Samowɛlɩ banɩ Yisɩrayɛlɩ tiinə bam
12
Samowɛlɩ ma ŋɔɔnɩ dɩ Yisɩrayɛlɩ tiinə bam o wɩ: «Amʋ sɩɩnɩ a cəgi abam kwǝrǝ woŋo kʋlʋ maama á na tagɩ dɩ amʋ tɩn baŋa nɩ. A ma tiŋi pɛ sɩ o taa nii á baŋa nɩ. 2 Kʋ zɩgɩ a nɔn-dʋnnɩ maŋa nɩ mʋ a wʋ abam yigə nɩ sɩ kʋ ba kʋ yi zɩm. Lele kʋntʋ a tiini a kwɩn yɩ a yuu pɩɩrɩ. Amʋ biə laan yɩ baara mʋ, yɩ ba wʋ á wʋnɩ. Pɛ wʋm laan ləri amʋ yuu nɩ mʋ, sɩ o taa nii á baŋa nɩ. 3 Nii-na nɩ da, a jalɩ a tɩtɩ mʋ Baŋa-Wɛ dɩdaanɩ o pɛ wʋm yigə nɩ. Ta-na cɩga: abam wɔɔ mʋ amʋ vrɩ o na-bɩa naa o bɩnaga? Wɔɔ mʋ a nan kɩ-o swan a pini? A bɛɛsɩ wɔɔ mʋ abam wʋnɩ? Wɔɔ mʋ sugi amʋ yiǝ dɩ pɛɛrɩ sɩ kʋ kwǝli o kǝm-balɔrɔ? Amʋ na tusi te kʋlʋ maama wʋnɩ, sɩ á ta á brɩ-nɩ, sɩ a joori a yiri-tɩ a pa abam.» 4 Nɔɔna bam ma lǝr-o ba wɩ: «Kɔtaa! Nmʋ wʋ pini dɩbam, n ma n wʋ bɛɛsɩ dɩbam. Nmʋ ta wʋ fɔgɩ n joŋi vwan pɛɛrɩ nɔɔnʋ tee nɩ.»5 Samowɛlɩ daa ma ləri o wɩ: «Zɩm dɛ dɩntʋ nɩ, Baŋa-Wɛ dɩ DƖ pɛ wʋm zɩgɩ amʋ cɩga kam kwaga nɩ sɩ abam wʋ nɛ amʋ tusim kʋlʋkʋlʋ baŋa nɩ.» Nɔɔna bam ma ləri ba wɩ: «Ɛɛn! Baŋa-Wɛ zɩgɩ yɩ DƖ niə.»
6 Samowɛlɩ daa ma ta dɩ nɔɔna bam o wɩ:
«Baŋa-Wɛ dɛɛn mʋ kuri Moyisi dɩdaanɩ Arɔn yɩ DƖ tɔgɩ bantʋ baŋa nɩ DƖ ja abam kwə bam DƖ nuŋi Ezipi nɩ.a 7 Taá zɩgɩ kʋntʋ, sɩ a lagɩ a bwɛ abam mʋ Baŋa-Wɛ yigə nɩ, sɩ kʋ tɔgɩ dɩdaanɩ Baŋa-Wɛ na kɩ wo-kamunnu tɩlʋ maama DƖ ma joŋi abam dɩ á kwə bam DƖ yagɩ tɩn.b 8 Zakɔbɩ dɩ o dwi tiinə dɛɛn na jǝni Ezipi nɩ tɩn, mʋ abam nabaara bam dɛɛn keeri ba loori Baŋa-Wɛ. Wɛ ma pa Moyisi dɩ Arɔn vrɩ-ba ba ja nuŋi Ezipi nɩ ba ba ba zʋʋrɩ tɩga kantʋ á laan na te tɩn nɩ.
9 Dɩ kʋntʋ dɩ, á nabaara bam ma ba ba swe ba Tu Baŋa-Wɛ dɩm swiə. Kʋntʋ ŋwaanɩ mʋ DƖ kɩ-ba ba dʋna jɩŋa nɩ. Kʋ ma pa Sizera wʋlʋ na yɩ Hazɔrɩ tɩʋ jar-kərə bam yigə tu tɩn, dɩ Filisi tiinə bam, dɩdaanɩ Moabɩ pɛ wʋm dɩ o nɔɔna bam wanɩ á nabaara bam ba di najara wʋnɩ.c 10 Á kwə bam dɛɛn daa ma keeri ba loori Baŋa-Wɛ yɩ ba wɩ: ‹Dɩbam tusi mʋ. Dɩ́ pipiri dɩ́ yagɩ Baŋa-Wɛ zulə yɩ dɩ́ daarɩ dɩ́ zuli Baalɩ dɩdaanɩ Asetarɩ jwǝnǝ yam. Nan joŋi dɩbam n yagɩ dɩ́ dʋna jɩŋa nɩ, sɩ dɩ́ laan wʋ́ joori dɩ́ taa zuli‑m.› 11 Baŋa-Wɛ ma kuri Zidɩɔn, dɩ Barakɩ, dɩ Zefete, dɩdaanɩ amʋ, Samowɛlɩ o pa abam. Wɛ ma tɔgɩ nɔɔna bam kʋntʋ baŋa nɩ DƖ joŋi abam o yagɩ á dʋna bam maama jɩŋa nɩ, sɩ á taá waɩ á zʋʋrɩ dɩ yazurə.
