Baŋa-Wɛ lamma!
106
Tee-na Baŋa-Wɛ!Pa dɩ́ kɩ-na Baŋa-Wɛ le,
sɩ DƖ tiini DƖ lamma.
DƖ sono kʋm wʋra mʋ maŋa maama.
2 Wɔɔ mʋ wʋ́ wanɩ o lwǝni
Baŋa-Wɛ tɩtʋŋ-kamunnu tɩm?
Wɔɔ mʋ yi sɩ kʋ tu wanɩ o tee‑DƖ
sɩ kʋ maŋɩ?
3 Kʋ na yɩ balʋ na tʋŋɩ cɩga
ba pa ba donnǝ
yɩ ba yɔɔrɩ ba kɩ kʋlʋ na maŋɩ tɩn,
Wɛ wʋ́ kɩ ba yu-yoŋo.
4 Amʋ Tu Baŋa-Wɛ,
nan guli amʋ gulə,
nɩ n na bʋŋɩ sɩ n kɩ n nɔɔna lanyɩranɩ te tɩn.
Nmʋ na tu sɩ n joŋi-ba n yagɩ,
sɩ n ta n ye amʋ dɩ ni nɩ.
5 A laan wʋ́ tɔgɩ dɩ balʋ
n na kuri tɩn
sɩ a na yigə-vəŋə.
A ta wʋ́ da a na wʋpolo kʋlʋ
n tɩʋ kʋm nɔɔna na naɩ tɩn,
yɩ a tɔgɩ dɩ n tɩtɩ nɔɔna bam
a taa jɩgɩ wʋpolo nmʋ ŋwaanɩ.
6 Dɩbam kɩ lwarɩm mʋ,
nɩ dɩ́ nabaara bam dɩ dɛɛn
na kɩ te tɩn.
Dɩ́ sagɩ cwǝŋǝ
yɩ dɩ́ tiini dɩ́ tʋŋɩ lwarɩm.
7 Dɩ́ nabaara bam dɛɛn na wʋ
Ezipi nɩ tɩn,
ba yigə tǝrǝ wo-kɩnkagɩla yalʋ
nmʋ na kɩ tɩn wʋnɩ.
Ba ma swe sono kʋlʋ
nmʋ na jɩgɩ dɩ ba tɩn ni nɩ.
Ba dɛɛn na ve ba yi
Nanɩ-sʋŋʋ kʋm ni nɩ tɩn,
mʋ ba lɔgɩ nmʋ kwaga nɩ.
8 Dɩ kʋntʋ maama dɩ,
Wɛ dɛɛn ta joŋi-ba mʋ DƖ yagɩ
DƖ tɩtɩ yɩrɩ dɩm ŋwaanɩ,
sɩ DƖ wanɩ DƖ brɩ
DƖ dam-fɔrɔ kʋm na yɩ te tɩn.
9 DƖ ma bagɩ Nanɩ-sʋŋʋ kʋm pa
kʋ na bam pwɛ ba daarɩ tɩ-kʋra.
DƖ laan ma pa DƖ nɔɔna bam
nɔnɩ tɩ-kʋra kam baŋa nɩ
ba bɛ na-fara-kam,
nɩ ka na yɩ kagʋa mʋ ba bɛ te tɩn.a
10 DƖ dɛɛn joŋi-ba DƖ yagɩ
balʋ na culi-ba tɩn jɩŋa nɩ,
sɩ ba dʋna daa yɩ taa jɩgɩ dam
ba baŋa nɩ.
11 Na-fara bam dɛɛn joori
ba kɩ daanɩ
ba pu ba dʋna bam maama.
Ba dʋna bam wʋlʋwʋlʋ
maa wʋ lugi na bam wʋnɩ.
12 Kʋntʋ kwaga nɩ
DƖ nɔɔna bam laan sɛ nɩ
DƖ taanɩ dɩm yɩ cɩga mʋ,
yɩ ba daarɩ ba leeni ba tee‑DƖ.b
13 Kʋ dɛɛn nan wʋ daanɩ
yɩ ba swe DƖ na kɩ te DƖ pa-ba tɩn.
Ba daa wʋ sɛ
sɩ ba cəgi Wɛ zaasɩm dɩm.
14 Ba maa na wʋ kagʋa yuu nɩ tɩn,
ba fra yam dɛɛn warɩ ya ja,
yɩ ba daarɩ ba maŋɩ Wɛ ba nii.c
15 Wɛ ma pa-ba ba na beeri kʋlʋ tɩn,
yɩ DƖ ta kwe yawɩ-cɛɔ DƖ wǝli da
DƖ kɩ ba yuu nɩ.
