Samowɛlɩ kuri Sooli sɩ o ji pɛ
9
Bɛnzamɛn dwi tu wʋdoŋ dɛɛn mʋ wʋra, o yɩrɩ mʋ Kisi. O maa yɩ nadum. O dɛɛn yɩ Abɩyɛlɩ bu mʋ. O ko-nakwɩ yɩrɩ maa yɩ Serɔrɩ yɩ wʋntʋ dɩ ko yɩrɩ yɩ Bekora. Bantʋ dɛɛn nuŋi Bɛnzamɛn dwi tu Afɩa dwi kʋm nɩ mʋ. 2 Kisi bu dɩdʋa dɛɛn wʋra, o yɩrɩ mʋ yɩ Sooli. O maa yɩ ninwam yɩ o doŋ tǝrǝ Yisɩrayɛlɩ tiinə bam maama wʋnɩ. O dɛɛn yɩ nɔn-wagɩlɩ mʋ cɩga cɩga. O maa yɩ nɔn-dʋŋʋ yɩ o tiini o dwara o dwe o yuudonnə bam maama.3 Dɛ dɩdwɩ mʋ Kisi bɩnɛ sɩdonnǝ ywəri sɩ je. O ma ta o bu Sooli o wɩ: «Ja dɩ́ tɩntʋŋna bam wʋnɩ dɩdʋa sɩ á vu á beeri bɩnɛ sɩm.» 4 Sooli ma sɩɩnɩ o kɩ kʋntʋ. Wʋntʋ dɩ o tɩntʋŋnʋ wʋm ma tʋlɩ Efrayim pweeru laŋa kam maama, dɩ Salisa je sɩm maama, ba beeri bɩnɛ sɩm ba ga. Ba ma kɛ ba vu ba yi Saalim, yɩ ba wʋ nɛ-sɩ daanɩ dɩ. Ba ma daarɩ ba tɔgɩ Bɛnzamɛn laŋa kam maama. Ba ta maa wʋ nɛ bɩnɛ sɩm je sɩm kʋntʋ mɛ mɛ.
5 Ba laan ma beeri ba vu ba yi Zufa. Sooli ma ta dɩ o tɩntʋŋnʋ wʋm o wɩ: «Pa dɩ́ joori sɔŋɔ. Tɩntʋ wɛɛnɩ, amʋ ko daa ba nii bɩnɛ sɩm, o laan je o bʋŋɩ dɩbam wʋbʋŋa mʋ, dɩ́ na daanɩ tɩn ŋwaanɩ.» 6 Tɩntʋŋnʋ wʋm ma lǝr-o o wɩ: «Nii, Wɛ tɩntʋŋnʋ dɩdʋa wʋ tɩʋ kʋntʋ nɩ. Nɔɔna tiini ba nɩg-o, bɛŋwaanɩ, kʋlʋ maama o na tɛ tɩn yǝni kʋ kɩ kʋntʋ mʋ. Pa dɩ́ beeri o je dɩ́ vu, sɩ dɛdoŋ wʋntʋ wʋ́ brɩ dɩbam cwǝŋǝ kalʋ dɩ na wʋ́ tɔgɩ tɩn.»
7 Sooli laan ma bwe‑o o wɩ: «Dɩ́ nan na lagɩ dɩ́ vu nɔɔnʋ wʋm te, bɛɛ mʋ dɩ́ wʋ́ ja dɩ́ vu dɩ́ pa‑o yɩ dɩ́ wʋdiu maama ti tɩntʋ tɩn? Kʋlʋkʋlʋ daa tǝrǝ dɩ́ tampwarʋ tɩm wʋnɩ, naa woŋo wʋra?» 8 Tɩntʋŋnʋ wʋm ma lǝr-o o wɩ: «Nii mʋ! Amʋ jɩgɩ səbu-dalɩ balaŋa. Amʋ wʋ́ kwe dɩntʋ mʋ a pa‑o, sɩ o brɩ dɩbam cwǝŋǝ kalʋ dɩ́ na wʋ́ da tɩn.» 9 Faŋa tɩn, Yisɩrayɛlɩ tiinə bam dɛɛn na lagɩ sɩ ba vu Wɛ nijoŋnu te ba bwe woŋo Wɛ tee nɩ, ba yǝni ba ta wɩ: ‹Pa-na sɩ dɩ́ vu dɩ́ na Sampwərə kam.› Bɛŋwaanɩ, ba dɛɛn bǝi Wɛ nijoŋnǝ bam nɩ: ba yɩ sampwəri mʋ. 10 Sooli laan ma ta o tɩntʋŋnʋ wʋm o wɩ: «Kʋ nan lamma, dɩ́ kɛ.» Ba ma kwe cwǝŋǝ ba maa ve tɩʋ kʋlʋ Wɛ tɩntʋŋnʋ wʋm na zʋʋrɩ da tɩn.
