Ləŋ-ŋwɩ Tɔnɔ 5
Le 107-150
Baŋa-Wɛ yɔɔrɩ DƖ nii DƖ nɔɔna baŋa nɩ
107
Pa dɩ́ kɩ-naBaŋa-Wɛ le, sɩ DƖ lamma.
DƖ sono kʋm wʋra mʋ maŋa maama.
2 Baŋa-Wɛ na vrɩ balʋ
DƖ ja nuŋi cam wʋnɩ tɩn
maŋɩ sɩ ba taa tɛ kʋ taanɩ jaja,
DƖ na joŋi-ba ba dʋna jɩŋa nɩ tɩn ŋwaanɩ.
3 Ba na jagɩ ba yi lʋgʋ baŋa
sapala yana yam tɩn
mʋ DƖ lagɩ-ba DƖ kɩ daanɩ
DƖ ja joori ba tɩtɩ tɩʋ kʋm.
4 Ba badonnǝ dɛɛn kaagɩ
kagʋa wʋnɩ mʋ
ba beeri yɔɔ yɩranɩ.
Ba beeri cwǝŋǝ ba ga
sɩ ba wanɩ ba yi tɩʋ
yɩ ba daarɩ ba jǝni kʋ wʋnɩ.
5 Kana dɩdaanɩ na-nyɔm
ma tiini kʋ cɛ-ba.
Ba dɛɛn gɛ fɩɩn mʋ sɩ ba tɩ.
6 Ba cam dɩm kʋntʋ ŋwaanɩ mʋ
ba keeri ba loori Baŋa-Wɛ.
DƖ ma joŋi-ba DƖ yagɩ
ba wʋ-cɔgɔ kʋm wʋnɩ.
7 DƖ ma ja-ba DƖ dɩ cwǝŋǝ kalʋ
na yɔɔrɩ tɩn wʋnɩ,
pa ba vu ba yi tɩʋ kʋlʋ
ba na wʋ́ taa zʋʋrɩ kʋ wʋnɩ tɩn.
8 Ba maŋɩ sɩ ba taa kɩ Baŋa-Wɛ le mʋ,
DƖ sono kʋlʋ na bá fɔgɩ kʋ je tɩn ŋwaanɩ.
DƖ ta yǝni DƖ tʋŋɩ wo-kɩnkagɩla
DƖ pa nabiinǝ.
9 DƖ gʋɩ nɔɔna na-nyɔm,
yɩ DƖ daarɩ DƖ paɩ kana na jɩgɩ balʋ tɩn wo-laarʋ,
sɩ ba taa di ba sui.
10 Ba badaara dɛɛn yɩ pɩɩna mʋ
ba na vɔgɩ-ba dɩ cɩgɩrʋ.
Ba maa je lim wʋnɩ
dɩ wʋ-cɔgɔ.
11 Bɛŋwaanɩ, ba dɛɛn vɩn
Wɛ kwǝrǝ kam mʋ.
Ba maa jɩgɩ Yuutu Baŋa-Wɛ zaasɩm dɩm ba goonə.
12 DƖ ma pa ba yɩra cɛ
dɩ tɩtʋŋ-dɛɛra.
Ba ma cɔɔlɩ ba tʋ tɩga nɩ
yɩ nɔɔn-nɔɔnʋ tǝrǝ sɩ o wǝli-ba.
13 Ba cam dɩm kʋntʋ ŋwaanɩ,
mʋ ba keeri ba loori Baŋa-Wɛ.
DƖ ma joŋi-ba DƖ yagɩ
ba wʋ-cɔgɔ kʋm wʋnɩ.
14 DƖ ma ja-ba DƖ nuŋi lim dɩlʋ
na kwǝli-ba tɩn wʋnɩ.
DƖ ma kɔ ba cɩgɩrʋ tɩm DƖ yagɩ
sɩ ba sin.
