Goliatɩ dwəni dɩ Yisɩrayɛlɩ jar-kərə bam
17
Filisi tiinə bam dɛɛn ma la ba jar-kərə bam ba kɩ daanɩ. Ba ma vu Zuda tɩʋ kʋlʋ yɩrɩ na yɩ Soko tɩn sɩ ba zaŋɩ najara da. Ba dɛɛn cwi ba vwə Efɛsɩ-Damimi nɩ mʋ. Je sɩm kʋntʋ wʋ Soko dɩdaanɩ Azeka tɩtarɩ laŋa nɩ mʋ. 2 Sooli dɩdaanɩ Yisɩrayɛlɩ jar-kərə kɔgɔ kʋm dɩ dɛɛn ma vu ba cwi ba vwə Ela bolo kʋm nɩ ba tigi da. Ba maa wʋra ba ti ba yigə sɩ ba jeeri Filisi tiinə bam dɩ najara. 3 Filisi tiinə bam dɛɛn kikili daanɩ mʋ, ba zɩgɩ zoŋo dɩdʋa yuu nɩ. Yisɩrayɛlɩ tiinə bam dɩ maa zɩgɩ zoŋo kʋdoŋ yuu nɩ, yɩ bolo laan tigi ba maama tɩtarɩ nɩ kʋ pɔɔrɩ-ba daanɩ.4 Filisi tiinə bam dɛɛn nan ya jɩgɩ ba babɩa kadoŋ na nuŋi Gatɩ tɩn. O yɩrɩ mʋ yɩ Goliatɩ. O ma nuŋi ba tigisim jǝgǝ kam sɩ o dwəni dɩ Yisɩrayɛlɩ tiinə bam. O dɩdwarɩm dɛɛn yɩ mɛtra yatɔ dɩ cicoro mʋ. 5 Canna yicəgə mʋ o dɛɛn yǝni o ma o pu o yuu. Canna dɩ mʋ ba dɛɛn mɛ ba sɔ o jara-kǝm gɔrɔ, yɩ kʋ duuni dɩ dɛɛn tiini dɩ gaalɩ nɩnɛɛnɩ kilo fusɩrdʋ (60) te. 6 Canna kam mʋ o mɛ o kwǝli o nacɩrɩ sɩm seeni. O ta jɩgɩ canna sʋ-lɔŋɔ mʋ o na pəli o kwaga nɩ. 7 Cicwe dɩlʋ o dɛɛn na ze o jɩŋa nɩ tɩn tiini dɩ dunǝ dɩ dwe garyi sɔɔna da-kolo na maɩ te tɩn. Dɩ yuu dɩdaanɩ dɩ ni-cɩcwaga kam tɩtɩ duuni dɩm yɩ nɩnɛɛnɩ kilo tɩrpɛ (7). Nɔn-dʋŋʋ maa tɔgɩ o yigə o ze o jara-kǝm cɩ-kwaŋa kam o veǝ.
8 Goliatɩ ma zaŋɩ o zɩgɩ o bagɩ Yisɩrayɛlɩ tiinə jar-kərə bam o wɩ: «Bɛŋwaanɩ mʋ á maama wʋra á kikili sɩ á kɩ najara? Amʋ yɩ Filisi tiinə bam babɩa mʋ. Abam dɩ yɩ Sooli jar-kərə mʋ naa á daɩ? Lɩ-na á wʋnɩ nɔɔnʋ dɩdʋa, sɩ kʋ tu jeeri amʋ dɩ najara. 9 Nɔɔnʋ wʋm kʋntʋ na wanɩ amʋ o gʋ, dɩbam Filisi tiinə maama wʋ́ ji abam gambɛ. Amʋ dɩ daa na wanɩ kʋ tu a gʋ, abam dɩ mʋ wʋ́ taa yɩ dɩbam gambɛ yɩ á tʋŋɩ á paɩ dɩbam. 10 Amʋ nii Yisɩrayɛlɩ jar-kərə bam mʋ a gooni. Lɩ-na nɔɔnʋ á pa-nɩ sɩ dɩ́ jeeri daanɩ dɩ najara.» 11 Sooli dɩdaanɩ o nɔɔna bam na ni Filisi tu wʋm taanɩ dɩm tɩn, ba bɩcarɩ ma di yɩ fʋʋnɩ tiini dɩ zʋ-ba.
