Annɩ zuli Baŋa-Wɛ
2
Annɩ laan ma loori Wɛ o wɩ:«Amʋ Tu Baŋa-Wɛ,
nmʋ pɛ a wʋʋ poli zanzan!
Amʋ joori a na dam Baŋa-Wɛ ŋwaanɩ mʋ.
Amʋ laan wʋ́ mwanɩ a dʋna baŋa nɩ,
Bɛŋwaanɩ, a wʋʋ mʋ tiini kʋ poli nmʋ zǝnǝ ŋwaanɩ.
2 Baŋa-Wɛ, nmʋ yɩ Wʋ-poŋo Tu yɩ n doŋ tǝrǝ!
Nɔɔn-nɔɔnʋ maa tǝrǝ
o na maɩ dɩ nmʋ.
Piu kʋdoŋ daa tǝrǝ,
kʋ na jɩgɩ dam nɩ dɩbam Wɛ dɩm!a
3 Baŋa-Wɛ yɩ Wɛ dɩlʋ na ye tɩtʋŋɩ maama ni nɩ tɩn mʋ.
DƖ maa bʋrɩ nɔɔna bʋra
ba tɩtʋŋa ŋwaanɩ.
Kʋntʋ ŋwaanɩ, yagɩ-na kamun-ŋwɛ taanɩ!
Kweeli-na á kamunni ŋwɛ sɩlʋ
á na jɩgɩ tɩn á yagɩ tɩga nɩ.
4 Dɩdɛɛra tɛn sɩm bwəri
yɩ ba dam maama ti.
Nabwənə dam laan za fɔgɩ
dɩ puli mʋ taan.
5 Balʋ ya na yǝni ba di ba sui tɩn
laan wʋra ba beeri tɩtʋŋa
sɩ ba ma na ba ni-wʋdiu.
Balʋ kana ya na wɔɛ tɩn dɩ laan maa di lanyɩranɩ ba sui.
Ka-dʋgʋ kam lʋgɩ biə barpɛ mʋ.
Kaanɩ wʋlʋ yaa na ba lʋrɩ tɩn, laan lʋgɩ kuni bɩrpɛ mʋ,
kʋ daarɩ yɩ wʋlʋ yaa na maŋɩ o lʋrɩ tɩn laan kwaarɩ.
6 Baŋa-Wɛ mʋ jaanɩ tʋʋnɩ dɩ ŋwɩa DƖ tui.
DƖ maa paɩ nɔɔna tu curu,
yɩ DƖ ta paɩ badonnǝ zaŋa.
7 Dɩntʋ mʋ paɩ nɔɔna yɩ nabwənə,
yɩ DƖ ta paɩ badaara yɩ jɩjɩgɩrʋ tiinə.
DƖ waɩ DƖ pa dɩdʋa wʋ tɩga nɩ,
yɩ DƖ daarɩ o zǝŋi wʋdoŋ.
8 DƖ yǝni o liiri yinigə tu mʋ
bwəru wʋnɩ.
DƖ maa lɩ nabwəm o lɛɛrʋ wʋnɩ.
DƖ laan maa pa ba taa tɔgɩ
ba je pabiə tɩtarɩ nɩ,
sɩ nɔɔna taa pa-ba zulə lanyɩranɩ.
Bɛŋwaanɩ, tɩga kam baŋa maama
yɩ Baŋa-Wɛ nyɩm mʋ,
yɩ Dɩntʋ mʋ cwi woŋo maama kʋ jǝgǝ nɩ.
9 DƖ nii balʋ na zɩgɩ dɩ cɩga ba pa‑DƖ tɩn baŋa nɩ mʋ.
Nɔn-balwaarʋ nan wʋ́ tɔgɩ lim wʋnɩ mʋ ba je.
Dam yɩranɩ warɩ dɩ joŋi nɔɔnʋ dɩ yagɩ.
10 Baŋa-Wɛ mʋ wʋ́ cɔgɩ DƖ dʋna bam maama.
DƖ lagɩ DƖ zɩgɩ wɛyuu nɩ mʋ DƖ bagɩ DƖ yagɩ ba baŋa nɩ!
Baŋa-Wɛ maa wʋ́ di nabiinǝ maama taanɩ.
Kʋ nan na yɩ pɛ wʋlʋ DƖ na tiŋi tɩn,
DƖ wʋ́ pa‑o dam
sɩ nɔɔna maama taa pa‑o zulə.»b
11 Elikana dɩ Annɩ ma joori ba sɔŋɔ Rama nɩ. Samowɛlɩ ma maŋɩ Siloo nɩ. O dɛɛn tʋŋɩ o pa Baŋa-Wɛ mʋ, yɩ kaanɩm tu Eli nii o baŋa nɩ.
Eli biə bam taanɩ
12 Eli biə bale bam dɛɛn yɩ nɔn-wo-kʋrrʋ mʋ. Ba yigə maa tǝrǝ dɩ Baŋa-Wɛ. 13 Ba ta maa yǝni ba cɔgɩ Wɛ kaanɩm tɩtʋŋa cullu tɩm. Bɛŋwaanɩ, nɔɔna na tu sɩ ba kɩ kaanɩm ba pa Wɛ, yɩ nwana yam ta na wʋra ya saŋa maŋa kalʋ tɩn, mʋ Wɛ kaanɩm tu tɩntʋŋnʋ wʋm wʋ́ da o ba yɩ o ze da-cɔrɔ na jɩgɩ nyɩa yatɔ tɩn. 14 Tɩntʋŋnʋ wʋm laan wʋ́ cu o lɩ nwana yalʋ na wʋra ya saŋɩ tɩn wʋnɩ. Kʋ na maŋɩ kʋ yɩ kambiə nɩ, naa nakənə nɩ, naa woŋo kʋlʋ maama nɩ, nwana yalʋ maama da-cɔrɔ kʋm na wʋ́ tʋrɩ kʋ zɔ tɩn mʋ wʋ́ taa yɩ Wɛ kaanɩm tu wʋm nyɩm. Ba dɛɛn jɩgɩ kikiə yam kʋntʋ mʋ ba kɩ dɩ Yisɩrayɛlɩ tiinə balʋ maama na tu Siloo sɩ ba kɩ kaanɩm tɩn.
15 Sɩ kʋ wǝli da tɩn, ba dɛɛn na yǝni ba gʋ varɩm yɩ ba ta wʋ lɔɔnɩ varɩm wʋm lara ba zwɛ bimbim dɩm baŋa nɩ sɩ ba daarɩ, Wɛ kaanɩm tu tɩntʋŋnʋ wʋm waɩ o tui o tɛ wɩ: «Pa-nɩ nwan-gwe dɩlʋ kaanɩm tu wʋm na wʋ́ wɔ tɩn, sɩ o ba lagɩ o joŋi nwan-saŋa n tee nɩ sɩ o di.» 16 Nɔɔnʋ wʋm na zɩgɩ sɩ o ta wɩ: «Yagɩ sɩ dɩ́ na zwɛ lara kam dɩ́ daarɩ, sɩ n laan lɩ nwana yalʋ n na lagɩ tɩn,» tɩntʋŋnʋ wʋm wʋ́ ləri mʋ o wɩ: «Awo! Pa-nɩ lɩla! Kʋ na daɩ kʋntʋ, a laan wʋ́ vrɩ-ya dɩ dam mʋ.»
17 Eli biə bam lwarɩm dɩm dɛɛn tiini dɩ gaalɩ mʋ yɩ dɩ cɔgɩ Baŋa-Wɛ yigə. Bɛŋwaanɩ, ba dɛɛn pɛ Baŋa-Wɛ kaanɩm pɛɛra yam ba jɩgɩ kuri.
18 Sɩ kʋ na yɩ Samowɛlɩ, wʋntʋ dɛɛn zɩgɩ o biini nɩ mʋ o tʋŋɩ o pa Baŋa-Wɛ. O nan ya zʋ gwar-wʋgʋ kʋlʋ ba na mɛ gar-fɩfalɩ ba sɔ sɩ kʋ taa nyɩ dɩ Wɛ kaanɩm tiinə gwaarʋ tɩm tɩn mʋ. 19 Bɩnɩ maama, o nu wʋm yǝni o sɔ gwar-bwərə balaŋa mʋ sɩ o pa‑o. O na tɔgɩ dɩ o barʋ o ba Wɛ-digə kam sɩ ba kɩ bɩnɩ dɩm kaanɩm, o yǝni o ja gwar-bwərə kam mʋ o ja o ba o pa‑o. 20 Eli dɩ maa yǝni o loori Wɛ sɩ DƖ kɩ lanyɩranɩ Elikana dɩ o kaanɩ Annɩ yuu nɩ o wɩ: «Baŋa-Wɛ wʋ́ pa kaanɩ wʋntʋ lʋ biə o pa‑m, sɩ ba ləri bu wʋntʋ yuu nɩ, o na kwe bu wʋm o pa Baŋa-Wɛ tɩn ŋwaanɩ.» Ba dɩ laan maa yǝni ba joori ba sɔŋɔ.
