7
Kiriaf-Jeerim ma sɩɩnɩ ba ba ba kwe Baŋa-Wɛ ni-gonim daka kam. Ba ma ja-ka ba vu ba zɩgɩ nɔɔnʋ wʋdoŋ sɔŋɔ nɩ, o yɩrɩ na yɩ Abinadabɩ. O dɛɛn zʋʋrɩ pu-kunə yuu nɩ mʋ. Ba ma kuri wʋntʋ bu Eleyazaarɩ yɩ ba tiŋ-o sɩ o taa nii daka kam baŋa nɩ.Samowɛlɩ nii Yisɩrayɛlɩ baŋa nɩ
2 Wɛ ni-gonim daka kam dɛɛn maŋɩ Kiriaf-Jeerim nɩ ka daanɩ taan, nɩnɛɛnɩ bɩna fiinle.a Yisɩrayɛlɩ maa keeri lanyɩranɩ, yɩ ba loori Baŋa-Wɛ sɩ DƖ joŋi-ba DƖ yagɩ. 3 Samowɛlɩ dɛɛn ma zaŋɩ o ta dɩ Yisɩrayɛlɩ tiinə kɔgɔ kʋm maama o wɩ: «Abam na sɩɩnɩ á sɩɩnɩ yiǝ mʋ sɩ á joori Baŋa-Wɛ tee nɩ, kʋ nan maŋɩ sɩ á lɩ Asetarɩ jwǝnǝ yam dɩ jwə-yɔɔrʋ tɩm maama á tɩtarɩ nɩ á dʋlɩ á yagɩ, sɩ á daarɩ á lwe á wʋʋ maama á pa Baŋa-Wɛ. Abam na zuli Dɩntʋ yɩranɩ, DƖ wʋ́ joŋi abam Filisi jɩŋa nɩ DƖ yagɩ.» 4 Yisɩrayɛlɩ ma sɩɩnɩ ba dʋlɩ Baalɩ dɩdaanɩ Asetarɩ jwǝnǝ yalʋ na wʋ ba tɩtarɩ nɩ tɩn ba yagɩ. Ba laan ma sɛ sɩ ba taa zuli Baŋa-Wɛ yɩranɩ.
5 Samowɛlɩ ma tʋŋɩ ni o pa Yisɩrayɛlɩ tiinə bam sɩ ba maama la ba jeeri Mitspa nɩ, sɩ o dɩ loori Baŋa-Wɛ o pa-ba.b 6 Nɔɔna bam ma sɩɩnɩ ba vu ba jeeri Mitspa nɩ. Ba na gilimi ba ti tɩn, ba ma mɔ na ba lo tɩga nɩ ba pa Baŋa-Wɛ. Dɛ dɩm kʋntʋ maama nɩ, ba ya vɔgɩ ba niə mʋ yɩ ba wɩ: «Dɩ́ sɩɩnɩ dɩ́ kɩ lwarɩm dɩ́ cɔgɩ Baŋa-Wɛ yigə.» Yisɩrayɛlɩ tiinə bam dɛɛn na wʋ Mitspa nɩ kʋntʋ tɩn, Samowɛlɩ mʋ tu o ji ba yigə tu.c
7 Filisi tiinə bam dɛɛn ma ni nɩ Yisɩrayɛlɩ tiinə bam jeeri daanɩ Mitspa nɩ. Ba dɩdɛɛra banu bam ma la ba jar-kərə bam ba kɩ daanɩ sɩ ba vu ba zaŋɩ najara dɩ Yisɩrayɛlɩ tiinə bam. Yisɩrayɛlɩ tiinə bam na ni kʋ ŋwa tɩn, mʋ fʋʋnɩ tiini dɩ zʋ-ba. 8 Ba ma ta dɩ Samowɛlɩ ba wɩ: «Fɔgɩ n ta n loori dɩ́ Tu Baŋa-Wɛ! Ta ja DƖ təŋə dɩbam ŋwaanɩ, sɩ DƖ joŋi dɩbam Filisi tiinə bam jɩŋa nɩ DƖ yagɩ.» 9 Samowɛlɩ ma kwe pəlbu o gʋ o zwɛ ka maama punə o ma o kaanɩ o pa Baŋa-Wɛ. O laan ma kaasɩ o loori Baŋa-Wɛ Yisɩrayɛlɩ tiinə bam ŋwaanɩ. Baŋa-Wɛ dɩ ma sɛ o wɛ-loro kʋm.
10 Samowɛlɩ ta na wʋra o kɩ kaanɩm dɩm o pa Baŋa-Wɛ tɩn, mʋ Filisi tiinə bam fʋfɔ ba twɛ sɩ ba ja najara yam ba yi Yisɩrayɛlɩ tiinə bam. Ba ma yi da dɩ Baŋa-Wɛ zɩgɩ wɛyuu nɩ DƖ pa dʋa tiini ka bagɩ-ba pɩna-pɩna! Fʋʋnɩ ma tiini dɩ ja Filisi tiinə bam, pa ba duri Yisɩrayɛlɩ tiinə bam yigə nɩ ba jagɩ je maama nɩ! 11 Yisɩrayɛlɩ tiinə bam ma da kʋ ŋwaanɩ ba zɩgɩ Mitspa nɩ, ba zəli Filisi tiinə bam taan, ba vu ba yi Bɛtɩ-Karɩ kuri seeni. Ba maa jɩgɩ-ba ba gʋɩ kʋntʋ yɩ ba veǝ.
12 Samowɛlɩ ma kwe kandwɛ-kamunu o cwi-dɩ Mitspa dɩdaanɩ Sɛn tɩtarɩ laŋa nɩ. O ma pa kandwɛ dɩm yɩrɩ wɩ: ‹Ebɛn-Ezɛrɩ›d, yɩ o ta o wɩ: «Sɩ kʋ ba kʋ yi tɩntʋ maama tɩn, Baŋa-Wɛ mʋ zǝni dɩbam.» 13 Kʋ dɛ kʋntʋ baŋa nɩ mʋ, yɩ Yisɩrayɛlɩ tiinə bam wanɩ Filisi tiinə bam. Baŋa-Wɛ dɛɛn ma cɩ-ba, pa ba daa wʋ lɛɛnɩ Yisɩrayɛlɩ laŋa kam nɩ.
Samowɛlɩ ta na ŋwɩ tɩn, Baŋa-Wɛ dɛɛn lɔgɩ Filisi tiinə bam kwaga nɩ mʋ. 14 Yisɩrayɛlɩ tiinə bam ma joori ba joŋi tɩɩnɩ dɩlʋ maama na wʋ Ekoron dɩdaanɩ Gatɩ laŋa nɩ yɩ Filisi tiinə bam ya vrɩ-dɩ ba tee nɩ tɩn. Yisɩrayɛlɩ tiinə bam dɛɛn joori ba na ba tɩga kam ni maama mʋ. Yazurə dɛɛn maa wʋra Yisɩrayɛlɩ tiinə bam dɩdaanɩ Amɔɔrɩ tiinə bam laŋa nɩ.
15 Samowɛlɩ dɛɛn nii Yisɩrayɛlɩ tiinə bam baŋa nɩ taan, kʋ vu kʋ yi o tʋʋnɩ mʋ. 16 Bɩnɩ maama nɩ, o dɛɛn yǝni o ve o kaagɩ tɩɩnɩ dɩntʋ mʋ: Betɛlɩ, dɩ Giligalɩ, dɩdaanɩ Mitspa. Je sɩntʋ maama nɩ mʋ o yǝni o kwɛ nɔɔna bam taana o pa-ba. 17 O nan na yǝni o ti, o daa yǝni o joori Rama mʋ o vu o jǝni o tɩtɩ sɔŋɔ nɩ. O na wʋra tɩn, o ta ma nii Yisɩrayɛlɩ tiinə bam baŋa nɩ. O dɛɛn ma lɔ kaanɩm bimbim Rama nɩ o pa Baŋa-Wɛ.