14
Dɛ dɩdwɩ mʋ Sooli bu Zonatan tagɩ dɩ nɔn-dʋŋʋ wʋlʋ na yǝni o ze o najara zɩla yam tɩn o wɩ: «Pa dɩ́ bɛ dɩ́ vu mɛ Filisi tiinə jar-kərə bam na ve ba tigi tɩn.» O nan wʋ pɛ o ko Sooli lwarɩ kʋ ni nɩ.2 Sooli dɛɛn maŋɩ Gibea tɩʋ kʋm laŋa kam seeni mʋ. O maa je grɩnadɩnɩ tiu kʋdoŋ na wʋ Migoron nɩ tɩn kuri nɩ. Jar-kərə balʋ na daarɩ ba maŋɩ o tee nɩ tɩn maa yɩ nɩnɛɛnɩ biə-yardʋ. 3 Nɔɔna bam kʋntʋ wʋnɩ dɩdʋa dɛɛn yɩ Asituba bu Ahiya. O maa yɩ Wɛ kaanɩm tu yɩ o jɩgɩ kaanɩm gwar-wʋgʋ kʋm. Asituba dɛɛn yɩ Ikabɔdɩ cʋrʋ dɩ Fineasɩ bu mʋ, yɩ o ta yɩ Eli naa. Eli dɛɛn ya yɩ Baŋa-Wɛ kaanɩm tu Siloo nɩ mʋ. Nɔɔna bam maama nan wʋ lwarɩ nɩ Zonatan nuŋi ba tee nɩ.
4 Cwǝŋǝ kam na wʋ Mikimasɩ zwəənu tɩm nɩ yɩ Zonatan jeeli sɩ o tɔgɩ da o kɛ o vu o yi Filisi tiinə jar-kərə bam te tɩn, dɛɛn tigi pu-kamunnu tɩle tɩtarɩ nɩ mʋ. Tɩ dɩdʋa yɩrɩ dɛɛn mʋ yɩ Bozezi, yɩ kʋdoŋ kʋm yɩrɩ yɩ Senɛ. 5 Piu dɩdʋa dɛɛn jeeri jazɩm baŋa seeni daa kam mʋ, yɩ kʋ yɔɔrɩ Mikimasɩ. Kʋdoŋ kʋm dɩ maa wʋ jagwiə seeni daa kam nɩ, yɩ kʋ yɔɔrɩ Geba.
6 Zonatan ma ta dɩ nɔn-dʋŋʋ wʋlʋ na ze o najara zɩla yam tɩn o wɩ: «Nan pa dɩ́ bɛ dɩ́ yi nɔn-kafɛ tɩntʋ na wʋ mɛ tɩn! Dɛdoŋ Baŋa-Wɛ wʋ́ wǝli dɩbam sɩ dɩ́ wanɩ-ba. Baŋa-Wɛ na lagɩ DƖ joŋi DƖ nɔɔna bam DƖ yagɩ, kʋlʋkʋlʋ bá cəŋi‑DƖ. Dɩ́ na daga naa dɩ́ na muri dɩ, kʋ maama yɩ bɩdwɩ mʋ Wɛ tee nɩ.» 7 Nɔn-dʋŋʋ wʋm ma lǝr-o o wɩ: «Kɩ kʋlʋ maama n na bʋŋɩ n ja sɩ n kɩ tɩn, sɩ a zɩgɩ n kwaga nɩ dɩ a wʋʋ maama.» 8 Zonatan maa wɩ: «Nan pa dɩ́ fʋfɔ dɩ́ vu dɩ́ brɩ dɩ́ tɩtɩ Filisi tiinə bam. 9 Ba na tagɩ ba brɩ dɩbam nɩ: ‹Taá zɩgɩ-na á cəgi dɩbam sɩ dɩ́ bɩɩnɩ á te›, dɩ wʋ́ maŋɩ da mʋ, dɩ bá di dɩ́ yi ba te. 10 Kʋ daarɩ ba na tagɩ nɩ: ‹Titwəni-na á din piu kʋm á ba-na yo seeni›, dɩ́ wʋ́ din dɩ́ yi-ba mʋ. Kʋntʋ wʋ́ brɩ nɩ Baŋa-Wɛ mʋ sɩɩnɩ DƖ kwe-ba DƖ kɩ dɩbam jɩŋa nɩ.»
