Sooli vɩn Baŋa-Wɛ ni dɩm
13
Sooli dɛɛn jɩgɩ bɩna fiintɔa mʋ yɩ o puli sɩ o di paarɩ. O dɛɛn nan di paarɩ Yisɩrayɛlɩ tiinə baŋa nɩ bɩna fiinna-yale mʋ.b2 Sooli dɛɛn ma kuri Yisɩrayɛlɩ tiinə bam wʋnɩ nɔɔna mʋrrʋ tɩtɔ sɩ ba taa wʋ o tee nɩ. Nɔɔna mʋrrʋ tɩle ma maŋɩ Mikimasɩ nɩ, kʋ wǝli dɩ Betɛlɩ pweeru laŋa kam nɩ. Nɔɔna mʋrʋ dɩ maa wʋ o bu Zonatan tee nɩ. Bantʋ ma vu Gibea na wʋ Bɛnzamɛn laŋa kam nɩ tɩn. Sooli ma pa Yisɩrayɛlɩ tiinə jar-kərə balʋ maama na daarɩ tɩn joori ba sam.
3 Zonatan dɛɛn ma vu Gibea mɛ Filisi tiinə jar-kərə kɔgɔ kʋdoŋ na gilimi tɩn. O na yi da tɩn, o ma jeeri-ba dɩ najara yɩ Filisi tiinə bam maama ni kʋ ŋwa. Sooli dɩ ma pa ba wu nabwaanʋ Yisɩrayɛlɩ tɩʋ kʋm maama wʋnɩ sɩ Ebru tiinə bam nuŋi najara kǝm ŋwaanɩ. 4 Yisɩrayɛlɩ tiinə bam ma ni nɩ Sooli mʋ wanɩ Filisi tiinə jar-kərə kɔgɔ kʋlʋ na wʋ Gibea nɩ tɩn o zəli. Kʋntʋ nan mʋ pɛ Yisɩrayɛlɩ tiinə bam kikiə maama lo Filisi tiinə bam mʋmwa nɩ. Yisɩrayɛlɩ tiinə jar-kərə bam maama ma sɛ Sooli kwǝrǝ kam yɩ ba vu ba jeer-o Giligalɩ nɩ.
5 Filisi tiinə bam dɩ dɛɛn ma bəŋi ba jar-kərə bam sɩ ba nuŋi ba zaŋɩ najara dɩdaanɩ Yisɩrayɛlɩ tiinə bam. Ba najara tərikooru dɛɛn yɩ mʋrrʋ tɩtɔ (3,000) mʋ. Balʋ na diini siseŋ-nɔɔna tɩn maa yɩ mʋrrʋ bardʋ (6,000). Ba jar-kərə maama ni dɛɛn warɩ dɩ ga dɩ ti. Ba daga zanzan nɩnɛɛnɩ nɩnɩʋ ni kasʋlʋ mʋ te. Ba ma tɔgɩ daanɩ ba vu Mikimasɩ ba cwi ba vwə da. Je sɩm kʋntʋ jeeri Bɛt-Avɛn wa-puli seeni mʋ. 6 Yisɩrayɛlɩ tiinə bam ma na nɩ kʋ tiini kʋ zʋ ba yɩra, Filisi tiinə bam na jɩgɩ-ba ba pɩɩnɩ tɩn ŋwaanɩ. Ba ma duri ba vu ba səgi pweeru bɔɔna wʋnɩ, dɩ punnu wʋnɩ, dɩ gugwəəru wʋnɩ, dɩ gwəənu wʋnɩ, dɩ vʋla wʋnɩ sɩ ba wanɩ ba lu. 7 Ba badonnǝ brɩ ba bɛ Zʋrdɛn bugə kam yɩ ba zʋ Gadɩ dɩdaanɩ Galadɩ laŋa kam nɩ mʋ.
Sooli ma maŋɩ Giligalɩ nɩ. Fʋʋnɩ ma ja nɔɔna balʋ na wʋ o tee nɩ tɩn pa ba yɩra saɩ pɔm-pɔm. 8 O dɛɛn pɩɩnɩ mʋ sɩ o cəgi Samowɛlɩ na wʋ́ ba maŋa kalʋ tɩn. O ma cəgi da yarpɛ nɩ Samowɛlɩ na tagɩ te tɩn. Samowɛlɩ yuu na ba naɩ tɩn, Sooli nɔɔna bam laan ma puli sɩ ba jagɩ ba daarɩ‑o. 9 Sooli ma ga ga o wɩ: «Ja-na zwɛɛm pɛɛra yam dɩdaanɩ yazurə pɛɛra yam á ba á pa-nɩ.» O na joŋi-tɩ nɔɔna bam tee nɩ tɩn, mʋ o kwe varɩm wʋm o wʋra o zwɛ o ma o kɩ kaanɩm. 10 O na yɔɔrɩ o ti kaanɩm dɩm tɩn dɩdaanɩ Samowɛlɩ dɛ o yi da. Sooli ma vu sɩ o jeer-o o daarɩ o zaan‑o.
