Wɛ ni-gonim daka kam joori Yisɩrayɛlɩ tɩʋ
6
Filisi tiinə bam na vrɩ Wɛ ni-gonim daka kam Yisɩrayɛlɩ tiinə bam jɩŋa nɩ tɩn, ka dɛɛn maŋɩ ba tee nɩ canɩ sɩrpɛ mʋ. 2 Ba ma bəŋi ba kaanɩm tiinə dɩ ba sampwəri, yɩ ba bwe-ba ba wɩ: «Dɩ́ wʋ́ kɩ Baŋa-Wɛ ni-gonim daka kam tɩta mʋ? Dɩ́ wʋ́ tɔgɩ cwǝŋǝ kɔɔ mʋ dɩ́ tʋŋɩ-ka sɩ ka joori ka vu ka jǝgǝ?» 3 Ba ma ləri ba wɩ: «Abam na lagɩ á tʋŋɩ Yisɩrayɛlɩ tiinə Wɛ dɩm daka kam sɩ ka joori ka na nuŋi mɛ tɩn, kʋ nan maŋɩ sɩ á tʋŋɩ-ka dɩdaanɩ pɛɛrɩ mʋ. Kʋ daɩ sɩ daka kam joori ka vu bwəri. Pɛɛrɩ dɩm kʋntʋ mʋ á lagɩ á ma á yoori ba Wɛ dɩm, sɩ dɩ yagɩ á lwarɩm dɩm jɩnɩ dɩ ma cɛ abam. Kʋntʋ mʋ wʋ́ pa á joori á na yazurə yɩ á daarɩ á lwarɩ bɛŋwaanɩ DƖ na tiini DƖ pa kʋ zʋ á yɩra tɩn.»4 Filisi tiinə bam daa ma bwe ba wɩ: «Pɛɛrɩ dwi dɔɔ mʋ dɩ nan wʋ́ tʋŋɩ sɩ dɩ́ ma dɩ́ yoori ba Wɛ dɩm?»
Ba daa ta ma ləri ba wɩ:
«Yawɩ-cɛɔ kʋm na tʋ á pwa banu bam dɩ ba tɩɩnɩ dɩnu dɩm maama baŋa nɩ tɩn, kʋ maŋɩ sɩ á kwe səbu-sɩŋa mʋ, á ma á mɔ kurə yalʋ na nuŋi namunnu tɩn yanu dɩdaanɩ tɩtwə yanu kamwarʋ, 5 sɩ tɩ taa nyɩ nɩnɛɛnɩ tɩlʋ na jɩgɩ á tɩɩnɩ dɩm tɩ cɔgɩ tɩn. Kʋntʋ mʋ á wʋ́ pa Yisɩrayɛlɩ tiinə Wɛ dɩm joŋi zulə. Dɛ dɩlʋ, abam na kɩ kʋntʋ, DƖ wʋ́ joori DƖ dwanɩ DƖ jɩ-dɩa abam baŋa nɩ, dɩ á jwǝnǝ yam, dɩdaanɩ á tɩga kam maama baŋa nɩ, sɩ á daa yɩ na cam. 6 Bɛɛ mʋ yɩ á bʋŋɩ sɩ á bɩcara kɩ dam yɩranɩ, nɩnɛɛnɩ Ezipi tiinə bam dɩ ba Pa-farʋ wʋm dɩ dɛɛn na kɩ te tɩn? Yɩ swe-na nɩ Baŋa-Wɛ kɩ kʋlʋ DƖ wʋbʋŋa na lagɩ tɩn DƖ yagɩ ba baŋa nɩ, pa ba ga