11 Bantʋ bale bam ma vu ba zɩgɩ mɛ Filisi tiinə bam na wʋ́ na-ba tɩn. Filisi tiinə bam ma ta ba brɩ daanɩ ba wɩ: «Nii-na! Ebru tiinə bam laan wʋra ba pi ba nuŋi bɔɔna yalʋ ba ya na səgi da tɩn wʋnɩ mʋ.» 12 Ba laan ma tɔɔlɩ ba ta Zonatan dɩdaanɩ nɔn-dʋŋʋ wʋm ba wɩ: «Titwəni á yi-na yo seeni, sɩ dɩ́ wanɩ dɩ́ brɩ abam woŋo.» Zonatan ma ta o tɩntʋŋnʋ wʋm o wɩ: «Ta n tɔgɩ a kwaga n diini, sɩ Baŋa-Wɛ mʋ kɩ nɔɔna bam kʋntʋ Yisɩrayɛlɩ tiinə bam jɩŋa nɩ.»
13 Zonatan laan ma gwanɩ o din piu kʋm, yɩ o tɩntʋŋnʋ wʋm tɔgɩ o kwaga. O ma jeeri Filisi tiinə bam dɩ najara o magɩ o dɩ tɩga nɩ. O na magɩ wʋlʋ o dɩ tɩga nɩ, nɔn-dʋŋʋ wʋm wʋ́ tɔgɩ o kwaga o gʋ kʋ tu. 14 Ba na dɛ yigə ba jeeri Filisi tiinə bam dɩ najara kʋntʋ tɩn, Zonatan dɩ o tɩntʋŋnʋ wʋm dɛɛn gʋ nɔɔna fiinle mʋ jǝgǝ dɩdʋa nɩ, ka wʋ gaalɩ naba-laara fiintɔ.
15 Fʋʋnɩ ma tiini dɩ ja Filisi tiinə jar-kərə balʋ maama dɛɛn na wʋ pwələ nɩ tɩn, dɩ tɩʋ kʋm wʋnɩ daa kam maama, dɩ balʋ na yɩrɩ ba tigisim je tɩn, dɩ ba tɩʋ kʋm nɔn-biə bam maama. Tɩga kam ma sisiŋi, bɛŋwaanɩ Baŋa-Wɛ mʋ kɩ sɩ fʋʋnɩ dɩm kʋntʋ taa wʋra.
16 Sooli nɔɔna balʋ na zɩgɩ Gibea nɩ ba tʋlɩ ba nii kʋlʋ na wʋra kʋ kɩ tɩn ma na nɩ: Filisi tiinə bam jagɩ mʋ yɩ ba duri je maama nɩ. 17 Sooli laan ma ta o nɔɔna bam maama o wɩ: «Jeeli-na dɩ́ nɔɔna bam maama ni, sɩ dɩ́ lwarɩ balʋ na tǝri yo seeni tɩn.» Ba na jeeli ba ti tɩn, mʋ ba maanɩ nɩ Zonatan dɩ nɔn-dʋŋʋ wʋlʋ na ze o jara-kǝm zɩla yam tɩn mʋ tǝrǝ. 18 Wɛ kaanɩm tu Ahiya dɛɛn na jɩgɩ kaanɩm zɩla yam o tee nɩ tɩn, Sooli ma ta dɩd-o o wɩ: «Ja Wɛ ni-gonim daka kam n fʋfɔ n yi yo seeni sɩ dɩ́ bwe Baŋa-Wɛ dɩ́ nii dɩ́ wʋ́ kɩ tɛ mʋ.» 19 O ta na wʋra o ŋɔɔnɩ dɩ kaanɩm tu wʋm kʋntʋ tɩn, ba ma ni vuvugə sɔɔ na tiini kʋ zaŋɩ Filisi tiinə bam tigisim je sɩm nɩ. Sooli ma ta o wɩ: «Lɩ n jɩŋa Wɛ ni-gonim daka kam nɩ. Maŋa daa tǝrǝ sɩ dɩ́ bwe Baŋa-Wɛ dɩ́ nii.»
