Baŋa-Wɛ sono kʋm na daga te tɩn
Davidi dɛɛn panɩ ləŋə kantʋ.
103
Amʋ tɛ a tɩtɩ wʋnɩ mʋ a wɩ:«Zuli Baŋa-Wɛ!»
DƖ yɩrɩ dɩm na yɩ lanyɩranɩ fasɩ tɩn,
amʋ wʋ́ tee‑DƖ sɩ kʋ nuