Samowɛlɩ Dayigǝ Tɔnɔ
Samowɛlɩ lʋra dɩ o biini taanɩ
1
Nɔɔnʋ wʋdoŋ dɛɛn mʋ wʋra, o yɩrɩ mʋ Elikana. O dɛɛn nuŋi Efrata dwi dɩm wʋnɩ mʋ, dɩ Zufa sɔ-yuu kʋm nɩ. O ko yɩrɩ maa yɩ Zeroham, yɩ o nabaara yɩ Elihu, dɩ Tohu, dɩ Zufa. O dɛɛn zʋʋrɩ Efrayim pweeru laŋa kam tɩʋ kʋdoŋ nɩ, kʋ yɩrɩ mʋ Rama. 2 Elikana kaana dɛɛn yɩ bale mʋ. Ba dɩdʋa yɩrɩ mʋ Annɩ, wʋdoŋ wʋm yɩrɩ maa yɩ Penina. Penina dɛɛn maa jɩgɩ biə yɩ Annɩ ba jɩgɩ bu.a3 Bɩnɩ maama nɩ, Elikana yǝni o zɩgɩ Rama nɩ o ja o digə kam maama mʋ o vu Wɛ-digə kam na wʋ Siloo nɩ tɩn sɩ o zuli Paŋwa Tu Baŋa-Wɛ, yɩ o daarɩ o kɩ kaanɩm o pa‑DƖ.b Eli biə bale bam, Hofini dɩdaanɩ Fineasɩ dɛɛn mʋ yɩ Baŋa-Wɛ kaanɩm tiinə bam Siloo nɩ. 4 Elikana na yǝni o kɩ kaanɩm kʋntʋ, o yǝni o maŋɩ nwana yam mʋ o pa Penina, yɩ o daarɩ o kwe yadonnə o pa o biə bam dɩ. 5 Sɩ kʋ na yɩ Annɩ, Elikana yǝni o maŋɩ nwana yam kuni bɩle o pa‑o, o na tiini o soe‑o tɩn ŋwaanɩ mʋ. Baŋa-Wɛ nan wʋ pɛ pwələ sɩ wʋntʋ lʋ biə. 6 Kʋntʋ ŋwaanɩ, Annɩ ka-doŋ Penina maa yǝni o kɩ-o o mwana, yɩ o daarɩ o paɩ kʋ zʋʋrɩ o yɩra lanyɩranɩ. 7 Kʋ maa yɩ kʋntʋ mʋ bɩnɩ dɩ bɩnɩ. Ba na ve Baŋa-Wɛ digə kam nɩ, Penina wʋ́ tiini o pa kʋ cɛ Annɩ yɩra mʋ. O dɩ dɛɛn maa yǝni o vɩn sɩ o di wʋdiu, yɩ o lɛɛrɩ o da kərə yɩranɩ taan. 8 O barʋ Elikana laan ma yǝni o bwe o wɩ: «Annɩ, bɛŋwaanɩ mʋ yɩ n vɩn wʋdiu. Bɛɛ mʋ yɩ n wʋʋ tiini kʋ cɔgɩ kʋntʋ? Yɩ ta n keerǝ. Amʋ ba dwe biə fugə n tee nɩ na?»
9 Maŋa dɩdʋa nɩ, ba na ve Siloo yɩ ba di ba ti tɩn, mʋ Annɩ zaŋɩ o zʋ Wɛ-digə kam nɩ, sɩ o warɩ Baŋa-Wɛ. Kʋntʋ dɩ Wɛ kaanɩm tu Eli dɛɛn ya je digə kam ni nɩ, o na yǝni o je mɛ tɩn. 10 Annɩ yigə ma tiini ka nywanɩ, yɩ o keerǝ. O ma loori Baŋa-Wɛ, 11 yɩ o goni ni o wɩ: «Paŋwa Tu Baŋa-Wɛ, amʋ yɩ nmʋ tɩntʋŋnʋ mʋ. Nii lɛɛrʋ tɩntʋ a na wʋ tɩ wʋnɩ tɩn, sɩ n guli amʋ gulə. Nmʋ na wʋ swe amʋ swiə, yɩ n na pɛ-nɩ bəkərə, amʋ nan lagɩ a joori a kwe‑o mʋ a pa nmʋ, sɩ o ŋwɩa maama wʋnɩ o taa yɩ nmʋ nyɩm. Fancʋan dɩ nan bá fɔgɩ ka tɔgɩ o yuu ka kɛ.»c
12 Annɩ ma tiini o loori Baŋa-Wɛ digə kam nɩ o daanɩ, yɩ Eli dɩ maa je o nii‑o. 13 Annɩ wɛ-loro kʋm maama dɛɛn kɩ o bɩcarɩ nɩ mʋ. O ni-vɔɔrʋ tɩm dɛɛn magɩ daanɩ mʋ, yɩ o kwǝrǝ ba zaŋa. Eli na nɛ kʋntʋ tɩn, o dɛɛn bʋŋɩ nɩ kaanɩ wʋm nyɔgɩ sana mʋ o su. 14 O ma ta dɩ Annɩ o wɩ: «Nmʋ zʋ yo sɩ n brɩ n sa-nyɔrɩ tɩtʋŋa mʋ na? Yagɩ n sa-nyɔrɩ kikiə yam kʋntʋ!»