20 Sooli dɩdaanɩ o jar-kərə bam maama ma kɩ daanɩ ba yɔɔrɩ Filisi tiinə bam je sɩm sɩ ba zaŋɩ najara dɩ ba. Ba ma vu ba na nɩ vuvugə tiini ka tʋ Filisi tiinə bam wʋnɩ yɩ ba zaŋɩ najara da-baŋa nɩ. 21 Ebru tiinə balʋ ya na tɔgɩ dɩ Filisi tiinə bam ba kɩ najara yam ba wǝli-ba tɩn laan ma joori ba lɛɛnɩ ba pu Yisɩrayɛlɩ tiinə balʋ na wʋ Sooli dɩ Zonatan tee nɩ tɩn. 22 Kʋ daarɩ Yisɩrayɛlɩ tiinə balʋ ya na səgi Efrayim pweeru laŋa kam nɩ tɩn dɩ ma ba ba ni nɩ: Filisi tiinə bam kwaanɩ ba duri sɩ ba lu Yisɩrayɛlɩ tiinə jɩŋa nɩ mʋ. Ba dɩ ma nuŋi ba tɔgɩ ba zəli-ba dɩ fʋra. 23 Ba dɛɛn pɛ Filisi tiinə bam kʋntʋ ba pu mʋ taa ba vu ba gaalɩ Bɛt-Avɛn. Mʋ cwǝŋǝ kalʋ wʋnɩ Baŋa-Wɛ dɛɛn na dɛ DƖ ma DƖ joŋi Yisɩrayɛlɩ tiinə bam DƖ yagɩ dɛ dɩm kʋntʋ nɩ tɩn.
Najara yam kwaga kikiə
24 Dɛ dɩm kʋntʋ nɩ mʋ Yisɩrayɛlɩ tiinə bam yɩra tiini ya bwǝnǝ, kana na jɩgɩ-ba tɩn ŋwaanɩ. Bɛŋwaanɩ, Sooli dɛɛn ya dugi durə mʋ yɩ o daarɩ o pa ni dɩntʋ o nɔɔna bam o wɩ: «Wʋlʋ maama na di wʋdiu zɩm kʋ loori wa-zʋʋrɩ maŋa yɩ a ta wʋ mɔ a jɩnɩ a dʋna bam baŋa nɩ, sɩ Kampwəl-balwara taa wʋ kʋ tu yuu nɩ.» Kʋ ma pa dɛ dɩm kʋntʋ, o nɔɔna bam wʋlʋwʋlʋ wʋ laŋɩ wʋdiu o ni nɩ.
25 Sooli jar-kərə bam maama ma tɔgɩ gaa wʋnɩ, mɛ tweeru na gaalɩ tɩn ba kɛ. Ba ma na nɩ tʋʋrʋ mʋ wʋra je sɩm maama. 26 Ba na dɛ da ba kɛ yɩ ba na tʋʋrʋ tɩm kʋntʋ tɩn, ba wʋlʋwʋlʋ wʋ laŋɩ-tɩ. Kampwələ kam mʋ ba dɛɛn kwarɩ. 27 Kʋ daarɩ Zonatan dɛɛn wʋ ni nɩ o ko dugi mʋ o pa nɔɔna bam. O maa kwe nacəgə kam, o na zeə o jɩŋa nɩ tɩn, o ma o zɔ tʋ-kamparɩ, o daarɩ o ma o jɩŋa o lɩ-dɩ o di. O yiə maa da ya puri. 28 Nɔɔna bam dɩdʋa ma ta dɩ Zonatan o wɩ: «Nmʋ ko nan dugi mʋ o yagɩ dɩ́ jar-kərə bam baŋa nɩ o wɩ: ‹Lɛɛrʋ taa wʋ wʋlʋ maama na wʋ́ di wʋdiu zɩm tɩn baŋa nɩ.› Kʋ yɩ kʋntʋ ŋwaanɩ mʋ dɩ́ maama bwǝnǝ tɩntʋ yɩ kana jɩgɩ dɩbam.» 29 Zonatan ma ta o wɩ: «Cɩga tɩn, a ko pɛ kʋ zʋ á maama yɩra lanyɩranɩ. Nii a na di tʋʋrʋ tɩm fɩnfɩɩn yɩ a joori a na dam te! 30 Dɩ́ nɔɔna bam ya na nɛ cwǝŋǝ sɩ ba di wʋdiu kʋlʋ maama ba na vrɩ Filisi tiinə bam tee nɩ tɩn, kʋ ya bá taa garɩ na? Tɩntʋ ba yaá na dam sɩ ba gʋ Filisi tiinə bam zanzan ba dwǝni ba zɩm na gʋ te tɩn.»
31 Dɩntʋ dɛ dɩm nɩ, Yisɩrayɛlɩ tiinə bam zɩgɩ Mikimasɩ nɩ ba zəli Filisi tiinə bam taa ba vu ba yi Ayalɔn. Ba na wanɩ-ba ba ti kʋntʋ tɩn, dɩdaanɩ ba yɩra yam bugi zanzan kana ŋwaanɩ. 32 Ba ma kɩ lɩla ba pɛ wǝǝnu tɩlʋ ba na vrɩ Filisi tiinə bam tee nɩ tɩn sɩ ba na wʋdiu ba di. Ba ma gʋ peeni, dɩ naanɩ, dɩ na-pwalɩ, ba daarɩ ba jɩgɩ nwana yam ba buri ba di gweeni, yɩ vara bam jana wʋ loori ba lu tɩga nɩ.
