Baŋa-Wɛ vɩɩrɩ DƖ tɩtɩ dɩ Samowɛlɩ
3
Samowɛlɩ dɛɛn ta na yɩ bu kʋntʋ tɩn, mʋ o tʋŋɩ o pa Baŋa-Wɛ yɩ Eli nii o baŋa nɩ. Kantʋ maŋa nɩ, nɔɔna ba ni Baŋa-Wɛ kwǝrǝ. Wɛ maa ba vɩɩrɩ wǝǝnu zanzan DƖ brɩ nɔɔna.2 Eli yiǝ yam dɛɛn lagɩ ya dwe mʋ yɩ o ba naɩ lanyɩranɩ. Tɩtɩɩ dɩdʋa, o maa tigi o tigə je nɩ o dɔa. 3 Samowɛlɩ dɩ maa tigi Wɛ-digə kam nɩ sɩ kʋ maŋɩ dɩdaanɩ Wɛ ni-gonim daka kam o dɔa. Kʋ dɛɛn yɩ tɩtɩɩ kʋnkʋrʋ mʋ, yɩ Wɛ min-zoŋo kʋm ya ta wʋ dwe.
4 Baŋa-Wɛ laan ma bəŋi Samowɛlɩ. O dɩ ma ləri o wɩ: «Nii-nɩ da.» 5 O ma zaŋɩ o duri o zʋ Eli te yɩ o wɩ: «A ko, nmʋ na bǝŋi-nɩ tɩn, nii-nɩ da.» Eli ma ta dɩd-o o wɩ: «Amʋ wʋ bǝŋi-m. Joori n vu n pəni.» Bu wʋm ma joori o vu o pwəgə je o pəni.
6 Baŋa-Wɛ daa ta ma bəŋi o yɩrɩ DƖ wɩ: «Samowɛlɩ!» Samowɛlɩ ma pɛ o zaŋɩ wɛɛnɩ. O ma duri o vu Eli te yɩ o ta dɩd-o o wɩ: «A ko, nii-nɩ da, n na bǝŋi-nɩ tɩn.» Eli ta ma ləri o wɩ: «A bu, amʋ wʋ bǝŋi-m. Joori n vu n pəni.»
7 Samowɛlɩ dɛɛn ya ta wʋ mɩ dɩ Baŋa-Wɛ. Bɛŋwaanɩ, Baŋa-Wɛ ya ta wʋ vɩɩrɩ DƖ kwǝrǝ DƖ brɩ-o. 8 Baŋa-Wɛ ta ma bəŋi Samowɛlɩ DƖ kɩ kuni bɩtɔ. Bu wʋm daa ma duri o vu Eli te o wɩ: «Amʋ ko, n na bǝŋi-nɩ tɩn, nii-nɩ da.»
Kʋ laan ma ba Eli yuu nɩ sɩ: kʋ yɩ Baŋa-Wɛ mʋ bǝi bu wʋm. 9 O laan ma ta Samowɛlɩ o wɩ: «Joori n vu n ta n tigə, sɩ DƖ daa na bǝŋi-m, sɩ n ta wɩ: ‹Amʋ Tu Baŋa-Wɛ, ta n ŋɔɔna, sɩ a yɩ n tɩntʋŋnʋ yɩ a cəgi n taanɩ dɩm mʋ.› » Samowɛlɩ ma sɩɩnɩ o vu o pəni o pwəgə je nɩ.
