Baŋa-Wɛ pɛ Sooli paarɩ dɩm ti
15
Samowɛlɩ dɛɛn tagɩ dɩ Sooli o wɩ: «Kʋ yɩ amʋ mʋ Baŋa-Wɛ pɛ ni sɩ a tiŋi nmʋ sɩ n di paarɩ DƖ nɔɔna Yisɩrayɛlɩ tiinə bam baŋa nɩ. Kʋntʋ tɩn, cəgi kwǝrǝ kalʋ Baŋa-Wɛ na jɩgɩ o pa‑m tɩn. 2 Paŋwa Tu Baŋa-Wɛ wɩ:‹A lagɩ a waarɩ Amalɛkɩ tiinə mʋ ba dɛɛn na tʋŋɩ te dɩ Yisɩrayɛlɩ tiinə bam tɩn ŋwaanɩ. Maŋa kalʋ Yisɩrayɛlɩ tiinə bam na nuŋi Ezipi nɩ ba maa bɩɩnɩ tɩn, Amalɛkɩ tiinə bam cɩgɩ ba cwǝŋǝ yɩ ba jeeri-ba dɩ najara mʋ.a 3 Kʋntʋ tɩn, ve n zaŋɩ najara dɩdaanɩ Amalɛkɩ tiinə bam. Yɔɔrɩ n cɔgɩ-ba dɩ ba woŋo maama. Yɩ ja ba ŋwaŋa. Go-na ba baara, dɩ ba kaana, dɩ ba biə, dɩ ba bu-sɩsɩn, kʋ wǝli dɩ ba naanɩ, dɩ ba peeni, dɩ ba yogondə, dɩ ba bɩnɛ.› »
4 Sooli ma bəŋi o jar-kərə bam o kɩ daanɩ pa ba jeeri Telayim nɩ. Jar-kərə mʋrrʋ fugə (10,000) mʋ nuŋi Zuda dwi dɩm nɩ. Nɔɔna mʋrrʋ biə-yale (200,000) dɩ maa nuŋi Yisɩrayɛlɩ dwiə yadaara yam nɩ. 5 Sooli laan ma da o kɔgɔ kʋm yigə yɩ ba vu Amalɛkɩ tiinə tɩʋ kʋm. Ba ma səgi bugə kadoŋ nɩ, yɩ ba cəgi sɩ ba nuŋi da ba zaŋɩ Amalɛkɩ tiinə bam baŋa nɩ. 6 Kɛnɩ dwi tiinə dɩ dɛɛn zʋʋrɩ je sɩm kʋntʋ nɩ. Sooli ma pa-ba kwǝrǝ o wɩ: «Maŋa kalʋ Yisɩrayɛlɩ tiinə bam na nuŋi Ezipi nɩ ba maa kɛ tɩn, abam kwə dɛɛn kɩ-ba lanyɩranɩ. Kʋntʋ tɩn, zaŋɩ-na á vu yigə á daarɩ Amalɛkɩ tiinə bam, sɩ a lagɩ a cɔgɩ ba maama mʋ. Kʋ nan daɩ sɩ abam dɩ da á tɩ.» Kɛnɩ tiinə bam ma sɩɩnɩ ba vu dáa ba daarɩ Amalɛkɩ tiinə bam.
7 Sooli laan ma jeeri Amalɛkɩ tiinə bam dɩ najara yɩ o di-ba. Najara yam puli Avila nɩ mʋ ya ve taa ya yi Suuri na wʋ Ezipi tɩʋ wa-puli seeni tɩn. 8 O ma ja Amalɛkɩ tiinə pɛ Agagɩ yɩ o ta ŋwɩ. Sɩ kʋ na yɩ Amalɛkɩ tɩʋ nɔɔna bam maama, o gʋ-ba mʋ nyɔ! 9 Kʋ daarɩ, Sooli dɩ o nɔɔna bam dɛɛn wʋ gʋ pɛ Agagɩ. Ba ma yagɩ tɩʋ kʋm varɩ-ŋʋna bam, naanɩ dɩ peeni maama. Ba wʋ sɛ sɩ ba gʋ-tɩ. Kʋ daarɩ kʋ na yɩ wo-kʋkwarɩ sɩm dɩ tɩlʋ na ba jɩgɩ kuri tɩn, ba yɔɔrɩ ba cɔgɩ tɩntʋ maama mʋ nyɔ!