Davidi ve najara je sɩm
12 Davidi ko dɛɛn maa yɩ Efrata tu Zese. Zese dɛɛn nuŋi Zuda tɩʋ Betelɩhɛm nɩ mʋ. O maa jɩgɩ bəkəri nana. Sooli paarɩ dɩm maŋa kam nɩ tɩn dɩ Zese kwɩn zanzan mʋ. 13 Zese bu-kwɩn sɩtɔ sɩm dɛɛn ya tɔgɩ ba vu sɩ ba wǝli Sooli mʋ jara-kǝm baŋa nɩ. Eliabɩ mʋ yɩ ba maama nakwɩ: Abinadabɩ ma saŋɩ, yɩ Shama yɩ batɔ tu wʋm. 14 Davidi dɛɛn nan mʋ yɩ ba maama nyaanɩ. O zɩmbaara batɔ na ve ba wʋra ba wǝli Sooli tɩn, 15 mʋ Davidi yǝni o ve sɔŋɔ Betelɩhɛm nɩ yɩ o joorə, sɩ o taa nii o ko peeni sɩm baŋa nɩ.
16 Goliatɩ lɛɛrɩ o dʋlɩ kandwənə kʋntʋ mʋ taan Yisɩrayɛlɩ tiinə bam yigə nɩ da fiinna, zɩzɩŋa nɩ dɩ dɩdaan-ni nɩ maama.
17 Yantʋ da yam nɩ, mʋ Zese tagɩ dɩ o bu Davidi o wɩ: «Kwe mɩn-wɔa yolo kʋntʋ na maŋɩ dɩ kʋrɩwaa bu dɩdʋa tɩn, dɩ dɩpwa fugə kantʋ, sɩ n kɩ lɩla n ja n vu n pa n cʋrrʋ tɩm na wʋ najara kaporo nɩ tɩn. 18 Nan ta kwe nayɩl-nugə kukollu tɩntʋ fugə n wǝli da n vu n pa ba jar-kərə yigə tu wʋm. Nmʋ laan ma n wʋ́ lwarɩ kʋ na yɩ te n cʋrrʋ tɩm yɩra nɩ, sɩ n daarɩ n ja taanɩ n nuŋi ba tee nɩ n ba sɩ kʋ pa a kɔ joro. 19 Nmʋ cʋrrʋ tɩm dɩdaanɩ Yisɩrayɛlɩ jar-kərə bam maama nan wʋ Ela bolo kʋm nɩ mʋ. Ba wʋra ba wǝli Sooli mʋ sɩ ba kɩ najara dɩdaanɩ Filisi tiinə bam.»
20 Davidi ma goni tɩga o zaŋɩ tɩ-pʋra ni nɩ. O ma lagɩ nɔɔnʋ wʋdoŋ o kwe peeni sɩm o kɩ o jɩŋa nɩ. O ta ma vɔ o zɩla yam o kɩ daanɩ. O ma kwe cwǝŋǝ o maa kɛa, nɩnɛɛnɩ o ko Zese na maŋɩ te o brɩ-o tɩn. O na dɛ dɛ o yi najara je sɩm tɩn, dɩdaanɩ jar-kərə bam dɩ nuŋi mʋ ba maa ve sɩ ba toŋi ba zɩgɩ najara ŋwaanɩ. Ba dɛɛn maa magɩ tiguri-kaasa. 21 Yisɩrayɛlɩ jar-kərə bam dɩdaanɩ Filisi jar-kərə bam ma tigisi tigisi, yɩ ba yibiyə laan jeeri daanɩ. 22 Davidi ma yagɩ o wʋdiiru tɩm o pa wʋlʋ na nii jar-kərə bam zɩla yam baŋa nɩ tɩn. O laan ma duri o vu o yi najara yam yigə kam nɩ, yɩ o bwe o cʋrrʋ tɩm kwaga. 23 Davidi dɛɛn ta zɩgɩ o ŋɔɔnɩ dɩ o cʋrrʋ tɩm mʋ, yɩ Goliatɩ na yɩ Filisi tiinə bam babɩa tɩn ba o nuŋi. Wʋntʋ dɛɛn nuŋi Gatɩ nɩ mʋ. O ma fʋfɔ o nuŋi dáa nɩ, yɩ o toŋi o fɔgɩ o zɩgɩ. O daa ma sɩŋɩ o tʋrʋ tɩm. Davidi ma ni o na twɩ Yisɩrayɛlɩ tiinə bam te tɩn. 24 Yisɩrayɛlɩ tiinə bam na nɛ Goliatɩ kʋntʋ tɩn, ba duri mʋ o yigə nɩ, fʋʋnɩ na tiini dɩ ja-ba tɩn ŋwaanɩ.