21 Baŋa-Wɛ ma sɩɩnɩ DƖ kɩ Annɩ yu-yoŋo. O ma lʋ bəkəri sɩtɔ dɩdaanɩ bɩsankam sɩle. Sɩ kʋ na yɩ Samowɛlɩ, wʋntʋ dɛɛn kɩ nɔɔnʋ mʋ, yɩ o tʋŋɩ o pa Baŋa-Wɛ.
22 Eli dɛɛn laan tiini o kwɩn mʋ. O ma yǝni o ni o biə bam na tʋŋɩ te maama Yisɩrayɛlɩ tiinə bam yɩra nɩ tɩn. O ta ma ni nɩ o biə bam jaanɩ kaana balʋ na yǝni ba la Wɛ digə kam ni nɩ ba tʋŋɩ tɩn ba gwalɩ ba tigə. 23 Eli ma ta dɩ ba o wɩ: «Nɔɔna maama tɛ wo-lwaanʋ tɩlʋ maama abam na jɩgɩ á kɩ tɩn taanɩ ba brɩ-nɩ. Bɛɛ mʋ yɩ á jɩgɩ tɩtʋŋ-dwə yam kʋntʋ á kɩ? 24 Amʋ biə bam, Baŋa-Wɛ nɔɔna bam na jɩgɩ á taanɩ ba tɛ te tɩn ba lamma. Nan yagɩ-na kikiə yam kʋntʋ. 25 Nɔɔnʋ wʋlʋ na kɩ o cɔgɩ o doŋ nabiinu yigə, Baŋa-Wɛ ta wʋ́ wanɩ DƖ zɩgɩ kʋ tu kwaga nɩ. Nɔɔnʋ nan na kɩ o cɔgɩ Baŋa-Wɛ tɩtɩ yigə mʋ, DƖ lagɩ DƖ kɩ tɛ mʋ?» Dɩ kʋntʋ maama dɩ, Eli biə bam ta wʋ sɛ o taanɩ dɩm. Bɛŋwaanɩ, Baŋa-Wɛ wʋbʋŋa maŋɩ ya ja mʋ sɩ DƖ gʋ-ba.
26 Kʋ daarɩ, Samowɛlɩ dɛɛn fɔgɩ o kɩ nɔɔnʋ mʋ. Baŋa-Wɛ dɩdaanɩ nabiinǝ maama maa lagɩ o taanɩ.c
Waarɩm dɩlʋ na wʋ́ ba Eli sɔŋɔ baŋa nɩ tɩn
27 Wɛ tɩntʋŋnʋ wʋdoŋ dɛɛn ma ba Eli te yɩ o wɩ:
«Baŋa-Wɛ ni dɩm mʋ tɩntʋ: Yisɩrayɛlɩ tiinə bam dɛɛn ta na yɩ gambɛ Ezipi pa-farʋ wʋm jɩŋa nɩ tɩn, amʋ dɛɛn vɩɩrɩ a tɩtɩ dɩdaanɩ nmʋ nabaarʋ Arɔn. 28 Amʋ ma kuri n nabaarʋ wʋm kʋntʋ Yisɩrayɛlɩ dwiə yam maama wʋnɩ, sɩ o taa yɩ amʋ kaanɩm tu. A maa paɩ wʋntʋ dɩ o dwi dɩm tʋŋɩ a kaanɩm bimbim dɩm tɩtʋŋa, yɩ ba zwɛ wǝǝnu tɩlʋ lwǝm na ywǝmmǝ tɩn ba pa-nɩ. Ba maa jɩgɩ pwələ sɩ ba lɛ kaanɩm gwar-wʋgʋ ba zʋ amʋ te. A ta ma pa ba dwi dɩm cwǝŋǝ sɩ ba taa di a digə pɛɛra yam Yisɩrayɛlɩ tiinə bam na zwɛ ba kaanɩ ba pa-nɩ tɩn wʋnɩ. 29 Bɛ nan mʋ te yɩ abam gooni pɛɛra yalʋ amʋ na pɛ ni sɩ á joŋi-ya á ma á kɩ kaanɩm á pa-nɩ a digə kam wʋnɩ tɩn? Nmʋ nan na kɩ te tɩn brɩ nɩ n tiini n kwarɩ n biə bam sɩ kʋ dwǝni n na kwarɩ amʋ te tɩn. Bɛŋwaanɩ, abam jɩgɩ amʋ nɔɔna Yisɩrayɛlɩ tiinə bam wʋdi-laarʋ tɩm mʋ á di á nuə.
