4
Samowɛlɩ dɩ dɛɛn ma lwǝni Baŋa-Wɛ kwǝrǝ pa ka yi Yisɩrayɛlɩ tiinə bam maama.Filisi tiinə vrɩ Wɛ ni-gonim daka kam
Yisɩrayɛlɩ tiinə bam dɛɛn ma nuŋi sɩ ba vu ba zaŋɩ najara dɩ Filisi tiinə bam. Ba ma vu ba te ba vwə Ebɛn-Ezɛrɩ seeni, yɩ Filisi tiinə bam vu ba te ba vwə Afɛkɩ seeni. 2 Filisi tiinə bam ma kɩ ba tɩtɩ daanɩ sɩ ba ja najara yam. Ba ma vu ba yi Yisɩrayɛlɩ tiinə bam dɩ najara. Ba ma wanɩ Yisɩrayɛlɩ tiinə bam yɩ ba gʋ ba jar-kərə mʋrrʋ tɩna (4,000). 3 Yisɩrayɛlɩ tiinə jar-kərə balʋ na daarɩ tɩn ma zɩgɩ najara kaporo nɩ ba joori ba ya na kikili daanɩ mɛ seeni tɩn. Ba nakwa bam ma bwe daanɩ ba wɩ: «Bɛɛ mʋ kɩ yɩ Baŋa-Wɛ pa Filisi tiinə bam wanɩ dɩbam zɩm kʋntʋ?» Ba ta maa wɩ: «Pa-na sɩ dɩ́ tʋŋɩ nɔɔna sɩ ba vu Siloo ba ja Wɛ ni-gonim daka kam ba ba yo seeni. Kʋntʋ wʋ́ pa Baŋa-Wɛ taa wʋ dɩ́ tee nɩ, yɩ DƖ joŋi dɩbam DƖ yagɩ dɩ́ dʋna bam jɩŋa nɩ.»a
4 Ba ma tʋŋɩ nɔɔna Siloo nɩ, sɩ ba vu ba ja Wɛ ni-gonim daka kam ba ja ba ba ba tee nɩ. Ka maa yɩ jǝgǝ kalʋ Paŋwa Tu Baŋa-Wɛ na di paarɩ Serubɛn sɩm tɩtarɩ laŋa nɩ tɩn mʋ. Eli biə bale, Hofini dɩdaanɩ Fineasɩ mʋ dɛɛn dɛ ba zɩŋɩ daka kam ba ja ba ba.
5 Ba na jaanɩ Wɛ ni-gonim daka kam ba yi ba tigisim dɩm je yɩ Yisɩrayɛlɩ tiinə bam na-ka tɩn, mʋ ba dɛɛn tiini ba kaasɩ wɛ wɛ dɩ wʋpolo pa tɩga kam maama sisiŋi. 6 Filisi tiinə bam ma ni sɔɔ kʋm. Ba ma bwe daanɩ ba wɩ: «Sɔɔ kʋntʋ na zaŋɩ Ebru tiinə bam vwə yam nɩ tɩn kuri mʋ bɛ?» Ba ma maanɩ nɩ kʋ yɩ Wɛ ni-gonim daka kam mʋ tu ka yi Yisɩrayɛlɩ tiinə bam na kikili daanɩ mɛ tɩn. 7 Kʋ ma pa fʋʋnɩ tiini dɩ zʋ Filisi tiinə bam. Ba maa tɛ ba wɩ: «Cam nan yi dɩbam na! Ba wa yam mʋ tu ya zʋ ba tɩtarɩ nɩ kʋntʋ! Dɩ́ ta wʋ nɛ kʋntʋ woŋo doŋ! 8 Lɛɛrʋ yi dɩbam! Wɔɔ mʋ wʋ́ wanɩ o joŋi dɩbam o yagɩ wa-dɛɛra yantʋ jɩŋa nɩ? Kʋ yɩ wa yam kʋntʋ mʋ dɛɛn pɛ cam dwi dwi ja Ezipi tiinə bam kagʋa kam nɩ ya gʋ. 9 Filisi tiinə bam, á pa-na dɩ́ di baarɩ! Kɩ-na najara yam nɩ nɔn-babɛ te! Kʋ na daɩ kʋntʋ, dɩ́ lagɩ dɩ́ ji Ebru tiinə bam gambɛ mʋ, nɩnɛɛnɩ bantʋ dɩ dɛɛn na yɩ dɩbam gambɛ te tɩn. Kʋntʋ tɩn, jaŋɩ-na dɩ baarɩ!»
10 Filisi tiinə bam dɛɛn ma kɩ najara yam dɩ ba dam maama. Ba ma wanɩ Yisɩrayɛlɩ tiinə bam. Yisɩrayɛlɩ tiinə bam ma duri ba joori ba sam nɩ. Yisɩrayɛlɩ tiinə balʋ na tɩgɩ dɩ dɛ dɩm nɩ tɩn kɔgɔ dɛɛn tiini kʋ gaalɩ zanzan, nɩnɛɛnɩ jar-kərə mʋrrʋ fiintɔ (30,000). 11 Filisi tiinə bam ma vrɩ Wɛ ni-gonim daka kam, yɩ ba daarɩ ba gʋ Eli biə bale bam, Hofini dɩdaanɩ Fineasɩ.
