Baŋa-Wɛ jɩgɩ cɩga dɩ DƖ nɔɔna
1 Wǝǝnu Kɩbarɩ tɔnɔ 16:8-22
105
Kɩ-na Baŋa-Wɛ le,sɩ á daarɩ á tee DƖ yɩrɩ!
Pa-na sɩ lʋgʋ baŋa dwi tiinə lwarɩ
DƖ na tʋŋɩ kʋlʋ maama tɩn.
2 Leeni-na tiə le á pa‑DƖ!
Ta-na kwaanʋ á tee‑DƖ!
Brɩ-na nɔɔna DƖ tɩtʋŋ-kamunnu
na yɩ te tɩn.
3 Taá jɩgɩ-na wʋpolo
DƖ yɩrɩ dɩm na yɩ lanyɩranɩ fasɩ tɩn ŋwaanɩ.
Abam balʋ na kwarɩ Baŋa-Wɛ tɩn,
sɩ á di-na ywəəni.
4 Ve-na Baŋa-Wɛ yigə nɩ
sɩ DƖ pa á joŋi dam.
Taá titwəni-na á twɛ‑DƖ maŋa maama wʋnɩ.
5 Joori á guli-na
DƖ tɩtʋŋ-kamunnu tɩm,
dɩdaanɩ DƖ wo-kɩnkagɩla yam gulə,
sɩ á yɩ swe DƖ sarɩya dɩm
DƖ na pɛ abam tɩn swiə.
6 Cɩga tɩn, á yɩ balʋ
Wɛ na kuri DƖ pa DƖ tɩtɩ mʋ.
Á maa yɩ Wɛ tɩntʋŋnʋ Abraham biə bam,
yɩ á kwǝri á yɩ Zakɔbɩ dwi dɩm.
7 Dɩntʋ nan mʋ yɩ
dɩbam Tu Baŋa-Wɛ dɩm.
DƖ maa te lʋgʋ baŋa maama
dɩ cɩga.
8 DƖ na goni DƖ ni dɩ DƖ nɔɔna bam te tɩn,
DƖ ta wʋ́ kɩ sɩ kʋ tɔgɩ-dɩ maŋa maama wuu.
DƖ bá kwanɩ DƖ ni sɩ kʋ taa ve maŋa maama,
dwiə mʋrʋ na wʋ́ saŋɩ tɩn.
9 Wɛ dɛɛn goni DƖ ni dɩm kʋntʋ mʋ dɩ Abraham,
yɩ DƖ daarɩ DƖ du durə
DƖ ma goni ni dɩ Yizakɩ.
10 Zakɔbɩ na tu o wʋra tɩn,
Wɛ ma fɔgɩ DƖ kɩ ni-gonim dɩm
DƖ pa‑o,
sɩ o dɩ o kwaga kam taa tɔgɩ-dɩ
maŋa maama.
11 Wɛ ma ta dɩd-o DƖ wɩ:
«Amʋ lagɩ a pa nmʋ
Kaanan tɩga kam mʋ,
sɩ nmʋ dɩ n dwi dɩm joŋi-ka
á taá te.»
12 Ba kɔgɔ kʋm dɛɛn ta ba daga.
Ba maa yɩ nɔɔna fɩnfɩɩn yɩranɩ,
yɩ ba kaagɩ Kaanan tɩga kam nɩ
ba beerǝ nɩ vərə mʋ te.a
13 Ba maa tʋlɩ tɩɩnɩ dɩm maama wʋnɩ
dɩ dwi tiinə maama wʋnɩ.
14 Dɩ kʋntʋ dɩ, Wɛ dɛɛn wʋ pɛ pwələ
sɩ nɔɔna bɛɛsɩ-ba.b
Bantʋ ŋwaanɩ mʋ DƖ dɛɛn kaanɩ pwa
yɩ DƖ wɩ:
15 «Yɩ dwe-na nɔɔna bantʋ,
sɩ amʋ mʋ kuri-ba a pa a tɩtɩ.