15 Annɩ ma lǝr-o o wɩ: «Awo! Amʋ wʋ nyɔgɩ sana kɔtaa! Amʋ yɩ kaanɩ wʋlʋ na tiini a na daanɩm tɩn mʋ. Kʋntʋ ŋwaanɩ nan mʋ amʋ yɔɔrɩ a lo a wʋ-cɔgɔ kʋm maama a tiŋi Baŋa-Wɛ yigə nɩ. 16 Yɩ ta n bʋŋɩ nɩ amʋ ga yɩ ka-yɔɔ mʋ, sɩ kʋ yɩ a wʋ mʋ cɔgɩ zanzan kʋ ja kɛ jɩŋa. Kʋntʋ mʋ te a tiini a loori Wɛ.»
17 Eli laan ma ta dɩd-o o wɩ: «Kʋ nan na yɩ kʋntʋ, zaŋɩ n vu dɩ yazurə, sɩ Yisɩrayɛlɩ tiinə Wɛ dɩm wʋ́ pa‑m n na beeri kʋlʋ tɩn.» 18 Annɩ ma ləri o wɩ: «Amʋ tu. A kɩ n le. Wɛ wʋ́ pa a kikiə su n yi.» O ma zaŋɩ o viiri, o vu o di wʋdiu. O yigə daa maa wʋ nywanɩ.
19 Tɩga na pʋʋrɩ tɩtɩɩtɩ tɩn, Elikana digə tiinə bam maama daa ma zʋ Wɛ-digə kam nɩ ba zuli Baŋa-Wɛ, yɩ ba daarɩ ba joori sɔŋɔ Rama nɩ. Elikana dɛɛn ma pəni dɩ o kaanɩ Annɩ. Baŋa-Wɛ ma sɛ Annɩ na loori kʋlʋ DƖ tee nɩ tɩn. 20 Annɩ ma ba o ja pugə yɩ o lʋ bəkərə. O ma pa bu wʋm yɩrɩ nɩ ‹Samowɛlɩ›. Bɛŋwaanɩ, o dɛɛn tagɩ mʋ o wɩ: «Amʋ loori Baŋa-Wɛ mʋ yɩ a joŋ-o.»
Annɩ kɩ Samowɛlɩ Wɛ jɩŋa nɩ
21 Bɩnɩ dɩdoŋ dɛɛn daa ma yi sɩ Elikana dɩ o digə tiinə bam joori ba vu Siloo ba kɩ kaanɩm ba pa Baŋa-Wɛ, sɩ Elikana dɩ kwe ni dɩlʋ o ya na tiŋi o pa Wɛ tɩn. 22 Annɩ maa wʋ tɔgɩ dɩ ba o vu. O dɛɛn tagɩ dɩ o barʋ wʋm mʋ o wɩ: «Yagɩ sɩ a na tu a kwǝri bu wʋm yɩlɩ, a tɩtɩ wʋ́ ja-o a vu Wɛ-digə kam sɩ a kɩ-o Baŋa-Wɛ jɩŋa nɩ. O maa wʋ́ maŋɩ da sɩ kʋ vu kʋ yi o tʋʋnɩ.» 23 Elikana ma ləri o wɩ: «Nan kɩ kʋlʋ maama na maŋɩ kʋ pa‑m tɩn. Maŋɩ yo sɩ bu wʋm waarɩ. Baŋa-Wɛ nan wʋ́ pa DƖ ni dɩm sɩɩnɩ dɩ kɩ kʋ pa‑m.»
Annɩ ma maŋɩ sɔŋɔ nɩ yɩ o kɔnɩ o bu wʋm. 24 Bu wʋm na tu o kwǝri yɩlɩ tɩn, mʋ Annɩ jaan‑o o vu Siloo. O ta maa jɩgɩ bɩna yatɔ na-bɩa, dɩdaanɩ muni kʋrɩwaa bu dɩdʋa, kʋ wǝli dɩ lɔa wʋ sana. O dɛɛn ma ja Samowɛlɩ o vu Wɛ-digə kam, dɩ o ta na maŋɩ o yɩ bu-pwələ tɩn mʋ. 25 Ba ma gʋ na-bɩa kam, yɩ ba daarɩ ba ja bu wʋm ba vu Eli te. 26 Annɩ ma ta dɩ Eli o wɩ: «Amʋ tu. Kʋ na yɩ cɩga tɩn, amʋ mʋ yɩ kaanɩ wʋlʋ dɛɛn na zɩgɩ n tee nɩ yɩ a loori Baŋa-Wɛ tɩn. 27 Kʋ yɩ bu wʋntʋ ŋwaanɩ mʋ a ya loori Baŋa-Wɛ, yɩ DƖ pa-nɩ a na lagɩ kʋlʋ tɩn. 28 Kʋntʋ tɩn, a lagɩ o joori a kwe‑o mʋ a pa Baŋa-Wɛ. Bu wʋm ŋwɩa kam maama wʋnɩ, o yɩ Baŋa-Wɛ nyɩm mʋ.» O na tagɩ kʋntʋ tɩn, ba ma kuni nadoonə ba zuli Baŋa-Wɛ dáanɩ.