25 Yisɩrayɛlɩ tiinə bam dɛɛn maa ŋɔɔnɩ da-tee nɩ ba wɩ: «Nii-na nɔɔnʋ wʋntʋ na yɔɔrɩ o nuŋi dɛ dɛ o gooni dɩbam te! Pɛ Sooli goni ni mʋ wɩ: wʋlʋ maama na gʋ nɔɔnʋ wʋntʋ, oó pa kʋ tu ŋwɩɩrʋ zanzan. O ta wʋ́ pa kʋ tu mʋ o bukɔ sɩ o ma o kɩ o kaanɩ. Kʋ tu sɔŋɔ tiinə dɩ daa bá taa ŋwɩ lampoo.»
26 Davidi ma bwe balʋ na zɩgɩ o tee nɩ kʋntʋ tɩn o wɩ: «Nɔɔnʋ na zaŋɩ o gʋ Filisi tu wʋntʋ, sɩ cavɩɩra yalʋ o na jɩgɩ o kɩ dɩ Yisɩrayɛlɩ tiinə bam tɩn ti, bɛ nyɔɔrɩ mʋ kʋ tu wʋ́ na? Filisi tu wʋntʋ yɩ nɔn-kafɛ mʋ. O za yɩ wɔɔ mʋ sɩ o taa zɩgɩ o dwəni dɩ Ŋwɩa Tu Baŋa-Wɛ jar-kərə bam?» 27 Jar-kərə bam ma tʋlɩ taanɩ dɩm yɩ ba ta kʋlʋ maama pɛ wʋm na wʋ́ kɩ o pa wʋlʋ na wʋ́ gʋ Goliatɩ tɩn ba brɩ Davidi.
28 Davidi zɩmba-kwɩa Eliabɩ ma ni o na zɩgɩ dɩ nɔɔna bam o larɩ te maama tɩn. O banɩ ma tiini dɩ zaŋɩ dɩ Davidi yɩ o bwe‑o o wɩ: «Nmʋ tu yo seeni sɩ n kɩ bɛɛ mʋ? Peeni sɩm fɩnfɩɩn n na yagɩ kagʋa nɩ tɩn, n pɛ wɔɔ mʋ nii-sɩ? A lwarɩ n kamunni dɩm ni nɩ. Nmʋ paalɩ n ba sɩ n nii najara yam kǝm dɩm mʋ!» 29 Davidi ma bwe‑o o wɩ: «Bɛɛ mʋ amʋ kɩ a ja a cɔgɩ? Kʋntʋ a yɩ bwe bwiə dɩ na?» 30 O ma titwəni o vu o joori o bwe nɔn-gɛ taanɩ dɩm kʋntʋ. Ba dɩ ta ma pa‑o dayigə nɔɔna bam lərə yam.
31 Nɔɔna badonnǝ ma ni Davidi na ŋɔɔnɩ te tɩn, yɩ ba vu ba lwǝni ba brɩ Sooli. Sooli ma pa ba bəŋi Davidi. 32 Davidi na yi o tee nɩ tɩn, o ma ta Sooli o wɩ: «Pɛ, kʋ ba maŋɩ sɩ nɔɔn-nɔɔnʋ taa kwarɩ fʋʋnɩ dɩ Filisi tu wʋntʋ. Amʋ yɩ n tɩntʋŋnʋ mʋ. A wʋ́ vu a jeer-o dɩ najara.»a 33 Sooli ma lǝr-o o wɩ: «Nmʋ bá wanɩ n jeeri nɔɔnʋ wʋm sɩ á kɩ najara. Ta n ye nɩ n yɩ bu mʋ. Filisi tu wʋntʋ nan maŋɩ o sɩŋɩ o nɔn-dʋnnɩ maŋa nɩ mʋ, o lwarɩ najara kǝm.»