11 Samowɛlɩ ma bwe Sooli o wɩ: «Bɛɛ mʋ kʋntʋ n kɩa?» Sooli ma lǝr-o o wɩ: «Maŋa kalʋ nmʋ na pɛ n ba tɩn na yiǝ yɩ n ta wʋ tu tɩn, amʋ nɔɔna bam ya wʋra ba jagɩ ba daarɩ-nɩ. Filisi tiinə jar-kərə bam dɩ ma jeeri daanɩ Mikimasɩ nɩ sɩ ba zaŋɩ najara dɩdaanɩ dɩbam. 12 Amʋ ya ta maa liǝ nɩ baá ba Giligalɩ yo seeni ba zaŋɩ a baŋa nɩ, yɩ a ta wʋ loori Baŋa-Wɛ zǝnǝ najara yam ŋwaanɩ. Kʋntʋ tɩn amʋ bʋŋɩ nɩ kʋ fɩɩn mʋ sɩ a kɩ lɩla a kɩ kaanɩm dɩm.»
13 Samowɛlɩ ma ta o wɩ: «Nmʋ tiini n tʋŋɩ jwərim zanzan. Nmʋ wʋ tɔgɩ ni dɩlʋ nmʋ Tu Baŋa-Wɛ na pɛ‑m sɩ n da tɩn. N ya na dɛ-dɩ dɩ cɩga, Baŋa-Wɛ yaá pa nmʋ dɩ n dwi dɩm di paarɩ Yisɩrayɛlɩ tiinə baŋa nɩ, sɩ kʋ taa ve wuu. 14 Nan nii! N paarɩ dɩm daa bá taa wʋra taan. Baŋa-Wɛ maŋɩ DƖ beeri DƖ na nɔɔnʋ wʋlʋ kikiə na dɛ DƖ wʋʋ tɩn, yɩ DƖ laan wʋ́ pa wʋntʋ mʋ taa nii DƖ nɔɔna bam baŋa nɩ, nmʋ na wʋ dɛ Baŋa-Wɛ ni dɩm tɩn ŋwaanɩ.»
15 Samowɛlɩ ma zɩgɩ Giligalɩ nɩ o kwe o cwǝŋǝ o maa kɛa. Nɔɔna balʋ ta na wʋ Sooli tee nɩ tɩn ma tɔgɩ dɩd-o ba vu Gibea na wʋ Bɛnzamɛn laŋa kam nɩ tɩn. Sooli ma jeeli ba ni daanɩ, o na nɩ ba ta yi nɔɔna biə-yardʋ (600).
16 Sooli dɩ o bu Zonatan dɩdaanɩ ba kɔgɔ kʋm maama maa maŋɩ Bɛnzamɛn tɩʋ Gibea nɩ ba tigə. Filisi tiinə bam dɩ maa maŋɩ Mikimasɩ nɩ ba tigə. 17 Filisi tiinə jar-kərə badonnǝ ma zɩgɩ ba na gilimi mɛ tɩn nɩ ba pɔɔrɩ ba tɩtɩ kuni bɩtɔ. Ba maa yǝni ba nuŋi sɩ ba taa magɩ ba dʋna yɩ ba vrɩ ba wǝǝnu. Pʋpwara dɩdʋa dɛɛn kwe Ofera cwǝŋǝ kam na wʋ Suwalɩ laŋa kam seeni tɩn mʋ. 18 Ba pʋpwara wʋdoŋ dɩ ma kwe Bɛte-Horon cwǝŋǝ kam, kʋ daarɩ yɩ pʋpwara kalʋ na daarɩ tɩn dɩ kwe cwǝŋǝ kalʋ na ve sisəm dɩm laŋa nɩ, mɛ na maŋɩ dɩ Zeboyim bolo kʋm dɩ kagʋa kam tɩn.
19 Kantʋ maŋa kam nɩ, yarʋ tǝrǝ Yisɩrayɛlɩ tiinə tɩɩnɩ dɩm maama wʋnɩ. Bɛŋwaanɩ, Filisi tiinə bam mʋ dɛɛn ya tagɩ ba wɩ: «Dɩ́ yɩ pa Ebru tiinə bam pwələ sɩ ba kɩ sʋ-lwaanʋ dɩdaanɩ cicwə ba ma daanɩ dɩbam.» 20 Kʋntʋ ŋwaanɩ kʋ fɩɩn mʋ sɩ Yisɩrayɛlɩ nɔɔna maama vu Filisi tiinə bam te sɩ ba dwəri ba vaanɩ, dɩ ba doorə, dɩ ba sʋkwaarʋ, dɩ ba sʋnɩ maama. 21 Kʋ na yɩ vaanɩ, Filisi tiinə bam maa yǝni ba pa ba ŋwɩ səbu-dalɩ dɩdʋa sɩ ba dwəri-dɩ ba pa-ba. Kʋ daarɩ kʋ na yɩ doorə, dɩ pingaasa, dɩ cicwə, baá ŋwɩ səbu-dala yale mʋ.
22 Kʋntʋ ŋwaanɩ, dɛ dɩm na yi sɩ Yisɩrayɛlɩ tiinə bam kɩ najara yam tɩn, nɔɔnʋ wʋlʋ maama na wʋ Sooli dɩ o bu Zonatan kwaga nɩ tɩn ba jɩgɩ sʋ-lɔŋɔ naa cicwe o jɩŋa nɩ. Sooli dɩ Zonatan yɩranɩ mʋ jɩgɩ najara zɩla yam kʋntʋ.
Zonatan zaŋɩ najara dɩ Filisi tiinə
23 Filisi tiinə bam dɛɛn ma pa ba jar-kərə kɔgɔ kʋdoŋ vu ba cɩ Mikimasɩ zwǝǝnu cwǝŋǝ kam.