15 Ba maŋɩ sɩ ba taa kɩ Baŋa-Wɛ le mʋ,
DƖ sono kʋlʋ na bá fɔgɩ kʋ je tɩn ŋwaanɩ.
DƖ ta yǝni o tʋŋɩ wo-kɩnkagɩla
DƖ pa nabiinǝ.
16 Kʋ na yɩ ni bwəəru tɩlʋ
ba na mɛ canna ba kɩ
yɩ tɩ fɔgɩ tɩ pɩ tɩʋ kʋm tɩn,
Baŋa-Wɛ pʋpʋgɩ-tɩ DƖ dɩ tɩga nɩ.
O ta daarɩ o ja tɩ luuru tɩm
o kɔɔ o yagɩ.
17 Nɔɔna bam badaara tɔgɩ jwərim mʋ.
Ba dɛɛn nɛ cam zanzan
ba zwabaniə kikiə
dɩ ba tusim ŋwaanɩ.
18 Ba daa ba lagɩ wʋdiu sɩ ba di,
yɩ kʋ gɛ fɩɩn sɩ ba tɩ.
19 Ba cam dɩm kʋntʋ ŋwaanɩ mʋ
ba keeri ba loori Baŋa-Wɛ.
DƖ ma joŋi-ba DƖ yagɩ
ba wʋ-cɔgɔ kʋm wʋnɩ.
20 DƖ ma tʋŋɩ DƖ kwǝrǝ sɩ ka yi-ba,
yɩ ba na ba yazurə.
DƖ ma joŋi-ba tʋʋnɩ jɩŋa nɩ DƖ yagɩ.
21 Ba maŋɩ sɩ ba taa kɩ Baŋa-Wɛ le mʋ,
DƖ sono kʋlʋ na bá fɔgɩ kʋ je tɩn ŋwaanɩ.
DƖ ta yǝni DƖ tʋŋɩ wo-kɩnkagɩla
DƖ pa nabiinǝ.
22 Kʋ maŋɩ sɩ ba ja le-kǝm pɛɛra
ba kɩ kaanɩm ba pa‑DƖ.
Baá guli DƖ tɩtʋŋ-kamunə yam,
yɩ ba daarɩ ba leeni dɩ wʋpolo
ya ŋwaanɩ.
23 Ba badaara dɛɛn diini nabwǝǝru mʋ
ba tɔgɩ nɩnɩʋ kʋm wʋ ba veǝ.
Ba ma kaagɩ ba beeri
na-fara bam baŋa nɩ
yɩ ba na nyɔɔrɩ pipiu ŋwaanɩ.
24 Ba ma na Baŋa-Wɛ tɩtʋŋa yam
na daga te na-luŋə je sɩm nɩ tɩn.
25 DƖ yǝni DƖ pa ni
yɩ vu-dɩʋ zaŋɩ kʋ fuli zanzan.
Na bam ma fʋʋrɩ ba di baŋa,
pa na-ŋʋnɩ joŋi
nɩnɩʋ kʋm je maama.
26 Na bam ma dʋlɩ nabwǝǝru tɩm
ba yagɩ wɛɛnɩ,
yɩ tɩ joori tɩ tu tɩga kuri kuri.
Naboro coonə bam vwana ma parɩ,
cam na tiini dɩ ja-ba tɩn ŋwaanɩ
27 Ba yǝni ba kaagɩ ba jijiri mʋ
nɩ sa-nyɔra na kɩ te tɩn.
Ba swan muri
pa ba yǝri ba na wʋ́ kɩ te tɩn.
28 Ba cam dɩm kʋntʋ ŋwaanɩ mʋ
ba keeri ba loori Baŋa-Wɛ.
DƖ ma vrɩ-ba DƖ yagɩ
ba wʋ-cɔgɔ kʋm wʋnɩ.
29 DƖ laan ma pa vu-dɩʋ kʋm
maŋɩ da cɩmm.