10 Baŋa-Wɛ ma ta dɩ Samowɛlɩ DƖ wɩ: 11 «A wʋʋ cɔgɩ mʋ, dɩ a na pɛ Sooli ji pɛ tɩn. O lɔgɩ amʋ kwaga nɩ mʋ, yɩ o ba sɛ sɩ o kɩ a ni dɩm nɩ.» Samowɛlɩ wʋ ma pɛ, yɩ o tiini o loori Baŋa-Wɛ tɩtɩɩ dɩm maama nɩ o pʋʋrɩ tɩga.
12 Samowɛlɩ ma goni tɩga o zaŋɩ sɩ o vu o beeri Sooli je. Ba ma ta ba brɩ-o nɩ: Sooli ve Karmɛlɩ mʋ, o nan cwi kandwɛ-kamunu mʋ o zɩgɩ da sɩ kʋ pa o na yɩrɩ. Ba ta wɩ: o na zɩgɩ dáanɩ tɩn, o laan ve Giligalɩ mʋ. 13 Samowɛlɩ ma vu o yi Sooli te. Sooli ma war‑o o wɩ: «Baŋa-Wɛ wʋ́ kɩ nmʋ yu-yoŋo. Amʋ kɩ a tɔgɩ Baŋa-Wɛ ni dɩm lanyɩranɩ.» 14 Samowɛlɩ ma bwe‑o o wɩ: «Cɩga? Bɛn nan daa mʋ kɩ yɩ a ni naanɩ dɩm dɩdaanɩ peeni sɩm kərə kʋntʋ?» 15 Sooli ma lǝr-o o wɩ: «Jar-kərə bam mʋ vrɩ varɩ-ŋʋna bantʋ Amalɛkɩ tiinə jɩŋa nɩ ba ja ba sɩ ba ma kɩ kaanɩm ba pa nmʋ Tu Baŋa-Wɛ dɩm. Kʋ daarɩ kʋlʋ maama laan na daarɩ tɩn, dɩ́ yɔɔrɩ dɩ́ cɔgɩ-tɩ mʋ fasɩ!» 16 Samowɛlɩ ma bag‑o o wɩ: «Pu n ni kʋntʋ, sɩ a ta kwǝrǝ kalʋ Baŋa-Wɛ na pɛ-nɩ diin tɩtɩɩ nɩ tɩn a brɩ-m.» Sooli ma ləri o wɩ: «A nan cǝgǝ.»
17 Samowɛlɩ laan maa wɩ: «Nmʋ ya maŋɩ n nii n tɩtɩ nɩ: n daɩ kʋlʋkʋlʋ yigə da. Dɩ kʋ dɩ, Baŋa-Wɛ nan mʋ pɛ n ji Yisɩrayɛlɩ dwi tiinə bam maama yigə tu. DƖ ma tiŋi‑m sɩ n ta n yɩ ba pɛ. 18 Dɩntʋ mʋ pɛ‑m tɩtʋŋɩ sɩ n tʋŋɩ, yɩ DƖ wɩ n ve n yɔɔrɩ n cɔgɩ Amalɛkɩ tiinə bam, ba na yɩ nɔn-balwaarʋ tɩn ŋwaanɩ. DƖ brɩ-m sɩ n kɩ najara yam taan sɩ kʋ taa nii n na ti ba maama tɩn. 19 Bɛ nan mʋ yɩ n wʋ sɛ DƖ ni dɩm? Bɛɛ mʋ kɩ yɩ n kɩ lɩla n vu n pɛ ba jɩjɩgɩrʋ tɩm sɩ n ta n jɩga? Nmʋ tʋŋɩ lwarɩm mʋ n cɔgɩ Baŋa-Wɛ yigə!»
20 Sooli ma ləri o wɩ: «Kʋ na yɩ cɩga, amʋ kɩ Baŋa-Wɛ ni dɩm mʋ cɩga cɩga. A dɛ cwǝŋǝ kalʋ DƖ na tʋŋɩ-nɩ sɩ a da tɩn. A ma yɔɔrɩ a cɔgɩ Amalɛkɩ tiinə bam, yɩ a daarɩ a ja ba pɛ Agagɩ a ba yo seeni. 21 Dɩ́ nan na di-ba tɩn, mʋ a nɔɔna bam kuri peeni sɩlʋ na lamma tɩn, dɩdaanɩ naanɩ dɩlʋ na lamma tɩn, ba lɩ wǝǝnu tɩlʋ na maŋɩ dɩ cɔgɩm tɩn wʋnɩ. Ba nan jaanɩ-ba ba ba Giligalɩ yo seeni mʋ, sɩ ba ma ba kɩ kaanɩm mʋ ba pa nmʋ Tu Baŋa-Wɛ dɩm.»