16 Nɔɔna bam na pugi ba vwə
kagʋa wʋnɩ tɩn,
ba dɛɛn kɩ wʋ-gʋrʋ
dɩ Moyisi dɩ Arɔn.
Arɔn nan yɩ kaanɩm tu wʋlʋ Baŋa-Wɛ tɩtɩ na kuri tɩn.
17 Kʋntʋ ŋwaanɩ mʋ tɩga kam
dɛɛn yarɩ bɩle
ka da ka li Datan,
ka daarɩ ka suli Abiram
dɩ o kɔgɔ kʋm.
18 Mim dɛɛn mʋ tʋ bantʋ
kwaga tɔgɩna bam tɩtarɩ nɩ,
pa dɩ zwɛ nɔn-balwaarʋ tɩm kʋntʋ maama kulə.d
19 Ba na kɛ ba yi Sinayie piu kʋm tɩn
mʋ ba dɛɛn kwe luu
ba mɔ nʋa nyɩnyʋgʋ
yɩ ba daarɩ ba zuli-kʋ.
20 Kʋntʋ tɩn, ba dɛɛn nuŋi Paarɩ-zulǝ Tu Baŋa-Wɛ kwaga nɩ
yɩ ba pipiri ba zuli na-bɩa nyɩnyʋgʋ kʋm kʋntʋ,
dɩ ka na yɩ varɩm wʋlʋ na dʋnɩ gaa tɩn dɩ.
21-22 Ba dɛɛn swe ba Tu Wɛ dɩm swiə,
dɩ DƖ na yɩ dɩlʋ
na joŋi-ba DƖ yagɩ
yɩ DƖ ta kɩ wo-kamunnu Ezipi nɩ,
dɩ wo-kɩnkagɩla Nanɩ-sʋŋʋ kʋm
ni nɩ DƖ pa-ba tɩn.f
23 Kʋntʋ ŋwaanɩ Wɛ wʋbʋŋa ma ja
sɩ DƖ cɔgɩ-ba.
Wɛ tɩntʋŋnʋ Moyisi nan zɩgɩ
ba dɩ Wɛ tɩtarɩ laŋa nɩ,
pa o cɩ Wɛ ban-zɔŋɔ kʋm
sɩ DƖ daa yɩ cɔgɩ-ba.
24 Nɔɔna bam dɛɛn ta ma gooni
tɩ-ywəŋə kalʋ Wɛ na lagɩ
DƖ pa-ba tɩn.
Bɛŋwaanɩ, ba wʋ sɛ nɩ Wɛ wʋ́ sɩɩnɩ DƖ kɩ DƖ tɔgɩ DƖ ni dɩm.
25 Ba maa maŋɩ ba vwə yam wʋnɩ
yɩ ba pʋʋnɩ Wɛ.
Ba maa wʋ sɛ sɩ ba kɩ
Baŋa-Wɛ ni dɩm nɩ.
26 Kʋ ma pa Wɛ sɩɩnɩ DƖ yiǝ
DƖ du durə nɩ:
DƖ lagɩ DƖ pa ba tɩ kagʋa kam yuu nɩ,
27 yɩ DƖ daarɩ DƖ jagɩ ba kwaga kam
DƖ yagɩ dwi-gɛ tiinə bam tɩtarɩ nɩ,
sɩ ba tɩ sa-tɩɩnɩ wʋnɩ.
28 Wɛ nɔɔna bam dɛɛn ta kwe ba tɩtɩ
ba salɩ Baal-Pewɔrɩ jwəm dɩm yɩra nɩ mʋ.
Ba ma tɔgɩ ba di wʋdiiru tɩlʋ
ba na kaanɩ ba pa cirǝ tɩn.
29 Ba tɩtʋŋ-naga kam kʋntʋ
dɛɛn mʋ zaŋɩ Wɛ banɩ,
yɩ DƖ pa yawɩ-cɛɔ tʋ ba tɩtarɩ nɩ.
30 Fineasɩ nan zaŋɩ o cɩ cwǝŋǝ
sɩ yawɩ-cɛɔ kʋm daa yɩ
cɔgɩ nɔɔna bam.g
31 O kǝm dɩm kʋntʋ ŋwaanɩ mʋ
Wɛ pɛ o na cɩga,
o dɩ o kwaga kam
sɩ kʋ taa ve wuu.h
32 Ba dɛɛn ta na wʋ Meriba
buli-yi dɩm seeni tɩn
mʋ ba daa ta zaŋɩ Wɛ banɩ.
Ba kǝm dɩm kʋntʋ
dɛɛn jaanɩ daanɩm mʋ dɩ ba
dɩ pa Moyisi.