ga ba yagɩ Yisɩrayɛlɩ tiinə bam cwǝŋǝ sɩ ba joori ba tɩtɩ tɩʋ. 7 Kʋntʋ tɩn, kwe-na dɛ á kɩ təriko-dʋŋʋ. Laan beeri-na naanɩ dɩle na lʋga, yɩ ba ta wʋ kwe-dɩ sɩ ba ma tʋŋɩ tɩn. Ja-na naanɩ dɩm á lə dɩ təriko kʋm sɩ dɩ taa vaŋɩ-kʋ, sɩ á daarɩ á pwɛ nwa balʋ naanɩ dɩm na lʋgɩ tɩn á pɩ. 8 Laan kwe-na Baŋa-Wɛ ni-gonim daka kam á daŋɩ təriko kʋm baŋa nɩ. Ta beeri-na daka kadoŋ, á kɩ səbu-sɩŋa wǝǝnu tɩlʋ á na mɔɔnɩ sɩ á ma á yoori‑DƖ tɩn ka wʋnɩ, sɩ á daarɩ á zɩgɩ-ka Wɛ ni-gonim daka kam tikəri nɩ. Abam na kɩ kʋntʋ á ti, sɩ á laan kalɩ naanɩ dɩm á yagɩ cwǝŋǝ nɩ sɩ dɩ taa vaŋɩ təriko kʋm dɩ veǝ, 9 yɩ á fɔgɩ á nii. Naanɩ dɩm na lɛɛnɩ dɩbam sisəm dɩm yɩ dɩ kwe Bɛtɩ-Sɩmesa cwǝŋǝ kam dɩ maa kɛa, dɩ́ wʋ́ lwarɩ nɩ kʋ yɩ Yisɩrayɛlɩ tiinə Wɛ dɩm mʋ sɩɩnɩ DƖ tʋŋɩ cam dɩntʋ DƖ yagɩ dɩbam yɩra nɩ. Sɩ naanɩ dɩm na tɔgɩ cwə-gaa, dɩ́ wʋ́ lwarɩ nɩ kʋ kɩ kʋ maŋɩ daanɩ mʋ, sɩ kʋ daɩ wo-lɔŋɔ.»
10 Filisi tiinə bam ma sɩɩnɩ ba kɩ kʋntʋ. Ba dɛɛn beeri naanɩ dɩle dɩlʋ na lʋgɩ tɩn mʋ ba lə təriko yɩra nɩ. Kʋ daarɩ yɩ ba pɩ dɩ nwa bam sɔŋɔ nɩ. 11 Ba ma kwe Baŋa-Wɛ ni-gonim daka kam ba daŋɩ təriko kʋm baŋa nɩ, yɩ ba daarɩ ba zɩgɩ daka kalʋ səbu-sɩŋa tɩtwə dɩ namunnu yawɩʋ kʋm nyɩnyʋrʋ kamwarʋ tɩm na wʋ ka wʋnɩ tɩn ba kɩ da. 12 Naanɩ dɩm ma yɔɔrɩ dɩ kwe Bɛtɩ-Sɩmesa cwǝŋǝ kam dɩ maa kɛa. Dɩ yɔɔrɩ dɩ magɩ dɩ yuu cwǝŋǝ kam kʋntʋ nɩ mʋ, yɩ dɩ keeri dɩ veǝ. Dɩ daa wʋ ywəri sɩ dɩ vu jazɩm seeni naa jagwiə seeni. Filisi tiinə dɩdɛɛra banu bam ma tɔgɩ dɩ kwaga ba vu ba yi Bɛtɩ-Sɩmesa ni nɩ.