Eli tʋʋnɩ
12 Dɩntʋ dɛ dɩm nɩ mʋ Bɛnzamɛn dwi tu dɩdʋa zɩgɩ najara kaporo kʋm nɩ o duri o vu o yi Siloo. Nɔɔnʋ wʋm ya kaagɩ o gwaarʋ, yɩ kasʋlʋ taagɩ o yuu maama, o wʋ na cɔgɩ tɩn ŋwaanɩ.b 13 Eli wʋbʋŋa maama dɛɛn nan ya duri ya da Wɛ ni-gonim daka kam kwaga mʋ, sɩ o lwarɩ kʋlʋ na kɩa ka baŋa nɩ tɩn. O ma vu o je cwǝŋǝ ni nɩ, sɩ o cəgi o ni jara-kǝm dɩm taanɩ. Nɔɔnʋ wʋm ma ba o zʋ tɩʋ kʋm wʋ o ta najara yam laŋa ya na ve te tɩn. Ba na ni tɩn, tɩʋ kʋm tiinə bam maama maa coosǝ ba yaga bɔgɩ-bɔgɩ.
14 Eli na ni sɔɔ kʋm ŋwa tɩn, mʋ o bwe o wɩ: «Bɛɛ mʋ kɩ yɩ ba coosǝ kʋntʋ?» Nɔɔnʋ wʋm ma kɩ lɩla o vu o yi Eli te o ta o brɩ-o kʋlʋ na kɩ tɩn. 15 Eli bɩna dɛɛn laan ya yɩ funʋgʋ-nana (98) mʋ, yɩ o yiǝ yam dwe. 16 Nɔɔnʋ wʋm ma ta o wɩ: «Amʋ nuŋi najara kaporo kʋm nɩ mʋ a ma a yi tɩntʋ. Zɩm mʋ a zɩgɩ dáanɩ a duri a ba.» Eli ma bwe‑o o wɩ: «Amʋ bu, bɛɛ mʋ kɩ da?» 17 Nɔɔnʋ wʋm ma ləri o wɩ: «Kʋ yɩ lɛɛrʋ mʋ dɩ́ nɛa. Yisɩrayɛlɩ jar-kərə bam duri Filisi tiinə bam yigə nɩ sɩ ba lu. Ba kɔgɔ zanzan mʋ tɩga. Nmʋ dɩ biə bam Hofini dɩdaanɩ Fineasɩ dɩ tɔgɩ ba tɩ mʋ. Filisi tiinə bam ta ma vrɩ Wɛ ni-gonim daka kam ba ja ba viiri!»
18 Nɔɔnʋ wʋm na yɔɔrɩ o ta kʋlʋ na kɩ Wɛ ni-gonim daka kam yɩra nɩ tɩn, mʋ Eli yalɩ o tʋ o kwaga nɩ. O dɛɛn je tɩʋ kʋm manco-pɩɩna ni nɩ mʋ, yɩ o tʋ tɩga nɩ kʋntʋ. O na yalɩ o tʋ o kʋlɔgɔ baŋa nɩ tɩn, mʋ o ban bwəri pa o tɩ. Bɛŋwaanɩ, o dɛɛn kwɩn mʋ zanzan, yɩ o ta tiini o nu o gaalɩ. Eli dɛɛn ya nii Yisɩrayɛlɩ tiinə bam baŋa nɩ bɩna fiinna mʋ.
19 Eli bu Fineasɩ kaanɩ wʋm dɛɛn jɩgɩ pugə mʋ, yɩ ka bɩ ka ti sɩ o lʋ. O dɩ ma ni nɩ ba vrɩ Wɛ ni-gonim daka kam ba ja ba viiri, yɩ o barʋ wʋm dɩdaanɩ o barʋ ko wʋm maama tɩga. O na ni tɩn, mʋ o pugə dɛ ka vri ka lagɩ lʋra. O maa wʋ wanɩ o wəri. 20 O na lagɩ o tɩ o lʋra kam baŋa nɩ tɩn, kaana balʋ na lwər‑o sɩ o lʋ tɩn ma ta dɩd-o ba wɩ: «Nan vɔ wʋʋ, sɩ n lʋgɩ bəkərə mʋ.» O maa wʋ ləri kʋlʋkʋlʋ.
21 Kaanɩ wʋm dɛɛn ma pa o bu wʋm yɩrɩ mʋ nɩ: ‹Ikabɔdɩ›, yɩ o ta yɩrɩ dɩm kuri o wɩ: «Baŋa-Wɛ paarɩ-zulǝ yam je Yisɩrayɛlɩ tiinə bam tee nɩ!» Kʋ dɛɛn yɩ Filisi tiinə bam na vrɩ Wɛ ni-gonim daka kam tɩn ŋwaanɩ, dɩ o barʋ dɩdaanɩ o barʋ ko wʋm maama dɩ na tɩgɩ tɩn ŋwaanɩ mʋ o tagɩ kʋntʋ. 22 O ma ta o wɩ: «Baŋa-Wɛ paarɩ-zulǝ yam nuŋi kʋ daarɩ Yisɩrayɛlɩ tɩʋ kʋm, ba na vrɩ Wɛ ni-gonim daka kam ba ja ba viiri tɩn ŋwaanɩ.»