Wɛ ni-gonim daka kam
5
Filisi tiinə bam dɛɛn na jaanɩ Wɛ ni-gonim daka kam ba vrɩ Yisɩrayɛlɩ tiinə bam jɩŋa nɩ kʋntʋ tɩn, ba dɛɛn zɩgɩ Ebɛn-Ezɛrɩ nɩ ba ja-ka ba vu ba tɩʋ kʋlʋ yɩrɩ na yɩ Asedodi tɩn mʋ. 2 Ba ma ja-ka ba zʋ ba jwə-dɛɛrɩ digə kam yɩ ba daarɩ ba zɩgɩ-ka jwəm dɩm nyɩnyʋgʋ kʋm təŋə nɩ. Jwəm dɩm yɩrɩ mʋ yɩ Dagɔn. 3 Tɩga na pʋʋrɩ tɩn, Asedodi tiinə bam ma zaŋɩ ba vu ba zʋ digə kam. Ba ma na nɩ Dagɔn tʋ o yibiyə baŋa nɩ Baŋa-Wɛ ni-gonim daka kam yigə nɩ. Ba dɛɛn ma joori ba gɔ-dɩ ba cwi dɩ zɩga je sɩm nɩ.a 4 Tɩga daa na pʋʋrɩ tɩn, mʋ ba nɛ nɩ jwəm dɩm daa ta tʋ Baŋa-Wɛ ni-gonim daka kam yigə nɩ. Jwəm dɩm yuu dɩdaanɩ dɩ jataala maama bwəri mʋ tɩ tigi digə kam ni nɩ dáa dáa. Dɩ yɩra yam yɩranɩ mʋ daarɩ. 5 Kʋntʋ mʋ pɛ, dɩdaanɩ zɩm maama, balʋ maama na yǝni ba zʋ Dagɔn digə kam nɩ tɩn ba sɛ sɩ ba nɔnɩ digə kam ni dɩm je sɩm ba kɛ, kʋ na maŋɩ kʋ yɩ balʋ na tu sɩ ba kaanɩ Dagɔn tɩn dɩ.6 Baŋa-Wɛ ma pa kʋ tiini kʋ zʋ Asedodi tiinə bam yɩra. Kʋ ma ni balʋ na zʋʋrɩ je sɩm kʋntʋ maama nɩ tɩn yɩ fʋʋnɩ zʋ-ba. O ma pa kurə nuŋi namunnu ba yɩra nɩ. 7 Asedodi tiinə bam na maanɩ kʋlʋ na jɩgɩ kʋ kɩ tɩn, ba ma kaasɩ ba wɩ: «Kʋ yɩ Yisɩrayɛlɩ tiinə Wɛ dɩm mʋ wʋra DƖ waarɩ dɩbam, dɩdaanɩ dɩ́ Wɛ Dagɔn. Dɩ́ yɩ pa Dɩntʋ ni-gonim daka kam maŋɩ dɩbam tee nɩ yo.» 8 Ba ma la Filisi tiinə dɩdɛɛra bam ba kɩ daanɩ sɩ ba jǝni ba banɩ. Ba ma bwe-ba ba wɩ: «Dɩ́ laan nan wʋ́ kɩ tɛ mʋ dɩdaanɩ Yisɩrayɛlɩ tiinə Wɛ dɩm daka kam?» Ba ma bwɛ ba ja yɩ ba wɩ: «Pa-na sɩ nɔɔna kwe-ka ba ja vu Gatɩ.»b Ba ma sɩɩnɩ ba ja-ka ba vu ba yi da.
9 Wɛ ni-gonim daka kam na yɔɔrɩ ka yi Gatɩ ka zɩgɩ da tɩn, mʋ Baŋa-Wɛ pɛ kʋ tiini kʋ zʋ tɩʋ kʋm kʋntʋ tiinə bam dɩ yɩra. Vuvugə ma tʋ tɩʋ kʋm je maama nɩ. DƖ ma pa ba kurə nuŋi namunnu mʋ, nɔn-kwɩɩrʋ dɩdaanɩ bu-balwa maama. 10 Ba daa ma pa Wɛ ni-gonim daka kam vu Ekoron.c
Ba na jaanɩ-ka ba yi tɩʋ kʋm wʋ tɩn, mʋ Ekoron tiinə bam coosi ba yagɩ ba wɩ: «Ba jɩgɩ Yisɩrayɛlɩ tiinə Wɛ dɩm daka kam mʋ ba bɩɩnɩ yo! Nii ba na lagɩ ba gʋ dɩbam dɩ dɩ́ dwi dɩm maama te!» 11 Ba ma tʋŋɩ ba la Filisi dɩdɛɛra bam ba kɩ daanɩ, yɩ ba ta ba wɩ: «Tʋŋɩ-na Yisɩrayɛlɩ tiinə Wɛ dɩm daka kam sɩ ka joori ka na nuŋi mɛ tɩn. Sɩ kʋ na daɩ kʋntʋ, ka wʋ́ wanɩ ka gʋ dɩbam dɩdaanɩ dɩ́ dwi dɩm maama ka ti.» Vuvugə ma tʋ tɩʋ kʋm maama nɩ, ba na kwarɩ tʋʋnɩ tɩn ŋwaanɩ. Baŋa-Wɛ ma pa kʋ tiini kʋ zʋ ba yɩra. 12 Nɔɔna balʋ na wʋ tɩgɩ tɩn, bantʋ kurə nuŋi namunnu mʋ. Nɔɔna bam dɛɛn maa kaasɩ bɔgɩ-bɔgɩ.