Davidi wɛ-loro zǝnǝ ŋwaanɩ
109
Amʋ Tu Wɛ, nmʋ na maŋɩ sɩ a taa tee‑m tɩn,yɩ ta n yɩ cɩmm.
2 Nɔn-balwaarʋ dɩ nɔn-ŋʋllʋ jɩgɩ amʋ kwaga mʋ ba coə.
Ba maa fɔɩ vwan ba daŋɩ a baŋa nɩ.
3 Sɩbɔŋɔ bɩtarɩ-cɛ yɩranɩ mʋ
ba mɛ ba gilimi-nɩ.
A maa wʋ kɩ kʋlʋkʋlʋ
yɩ ba daa ta jɩgɩ dɩdaanɩ-nɩ.
4 Ba maa zagɩ-nɩ ni-cɛɛrɩ,
dɩ amʋ na duri ba ŋwaŋa
te maama tɩn dɩ.
Amʋ nan ta wʋ́ taa loori Wɛ
a pa-ba mʋ.
5 A na yǝni a kɩ-ba lanyɩranɩ,
baá joori ba kɩ-nɩ zʋnnɩ.
A ta na jɩgɩ ba sono,
ba maa wʋ́ ja pu-sɩŋa ba jeeri-nɩ.
6 Nan beeri nɔn-balɔrɔ
sɩ kʋ tu di a dʋnʋ wʋm taanɩ.
Ta pa o sɩba-nyɩnʋ zaŋɩ
o saŋ-o.
7 Ba maa na di o taanɩ dɩm,
sɩ ba ta nɩ: o tʋa.
Kwe o wɛ-loro tɩtɩ
sɩ kʋ taa yɩ lwarɩm.
8 Pa o ŋwɩa da yam ti lɩla.
Ta pa nɔɔnʋ wʋdoŋ
ləri wʋntʋ yuu nɩ
o taa tʋŋɩ o tɩtʋŋa yam.
9 Sɛ sɩ o biə ji bɩtara mʋ,
sɩ o kaanɩ wʋm dɩ ji kadəm.
10 Pa o biə taa kaagɩ je maama
ba loori wʋdiu sɩ ba di.
Ba maa wʋ́ taa zʋʋrɩ
di-dwəənu wʋnɩ,
yɩ ba yǝni ba nuŋi dáa nɩ
ba loori zǝnǝ.
11 Sɛ sɩ o na di jɩnɩ
nɔɔnʋ wʋlʋ tee nɩ tɩn
zaŋɩ o ba o joŋi a dʋnʋ wʋm jɩjɩgɩrʋ tɩm maama,
sɩ vərə dɩ ba ba vrɩ o na yaarɩ o na kʋlʋ maama tɩn ba taa te.
12 Yɩ pa pwələ sɩ nɔɔn-nɔɔnʋ
duri kʋ tu dɩ o biə balʋ
o na tɩgɩ o daarɩ tɩn yibwənə.
13 Nan pa o dwi dɩm maama saarɩ,
sɩ dwi dɩlʋ na saŋɩ tɩn
swe ba swiə lɩla.
14 Baŋa-Wɛ, yɩ fɔgɩ n swe
o nabaara bam na kɩ lwarɩm yalʋ dwi maama tɩn.
Nan yɩ saarɩ o nu kəm-balwaarʋ kɔtaa.
15 Ta n guli ba lwarɩm dɩm kʋntʋ taan,
sɩ n daarɩ n pa ba dwi dɩm
daa yɩ taa jɩgɩ yɩrɩ lʋgʋ baŋa nɩ.
16 Bɛŋwaanɩ, a dʋnʋ wʋm yigə tǝrǝ
nabwənə wʋnɩ
sɩ o taa kɩ-ba lanyɩranɩ.
O nan bɛɛsɩ yinigə tiinə
dɩ balʋ wʋʋ na cɔgɩ tɩn mʋ,
pa ba vu ba tɩ.
17 O maa soe sɩ o taa sɔɔlɩ lwarɩm
o yagɩ o donnǝ baŋa nɩ.
Nan pa kampwəl-balɔrɔ
taa dɔgɩ o tɩtɩ yuu nɩ!
O maa ba fɔgɩ o lagɩ sɩ
o kɩ nɔɔn-nɔɔnʋ yu-yoŋo.