13 Bɛtɩ-Sɩmesa tiinə bam dɛɛn ya wʋ ba bwəəlu tɩm nɩ mʋ ba gwe bəniŋəa. Ba ma kwǝni ba yum ba nii, yɩ ba na Wɛ ni-gonim daka kam. Kʋ ma pa ba wʋʋ tiini kʋ poli zanzan. 14 Təriko kʋm dɛ kʋntʋ mʋ taan kʋ vu kʋ yi nɔɔnʋ dɩdʋa kara kʋ zɩgɩ da, piu kamunu kʋdoŋ təŋə nɩ. Nɔɔnʋ wʋm yɩrɩ mʋ Zozwe. O maa yɩ Bɛtɩ-Sɩmesa tu. Nɔɔna bam ma yɔɔrɩ ba lɔ təriko kʋm dɛ sɩm ba ma dwe mim. Ba ma daarɩ ba gʋ naanɩ dɩm ba zwɛ ba ma ba kɩ kaanɩm ba pa Baŋa-Wɛ. 15 Levi dwi tiinə bam dɛɛn ya zʋʋrɩ Baŋa-Wɛ daka kam təriko kʋm baŋa nɩ ba ja tu tɩga. Ba ta ma kwe daka kalʋ səbu-sɩŋa kamwarʋ tɩm na wʋ ka wʋnɩ tɩn ba wǝli da. Ba ma zɩgɩ tɩntʋ maama piu kamunu kʋm baŋa nɩ. Dɛ dɩm kʋntʋ nɩ Bɛtɩ-Sɩmesa tiinə bam ma kɩ zwɛɛm pɛɛra dɩ pɛɛra yadonnə ba kaanɩ ba pa Baŋa-Wɛ. 16 Filisi tiinə dɩdɛɛra banu bam dɛɛn zɩgɩ mʋ ba nii tɩtʋŋa yam kʋntʋ maama. Ba laan ma joori ba vu Ekoron dɛ dɩm kʋntʋ nɩ.
17 Səbu-sɩŋa namunnu kamwarʋ tɩnu tɩm dɛɛn zɩgɩ tɩ paɩ tɩɩnɩ dɩntʋ mʋ: Asedodi, dɩ Gaza, dɩ Asekelon, dɩ Gatɩ, dɩdaanɩ Ekoron. Filisi tiinə bam dɛɛn kwe tɩntʋ mʋ sɩ ba ma ba yoori Baŋa-Wɛ ba lwarɩm dɩm ŋwaanɩ. 18 Ba səbu-sɩŋa tɩtwə yanu yam dɩ maa zɩgɩ ya paɩ tɩɩnɩ dɩnu dɩlʋ dɩdɛɛra bam na nii dɩ baŋa nɩ tɩn. Dɩ maa yɩ tʋ-kamunə dɩlʋ na lɔgɩ dɩ pɩ dɩ dam tɩn, kʋ wǝli dɩ tɩ-balwa bam na wʋ cɩgɩ tɩn. Piu kamunu kʋlʋ baŋa nɩ ba na zɩgɩ Baŋa-Wɛ ni-gonim daka kam tɩn daa ta wʋ Bɛtɩ-Sɩmesa tu Zozwe kara kam nɩ dɩ zɩm maama mʋ, sɩ kʋ taa yɩ maana dɩ kʋlʋ na kɩ da tɩn.
19 Kʋ daarɩ, Baŋa-Wɛ dɛɛn ma gʋ Bɛtɩ-Sɩmesa nɔɔna fusɩrpɛ, ba na leesi ba nii Wɛ ni-gonim daka kam wʋnɩ tɩn ŋwaanɩ. Tɩʋ kʋm nɔɔna bam ma keeri zanzan, dɩ Baŋa-Wɛ na tʋŋɩ te ba yɩra nɩ tɩn. 20 Bɛtɩ-Sɩmesa ma bwe daanɩ ba wɩ: «Dɩbam wʋnɩ wɔɔ mʋ wʋ́ wanɩ Baŋa-Wɛ dɩm yigə nɩ o zɩgɩ? DƖ tiini DƖ yɩ lanyɩranɩ fasɩ mʋ. Dɩ́ wʋ́ pa DƖ daka kam zɩgɩ yo ka vu nɔɔnʋ wɔɔ tee nɩ mʋ?»
21 Ba ma tʋŋɩ kwǝrǝ Kiriaf-Jeerim tiinə tee nɩ ba wɩ: «Filisi jaanɩ Baŋa-Wɛ ni-gonim daka kam ba joori ba ba ba yagɩ yo seeni mʋ. Kʋntʋ tɩn, ba-na á kwe-ka á ja á vu á te.»