10 Baŋa-Wɛ ma joori DƖ ba DƖ zɩgɩ da. DƖ ma bǝŋ-o nɩ DƖ ya na maŋɩ DƖ bəŋi te tɩn DƖ wɩ: «Samowɛlɩ! Samowɛlɩ!» Samowɛlɩ ma ləri o wɩ: «Amʋ Tu, ta n ŋɔɔna, sɩ a yɩ n tɩntʋŋnʋ yɩ a cəgi n taanɩ dɩm mʋ.» 11 Baŋa-Wɛ laan ma ta DƖ wɩ: «Amʋ ti a yigə mʋ sɩ a kɩ wo-kɩnkagɩlɩ Yisɩrayɛlɩ tiinə bam wʋnɩ. Balʋ maama na wʋ́ ni kʋ ŋwa tɩn yɩra maa wʋ́ sɔɔrɩ. 12 Maŋa kam na yiǝ, amʋ wʋ́ tʋŋɩ kʋlʋ maama a na tagɩ Eli sɔŋɔ kʋm ŋwaanɩ tɩn. A na puli tɩtʋŋa, a nan wʋ́ ja-ya mʋ a yi ya gurim. 13 Bɛŋwaanɩ, a maŋɩ a wuuri a kaan‑o nɩ: a lagɩ a waarɩ o digə kam taan wuu, o biə bam kǝm-balwaarʋ tɩm ŋwaanɩ. Bɛŋwaanɩ, Eli ya ye o biə bam na tiini ba lwɛ amʋ zanzan te tɩn ni nɩ, yɩ o wʋ dɩ-ba cwǝŋǝ nɩ. 14 Kʋntʋ ŋwaanɩ mʋ, amʋ tagɩ a du dɩ Eli digə tiinə bam a wɩ: ‹Kaanɩm dwi dɩ pɛɛra dwi daa bá taa wʋra, sɩ ya wanɩ ya saarɩ ba tusim dɩm maŋa dɩ maŋa.› »
15 Samowɛlɩ na ni kʋntʋ tɩn, o ma lɛɛrɩ o tigi da sɩ tɩga vu ka pʋʋrɩ. O laan ma pʋrɩ Wɛ digə kam manco-pɩɩna yam. Fʋʋnɩ dɛɛn maa tiini dɩ jɩg-o. O ma warɩ sɩ o ta kʋlʋ Wɛ na vɩɩrɩ DƖ brɩ-o tɩn dɩ Eli. 16 Eli ma bǝŋ-o o wɩ: «Amʋ bu Samowɛlɩ!» Samowɛlɩ ma ləri o wɩ: «Nii-nɩ da.» 17 Eli laan ma bwe‑o o wɩ: «DƖ tagɩ bɛɛ mʋ dɩ nmʋ? Yɩ zaŋɩ n səgi kʋlʋkʋlʋ amʋ yigə nɩ, sɩ Wɛ wʋ́ pa n tiini n na lɛɛrʋ, nɩnɛɛnɩ n na wʋ tagɩ kʋlʋ maama DƖ na ŋɔɔnɩ dɩ nmʋ tɩn n brɩ nɩ.»
18 Samowɛlɩ ma tʋlɩ Wɛ kwǝrǝ kam maama nyɔ o brɩ-o, o wʋ kwɩɩlɩ kʋlʋkʋlʋ tɩga nɩ. Eli ma ta o wɩ: «Baŋa-Wɛ kwǝrǝ kam mʋ kʋntʋ. Yagɩ sɩ DƖ kɩ kʋlʋ na wʋ DƖ wʋbʋŋa nɩ tɩn.»
19 Samowɛlɩ dɛɛn maa wʋra o kɩ nɔɔnʋ, yɩ Baŋa-Wɛ wʋ o tee nɩ. Kʋ ma pa kʋlʋ maama Samowɛlɩ na tɛ tɩn yǝni kʋ sɩɩnɩ kʋ kɩ. 20 Yisɩrayɛlɩ tiinə bam maama, kʋ na zɩgɩ Dan nɩ sɩ kʋ yi Bɛɛr-Seba tɩn, ba maama dɛɛn pɛ cɩga mʋ nɩ Samowɛlɩ sɩɩnɩ o yɩ Baŋa-Wɛ nijoŋnu mʋ cɩga cɩga. 21 Baŋa-Wɛ dɛɛn ta yǝni DƖ vɩɩrɩ DƖ tɩtɩ mʋ Siloo nɩ. DƖ maa wʋ́ yǝni DƖ ba Samowɛlɩ te DƖ ŋɔɔnɩ dɩd-o.