11 Ba na wʋra ba diini zoŋo sɩ ba vu ba yi tɩʋ kʋm tɩn, mʋ ba jeeri bukwa na nuŋi tɩʋ kʋm wʋnɩ ba maa ve bugə sɩ ba mɔ na. Ba ma bwe-ba ba wɩ: «Sampwərə kam zɩm wʋ yo na?» 12 Bukwa bam ma ləri ba wɩ: «Ɛɛn! Nan kɩ-na lɩla, sɩ o yɔɔrɩ o wʋ abam yigə nɩ mʋ. Zɩm mʋ o daa ta tu dɩbam tɩʋ. Bɛŋwaanɩ, o lagɩ o wǝli dɩ́ nɔɔna bam wʋnɩ sɩ ba kɩ kaanɩm zoŋo yuu wara-je bimbim dɩm baŋa nɩ. 13 Á na zʋ tɩʋ kʋm wʋ, á wʋ́ wanɩ á yi‑o yɩ o ta wʋ diini o yi mɛ kaanɩm dɩm na wʋ́ kɩ tɩn. Nɔɔna bam wʋ́ taa je ba cəgi wʋntʋ mʋ sɩ o ba o loori Wɛ yu-yoŋo o kɩ kaanɩm dɩm baŋa nɩ, sɩ wʋntʋ dɩ nɔɔna bam maama laan wanɩ ba di wʋdiu. Nan ve-na, sɩ á wʋ́ na‑o.»
14 Ba ma vu ba zʋ tɩʋ kʋm wʋnɩ. Ba na maa zʋʋrɩ tɩn, mʋ Samowɛlɩ dɩ maa bɩɩnɩ sɩ o jeeri-ba. O dɛɛn wʋ cwǝŋǝ nɩ mʋ, o diini o maa ve kaanɩm je sɩm. 15 Dɛ dɩlʋ tɩga na wʋ́ pʋʋrɩ sɩ Sooli ba o yi tɩʋ kʋm tɩn, mʋ Baŋa-Wɛ dɛɛn nan ya loori yigə DƖ ta dɩ Samowɛlɩ DƖ wɩ: 16 «Jwa kantʋ maŋa nɩ, amʋ wʋ́ tʋŋɩ Bɛnzamɛn dwi tu dɩdʋa sɩ o ba n te. Kʋ maŋɩ sɩ n lo yu-yoŋo nugə mʋ o yuu nɩ, sɩ n ma n tiŋ‑o sɩ o taa yɩ amʋ nɔɔna Yisɩrayɛlɩ tiinə bam yigə tu. Sɩ wʋntʋ mʋ wʋ́ joŋi a nɔɔna bam o yagɩ Filisi tiinə jɩŋa nɩ. Bɛŋwaanɩ, a nii a na a nɔɔna bam cam dɩm, yɩ ba kərə kam dɩ yi-nɩ.»
17 Samowɛlɩ yi na tu dɩ pɩɩrɩ Sooli tɩn, mʋ Baŋa-Wɛ tagɩ dɩd-o DƖ wɩ: «Nɔɔnʋ wʋntʋ mʋ a tagɩ o taanɩ a brɩ-m tɩn. Wʋntʋ mʋ wʋ́ taa nii amʋ nɔɔna bam baŋa nɩ.»a 18 Samowɛlɩ na wʋ tɩʋ kʋm manco-pɩɩna ni nɩ tɩn mʋ Sooli fʋfɔ o vu o yi o te. O ma bwe‑o o wɩ: «A loori-m! Brɩ dɩbam Sampwərə kam na zʋʋrɩ mɛ tɩn.» 19 Samowɛlɩ ma lǝr-o o wɩ: «Amʋ mʋ yɩ Sampwərə kam. Nan da-na amʋ yigə sɩ dɩ́ di zoŋo kʋm baŋa dɩ́ vu kaanɩm je sɩm. Zɩm mʋ dɩ́ wʋ́ tɔgɩ daanɩ dɩ́ di kaanɩm dɩm wʋdiu. Jwa zɩzɩŋa nɩ, a ta wʋ́ ta kʋlʋ maama na wʋra tɩn a brɩ-m, sɩ a daarɩ a yagɩ‑m cwǝŋǝ nɩ sɩ n viiri. 20 Pa n wʋbʋŋa taa tigə, sɩ kʋ na yɩ bɩnɛ sɩlʋ na je da yatɔ zɩm tɩntʋ tɩn, ba joori ba na-sɩ. Nan lwarɩ nɩ: Yisɩrayɛlɩ tiinə bam maama yi pagɩ nmʋ dɩ n ko sɔŋɔ kʋm baŋa nɩ mʋ.»
