Samowɛlɩ lɩ Davidi sɩ o jwa ba o ji pɛ
16
Dɛ dɩdwɩ mʋ Baŋa-Wɛ tagɩ dɩ Samowɛlɩ DƖ wɩ: «Amʋ maŋɩ a vɩn Sooli nɩ: o daa bá taa yɩ Yisɩrayɛlɩ tiinə pɛ. N nan wʋ́ keeri o ŋwaanɩ taan sɩ n vu n maŋɩ yən mʋ? Zaŋɩ n kwe n kwara kam n su-ka dɩ nugə, sɩ n daarɩ n vu Zese sɔŋɔ Betelɩhɛm nɩ. Bɛŋwaanɩ, amʋ kuri o biə bam dɩdʋa mʋ sɩ o ji pɛ.»2 Samowɛlɩ maa wɩ: «Amʋ wʋ́ kɩ tɩta mʋ a vu a kɩ kʋntʋ? Sooli na niə, oó gʋ-nɩ mʋ.» Baŋa-Wɛ ma lǝr-o DƖ wɩ: «Ja nacwɛn n wǝli da, sɩ n laan ta wɩ n tu sɩ n kɩ kaanɩm mʋ n pa Baŋa-Wɛ. 3 Ta daarɩ n bəŋi Zese sɩ o ba o taa wʋ kaanɩm dɩm wʋnɩ. Amʋ wʋ́ brɩ-m n na wʋ́ kɩ kʋlʋ yɩ a pa n lwarɩ wʋlʋ a na kuri sɩ o ji pɛ tɩn. N ma n na nɛ kʋ tu mʋ n maŋɩ sɩ n lo nugə o yuu nɩ, sɩ n tiŋ‑o paarɩ.»
4 Samowɛlɩ ma kɩ kʋlʋ Baŋa-Wɛ na brɩ tɩn, yɩ o vu Betelɩhɛm. O na yi da tɩn, tɩʋ kʋm nakwa ma nuŋi ba jeer-o yɩ ba yɩra saɩ. Ba ma bwe‑o ba wɩ: «Kʋ yɩ ywəəni mʋ yɩ n ve n bɩɩnɩ na?» 5 Samowɛlɩ ma lǝri-ba o wɩ: «Ɛɛn, a tu dɩ ywəəni mʋ. Amʋ tu yo sɩ a kɩ kaanɩm mʋ a pa Baŋa-Wɛ. Kwɛ-na á tɩtɩ, sɩ á ba á gwaanɩ dɩ amʋ sɩ dɩ́ kɩ kaanɩm dɩm.» O ma vu o lɩ Zese dɩ o biə bam pa ba kwɛ ba tɩtɩ yɩ o daarɩ o bǝŋi-ba sɩ ba vu kaanɩm dɩm jǝgǝ.
6 Zese dɩdaanɩ o biə bam na yi da tɩn, Samowɛlɩ ma na o bu-kwɩan Eliabɩ. O ma ta o wʋnɩ o wɩ: «N nɛ naa n wʋ nɛ, baarʋ wʋntʋ na zɩgɩ Baŋa-Wɛ yigə nɩ tɩn mʋ yɩ wʋlʋ DƖ na kuri sɩ DƖ tiŋi pɛ tɩn.» 7 Baŋa-Wɛ ma ta dɩ Samowɛlɩ DƖ wɩ: «Yɩ jeeli n daŋɩ baarʋ wʋm yibiyə pooni na yɩ te tɩn baŋa nɩ, naa o na yɩ nɔn-wagɩlɩ tɩn nɩ. Amʋ vɩn wʋntʋ mʋ. Amʋ Baŋa-Wɛ ba nii wǝǝnu DƖ naɩ-tɩ nɩnɛɛnɩ nabiinǝ na naɩ te tɩn. Nabiinǝ nii ba naɩ pooni yigə kam mʋ, Baŋa-Wɛ nan nii DƖ naɩ bɩcarɩ-yi dɩm nɩ mʋ.»a
8 Zese laan ma bəŋi o bu Abinadabɩ o pa o vu Samowɛlɩ te sɩ o na‑o. Samowɛlɩ ma ta o wɩ: «Baŋa-Wɛ wʋ kuri wʋntʋ dɩ.» 9 Zese daa ma tʋŋɩ Shama o tee nɩ. Samowɛlɩ ta maa wɩ: «Baŋa-Wɛ wʋ kuri wʋntʋ dɩ.» 10 Zese maa pa o biə barpɛ maama mʋ vu Samowɛlɩ te ba da o yigə nɩ ba kɛ, yɩ Samowɛlɩ wɩ: «Baŋa-Wɛ wʋ kuri bantʋ wʋlʋwʋlʋ.» 11 O laan ma ga ga o bwe Zese o wɩ: «Nmʋ biə bam maama mʋ kʋntʋ na?» Zese ma ta o wɩ: «Jɩŋa-bu wʋm mʋ daarɩ. Wʋntʋ nan wʋ peeni sɩm kwaga nɩ mʋ o yɩrɩ-sɩ.» Samowɛlɩ maa wɩ: «Tʋŋɩ n bǝŋ-o sɩ o ba. Wʋntʋ na wʋ tu yo seeni, dɩ́ bá wanɩ dɩ́ kɩ kaanɩm dɩm sɩ dɩ́ di.»
