Wɛ wʋ dɩbam tee nɩ
Davidi dɛɛn panɩ ləŋə kantʋ.
108
Amʋ Tu Wɛ, a wʋʋ kʋm yɔɔrɩ kʋ da nmʋ mʋ.Kʋntʋ tɩn, a lagɩ a leeni le
a zuli-m dɩ a wʋʋ maama.
2 A ta wʋ́ kwe kwaanʋ dwi dwi mʋ
a ta sɩ tɩ kwǝri zaŋɩ baŋa baŋa.
Tɩga na pʋʋrɩ,
a wʋ́ zaŋɩ lɩla a leeni le!
3 Baŋa-Wɛ, a wʋ́ kɩ nmʋ le
nɔɔna bam maama yigə nɩ.
A ta wʋ́ leeni le a zuli-m
lʋgʋ baŋa dwi tiinə maama tɩtarɩ nɩ.
4 N sono kʋm zɩgɩ mʋ taan,
yɩ kʋ gɩɩnɩ kʋ di wɛyuu.
Nmʋ na zɩgɩ n cɩga wʋnɩ te tɩn
mʋ tiini kʋ yalma sɩ kʋ gaalɩ kunkwǝǝnu tɩm.
5 Amʋ Tu Wɛ, pa n yɩrɩ zaŋɩ
wɛyuu maama nɩ!
Pa n paarɩ-zulǝ taa naɩ
lʋgʋ baŋa je maama nɩ!
6 Popo, ləri a wɛ-loro kʋm.
Kwe n dam-fɔrɔ kʋm
n ma n joŋi dɩbam n yagɩ.
Kʋntʋ tɩn, n nɔn-sonnu tɩm
wʋ́ taa te ba tɩtɩ.
7 Wɛ zɩgɩ DƖ tɩtɩ digə kam nɩ mʋ
DƖ ta nɩ:
«Amʋ wʋ́ brɩ a dam jaja
a cɛ cɛ Sishɛm laŋa kam,
yɩ a daarɩ a maŋɩ Sukɔtɩ bolo kʋm
a pɔɔrɩ a pa a nɔɔna bam.
8 Galadɩ laŋa kam yɩ amʋ nyɩm,
kʋ ta wǝli dɩ Manasɩ laŋa kam dɩ.
Efrayim maa nyɩ dɩ a yicəgə kam.
Zuda dɩ maa nyɩ dɩ
a paarɩ nacəgə kam.
9 Kʋ na yɩ Moabɩ laŋa kam,
dáanɩ mʋ a lagɩ a taa sanɩ a jɩn sɩm.
A ta lagɩ a dʋlɩ a natrɩ
Edɔm tɩʋ kʋm seeni mʋ,
sɩ kʋ brɩ nɩ a te-kʋ.
A kwǝrǝ maa wʋ́ bagɩ ka yagɩ
Filisi tiinə bam seeni,
a na wanɩ-ba a di tɩn ŋwaanɩ.»
10 Wɔɔ nan mʋ wʋ́ ja amʋ o vu
tɩʋ kʋlʋ na lɔgɩ kʋ pɩ tɩn wʋnɩ?
Wɔɔ mʋ wʋ́ ja-nɩ o vu
o yi Edɔm tɩʋ kʋm?
11 Dɩbam Tu Wɛ, nmʋ nan nuŋi
dɩ́ kwaga nɩ mʋ na?
Dɩ́ na nuŋi sɩ dɩ́ zaŋɩ najara,
n daa n bá tɔgɩ dɩ́ yigə
sɩ dɩ́ vu na?
12 A loori-m, wǝli dɩbam
sɩ dɩ́ wanɩ dɩ́ dʋna bam,
sɩ nabiinǝ na jɩgɩ zǝnǝ yalʋ tɩn maama ba jɩgɩ kuri.
13 Wɛ nan na wʋ dɩbam tee nɩ,
dɩ́ wʋ́ wanɩ dɩ́ dʋna bam dɩ́ di.
Dɩntʋ wʋ́ nɔnɩ-ba DƖ cʋcʋgɩ
DƖ pa dɩbam.a