21 Sooli ma ləri o wɩ: «Amʋ nan nuŋi Bɛnzamɛn dwi dɩm wʋnɩ mʋ. Yisɩrayɛlɩ dwiə yam maama wʋnɩ, Bɛnzamɛn dwi dɩm mʋ tiini dɩ muri. Amʋ ta na nuŋi digə kalʋ nɩ tɩn mʋ yɩ kalʋ nɔɔn-nɔɔnʋ na yǝri ka ni nɩ tɩn. Tɩta mʋ yɩ nmʋ ŋɔɔnɩ taanɩ dɩntʋ n pa-nɩ?»
22 Samowɛlɩ dɛɛn ma ja Sooli dɩ o tɩntʋŋnʋ wʋm o vu o zʋ Wɛ-digǝ kam wʋnɩ. O ma pa ba jǝni mɛ yuutiinə na je tɩn.b Balʋ ba na bəŋi sɩ ba jeeri da tɩn maa yɩ nɩnɛɛnɩ nɔɔna fiintɔ. 23 Samowɛlɩ ma ta dɩ wʋlʋ na saŋɩ ba wʋdiu kʋm tɩn o wɩ: «Kwe nwanɩ dɩlʋ a ya na pɛ‑m yɩ a ta dɩ nmʋ sɩ n tiŋi dɩ yɩra tɩn n ja n ba n pa-nɩ.» 24 Wʋdi-saŋnʋ wʋm ma kwe cwe dɩm dɩ dɩ nwana yam maama o ja o vu o zɩgɩ Sooli yigə nɩ. Samowɛlɩ laan ma ta dɩ Sooli o wɩ: «Kʋ yɩ nmʋ nyɩm mʋ. Di n na lagɩ te tɩn, sɩ a maŋɩ a tiŋi nwanɩ dɩntʋ n ŋwaanɩ mʋ, yɩ a laan bəŋi nɔɔna bantʋ maama sɩ dɩ́ di daanɩ.»
Dɩntʋ dɛ dɩm nɩ, Sooli dɩdaanɩ Samowɛlɩ ma di wʋdiu daanɩ. 25 Ba na di ba ti tɩn, ba ma zɩgɩ da ba tu ba joori tɩʋ kʋm wʋnɩ. Samowɛlɩ ma ja Sooli o din sɔŋɔ kʋm nayuu baŋa yɩ ba lara.c 26 Tɩga na jɩgɩ ka pʋʋrɩ tɩn, mʋ ba goni tɩga ba zaŋɩ. Samowɛlɩ ma ta dɩ Sooli ya na wʋ nayuu kʋm nɩ tɩn o wɩ: «Nan zaŋɩ n ti n yigə, sɩ a banɩ‑m a yagɩ cwǝŋǝ nɩ sɩ n viiri.» Sooli na zaŋɩ o tu nayuu kʋm nɩ tɩn, o dɩ Samowɛlɩ ma nuŋi pooni ba kwe cwǝŋǝ ba maa kɛa.
27 Ba na ve ba yi tɩʋ kʋm ni dɩm tɩn, Samowɛlɩ ma ta dɩ Sooli o wɩ: «Ta dɩ n tɩntʋŋnʋ wʋm sɩ o tɔgɩ yigə o taa veǝ.» Sooli tɩntʋŋnʋ wʋm na kɛ o ti tɩn, mʋ Samowɛlɩ daa tagɩ o wɩ: «Zɩgɩ kʋntʋ, sɩ a ta Wɛ kwǝrǝ kam a brɩ-m.»