Sooli wanɩ Amɔn tiinə bama
11
Amɔn tiinə pɛ Nahasɩ dɛɛn lagɩ o jar-kərə o vu Yabɛsɩ Galadɩ, sɩ o li tɩʋ kʋm kʋntʋ o joŋi o taa te. Tɩʋ kʋm baara bam ma ta dɩ Nahasɩ ba wɩ: «Nan pa dɩ́ goni ni daanɩ, sɩ dɩ́ wʋ́ sɛ sɩ n ta n te dɩbam.» 2 O ma lǝri-ba o wɩ: «Amʋ beeri cavɩɩra mʋ sɩ a kɩ Yisɩrayɛlɩ tiinə bam yɩra nɩ. Kʋntʋ tɩn, á na lagɩ sɩ dɩ́ goni ni daanɩ, kʋ nan maŋɩ sɩ a pi a lɩ nɔɔnʋ maama jazɩm yi mʋ yo seeni, sɩ a daarɩ a goni ni dɩ abam.» 3 Tɩʋ kʋm nakwa bam ma ta ba wɩ: «Nan pa dɩbam pwələ sɩ dɩ́ kwe da yarpɛ dɩ́ tʋŋɩ kwǝrǝ Yisɩrayɛlɩ tɩga kam maama nɩ dɩ́ beeri zǝnǝ. Dɩ́ na beeri dɩ́ pwəli yɩ vrɩnʋ na wʋ tu sɩ o vrɩ dɩbam n jɩŋa nɩ o yagɩ, dɩ́ laan wʋ́ ba dɩ́ sɛ‑m.»4 Nɔɔna badonnǝ ma ja kwǝrǝ kam kʋntʋ ba vu ba yi Gibea. Sooli tɩʋ kʋm mʋ kʋntʋ. Ba ma ta taanɩ dɩm ba dɩ Gibea tiinə bam zwa nɩ. Ba dɩ na ni tɩn, ba ma kaasɩ bɔgɩ-bɔgɩ. 5 Kʋntʋ dɩ Sooli ya zɩgɩ o kara nɩ mʋ o kalɩ o nabɛ o maa joori sɔŋɔ. O na ni sɔɔ kʋm tɩn, mʋ o bwe o wɩ: «Bɛɛ mʋ kɩ nɔɔna bam yɩra nɩ yɩ ba kaasɩ kʋntʋ ŋɔɔ?» Ba ma lwǝni kwǝrǝ kalʋ na nuŋi Yabɛsɩ ka ba tɩn ba brɩ-o.
6 Sooli na ni tɩn, Baŋa-Wɛ Joro ma tu o baŋa dɩ dam. O banɩ tiini dɩ zaŋɩ zanzan 7 O ma ja o nabɛ sɩm sɩle o gʋ. O ta ma tʋrɩ tʋrɩ sɩ nwana yam murə-murə, yɩ o pa nɔɔna ja-ya ba jagɩ sɩ ya yi Yisɩrayɛlɩ tiinə maama. Nɔɔna bam na yi je sɩlʋ maama, baá ta tɩntʋ mʋ ba wɩ: «Sooli dɩ Samowɛlɩ mʋ wʋra ba laɩ jar-kərə ba kɩ daanɩ. Wʋlʋ na wʋ sɛ sɩ o nuŋi o tɔgɩ ba kwaga, ba lagɩ ba kɩ kʋ tu nɩ ba na kɩ te dɩ nabɛ sɩntʋ tɩn mʋ.» Fʋʋnɩ ma tiini dɩ zʋ Yisɩrayɛlɩ tiinə bam Baŋa-Wɛ ŋwaanɩ. Ba maama jilli ma nuŋi sɩ ba vu ba zaŋɩ najara. 8 Sooli ma pa nɔɔna bam maama jeeri Bezeki nɩ. Ba na jeeli ba ni tɩn, Yisɩrayɛlɩ jar-kərə bam dɛɛn yɩ nɔɔna mʋrrʋ biə-yatɔ (300,000) mʋ. Zuda jar-kərə bam maa yɩ nɔɔna mʋrrʋ fiintɔ (30,000).
9 Sooli dɩ o kwaga nɔɔna bam ma tʋŋɩ Yabɛsɩ tɩʋ nɔɔna sɩ ba joori ba tɩʋ kʋm dɩ kwǝrǝ kantʋ: «Jwa wɩ-brɩ maŋa nɩ, dɩ́ wʋ́ ba dɩ́ joŋi abam dɩ́ yagɩ.» Nɔɔna bam na jaanɩ kwǝrǝ kam ba yi Yabɛsɩ Galadɩ yɩ ba ta tɩn, tɩʋ kʋm tiinə wʋʋ ma poli zanzan. 10 Dɩ kʋ dɩ, ba ta tʋŋɩ kwǝrǝ Amɔn tiinə bam tee nɩ mʋ wɩ: «Kʋ ta wʋ á tee nɩ. Dɩ́ jwa wʋ á jɩŋa nɩ, sɩ á kɩ dɩbam á na bʋŋɩ te tɩn.»
11 Tɩga na lagɩ ka pʋʋrɩ tɩn, mʋ Sooli pɔɔrɩ o jar-kərə bam kuni bɩtɔ. O laan ma pa ba nuŋi yɩ ba da ba zaŋɩ Amɔn tiinə kɔgɔ kʋm baŋa nɩ. Ba ma wanɩ-ba, yɩ ba gʋ ba zanzan sɩ kʋ vu kʋ yi wɩa brɩm maŋa. Balʋ fɩɩn na lugi tɩn ma duri ba jagɩ je maama nɩ. Nɔɔn-nɔɔnʋ daa wʋ tɔgɩ dɩ o doŋ.
12 Yisɩrayɛlɩ tiinə bam ma yi Samowɛlɩ te ba wɩ: «Nɔɔna balʋ na gooni Sooli yɩ ba wɩ: kʋ ya wʋ maŋɩ sɩ o di paarɩ dɩbam baŋa nɩ tɩn, ba wʋ yən mʋ? Nan pa dɩbam cwǝŋǝ sɩ dɩ́ gʋ-ba!» 13 Sooli maa wʋ sɛ yɩ o wɩ: «Zɩm dɛ dɩntʋ, yɩ gʋ-na nɔɔn-nɔɔnʋ! Bɛŋwaanɩ tɩn, kʋ yɩ zɩm dɛ dɩm mʋ Baŋa-Wɛ joŋi Yisɩrayɛlɩ tiinə bam DƖ yagɩ.»
14 Samowɛlɩ laan ma ta dɩ nɔɔna bam o wɩ: «Pa dɩ́ joori-na Giligalɩ sɩ dɩ́ kwɛ Sooli paarɩ dɩm sɩ dɩ da cwǝŋǝ nɔɔna maama yiǝ nɩ.» 15 Ba maama ma sɩɩnɩ ba vu Giligalɩ. Ba ma fɔgɩ ba tiŋi Sooli paarɩ dɩm wara-je sɩm nɩ, yɩ ba daarɩ ba kɩ yazurə pɛɛra ba ma kɩ kaanɩm ba pa Baŋa-Wɛ. Je sɩm kʋntʋ nɩ mʋ Sooli dɩ Yisɩrayɛlɩ tiinə bam maama dɛɛn cakɩ dɩ wʋpolo.