Yisɩrayɛlɩ tiinə wɩ ba lagɩ pɛ
8
Samowɛlɩ dɛɛn ma ba o kwɩn zanzan. O ma pa o biə bam ni sɩ bantʋ taa nii Yisɩrayɛlɩ tiinə bam baŋa nɩ. 2 O bu-kwɩan kam yɩrɩ mʋ yɩ Zowɛlɩ. Wʋlʋ na saŋɩ wʋntʋ kwaga tɩn yɩrɩ maa yɩ Abɩa. Ba dɛɛn yǝni ba jeeri Bɛɛr-Seba nɩ mʋ, yɩ ba nii Yisɩrayɛlɩ tiinə bam baŋa nɩ. 3 Samowɛlɩ biə bam nan wʋ tɔgɩ ba ko wʋm na-bwərə kam. Ba dɛɛn tɔgɩ səbu-laga mʋ. Ba maa sɛ sɩ nɔɔna yəgi-ba dɩ səbu, yɩ ba daarɩ ba kwɩɩlɩ cɩga kam ba yagɩ tɩga nɩ dɩ ba na bʋrɩ nɔɔna taana te tɩn.4 Yisɩrayɛlɩ nakwa bam laan ma la ba jeeri daanɩ, yɩ ba vu Samowɛlɩ te Rama nɩ. 5 Ba ma ta dɩd-o ba wɩ: «Lele kʋntʋ, nmʋ tiini n kwɩn mʋ. N biə bam nan ba tɔgɩ nmʋ na-bwərə. Kʋntʋ tɩn, tiŋi pɛ n pa dɩbam, sɩ kʋ tu taa nii dɩ́ baŋa nɩ, nɩnɛɛnɩ tɩɩnɩ dɩdonnǝ dɩm na jɩgɩ pwa te tɩn.»a
6 Nakwa bam na tagɩ nɩ ba lagɩ pɛ tɩn dɛɛn tiini kʋ daanɩ Samowɛlɩ zanzan. O ma loori Wɛ kʋ ŋwaanɩ. 7 Baŋa-Wɛ ma ləri DƖ wɩ: «Cəgi nɔɔna bam taanɩ dɩm, sɩ n sɛ n kɩ kʋlʋ maama ba na tagɩ dɩ nmʋ tɩn. Bɛŋwaanɩ, kʋ daɩ nmʋ mʋ ba vɩn, sɩ kʋ yɩ amʋ mʋ ba wɩ ba daa vaɩ sɩ a taa yɩ ba pɛ. 8 Ba maŋɩ ba zɩgɩ kʋ dɛ nɩ mʋ ba vɩn amʋ yɩ ba daarɩ ba tɔgɩ jwǝnǝ kwaga, kʋ zɩgɩ a na jaanɩ-ba a nuŋi Ezipi nɩ tɩn, sɩ kʋ ba kʋ yi zɩm dɛ dɩm. Ba laan maa wʋra ba kɩ nmʋ nɩ ba na maŋɩ ba kɩ amʋ dɩ te tɩn. 9 Kʋntʋ tɩn, za n sɛ ba kwǝrǝ kam, sɩ n daarɩ n kaanɩ-ba zanzan sɩ ba lwarɩ ba pɛ wʋm na wʋ́ tʋŋɩ te ba yɩra nɩ tɩn.»
10 Samowɛlɩ laan ma tʋlɩ Baŋa-Wɛ na tagɩ kʋlʋ tɩn maama o brɩ nɔɔna balʋ na tu o te sɩ ba beeri pɛ tɩn, 11 yɩ o wɩ: «Wʋlʋ abam na beeri sɩ o di paarɩ á baŋa nɩ tɩn na wʋ́ tʋŋɩ kʋlʋ á yɩra nɩ tɩn mʋ tɩntʋ: o lagɩ o fɩn á bəkəri mʋ sɩ ba ji o jar-kərə. Oó pa ba badonnǝ taa co o jara-kǝm tərikooru, sɩ badaara taa diini siseŋ-nɔɔna, yɩ badaara duri tərikooru tɩm yigə nɩ ba kwɛ cwǝŋǝ kam ba pa‑o. 12 O ta lagɩ o kuri á biə bam wʋnɩ mʋ sɩ ba taa yɩ o jar-kərə yigǝ tiinǝ, sɩ badonnǝ taa nii nɔɔna mʋrʋ baŋa nɩ, yɩ badonnǝ dɩ taa nii nɔɔna fiinnu baŋa nɩ. O ta wʋ́ fɩn á biə bam mʋ sɩ ba taa tʋŋɩ o karɩ sɩm nɩ ba vara yɩ ba daarɩ ba zagɩ mɩna. Oó pa ba kɩ najara zɩla dɩ tərikooru zɩla dwi maama sɩ o ma zaŋɩ najara. 13 Kʋ na yɩ á bukwa bam, o maa wʋ́ pa ba taa kɩ wǝǝnu tɩlʋ lwǝm na ywǝmmǝ tɩn dwi dwi ba pa‑o. Ba badaara dɩ maa wʋ́ saŋɩ ba pa‑o, sɩ badonnǝ dɩ taa fɔgɩ dɩpɛ. 14 Pɛ wʋm lagɩ o vrɩ á karɩ sɩlʋ na tiini sɩ lamma tɩn mʋ, dɩ je sɩlʋ á na dugi vinyə dɩ Olivi tweeru sɩ wʋnɩ tɩn, sɩ o daarɩ o kwe-sɩ o pa o tɩntʋŋna. 15 O ta maa wʋ́ joŋi á mɩna dɩ á tiu biə fugə maama wʋnɩ pʋpwara dɩdʋa, sɩ o kwe o pa o kwaga nɔɔna dɩ o tɩntʋŋna. 16 Kʋ ta na yɩ abam tɩtɩ tɩntʋŋna, baara dɩ kaana, dɩ á naanɩ, dɩ á bɩnɛ, o lagɩ o joŋi balʋ maama na lana tɩn mʋ o taa te sɩ ba taa tʋŋɩ ba pa‑o. 17 O ta lagɩ o joŋi á var-mumugu fugə maama wʋnɩ pʋpwara dɩdʋa mʋ. Abam tɩtɩ dɩ nan wʋ́ ji o gambɛ. 18 Dɛ dɩm na tuǝ yɩ á jɩgɩ pɛ, á wʋ́ tiini á coosi á loori Baŋa-Wɛ sɩ DƖ wǝli abam, pɛ wʋm na bɛɛsɩ abam te tɩn ŋwaanɩ. Dɛ dɩm kʋntʋ nɩ Baŋa-Wɛ nan ba lagɩ DƖ cəgi á taanɩ dɩm.»
19 Nɔɔna bam maa wʋ sɛ Samowɛlɩ kwǝrǝ kam. Ba ma ta ba wɩ: «Dɩ kʋntʋ maama dɩ, dɩbam ta lagɩ pɛ mʋ sɩ o taa di paarɩ dɩ́ baŋa nɩ. 20 Dɩ́ lagɩ sɩ dɩ́ taa nyɩ nɩnɛɛnɩ tɩɩnɩ dɩdonnǝ dɩm na yɩ te tɩn mʋ. Dɩ́ pɛ wʋm wʋ́ taa nii dɩ́ baŋa nɩ, yɩ o ta wʋ́ tɔgɩ dɩ́ yigə sɩ dɩ́ yǝni dɩ́ zaŋɩ najara dwi maama!»