Nan yɩ pa-na kʋ cɛ
amʋ nijoŋnǝ bam yɩra.»
16 Baŋa-Wɛ dɛɛn pɛ kana tʋ
Kaanan tɩga kam baŋa,
yɩ ba wʋdiiru maama je.c
17 DƖ nan ya tʋŋɩ nɔɔnʋ mʋ
sɩ o loori o yi Ezipi.
Zʋzɛfʋ mʋ kʋntʋ, ba na yəg‑o
ba dɩ gabɛɛm wʋnɩ tɩn.
18 Ba dɛɛn kwe capʋnnʋ mʋ
ba ma vɔ o nɛ sɩm
yɩ ba daarɩ ba kwe luu
ba ma ja o ban dɩm.
19 Baŋa-Wɛ ni dɩm dɛɛn mʋ maŋ-o
dɩ nii,
sɩ kʋ yi maŋa kalʋ
DƖ na wuuri DƖ ta kʋlʋ tɩn sɩɩnɩ kʋ kɩ.
20 Ezipi Pa-farʋ wʋm laan ma pa ni
sɩ ba pʋr‑o ba yagɩ.
21 Pɛ wʋm ma pa wʋntʋ ji dɩdɛɛrʋ
o sɔŋɔ kʋm nɩ,
sɩ o taa te o jɩjɩgɩrʋ tɩm maama o niə.
22 Pɛ wʋm dɛɛn ta pɛ‑o dam
sɩ o taa zaasɩ o nakwa bam,
sɩ ba joŋi swan o tee nɩ.
23 Zakɔbɩ dɩ o kwaga kam dɛɛn ma vu
Samɩ dwi tiinə tɩʋ Ezipi nɩ
ba ji vərə ba zʋʋrɩ da.
24 Baŋa-Wɛ dɛɛn pɛ
sɩ DƖ nɔɔna bam puli zanzan,
pa ba damma ba dwe
ba dʋna Ezipi tiinə bam.
25 Wɛ ta ma pa bantʋ wʋbʋŋa pipiri
sɩ ba laan taa culi DƖ nɔɔna bam,
sɩ ba daarɩ ba kɩ swan ba bɛɛsɩ-ba.d
26 Baŋa-Wɛ dɛɛn ma tʋŋɩ
DƖ tɩntʋŋnʋ Moyisi ba tee nɩ.
DƖ ta ma kuri Arɔn
sɩ o da o wǝli Moyisi.
27 Bantʋ bale mʋ dɛɛn tʋŋɩ wo-kɩnkagɩla yalʋ Wɛ na pɛ-ba tɩn
nɔɔna bam tɩtarɩ nɩ.
Cɩga tɩn, ba kɩ Wɛ tɩtʋŋ-kamunnu
Samɩ dwi tiinə tɩʋ Ezipi nɩ.
28 Baŋa-Wɛ dɛɛn pɛ lim mʋ kwǝli
ba tɩga kam maama.
Ba nan wʋ sɛ Wɛ ni-taanɩ dɩm.
29 DƖ ma pa ba bwi sɩm na maama
ji jana,
pa kale yam maama tɩ.
30 Yoorə dɛɛn ma yʋ
sɩ joŋi ba tɩʋ kʋm maama,
dɩdaanɩ pɛ sɔŋɔ pwəgə je sɩm.
31 Wɛ ta ma pa ni,
yɩ nanjwɛ dɩdaanɩ yeenə laan ba
ya joŋi ba tɩʋ kʋm je maama
ya su.
32 DƖ ma pa dʋa ji dʋ-kambana ya nɩ,
yɩ dʋa pɩpɩlɩ ka bagɩ
ba tɩʋ kʋm maama.
33 DƖ ma tɔgɩ kʋntʋ baŋa
DƖ cɔgɩ ba vinyə tweeru tɩm
dɩdaanɩ ba kapʋrrʋ tɩm.
