Pɛ wʋlʋ Baŋa-Wɛ na kuri tɩn taanɩ
Davidi dɛɛn panɩ ləŋə kantʋ.
110
Baŋa-Wɛ tagɩdɩ amʋ Yuutu wʋm DƖ wɩ:
«Ba n jǝni amʋ jazɩm seeni,
sɩ amʋ laan wanɩ n dʋna bam
a kɩ nmʋ dam kuri nɩ
sɩ n ta n te-ba.»a
2 Baŋa-Wɛ wʋ́ pa n paarɩ dam-fɔrɔ kʋm yalɩ kʋ yi je maama.
Nmʋ wʋ́ di paarɩ Siyɔn nɩ
yɩ n wanɩ n dʋna bam
na gilimi abam tɩn.
3 N na zaŋɩ n nuŋi dɩ dam
dɛ dɩlʋ wʋnɩ,
nmʋ nɔɔna bam wʋ́ tɔgɩ n kwaga
dɩ wʋpolo
Wɛ tɩtɩ pweeru tɩm yuu nɩ.
Tɩga na pʋʋrɩ tɩtɩɩtɩ,
nmʋ nɔn-dʋnnʋ tɩm wʋ́ ba nmʋ te,
nɩ nyɔnɔ na yǝni kʋ tʋ
zɩzɩŋa nɩ te tɩn.
4 Baŋa-Wɛ dugi durə mʋ
yɩ DƖ daa bá fɔgɩ DƖ za DƖ ni.
DƖ tagɩ DƖ wɩ: «Nmʋ wʋ́ ta n yɩ amʋ kaanɩm tu maŋa maama,
nɩ Mɛlɩkisedɛkɩ faŋa faŋa
na yɩ te tɩn.»b
5 Dɩ́ Yuutu Wɛ dɩm maa wʋ
n jazɩm seeni.
DƖ ban-zɔŋɔ dɛ dɩm nɩ
DƖ wʋ́ wanɩ pwa DƖ dɩ tɩga nɩ.
6 DƖ lagɩ DƖ di dwi-gɛ tiinə bam taanɩ,
yɩ DƖ waarɩ-ba
sɩ ba twa bam mʋ faarɩ
tɩga kam je maama nɩ.
Kʋ ta na yɩ lʋgʋ baŋa maama pwa bam
DƖ lagɩ DƖ cɩcʋgɩ
ba yukwəli sɩm mʋ.
7 DƖ na wʋ cwǝŋǝ yuu nɩ DƖ veǝ,
bu-tʋla wʋ́ taa wʋra,
yɩ o nyɔ na sɩ o yɩra taa zurǝ.
Kʋntʋ ŋwaanɩ,
oó kwǝni o yuu wɛɛnɩ,
yɩ o zɩgɩ dɩ dam.