30 Amʋ wʋlʋ na yɩ Yisɩrayɛlɩ tiinə Baŋa-Wɛ dɩm tɩn ni dɩm mʋ tɩntʋ: Amʋ dɛɛn ya goni ni mʋ nɩ: á sɔ-yuu kʋm dɩdaanɩ á dwi dɩm wʋ́ taa yɩ a kaanɩm tiinə sɩ kʋ taa ve maŋa maama. Amʋ laan nan tɛ a wɩ: kʋ daa bá taa yɩ kʋntʋ. Bɛŋwaanɩ, amʋ wʋ́ zuli balʋ dwi maama na zuli-nɩ tɩn mʋ, sɩ a daarɩ a nii balʋ yigə na tǝri a wʋnɩ tɩn a gooni. 31 Ta n ye nɩ maŋa lagɩ ka yi sɩ a pa n dwi dɩm ti. Nɔn-kwɩʋn daa bá taa wʋra n ko dwi dɩm wʋnɩ. Nmʋ digə tiinə bam maama wʋ́ tɩ ba nɔn-dʋnnɩ maŋa nɩ mʋ. 32 Nmʋ wʋ́ na lɛɛrʋ na tu amʋ Wɛ-digə kam baŋa nɩ te tɩn. Nmʋ ta wʋ́ na amʋ na wʋ́ kɩ Yisɩrayɛlɩ tiinə bam lanyɩranɩ te tɩn, sɩ Kʋ daarɩ abam dwi dɩm nɩ, nɔɔn-nɔɔnʋ daa bá kwɩn sɩ o laan tɩ. 33 Amʋ nan za wʋ́ pa n biə bam wʋ dɩdʋa daarɩ sɩ o taa tʋŋɩ a kaanɩm bimbim dɩm tɩtʋŋa. Wʋntʋ yiǝ nan wʋ́ dwe pa wʋ-cɔgɔ yɩranɩ taa wʋra. Abam dwi dɩm na daarɩ tɩn maa wʋ́ tɩ ba nɔn-dʋnnɩ maŋa nɩ.
34 Nmʋ biə bam bale Hofini dɩdaanɩ Fineasɩ wʋ́ da daanɩ mʋ ba tɩ dɛ dɩdwɩ wʋnɩ. Kʋ na wʋ́ kɩ-ba te tɩn maŋɩ sɩ n wanɩ n lwarɩ nɩ kʋlʋ maama a na tagɩ tɩn wʋ́ kɩ. 35 Amʋ laan wʋ́ kuri kaanɩm tu wʋdoŋ na jɩgɩ cɩga lanyɩranɩ tɩn. Kʋ tu wʋ́ taa tʋŋɩ yɩ o kɩ a wʋbʋŋa na lagɩ kʋlʋ maama tɩn o pa-nɩ. A maa wʋ́ pa o dwi tiinə fɔgɩ ba puli lanyɩranɩ, sɩ ba taa tʋŋɩ ba paɩ pɛ wʋlʋ a na wʋ́ kuri tɩn. 36 Abam dwi dɩm wʋnɩ balʋ na wʋ́ daarɩ tɩn laan wʋ́ vu kaanɩm tu wʋm kʋntʋ te ba loori səbu dɩdaanɩ wʋdiu. Baá ta ba wɩ: ‹Popo, pa dɩbam dɩ da dɩ́ tʋŋɩ kaanɩm tiinə tɩtʋŋa yam, sɩ dɩbam dɩ da dɩ́ laŋɩ wʋdiu.› »