33 Bɛŋwaanɩ, o dɛɛn wʋ bʋŋɩ o yi
yɩ o ta ta-yɔɔ,
nɔɔna bam na pɛ o banɩ zaŋɩ tɩn ŋwaanɩ.
34 Ba maa wʋ cɔgɩ dwi-gɛ tiinə balʋ
dɛɛn na zʋʋrɩ tɩ-ywəŋə kam wʋnɩ tɩn,
nɩ Baŋa-Wɛ ya na pɛ-ba ni
sɩ ba kɩ te tɩn.
35 Ba nan gwaanɩ dɩ dwi-gɛ tiinə bam kʋntʋ mʋ,
pa ba lɛɛrɩ ba kɩ ba tɔgɩ
bantʋ cullu tɩm.
36 Ba dɛɛn ta tɔgɩ ba kaanɩ
bantʋ jwǝnǝ yam,
yɩ kʋntʋ mʋ jaanɩ cɔgɩm
kʋ ba ba yum nɩ.
37 Ba dɛɛn jɩgɩ ba tɩtɩ biə mʋ
ba kaanɩ ba pa tangwana.
38 Kʋntʋ tɩn, ba gʋ balʋ
na wʋ maŋɩ sɩ ba tɩ tɩn,
dɩ ba na kwe ba biə,
bəkəri dɩ bɩsankam,
ba ma ba kaanɩ Kaanan tiinə jwǝnǝ yam te tɩn.
Jana bam kʋntʋ pɛ ba ja
ba tɩga kam mʋ ba cɔgɩ.
39 Ba ta ma digimi ba tɩtɩ
dɩ ba tɩtʋŋ-zɔɔna yam kʋntʋ.
Ba kənə yam brɩ nɩ
ba daa ba jɩgɩ cɩga dɩ Wɛ.
40 Baŋa-Wɛ ban-lʋm dɩm dɛɛn yɔɔrɩ
dɩ zaŋɩ DƖ nɔɔna bam baŋa nɩ mʋ,
pa DƖ vɩn balʋ ya na yɩ
DƖ tɩtɩ nyɩm tɩn.
41 DƖ ma kwe-ba DƖ kɩ
dwi-gɛ tiinə bam jɩŋa nɩ.
Balʋ na culi-ba tɩn mʋ
laan di paarɩ ba baŋa nɩ.
42 Ba dʋna bam kʋntʋ ma tiini
ba bɛɛsɩ-ba,
dɩ ba na di dam ba baŋa nɩ te tɩn.
43 Kuni zanzan mʋ Wɛ yǝni DƖ vrɩ-ba
ba dʋna jɩŋa nɩ DƖ yagɩ.
Ba wʋbʋŋa nan jaanɩ mʋ
sɩ ba lɔ Wɛ kwaga nɩ.
Kʋ ma pa ba bugi ba je
ba lwarɩm dɩm ŋwaanɩ.
44 Kʋntʋ maama wʋnɩ dɩ,
Wɛ nɔɔna bam na yǝni
ba keeri ba loori-DƖ tɩn,
DƖ yigə ta wʋ ba yaara yam wʋnɩ mʋ.
45 DƖ ma tɔgɩ DƖ ni-gonim dɩm
baŋa nɩ DƖ duri ba ŋwaŋa,
pa DƖ banɩ dɩm zuri
DƖ sono kʋm ŋwaanɩ.
46 DƖ dɛɛn pɛ balʋ na yǝni
ba wanɩ-ba ba di tɩn
jɩgɩ ba yibwənə mʋ.
47 Dɩ́ Tu Baŋa-Wɛ, a loori-m!
Joŋi dɩbam n yagɩ!
Lɩ dɩbam dwi-gɛ tiinə bam
tɩtarɩ nɩ n kɩ daanɩ,
sɩ n pa dɩ́ joori dɩ́ tɩtɩ tɩʋ kʋm.
Dɩ́ laan wʋ́ kɩ nmʋ le,
n yɩrɩ dɩm na yɩ lanyɩranɩ fasɩ tɩn ŋwaanɩ,
yɩ dɩ́ daarɩ dɩ́ taa tee‑m
n paarɩ-zulǝ yam ŋwaanɩ.
48 Pa-na dɩ́ taa te Baŋa-Wɛ dɩm
na yɩ Yisɩrayɛlɩ tiinə Wɛ tɩn!
Dɩntʋ maŋɩ dɩ tiə mʋ
kʋ zɩgɩ faŋa faŋa
sɩ kʋ taa ve maŋa kalʋ na ba ti tɩn.
Pa-na sɩ nɔɔna maama ta wɩ:
«Amina!»
Tee-na Baŋa-Wɛ!i