10
Ba na zɩgɩ da kʋntʋ tɩn, Samowɛlɩ laan ma kwe Olivi nugə kabɔɔ. O ma lo nugə kam Sooli yuu nɩ yɩ o daarɩ o kukwǝr-o.a O ma ta dɩd-o wɩ:«Baŋa-Wɛ mʋ kwɛ nmʋ tɩntʋ, yɩ DƖ tiŋi‑m sɩ n ta n yɩ o nɔɔna Yisɩrayɛlɩ tiinə bam yigə tu. [Nmʋ wʋ́ ta n nii ba baŋa nɩ yɩ n daarɩ n joŋi-ba ba dʋna maama jɩŋa nɩ n yagɩ. Tɩntʋ nan mʋ wʋ́ brɩ-m nɩ Baŋa-Wɛ sɩɩnɩ DƖ tiŋi‑m sɩ n ta n te DƖ nɔɔna bam:]b 2 Zɩm, nmʋ na nuŋi amʋ tee nɩ, yɩ n na kɛ n yi Bɛnzamɛn laŋa sisəm dɩm, Rasɛɛlɩ yibeeli dɩm na wʋ Zeliza nɩ tɩn, nń jeeri baara bale. Bantʋ maa wʋ́ ta ba brɩ-m nɩ: ba joori ba na bɩnɛ sɩlʋ n ya na kaagɩ n beeri tɩn. Ba ta wʋ́ pa n maanɩ nɩ n ko wʋm daa ba jɩgɩ sɩ liǝ, sɩ o laan liǝ mʋ nmʋ tɩtɩ ŋwaanɩ yɩ o bwe o wɩ: ‹Amʋ wʋ́ kɩ tɛ mʋ sɩ a joori a na a bu wʋm?›
3 Nmʋ na zɩgɩ dáanɩ yɩ n vu n yi Tabɔɔrɩ tiu kʋm, n ta wʋ́ jeeri baara batɔ na maa ve Betɛlɩ sɩ ba kɩ kaanɩm ba pa Wɛ. Ba dɩdʋa wʋ́ taa jɩgɩ bʋ-balɩ sɩtɔ, dɩdʋa maa ze dɩpwa yatɔ, yɩ batɔ tu wʋm dɩ jɩgɩ lɔɔ dɩ kʋ wʋʋ dɩvɛn bam. 4 Ba na jeeri‑m kʋntʋ, baá warɩ‑m, yɩ ba daarɩ ba pa‑m dɩpwa yale. Kʋ na kɩ kʋntʋ, sɩ n joŋi dɩpwa yam ba jɩŋa nɩ.
5 N laan na zɩgɩ dáanɩ, nń vu n yi Wɛ zoŋo kʋm na wʋ Gibea seeni tɩn. Dáanɩ mʋ Filisi tiinə jar-kərə bam jɩgɩ tigisim je. Nmʋ na yi tɩʋ kʋm ni, nń jeeri Wɛ nijoŋnə badonnǝ kɔgɔ na zɩgɩ zoŋo kʋm wara-je sɩm nɩ ba maa tuǝ. Ba maa wʋ́ taa taɩ kwaanʋ dwi dwi, yɩ ba magɩ sɩnyɛ, ba daarɩ ba taa wu wui. Ba maa wʋ́ taa veǝ yɩ ba pwərisə. 6 Baŋa-Wɛ Joro laan wʋ́ ba nmʋ baŋa dɩdaanɩ dam pa n dɩ wǝli ba wʋnɩ n tɔgɩ n ta n pwərisə. Kʋntʋ baŋa nɩ n lagɩ n ləri mʋ n ji nɔn-gaa. 7 Wo-kɩnkagɩla yam kʋntʋ maama na sɩɩnɩ ya kɩ nmʋ yɩra nɩ, kʋ laan maŋɩ sɩ n kɩ kʋlʋ maama na wʋ́ su n yi tɩn, sɩ Wɛ wʋra dɩ nmʋ.