Nɔɔn-nɔɔnʋ dɩ nan bá kɩ kʋ tu yu-yoŋo!
18 O mɩ dɩ Kampwəl-balwara taanɩ mʋ,
nɩnɛɛnɩ dɩ yɩ gɔrɔ kʋlʋ
o na jɩgɩ o zʋʋrɩ tɩn.
Dɩ maa nyɩ dɩ na balʋ
o na yǝni o nyɔa
pa ba tu o wʋʋ tɩn,
dɩ nugə kalʋ o na mɛ
o turi o yɩra tɩn.
19 Nan pa o kampwəl-balɔrɔ kʋm
məəli o yɩra,
nɩ gɔrɔ kʋlʋ o na zʋ tɩn.
Pa kʋ taa nyɩ dɩ kilə
kalʋ o na vɔga o təŋə nɩ tɩn.
20 Kʋ na yɩ balʋ na jɩgɩ amʋ kwaga
ba co
yɩ ba ta zagɩ-nɩ ni-cɛɛrɩ tɩn,
Baŋa-Wɛ wʋ́ pa ba joori
ba na waarɩm kʋntʋ doŋ.
21 Yuutu Baŋa-Wɛ,
nan da n yɩrɩ dɩm ŋwaanɩ
n nii amʋ baŋa nɩ lanyɩranɩ.
Joŋi-nɩ n yagɩ,
n sono kʋlʋ na yɩ cɩga cɩga tɩn ŋwaanɩ.
22 Bɛŋwaanɩ, amʋ tiini a bwǝnǝ mʋ lagɩ-lagɩ
yɩ yinigə dɩ jɩgɩ-nɩ.
A bɩcarɩ dɩ maa tiini dɩ di.
23 A lagɩ a je lɩla mʋ,
nɩnɛɛnɩ lunluŋu na yǝni kʋ kɩ te dɩdaan-ni seeni tɩn.
Ba lagɩ ba pəli-nɩ ba yagɩ dáa nɩ,
nɩnɛɛnɩ kayɩra doŋ tɩn.
24 A nadoonə maa magɩ daanɩ
a kana na tiini ka wɔɛ tɩn ŋwaanɩ.
A yɩra yam tiini ya bugi,
pa ya daarɩ kwi yɩranɩ mʋ.
25 Balʋ na ja dɩ amʋ tɩn
jɩgɩ-nɩ ba goonə.
Ba maa na yǝni ba na-nɩ,
ba dʋlɩ ba yum tɩm mʋ
amʋ ŋwaanɩ.
26 Amʋ Tu Baŋa-Wɛ, ba n zəni-nɩ!
Da n sono kʋm ŋwaanɩ
n joŋi-nɩ n yagɩ.
27 Pa a dʋna bam na n dam dɩm,
sɩ ba wanɩ ba lwarɩ nɩ
kʋ yɩ nmʋ mʋ wǝli-nɩ.
28 Ba laan wʋ́ wanɩ ba sɔɔlɩ lwarɩm
ba yagɩ amʋ yuu nɩ,
sɩ nmʋ nan wʋ́ kɩ amʋ yu-yoŋo.
Ba na bʋŋɩ sɩ ba bɛɛsɩ-nɩ,
ba maa wʋ́ na ba cavɩɩra.
A nan wʋ́ di ywəəni mʋ,
a na yɩ nmʋ tɩntʋŋnʋ tɩn ŋwaanɩ.
29 Cɩga tɩn, cavɩɩra wʋ́ di balʋ
na jɩgɩ a kwaga kam ba co tɩn.
Cavɩɩra maa yɩ gɔrɔ kʋlʋ
ba na wʋ́ zʋ tɩn.
30 A lagɩ a puri a ni
a tiini a kɩ Baŋa-Wɛ le mʋ.
A maa wʋ́ zɩgɩ nɔn-kɔgɔ tɩtarɩ nɩ
a tee‑DƖ.
31 Bɛŋwaanɩ, DƖ yǝni DƖ zɩgɩ nabwəm jazɩm seeni sɩ DƖ zən‑o.
DƖ ta maa yǝni DƖ vrɩ kʋ tu DƖ yaga
balʋ na lagɩ ba pa o tʋ
dɩ o bʋra tɩn jɩŋa nɩ.