12 Zese ma pa ba bəŋi o jɩŋa-bu Davidi yɩ o ba. O maa yɩ lannʋ yɩ yazurə yi‑o lanyɩranɩ, o yi-nigə jɩgɩ fra. Baŋa-Wɛ ma ta dɩ Samowɛlɩ DƖ wɩ: «Zaŋɩ n lo nugə o yuu nɩ, sɩ wʋntʋ mʋ a kuri.»b 13 Samowɛlɩ ma kwe kwara kam dɩ ka wʋ nugə o lo Davidi yuu nɩ, o cʋrrʋ tɩm yibiyə nɩ. Sɩntʋ nɛ sɩm ni nɩ mʋ Baŋa-Wɛ Joro tu Davidi baŋa nɩ dɩ dam. Kʋ maa wʋ o tee nɩ taan, kʋ zɩgɩ dɛ dɩm kʋntʋ nɩ sɩ kʋ taa veǝ. Samowɛlɩ laan ma joori o vu Rama.
Davidi tʋŋa o paɩ Pɛ Sooli
14 Baŋa-Wɛ Joro ma nuŋi Kʋ daarɩ Sooli. Baŋa-Wɛ ma ləri DƖ kwe jor-lɔŋɔ DƖ pa kʋ yǝni kʋ daanɩ‑o. 15 Sooli tɩntʋŋna bam ma ta ba wɩ: «Dɩ́ maanɩ nɩ Wɛ mʋ pɛ jor-lɔŋɔ ba kʋ jɩgɩ-m kʋ daana. 16 Pɛ, dɩ́ yɩ nmʋ tɩntʋŋna mʋ. Kʋntʋ, yagɩ sɩ dɩ́ beeri je sɩm maama nɩ dɩ́ nii wʋlʋ na waɩ o taɩ kɔnɔ lanyɩranɩ tɩn. Baŋa-Wɛ na pɛ jor-lɔŋɔ kʋm ba n baŋa nɩ yɩ kʋ tu na tagɩ o kɔnɔ kʋm, nmʋ wʋʋ wʋ́ tʋ.» 17 Sooli ma pa-ba ni o wɩ: «Kwaanɩ-na á beeri nɔɔnʋ wʋlʋ na taɩ kɔnɔ lanyɩranɩ tɩn á ja á ba á pa-nɩ.» 18 Sooli tɩntʋŋna bam dɩdʋa ma ləri o wɩ: «Amʋ nɛ nɔɔnʋ wʋdoŋ, o yɩ Betelɩhɛm tu Zese bu mʋ. O ye kɔnɔ tam lanyɩranɩ. Nɔɔnʋ wʋm yɩ babɩa yɩ o ye najara kǝm. O ni-taanɩ dɩ ywəmmə, o nan jɩgɩ yi-nɩɩnɩ dɩ. Baŋa-Wɛ maa wʋ o tee nɩ.»
19 Sooli ma tʋŋɩ kwǝrǝ Zese tee nɩ yɩ o wɩ: «Nmʋ bu Davidi wʋlʋ na yɩrɩ n peeni sɩm tɩn mʋ a laga. Pa o ba a te.» 20 Zese ma ja bɩnaga o daarɩ o kwe dɩpɛ, dɩdaanɩ lɔɔ dɩ kʋ wʋ sana, dɩ bʋcwɛn o daŋɩ ka baŋa nɩ. O ma tʋŋɩ o bu Davidi sɩ o ja-o vu o pa Sooli.
21 Kʋ kɩ kʋntʋ mʋ yɩ Davidi da o zʋ Sooli tɩntʋŋna bam wʋnɩ. Sooli dɛɛn maa tiini o soe Davidi. O ma lɩ-o sɩ o taa yɩ wʋlʋ na wʋ́ taa ze o najara zɩla yam tɩn. 22 Sooli ma tʋŋɩ kwǝrǝ o pa Zese o wɩ: «Amʋ wʋʋ tiini kʋ poli dɩ n bu Davidi. Kʋntʋ tɩn, yagɩ sɩ o maŋɩ a tee nɩ o taa tʋŋa o pa-nɩ.»
23 Maŋa kalʋ maama Wɛ na yǝni o pa jor-lɔŋɔ kʋm zʋ Sooli, Davidi wʋ́ ta o kɔnɔ kʋm mʋ. Kʋntʋ na yǝni kʋ kɩ, Sooli wʋʋ wʋ́ tʋ mʋ, yɩ kʋ gara kʋ pa‑o. Jor-lɔŋɔ kʋm maa yǝni kʋ viiri kʋ daarɩ‑o.