22 Samowɛlɩ maa wɩ: «Kɔɔ mʋ poli Baŋa-Wɛ wʋʋ? N na sɛ kwǝrǝ kalʋ DƖ na pɛ‑m sɩ n kɩ tɩn mʋ naa n na zwɛ vara yɩ n paɩ pɛɛra n ma n kɩ kaanɩm n pa‑DƖ mʋ, kɔɔ mʋ gara? Nii yo! N na sɛ Wɛ ni, kʋntʋ garɩ n na kɩ kaanɩm dɩlʋ dwi maama n pa‑DƖ.b 23 N na lɔgɩ Wɛ kwaga nɩ, kʋntʋ dɩ yi-nɛɛrɩ yɩ bɩdwɩ mʋ. Yi-dɛɛrɩ-nyɩm dɩdaanɩ jwə-kaanʋ dɩ maa ba garɩ daanɩ. Nmʋ na vɩn Baŋa-Wɛ kwǝrǝ kam tɩn, DƖ dɩ vɩ‑m sɩ n daa n bá taa yɩ pɛ.»
24 Sooli ma ləri Samowɛlɩ o wɩ: «Cɩga tɩn, amʋ kɩ lwarɩm. A vɩn Baŋa-Wɛ kwǝrǝ kam. A wʋ sɛ nmʋ na brɩ-nɩ sɩ a kɩ te tɩn. A nan ya kwarɩ a nɔɔna bam mʋ, pa a kɩ bantʋ na lagɩ te tɩn. 25 A nan loori‑m sɩ n yagɩ a lwarɩm n ma n cɛ-nɩ, sɩ n daarɩ n da dɩdaanɩ amʋ sɩ dɩ́ joori sɔŋɔ, sɩ a daa wanɩ a zuli Baŋa-Wɛ.» 26 Samowɛlɩ ma lǝr-o o wɩ: «Amʋ bá tɔgɩ-m a joori. Bɛŋwaanɩ, nmʋ vɩn Baŋa-Wɛ kwǝrǝ kam pa DƖ dɩ vɩ‑m DƖ wɩ: n daa n bá taa yɩ Yisɩrayɛlɩ tiinə pɛ.»
27 Samowɛlɩ laan ma pipiri sɩ o viiri. Sooli ma ja o gɔrɔ kʋm ni dɩm seeni yɩ kʋ kaarɩ. 28 Samowɛlɩ ma ta dɩd-o o wɩ: «Nii! Baŋa-Wɛ zɩm joori DƖ joŋi Yisɩrayɛlɩ tiinə paarɩ dɩm na wʋ n jɩŋa nɩ tɩn mʋ DƖ daarɩ‑m. DƖ ma kwe-dɩ DƖ pa n doŋ wʋlʋ na garɩ‑m tɩn. 29 Yisɩrayɛlɩ tiinə Paarɩ-zulǝ Tu Baŋa-Wɛ dɩm ba fɔɩ vwan, DƖ taanɩ dɩ maa ba gɔɩ dɩ yaga. Bɛŋwaanɩ, DƖ daɩ nabinzwənə, sɩ DƖ taa zaɩ DƖ ni.»c 30 Sooli ma ləri o wɩ: «Amʋ sɩɩnɩ a kɩ lwarɩm. Dɩ kʋntʋ maama dɩ, yɩ pa a na a cavɩɩra Yisɩrayɛlɩ nakwa bam dɩdaanɩ ba kɔgɔ kʋm maama yigə nɩ. Nan joori n da dɩ amʋ sɩ a vu a zuli n Tu Baŋa-Wɛ dɩm.» 31 Samowɛlɩ ma sɛ. O ma da dɩ Sooli o joori pa Sooli vu o zuli Baŋa-Wɛ.
32 Samowɛlɩ laan ma ta o wɩ: «Ja-na Amalɛkɩ tiinə pɛ Agagɩ á ja á ba yo seeni.» Agagɩ ma zaŋɩ o vu o yi o te dɩ baarɩ yɩ o bʋŋɩ o wʋnɩ wɩ: «Cam dɩ tʋʋnɩ daa bá yi-nɩ.» 33 Samowɛlɩ maa wɩ: «Nmʋ mɛ n sʋ-lɔŋɔ mʋ n pa kaana zanzan ga ba biə. Kʋntʋ cwǝŋǝ kam nɩ mʋ nmʋ dɩ nu wʋ́ ga o biə.» O ma zɩgɩ Baŋa-Wɛ yigə nɩ o kwe o sʋ-lɔŋɔ kʋm o tʋrɩ Agagɩ murə-murə Giligalɩ nɩ.