩ kʋntʋ yɩ o bʋŋɩ sɩ o ja Filisi tiinə bam jɩn mʋ o ma o gʋ Davidi.
26 Pɛ nakwa bam ma joori ba ja pɛ kwǝrǝ kam ba vu Davidi te. Davidi na ni tɩn, o wʋʋ ma poli dɩ taanɩ dɩm, o na wʋ́ ji pɛ wʋm bukɔ barʋ tɩn ŋwaanɩ. Kadri dɛ dɩm na lagɩ dɩ yi tɩn, 27 dɩdaanɩ Davidi loori o zaŋɩ dɩ o nɔɔna bam yɩ ba vu ba gʋ Filisi tiinə biə-yale. O ma ja Filisi tiinə fwǝli-twaanʋ tɩm o ba o jeeli tɩ ni nɩ o brɩ Sooli, sɩ o wanɩ o ji Pɛ tɩmbaarʋ. Sooli ma ga ga o kwe o bukɔ Mikalɩ o pa Davidi sɩ o ma o kɩ o kaanɩ.
28 Sooli ma lwarɩ jaja nɩ Baŋa-Wɛ mʋ wʋ Davidi tee nɩ. O ta ma maanɩ nɩ o bukɔ Mikalɩ sɩɩnɩ o soe Davidi. 29 Kʋ laan ma fɔgɩ kʋ pa o tiini o kwar-o. Sooli ma lɛɛrɩ o dʋnɩ Davidi taan, sɩ kʋ yi o tʋʋnɩ.
30 Filisi jar-kərə bam dɛɛn yǝni ba tui ba kɩ najara mʋ dɩ Yisɩrayɛlɩ tiinə bam ba ba yaga. Sooli jar-kərə yigǝ tiinǝ bam maama wʋnɩ Davidi mʋ di Filisi tiinə bam sɩ kʋ dwǝni ba maama. Kʋ ma pa Davidi yɩrɩ jagɩ je maama nɩ.