34 Kʋ ma pa Davidi ləri o wɩ: «A ko, amʋ yǝni a jɩgɩ o ko peeni mʋ a niə. Nyoŋo naa ga-vara dwi maama na yǝni kʋ ba kʋ ja a vara bam dɩdʋa, 35 a yǝni a duri a vu a yi-kʋ, a daarɩ a magɩ-kʋ mʋ sɩ a vrɩ a varɩm wʋm kʋ ni nɩ. Nyoŋo kʋm kʋntʋ laan na yǝni kʋ pipiri sɩ kʋ ja amʋ, a yǝni a tʋ a gʋrɩgɩ kʋ ban nɩ mʋ, yɩ a laan daarɩ a gʋ-kʋ. 36 Amʋ gʋ nywəənu dɩdaanɩ ga-vara badonnǝ kʋntʋ doŋ a na. Filisi tu wʋm dɩ daɩ kʋlʋkʋlʋ. A wʋ́ gʋ-o dɩ. Kʋ ya wʋ maŋɩ sɩ o gooni Ŋwɩa Tu Baŋa-Wɛ jar-kərə bam. 37 Baŋa-Wɛ yɩ dɩlʋ na joŋi amʋ DƖ yagɩ nywəənu dɩdaanɩ ga-vara babam jɩŋa nɩ tɩn mʋ. DƖ ta wʋra sɩ DƖ joŋi-nɩ DƖ yagɩ Filisi tu wʋm jɩŋa nɩ.»b Sooli laan ma ta dɩ Davidi o wɩ: «Tɔ! Nan ve sɩ Baŋa-Wɛ wʋ́ taa wʋ n tee nɩ.»
38 Sooli dɛɛn kwe wʋntʋ tɩtɩ najara gwaarʋ tɩm o zʋ Davidi mʋ. O ma kwe canna yicəgə o ma pu o yuu kʋm, yɩ o ta kwe luu jara-kǝm gɔrɔ o ma kwǝli o nyɔɔnɩ dɩm. 39 Davidi ma kwe Sooli sʋ-lɔŋɔ kʋm o vɔ jara-kǝm gwaarʋ tɩm yɩra nɩ, yɩ o laan kwaanɩ sɩ o vu o nii. O na wʋ zʋ gwaarʋ tɩntʋ doŋ o mɩ tɩn, vəŋə maa camma ka pa‑o. O ma ta dɩ Sooli o wɩ: «Najara zɩla yantʋ bá joŋi-nɩ, bɛŋwaanɩ amʋ wʋ tʋŋɩ dɩ-tɩ a na.» O ma lɩ tɩ maama o tiŋi. 40 O ma kwe o nayɩra da-lɔŋɔ kʋm, o daarɩ o vu bugə ni nɩ o kuri kandwa-sɩswələ yanu. O ma dɩ kandwa yam kʋntʋ o nayɩra tampɔgɔ nɩ, yɩ o daarɩ o kwe o napana, o laan maa ve sɩ o jeeri Filisi tu wʋm.
41 Filisi tu wʋm maa fʋfɔ o ve mɛmɛ o twɛ Davidi. Nɔn-dʋŋʋ wʋlʋ na ze o jara-kǝm cɩ-kwaŋa kam maa wʋ o yigə nɩ o veǝ. 42 Goliatɩ na yɔɔrɩ o nii o na Davidi tɩn, o maanɩ wɩ o yɩ bu mʋ. O ma goon‑o dɩ o na yɩ bu-pwələ na yɩ lannʋ tɩn ŋwaanɩ. 43 O ma bwe Davidi o wɩ: «N bʋŋɩ nɩ a yɩ kakurə mʋ na, yɩ n jɩgɩ da-lɔŋɔ n bɩɩnɩ amʋ baŋa nɩ kʋntʋ?» O ma kwe o tɩʋ kʋm jwə-dɛɛra yam yɩra o ma o sɔɔlɩ lwarɩm o yagɩ Davidi yuu nɩ. 44 O ta ma ta o wɩ: «Fʋfɔ n yi yo seeni, sɩ a na wʋ kwe n ya-nwana yam a pa zunə dɩdaanɩ ga-vara sɩ ba di.»