33 Nɔɔna ma ta Sooli ba wɩ: «Nii dɩbam nɔɔna bam na kɩ lwarɩm dɩlʋ Baŋa-Wɛ yigə nɩ. Ba jɩgɩ nwana mʋ ba dʋnɩ dɩ ya yɩra jana.» Sooli ma ta o wɩ: «Abam cɔgɩ á cɩga dɩ Baŋa-Wɛ. Bibili-na kandwɛ-kamunu á ja á ba yo seeni á pa-nɩ.» 34 O daa ma ta o wɩ: «Ve-na á da nɔɔna bam wʋnɩ á ta sɩ ba maama ja ba naanɩ dɩdaanɩ ba peeni sɩm ba ba yo seeni. Ba maŋɩ sɩ ba gʋ vara bam maama kandwɛ dɩm baŋa nɩ ba daarɩ ba di yo mʋ. Kʋ daɩ sɩ ba dʋnɩ nwana yam dɩ ya yɩra jana ba ma kɩ lwarɩm Baŋa-Wɛ yigə nɩ.» Tɩtɩɩ dɩm kʋntʋ nɩ, nɔɔna bam maama ma ja ba vara ba ba ba gʋ dáanɩ. 35 Sooli dɩ ma lɔ kaanɩm bimbim sɩ o ma o zuli Baŋa-Wɛ. Mʋ bimbim dɩlʋ o na dɛ yigə o lɔ o pa Baŋa-Wɛ tɩn.
36 Sooli ma ta dɩ o nɔɔna bam o wɩ: «Nan pa-na sɩ dɩ́ vu dɩ́ zəli Filisi tiinə bam tɩtɩɩ dɩntʋ wʋnɩ sɩ kʋ taa nii tɩ-pʋra maŋa nɩ. Dɩ́ wʋ́ gʋ-ba yɩ dɩ́ daarɩ dɩ́ vrɩ ba zɩla. Dɩ́ yɩ daarɩ nɔɔnʋ dɩdʋa dɩ.» Ba ma lǝr-o ba wɩ: «Kɩ kʋlʋ maama n na bʋŋɩ n ja sɩ n kɩ tɩn.» Kaanɩm yigə tu wʋm ma ta o wɩ: «Yagɩ-na sɩ dɩ́ bwe Baŋa-Wɛ sɩ dɩ́ lwarɩ DƖ wʋbʋŋa.» 37 Sooli ma bwe Wɛ o wɩ: «A ja najara a jeeri Filisi tiinə bam sɩ n pa dɩ́ di-ba na?» Baŋa-Wɛ maa wʋ lǝr-o dɩntʋ dɛ dɩm nɩ.
38 Kʋ ma pa Sooli ta dɩ Yisɩrayɛlɩ jar-kərə yigǝ tiinǝ bam o wɩ: «Á ba-na yo sɩ dɩ́ lwarɩ lwarɩm dwi dɔɔ mʋ dɩ́ kɩ zɩm. 39 A dugi dɩdaanɩ Ŋwɩa Tu Baŋa-Wɛ na paɩ Yisɩrayɛlɩ tiinə di ba najara tɩn a wɩ: wʋlʋ maama na kɩ lwarɩm dɩm tɩn wʋ́ tɩ mʋ. Kʋ na maŋɩ kʋ yɩ amʋ bu Zonatan dɩ, o bá lu.» O na tagɩ kʋntʋ tɩn, ba maama wʋnɩ nɔɔn-nɔɔnʋ wʋ ləri taanɩ.
40 Sooli laan ma ta dɩ Yisɩrayɛlɩ jar-kərə bam o wɩ: «Abam maama ve-na dáa á zɩgɩ kɔgɔ dɩdʋa, sɩ amʋ dɩ a bu Zonatan dɩ zɩgɩ yo seeni.» Nɔɔna bam ma sɛ yɩ ba wɩ: «Kɩ kʋlʋ nmʋ na bʋŋɩ n ja sɩ n kɩ tɩn.» 41 Sooli ma loori Yisɩrayɛlɩ tiinə Baŋa-Wɛ dɩm o wɩ: «Popo, brɩ-nɩ woŋo bɛŋwaanɩ n na wʋ ləri dɩbam loro kʋm zɩm tɩn. Kʋ na yɩ amʋ, naa a bu Zonatan yigə mʋ, pa Yurim kandwɛ dɩm brɩ. Kʋ nan na yɩ Yisɩrayɛlɩ tiinə kɔgɔ kʋm yigə mʋ, sɩ n pa Tumim kandwɛ dɩm brɩ.»a Jɔrɔ kʋm ma ja Zonatan dɩ Sooli, yɩ kʋ yagɩ Yisɩrayɛlɩ tiinə kɔgɔ kʋm. 42 Sooli daa ma ta o wɩ: «Laan pa Wɛ kuri amʋ dɩ a bu Zonatan tɩtarɩ nɩ.» Jɔrɔ kʋm ma lɩ Zonatan.
