Baŋa-Wɛ jɩgɩ kamunni.
104
Amʋ tɛ a tɩtɩ wʋnɩ mʋ nɩ:«Tee Baŋa-Wɛ!»
Amʋ Tu Baŋa-Wɛ,
nmʋ tiini n jɩgɩ kamunni!
Nɩnwaŋ-fɔrɔ dɩdaanɩ paarɩ
mʋ kwǝli‑m.
2 Pooni mʋ gilimi nmʋ maama
dɩ kaagɩ,
nɩ nɔɔnʋ na pugi gɔrɔ tɩte tɩn.
Nmʋ daa n ta ma n lwarɩ
wɛyuu kʋm,
nɩnɛɛnɩ ba na lwarɩ gɔrɔ
ba ma pu vwe te tɩn.
3 Nmʋ tiŋi be wɛyuu kunkwǝǝnu tɩm baŋa nɩ,
sɩ n ma n lɔ wɛyuu digə
n pa n tɩtɩ.
N ta paɩ kunkwǝǝnu tɩm tɩtɩ
jiri təriko tɩ pa‑m
sɩ n ta n dɔgɩ tɩ baŋa nɩ,
yɩ viu kʋm kalɩ‑m
kʋ jaanɩ kʋ ve yigə.
4 Nmʋ jɩgɩ viu kʋm mʋ
n ma n tʋŋɩ n tɩtʋŋa maama.
N ta paɩ dʋa kam pɩpɩla
sɩ ka mim dɩm taa yɩ
n tɩntʋŋnʋ.
5 Nmʋ dɛɛn fɔgɩ n cwi
tɩga baŋa kuri dɩm,
pa ka zɩgɩ mʋ ga cɛpɩ
yɩ ka daa ba gɔɩ.
6 Nmʋ daa n ta ma n paɩ
dʋ-fara kwǝli lʋgʋ kʋm,
nɩ gɔrɔ na kwǝli-kʋ te tɩn.
Na-fara bam brɩ ba kwǝli
pweeru tɩm dɩ.
7 Nmʋ nan na bagɩ-tɩ dɩ kwǝr-dɩa tɩn,
na-fara bam duri ba kɛ lɩla.
Nmʋ na bagɩ nɩ dʋ-baga te tɩn,
ba ma duri sɩ ba lu.
8 Na bam dɛɛn pɛɛlɩ pweeru tɩm seeni
ba daarɩ ba cuuri ba tʋlɩ
bwəəlu tɩm wʋnɩ
ba vu ba maŋɩ je sɩlʋ
nmʋ na pɛ ba pəni da tɩn.
9 Nmʋ ma n tiŋi sisənə n pa na bam
sɩ ba yɩ lɛɛnɩ-ya,
sɩ na-fara bam daa yɩ li
lʋgʋ kʋm ba di.
10 Nmʋ mʋ paɩ buli-yiə
taɩ bwəəlu tɩm nɩ,
yɩ bu-tʋlɩ dɩ maa tɔgɩ
pweeru tɩm laŋa nɩ sɩ kɛa.
11 Bwi sɩm kʋntʋ mʋ paɩ
vara dwi maama yɩra zuri.
Kagʋa wʋ bɩnɛ sɩm
dɩ maa nyɔ na ba sui.
12 Bwi sɩm ni nɩ mʋ
zunə sɔ ba pwǝru da.
Ba maa dɔgɩ tweeru nɛ sɩm nɩ
ba leenə.
13 Nmʋ yǝni n zɩgɩ
n wɛyuu digə kam nɩ mʋ
n paɩ dʋa nɩ
sɩ ka yi pweeru tɩm.
Kʋ maa paɩ tɩga kam
nyɔ na ka sui,
yɩ ka kɩ wʋdiiru lanyɩranɩ.
14 Nmʋ ma n paɩ ga-lɛɛrʋ nuŋi
sɩ vara taa di.
N ta paɩ tɩga kam
taa kɩ wʋdiiru dwi dwi,
sɩ nabiinǝ taa vara
yɩ ba daarɩ ba di.
15 Tɩga kam maa paɩ sana sɩ
nɔɔna taa nyɔa yɩ ba di ywəəni.
Ka ta paɩ nugə
sɩ ba yibiyə taa nyɩɩna,
yɩ ka paɩ mɩna
sɩ ba bɩcara kɩ dam.
16 Tweeru tɩlʋ Baŋa-Wɛ na jəri DƖ zɩgɩ tɩn
yǝni tɩ naɩ na mʋ zanzan,
kʋ na maŋɩ kʋ yɩ Sɛdrɩ tweeru tɩlʋ na wʋ Liban pweeru tɩm nɩ tɩn.
17 Zunə yǝni ba sɔ ba pwǝru
tweeru tɩm kʋntʋ nɛ nɩ.
Bugə ni zunə dɩ wʋ́ taa zʋʋrɩ
tɩ wʋnɩ.
18 Pweeru tɩlʋ na dwara tɩn mʋ yɩ
je sɩlʋ kagʋa wʋ bʋnɩ
na beeri sɩ wʋdiu tɩn.
Pa-nyaanɩa dɩ maa səgi
pweeru tɩm gugwəəru nɩ.