8 Nmʋ laan ma n wʋ́ da yigə n vu Giligalɩ, sɩ a laan ba. Amʋ nan na tu a jeeri‑m, a laan wʋ́ kɩ zwɛɛm pɛɛra dɩdaanɩ yazurə pɛɛra a ma kaanɩ a pa Wɛ. Nmʋ maŋɩ sɩ n cəgi-nɩ da yarpɛ mʋ, sɩ a laan ba a yi‑m Giligalɩ nɩ. A na tuǝ, a laan wʋ́ brɩ-m kʋlʋ daa na wʋra sɩ n kɩ tɩn.»
Sooli jigi Yisɩrayɛlɩ tiinə pɛ
9 Sooli dɛɛn na pipiri sɩ o kɛ o daarɩ Samowɛlɩ tɩn, mʋ Baŋa-Wɛ pɛ o bɩcarɩ ləni dɩ ji bɩcarɩ-dʋʋrɩ. Dɛ dɩm kʋntʋ nɩ woŋo maama sɩɩnɩ kʋ kɩ kʋ maŋɩ dɩdaanɩ Samowɛlɩ na tagɩ te tɩn mʋ. 10 Sooli dɩdaanɩ o tɩntʋŋnʋ wʋm na dɛ ba yi Gibea tɩn, mʋ ba nɛ Wɛ nijoŋnə kɔgɔ na bɩɩnɩ sɩ ba jeeri-ba. Wɛ Joro ma ba Sooli baŋa dɩdaanɩ dam. O ma tʋ ba wʋnɩ o tɔgɩ o pwərisə. 11 Nɔɔna balʋ dɛɛn na ye Sooli faŋa tɩn ma na o na kɩ te yɩ o ŋɔɔnɩ tɩn, yɩ ba bwe daanɩ ba wɩ: «Nii-na! Bɛɛ mʋ yi Kisi bu wʋm tɩntʋ? Sooli dɩ ga tɔgɩ o wʋ nijoŋnǝ bam wʋnɩ mʋ na?»
12 Je sɩm kʋntʋ nɔɔnʋ dɩdʋa ma ta o wɩ: «Sɩ nijoŋnə bantʋ bam, á ye ba kwə na?» Kʋ maama na kɩ te tɩn dɛɛn ma lɛɛrɩ kʋ ji sinsərə nɩ: «Sooli dɩ laan tɔgɩ o wʋ Wɛ nijoŋnǝ bam wʋnɩ mʋ na?» 13 Sooli na pwərisi o ti tɩn, o laan ma bɛ o din zoŋo baŋa wara-je sɩm.
14 Sooli ko cʋrʋ wʋdoŋ dɛɛn ma na Sooli dɩ o tɩntʋŋnʋ wʋm yɩ o bwe-ba o wɩ «Abam ya ve yən mʋ?» Sooli ma ləri o wɩ: «Dɩ́ ya kaagɩ dɩ́ beeri bɩnɛ sɩm mʋ. Dɩ́ nan na wʋ nɛ-sɩ tɩn, mʋ dɩ́ ve Samowɛlɩ te.» 15 O ko cʋrʋ kʋm ma ta o wɩ: «Nan ta n brɩ-nɩ Samowɛlɩ na tagɩ kʋlʋ dɩ nmʋ tɩn.» 16 Sooli ta ma ləri o wɩ: «O pɛ dɩ́ lwarɩ nɩ ba joori ba na bɩnɛ sɩm mʋ.» Kʋ daarɩ, Sooli wʋ sɛ sɩ o ta kʋlʋ Samowɛlɩ na ŋɔɔnɩ dɩd-o paarɩ dim ŋwaanɩ tɩn.
17 Samowɛlɩ dɛɛn ma bəŋi Yisɩrayɛlɩ tiinə bam maama sɩ ba ba Mitspa ba jeeri Baŋa-Wɛ yigə nɩ.c 18 Ba na lagɩ daanɩ tɩn, o ma ta dɩ ba o wɩ: «Yisɩrayɛlɩ tiinə Baŋa-Wɛ dɩm kwǝrǝ mʋ tɩntʋ: Yisɩrayɛlɩ tiinə bam, amʋ mʋ jaanɩ abam a nuŋi Ezipi nɩ a ba yo seeni. Amʋ ta ma vrɩ abam Ezipi tiinə jɩŋa nɩ, yɩ a joŋi abam a yagɩ tɩɩnɩ dɩlʋ maama dɛɛn na bɛɛsɩ abam tɩn jɩŋa nɩ. 19 Abam Tu Wɛ yɩ dɩlʋ na yǝni o vrɩ abam á cam dɩ á yaara maama wʋnɩ tɩn mʋ. Dɩ kʋntʋ dɩ, abam ta lɔgɩ Wɛ kwaga nɩ mʋ yɩ á wɩ: á lagɩ pɛ o taa wʋ á yigə nɩ. Kʋntʋ ŋwaanɩ nan ba-na á kikili á tɩtɩ Baŋa-Wɛ yigə nɩ, dwi dɩ dwi, sɔ-yuu dɩ sɔ-yuu.»