12 Abam nan na yɔɔrɩ á na Amɔn tiinə pɛ Nahasɩ na lagɩ o zaŋɩ najara dɩ abam tɩn, mʋ á tagɩ dɩ amʋ á wɩ: ‹Lagɩ pɛ n pa dɩbam, sɩ o taa nii dɩ́ baŋa nɩ.› Á tagɩ kʋntʋ yɩ abam Tu Baŋa-Wɛ dɩm ya mʋ maŋɩ DƖ yɩ abam pɛ. 13 Á nan nii-na á pɛ wʋm mʋ tɩntʋ. O maa yɩ pɛ wʋlʋ á na loori Wɛ o ŋwaanɩ yɩ Baŋa-Wɛ kur‑o DƖ pa abam tɩn. 14 Nan sɩɩnɩ-na yiǝ á taá kwarɩ Baŋa-Wɛ sɩ á daarɩ á taá zuli‑DƖ yɩ á tɔgɩ DƖ cwe sɩm. Yɩ sɩn-na á zwa á vɩn DƖ niə yam. Abam maama dɩ á pɛ wʋm na tɔgɩ á Tu Baŋa-Wɛ kʋntʋ doŋ, kʋʋ́ taa lana kʋ pa abam. 15 Kʋ daarɩ á na pɛ á zwa sɩn, yɩ á vɩn sɩ á sɛ DƖ niə yam, Baŋa-Wɛ dɩ wʋ́ lɔ abam dɩ á pɛ wʋm kwaga nɩ mʋ.
16 Nan taá zɩgɩ á na zɩgɩ mɛ kʋntʋ tɩn, sɩ Baŋa-Wɛ wʋ́ kɩ wo-kamunu á yibiyə nɩ lele kʋntʋ. 17 Maŋa kantʋ daɩ tɩ-pwəŋə mʋ na? Amʋ nan wʋ́ loori Baŋa-Wɛ sɩ o pa dʋa ba ka taa baga ka wuurǝ yɩ ka nɩ. Abam na nɛ dʋ-fara kʋm, á wʋ́ maanɩ nɩ á tiini á sa cwǝŋǝ yɩ á cɔgɩ Baŋa-Wɛ yigə mʋ, dɩ á na tagɩ nɩ á lagɩ pɛ tɩn.»
18 Samowɛlɩ na sɩɩnɩ o loori Baŋa-Wɛ tɩn, Wɛ ma pa dʋ-fara ba ka baga yɩ ka nɩ dɛ dɩm kʋntʋ nɩ. Kʋ ma pa nɔɔna bam maama tiini ba kwarɩ Baŋa-Wɛ dɩdaanɩ Samowɛlɩ. 19 Ba ma ta dɩ Samowɛlɩ ba wɩ: «Popo, loori n Tu Baŋa-Wɛ dɩm təŋə n pa dɩbam sɩ dɩ́ yɩ tɩ. Dɩbam laan sɩɩnɩ dɩ́ lwarɩ nɩ dɩ́ lwarɩm dɩm daga, yɩ dɩ́ ta wǝli ya wʋnɩ mʋ dɩdaanɩ dɩ́ na wɩ dɩ́ lagɩ pɛ tɩn.»
20 Samowɛlɩ laan ma lǝri-ba o wɩ: «Cɩga tɩn, abam sɩɩnɩ á kɩ wo-balɔrɔ. Nan yɩ taá kwarɩ-na fʋʋnɩ. Kʋ laan nan maŋɩ sɩ á taá tɔgɩ Baŋa-Wɛ dɩ á wʋʋ maama mʋ, sɩ á daa yɩ lɔ DƖ kwaga nɩ. 21 Yɩ zuli-na jwǝnǝ. Yantʋ ba jɩgɩ dam, ya nan bá wanɩ abam ya joŋi ya yagɩ cam wʋnɩ. Ya yɩ wo-yɔɔrʋ yɩranɩ mʋ. 22 Baŋa-Wɛ bá sɛ DƖ vɩn abam balʋ na yɩ DƖ nɔɔna bam tɩn, DƖ tɩtɩ yɩrɩ kamunu kʋm ŋwaanɩ. Bɛŋwaanɩ, Dɩntʋ mʋ kuri abam sɩ DƖ pa á taá yɩ DƖ tɩtɩ nɔɔna. 23 Sɩ kʋ na yɩ amʋ, a ta wʋ́ taa loori Baŋa-Wɛ a pa abam. Kʋ ya na daɩ kʋntʋ, a yaá kɩ lwarɩm mʋ.d Amʋ za wʋ́ taa brɩ abam cwə-laarʋ tɩlʋ na maŋɩ sɩ á tɔgɩ tɩn. 24 Taá kwarɩ-na Baŋa-Wɛ sɩ á daarɩ á taá zuli‑DƖ dɩ á bɩcarɩ maama. Guli-na wo-kamunnu tɩlʋ maama DƖ na kɩ DƖ pa abam tɩn. 25 Nan taá ye-na nɩ: abam dɩ á pɛ wʋm na misi á yum kǝm-balwaarʋ wʋnɩ, Wɛ wʋ́ pa á yɩra maama saarɩ tɩga baŋa nɩ mʋ.»