45 Davidi ma lǝr-o o wɩ: «Nmʋ jɩgɩ sʋ-lɔŋɔ dɩ cicwe dɩ kalaŋa mʋ n bɩɩnɩ sɩ n ma n jeeri amʋ dɩ najara. Amʋ nan jɩgɩ Paŋwa Tu Baŋa-Wɛ dɩm yɩrɩ mʋ a bɩɩnɩ n baŋa nɩ. DƖ maa yɩ dɩlʋ na te Yisɩrayɛlɩ jar-kərə bam maama tɩn. Kʋ nan yɩ Dɩntʋ yɩrɩ mʋ n jɩgɩ n goonə. 46 Zɩm dɛ dɩntʋ, Baŋa-Wɛ wʋ́ kɩ-m a jɩŋa nɩ. A wʋ́ magɩ‑m a dɩ tɩga nɩ, yɩ a goni n yuu. Zɩm, a ta lagɩ a kwe Filisi jar-kərə ya-nwana yam mʋ a pa wɛyuu zunə dɩ ga-vara sɩ ba di. Tɩga baŋa nɔɔna maama laan wʋ́ sɛ dɩ cɩga nɩ: Wɛ wʋra DƖ na te Yisɩrayɛlɩ tiinə bam. 47 Nɔn-kɔgɔ kʋlʋ maama na jeeri yo seeni tɩn wʋ́ lwarɩ nɩ: Baŋa-Wɛ na lagɩ DƖ joŋi nɔɔna DƖ yagɩ, kʋ daɩ sʋ-lɔŋɔ naa cicwe mʋ DƖ maɩ DƖ joŋi-ba DƖ yaga. Najara yam yɩ Baŋa-Wɛ mʋ te-ya. Dɩntʋ nan wʋ́ wanɩ abam maama DƖ kɩ dɩbam jɩŋa nɩ.»
48 Filisi tu Goliatɩ daa ta maa fʋfɔ o bɩɩnɩ Davidi tee nɩ. Davidi ma duri o yɔɔrɩ najara je sɩm nɩ sɩ o vu o jeer-o. 49 O laan ma tʋrɩ o lɩ kandwɛ o tampɔgɔ kʋm wʋnɩ. O ma kwe kandwɛ dɩm o kɩ o napana kam nɩ, yɩ o vuvugi-ka o dʋlɩ o yagɩ. Kandwɛ dɩm ma yɔɔrɩ dɩ vu dɩ lɔ Goliatɩ tri, dɩ mʋʋrɩ dɩ zʋ da. Goliatɩ ma tʋ tɩga nɩ, yɩ o yibiyə vin tɩga nɩ.
50 Mʋ kʋ na tu te, Davidi dɛɛn mɛ napana dɩdaanɩ kandwɛ mʋ o ma o di Goliatɩ. O ma mag-o o gʋ yɩ kʋ daɩ sʋ-lɔŋɔ mʋ o mɛ o gʋ-o. 51 Davidi ma duri o yi o zɩgɩ Goliatɩ baŋa nɩ. O ta ma lɩ Goliatɩ tɩtɩ sʋ-lɔŋɔ kʋ polo nɩ, o ma gʋ-o o daarɩ o go o yuu.
Filisi tiinə bam na maanɩ nɩ ba babɩa kam tɩgɩ tɩn, mʋ ba maama pipiri ba duri sɩ ba lu. 52 Yisɩrayɛlɩ jar-kərə bam dɩdaanɩ Zuda jar-kərə bam ma kaasɩ dɩ tiguri-kaasa, yɩ ba daarɩ ba pɛ Filisi tiinə bam kwaga ba pu. Ba ma zəli-ba kʋntʋ taa ba vu ba kwaarɩ Gatɩ ni nɩ dɩdaanɩ Ekoron manco-pɩɩna nɩ. Filisi tiinə zanzan twa maa maŋɩ Saarayim cwǝŋǝ kam yuu nɩ ba tigi tigi kʋntʋ, sɩ kʋ vu kʋ yi Gatɩ dɩdaanɩ Ekoron nɩ. 53 Yisɩrayɛlɩ jar-kərə bam na zəli Filisi tiinə bam ba ti yɩ ba joori tɩn, ba ma lu kʋlʋ maama na wʋ ba tigə je sɩm nɩ tɩn ba ja ba viiri. 54 Davidi ma ja Goliatɩ yuu kʋm o ja o vu Zeruzalɛm, sɩ Kʋ daarɩ Goliatɩ jara-kǝm zɩla yam mʋ o jaanɩ yantʋ o zʋ o tiŋi o tɩtɩ vwe wʋnɩ.
55 Maŋa kalʋ Davidi ya na maa ve sɩ o jeeri Goliatɩ tɩn, mʋ Sooli ŋɔɔnɩ o taanɩ dɩ o jar-kərə yigə tu wʋm, Abenɩra mʋ kʋntʋ. O ma bwe‑o o wɩ: «Nɔn-dʋŋʋ kʋm yɩ wɔɔ bu mʋ?» Abenɩra ma lǝr-o o wɩ: «Pɛ, kʋ na yɩ cɩga tɩn, amʋ yǝri o ko na yɩ wʋlʋ tɩn.» 56 Sooli ma ta o wɩ: «Nan ve n bwe sɩ dɩ́ lwarɩ o na yɩ wʋlʋ bu tɩn.»