19 Nmʋ kɩ cana kam mʋ
sɩ ka pɔɔrɩ bɩnɩ maama
dɩ dɩ canɩ sɩm.
Wɩa kam dɩ maa ye maŋa kalʋ
ka na wʋ́ zʋ digə tɩn.
20 Nmʋ mʋ paɩ tɩga yǝni ka yi
pa lim wʋra
yɩ ga-vara dɩ nuŋi ba beerǝ.
21 Tɩtɩɩ nɩ nywəənu dɩ wʋ́ nuŋi
tɩ kaagɩ tɩ beeri wʋdiu yɩ tɩ suurə.
Kʋ yɩ Wɛ mʋ pa-tɩ tɩ ni-wʋdiu.
22 Tɩga na yǝni ka jɩgɩ ka pʋʋra,
nywəənu tɩm wʋ́ joori mʋ
tɩ vu tɩ pəni tɩ pwəgə je nɩ cɩmm.
23 Kʋ daarɩ sɩ nabiinǝ dɩ laan nuŋi ba digə nɩ
ba vu ba tɩtʋŋa ni,
sɩ tɩga kam joori ka yi.
24 Amʋ Tu Baŋa-Wɛ,
nmʋ tiini n kɩ wǝǝnu dwi dwi
yɩ tɩ daga zanzan.
Nmʋ na yɩ wʋbʋŋa tu tɩn mʋ
pɛ n kɩ tɩntʋ maama.
Tɩga baŋa maama su mʋ
dɩdaanɩ wǝǝnu tɩlʋ nmʋ na naanɩ tɩn.
25 Nii nɩnɩʋ kʋm mʋ!
Kʋ tigi mʋ ga palalala
yɩ kʋ yalma lanyɩranɩ.
Wǝǝnu dwi dwi maa wʋ kʋ wʋnɩ,
tɩ na yɩ wo-kamunə
dɩ wo-balwa maama dɩ,
yɩ tɩ daga tɩ gaalɩ garɩm.
26 Nabwǝǝru maa tɔgɩ nanɩɩrʋ tɩm wʋnɩ tɩ bɛa.
Nɩnɩʋ wʋ juru Prənyoŋo
dɩ maa wʋra,
n na naanɩ-kʋ n kɩ da
sɩ kʋ taa kwɛɛrɩ tɩn.
27 Wǝǝnu tɩntʋ maama n na kɩ tɩn
jɩgɩ n tɩɩna mʋ,
sɩ n pa-ba ba ni-wʋdiu kʋ maŋa nɩ.
28 Nmʋ na yǝni n kwe-kʋ n pa-ba,
baá joŋi yɩ ba daarɩ ba di.
Nmʋ na puri n jataala yam
sɩ n pa-ba wʋdiu,
baá joŋi wo-laarʋ tɩm
yɩ ba di ba su.
29 Nmʋ nan na pipiri n daarɩ-ba,
fʋʋnɩ mʋ yǝni dɩ ja-ba.
N na lɩ siun ba yɩra nɩ,
ba maŋɩ sɩ ba tɩ mʋ,
yɩ ba joori ba ji tɩɩrʋ.
30 Nmʋ nan na kɩ n siun kʋm
woŋo kʋlʋ yɩra nɩ,
kʋʋ́ taa jɩgɩ ŋwɩa mʋ.
N yǝni n tɔgɩ kǝm dɩm kʋntʋ baŋa nɩ
n paɩ tɩga baŋa fɔgɩ ka kwɛ mʋ.
31 Baŋa-Wɛ wʋ́ pa DƖ paarɩ-zulǝ yam taa wʋra maŋa maama,
sɩ DƖ taa jɩgɩ wʋpolo dɩ DƖ na kɩ wǝǝnu tɩlʋ maama tɩn.
32 Dɩntʋ mʋ na yɔɔrɩ DƖ nii
tɩga baŋa seeni,
fʋʋnɩ wʋ́ ja-ka sɩ ka yɩra taa saɩ.
DƖ na twɩ DƖ jɩŋa DƖ dwe pweeru tɩm,
tɩ wʋ́ tarɩgɩ min-vʋgʋ
yɩ nyʋa zaŋɩ gulululu.
33 Amʋ na loori a wʋ a ŋwɩa wʋnɩ,
a lagɩ a leeni mʋ a tee Baŋa-Wɛ.
A maa wʋ́ zuli‑DƖ taan
sɩ a ŋwɩa ba ka ti.
34 A na leeni kʋntʋ doŋ,
Wɛ wʋ́ pa a wʋbʋŋa yam
taa poli DƖ wʋ,
Bɛŋwaanɩ, kʋ yɩ Baŋa-Wɛ mʋ paɩ
a di ywəəni.
35 Kʋ nan na yɩ lwarɩm-kərə maama,
pa ba je tɩga kam baŋa nɩ,
sɩ nɔn-balwaarʋ dɩ daa yɩ taa wʋra.
Amʋ tɛ a tɩtɩ wʋnɩ mʋ nɩ:
«Tee Baŋa-Wɛ!»
Pa-na dɩ́ tee Baŋa-Wɛ!b