DƖ ma kaagɩ kaagɩ ba tɩʋ kʋm tweeru tɩm maama
DƖ dɩ tɩga nɩ.
34 DƖ ta ma puri DƖ ni DƖ ta,
yɩ kayɩra laan wuuri sɩ ba.
Sɩ kɔgɔ kʋm daga sɩ gaalɩ garɩm.
35 Sɩ ma məəli tɩga kam maama
sɩ di ga-lɛɛrʋ dɩ wʋdiiru tɩm
maama fasɩ.
36 Kʋ kwaga nɩ tɩn,
Baŋa-Wɛ gʋ Ezipi tiinə
bu-kwɩan maama mʋ.
Bəkərə kalʋ maama ba na dɛ yigə
ba lʋ sɔŋɔ maama wʋnɩ tɩn mʋ
DƖ gʋa.e
37 Baŋa-Wɛ laan ma ja Yisɩrayɛlɩ tiinə bam DƖ nuŋi Ezipi nɩ,
yɩ ba zɩŋɩ səbu-poŋo dɩ səbu-sɩŋa wǝǝnu zanzan ba ja viiri.
Ba dwiə yam maama wʋnɩ nɔɔn-nɔɔnʋ wʋ maŋɩ kwaga nɩ.
38 Ba na viiri tɩn,
Ezipi tiinə bam wʋʋ dɛɛn poli,
ba ya na kwarɩ fʋʋnɩ dɩ ba tɩn ŋwaanɩ.
39 Wɛ ma kwe kunkoŋo
DƖ ma DƖ kwǝli DƖ nɔɔna bam.
DƖ ma daarɩ DƖ kwe min-vʋgʋ
DƖ pa-ba,
sɩ tɩtɩɩ nɩ ba taa jɩgɩ pooni
ba tɩtarɩ nɩ.f
40 Ba ma loori‑DƖ sɩ DƖ pa-ba wʋdiu
sɩ ba di,
yɩ DƖ pa lwi jaanɩ sɩ yi-ba.g
DƖ ma daarɩ DƖ pa dɩpɛ
nuŋi wɛyuu nɩ kʋ tʋ kʋ pa-ba,
sɩ ba di ba su.
41 DƖ ta ma pa piu kʋdoŋ yarɩ,
yɩ na ta ba nuŋi ba cuurə.
Na bam dɛɛn tʋlɩ ba zʋ
kagʋa kam wʋnɩ mʋ
ba durǝ nɩ bu-tʋla mʋ te.
42 Baŋa-Wɛ dɛɛn na tʋŋɩ kʋntʋ maama tɩn,
kʋ yɩ DƖ na guli ni-gonim dɩlʋ
DƖ na kɩ dɩdaanɩ DƖ tɩntʋŋnʋ Abraham tɩn ŋwaanɩ mʋ.
43 Baŋa-Wɛ dɛɛn jaanɩ DƖ nɔɔna
balʋ DƖ na kuri tɩn
DƖ ja DƖ nuŋi Ezipi nɩ.
Ba nuŋi kʋntʋ
yɩ ba leeni mʋ ba di ywəəni,
ba daarɩ ba kaasɩ dɩ wʋpolo baŋa baŋa.
44 DƖ ma kwe dwi-gɛ tiinə tɩɩnɩ
DƖ pa DƖ nɔɔna bam,
yɩ ba laan joŋi nɔɔna bam tɩga kam ba te,
ba daarɩ ba di ba wʋdiiru tɩm.
45 Wɛ dɛɛn kɩ tɩntʋ maama DƖ pa-ba,
sɩ ba wanɩ ba taa sɛ DƖ niə yam mʋ,
yɩ ba daarɩ ba taa tʋŋɩ
ba tɔgɩ DƖ zaasɩm dɩm maama.
Pa-na dɩ́ tee Baŋa-Wɛ!