20 Samowɛlɩ laan ma bəŋi Yisɩrayɛlɩ dwiə yam maama sɩ ba nuŋi dwi dɩ dwi ba zɩgɩ o yigə nɩ. Wɛ ma kuri Bɛnzamɛn dwi dɩm ba maama wʋnɩ. 21 Samowɛlɩ daa ma pa Bɛnzamɛn dwi dɩm titwəni dɩ yi, sɔ-yuu dɩ sɔ-yuu. Wɛ ma kuri Matiri sɔ-yuu kʋm ba wʋnɩ. Sɩ kʋ kweeli tɩn, Kisi bu Sooli mʋ Wɛ kuri Matiri sɔ-yuu kʋm wʋnɩ. Nɔɔna dɛɛn ma vu ba beer‑o ba ga. 22 Ba na wʋ nɛ‑o tɩn, ba ta ma bwe Baŋa-Wɛ ba wɩ: «Wʋntʋ na sɩɩnɩ o yɩ nɔɔnʋ wʋm, o tu yo seeni na?» Baŋa-Wɛ ma ləri DƖ wɩ: «Ve-na á nii. O səgi o tɩtɩ mʋ zɩla yam wʋnɩ.»
23 Nɔɔna dɛɛn ma duri ba vu ba vaŋ-o ba ja ba nuŋi pwələ. Sooli na tu o zɩgɩ nɔɔna bam tɩtarɩ nɩ tɩn, wʋntʋ dɩdwarɩm dɛɛn mʋ dwe nɔɔna bam maama. 24 Samowɛlɩ laan ma ta dɩ nɔɔna bam maama o wɩ: «Nii-na, nɔɔnʋ wʋntʋ mʋ Baŋa-Wɛ kuri DƖ pa abam. Nɔɔn-nɔɔnʋ tǝrǝ dɩbam maama wʋnɩ sɩ kʋ tu dwəni dɩ wʋntʋ.» Nɔɔna bam maama ma kaasɩ dɩ kwǝr-dɩa ba wɩ: «Wɛ wʋ́ pa dɩ́ pɛ wʋm mʋmwɛ-dɛɛrɩ.»
25 Samowɛlɩ laan ma lwǝni o brɩ nɔɔna bam sɩ ba lwarɩ paarɩ dim tɩtʋŋ-naga na wʋ́ taa yɩ te maama tɩn. O ta ma pʋpʋnɩ tɩntʋ o kɩ tɔnɔ wʋnɩ, yɩ o kwe-kʋ o tiŋi Baŋa-Wɛ yigə nɩd. Kʋntʋ kwaga nɩ mʋ o banɩ nɔɔna bam o pa ba joori ba sam. 26 Sooli dɩ ma joori o vu o sɔŋɔ Gibea nɩ. Nɔɔna badonnǝ na yɩ nɔn-babɛ tɩn dɛɛn ma kogil-o yɩ ba tɔg-o ba vu. Wɛ dɛɛn ya pɛ bantʋ wʋbʋŋa tɔgɩ Sooli mʋ. 27 Nɔn-wo-kʋrrʋ tɩdonnə dɩ dɛɛn nan mʋ ta tɔgɩ ba wʋra, yɩ ba tɛ ba wɩ: «Ʋn ʋn! Mʋ wʋntʋ mʋ lagɩ o vrɩ dɩbam!» Ba maa goon-o yɩ ba wʋ jaanɩ pɛɛrɩ dɩ dɩdʋa dɩ, ba ja ba ba ba pa-o. Sooli ma cɩm.