Na-ŋʋnɩ sɩm dɩ ya na fufugi tɩn
maŋɩ da yirr.
30 Naboro coonə bam wʋʋ ma poli,
ba na nɛ siun ba cam dɩm wʋnɩ tɩn ŋwaanɩ.
Wɛ ma ja-ba DƖ ja DƖ yi bubɛ dɩlʋ
ba ya na lagɩ ba yi tɩn.
31 Ba maŋɩ sɩ ba taa kɩ Baŋa-Wɛ le mʋ,
DƖ sono kʋlʋ na bá fɔgɩ kʋ je tɩn ŋwaanɩ.
DƖ ta yǝni DƖ tʋŋɩ wo-kɩnkagɩla
DƖ pa nabiinǝ.
32 Kʋ maŋɩ sɩ ba vu ba zɩgɩ
Wɛ nɔn-kɔgɔ kʋm tɩtarɩ nɩ
ba zǝŋi DƖ yɩrɩ,
sɩ ba daarɩ ba zuli‑DƖ
nakwa bam yigə nɩ.
33 Baŋa-Wɛ dɛɛn mʋ pɛ bwi wɩ fasɩ
yɩ je sɩm ji kagʋa yɩranɩ.
DƖ ma pa buli-yiə na bam je
yɩ tɩga kam maama kʋ.
34 Tɩga kalʋ ya na kɩ wʋdiiru lanyɩranɩ tɩn ma ji
tɩga kalʋ na yɩ yɛ yɩranɩ tɩn mʋ,
balʋ ya na zʋʋrɩ ka baŋa nɩ tɩn
kǝm-balwaarʋ ŋwaanɩ.
35 Baŋa-Wɛ nan ta pɛ
sɩ kagʋa pipiri ka ji je sɩlʋ
bwi na daga da tɩn mʋ.
Na zanzan dɩ buri ba bugi tɩ-kʋra.
36 DƖ ma ja balʋ kana na wɔɛ tɩn
DƖ pa-ba jǝŋǝ je
tɩga kam kʋntʋ baŋa nɩ.
Ba ma puli tɩʋ kuri
sɩ ba taa zʋʋrɩ kʋ wʋnɩ.
37 Ba ma va karɩ ba du wʋdiiru
sɩ wʋnɩ,
yɩ ba cɩ kadwi
sɩ ba ma jəri vinyə tweeru.
Ba na dugi kʋlʋ maama tɩn
kɩ wʋdiiru lanyɩranɩ.
38 Baŋa-Wɛ maa kɩ ba yu-yoŋo
pa ba kɔgɔ kʋm puli zanzan.
Ba vara bam dɩ daga
ba maa ve yigə.
39 Ba laan ta ma daarɩ ba na cam
dɩ wʋ-cɔgɔ,
yɩ ba dʋna bɛɛsɩ-ba,
pa ba na ba cavɩɩra.
40 Baŋa-Wɛ nan paɩ nɔn-yum
di ba cavɩɩra mʋ,
yɩ DƖ daarɩ DƖ paɩ ba kaagɩ kagʋa
yuu nɩ ba beeri yɔɔ yɩranɩ.
41 Kʋ nan na yɩ nabwənə,
DƖ yǝni DƖ joŋi-ba DƖ ja nuŋi
ba yaara yam wʋnɩ.
DƖ maa paɩ ba dwi dɩm puli zanzan
nɩ pe-kɔgɔ tɩn.
42 Nɔn-ŋʋna mʋ nii ba na Wɛ kikiə
yɩ ba wʋ poli zanzan.
Nɔn-balwaarʋ niə yam maama
nan yɔɔrɩ ya pu mʋ.
43 Wʋlʋ maama na yɩ swan tu,
kʋ tu maŋɩ sɩ o taa guli
kikiə yam kʋntʋ maama,
sɩ o yɩ swe Baŋa-Wɛ sono kʋm
na wʋra maŋa maama tɩn ni nɩ.