43 Sooli laan ma bwe o bu wʋm o wɩ: «Nmʋ kɩ bɛɛ mʋ n sa cwǝŋǝ?» Zonatan ma ta o wɩ: «Amʋ mɛ a nacəgə ni mʋ a laŋɩ tʋʋrʋ fɩnfɩɩn a di. Kʋntʋ tɩn, a nan maŋɩ sɩ a tɩ mʋ na?» 44 Sooli ma ta o wɩ: «Zonatan, lɛɛrʋ taa wʋ amʋ yuu nɩ nɩnɛɛnɩ a na wʋ pɛ n tɩ!»
45 Yisɩrayɛlɩ jar-kərə bam ma ta dɩ Sooli ba wɩ: «Kʋntʋ bá kɩ! Kʋ daɩ Zonatan mʋ jaanɩ wɔnɔ-kamunu kʋntʋ o ba o pa dɩbam Yisɩrayɛlɩ tiinə bam na? Dɩbam dugi dɩ ŋwɩa Tu Baŋa-Wɛ yɩrɩ dɩm nɩ Zonatan yuuyuǝ dɩdʋa tɩtɩ bá gɔ o yuu nɩ. Kʋ yɩ Wɛ mʋ zən‑o pa o kɩ kʋlʋ maama o na kɩ zɩm tɩn!» Kʋ dɛɛn kɩ kʋntʋ mʋ yɩ Yisɩrayɛlɩ tiinə kɔgɔ kʋm joŋi Zonatan mʋmwɛ ba yagɩ, yɩ o daa wʋ tɩgɩ.
46 Sooli laan ma yagɩ Filisi tiinə bam zəlim. Filisi tiinə bam ma joori ba tɩtɩ tɩʋ.
Sooli na di paarɩ yɩ o kɩ kʋlʋ tɩn
47 Sooli na tu o di paarɩ Yisɩrayɛlɩ tiinə baŋa nɩ o ti tɩn, o dɛɛn kɩ najara mʋ dɩdaanɩ ba dʋna bam maama. Bantʋ maa yɩ Moabɩ tiinə, dɩ Amɔn tiinə, kʋ wǝli dɩ Edɔm dwi tiinə bam, dɩ pwa balʋ na te Zoba laŋa kam, dɩdaanɩ Filisi tiinə bam. O dɛɛn na jeeri balʋ maama tɩn, o yǝni o di-ba mʋ. 48 Kʋ ta na yɩ Amalɛkɩ tiinə bam, o tiini o kɩ baarɩ o wanɩ-ba. Kʋ ma pa o joŋi Yisɩrayɛlɩ tiinə bam o yagɩ balʋ maama dɛɛn na jɩgɩ-ba ba vrɩ tɩn jɩŋa nɩ.
49 Sooli dɛɛn jɩgɩ bəkəri sɩtɔ mʋ: Zonatan, dɩ Isivi, dɩdaanɩ Malikisua. O bukɔ-nakwɩn yɩrɩ mʋ yɩ Merabɩ, bukɔ-balaŋa kam yɩrɩ maa yɩ Mikalɩ. 50 O kaanɩ wʋm dɛɛn yɩ Ahimaazi bukɔ mʋ, o yɩrɩ yɩ Ahinoam. Nera bu Abenɩra dɛɛn mʋ yɩ Sooli jar-kərə bam yigə tu wʋm. Nera nan ta yɩ Sooli ko cʋrʋ mʋ. 51 Sooli ko Kisi dɩdaanɩ Abenɩra ko Nera maama ko mʋ yɩ Abɩyɛlɩ.
52 Maŋa kalʋ maama Sooli na ŋwɩ tɩn, tigurə zanzan ma kɩ Yisɩrayɛlɩ tiinə bam dɩdaanɩ Filisi tiinə bam laŋa nɩ. Sooli dɛɛn na maanɩ nɩ nɔɔnʋ wʋlʋ dana yɩ o ta jɩgɩ baarɩ, oó pa kʋ tu da o zʋ o jar-kərə kɔgɔ kʋm wʋnɩ mʋ.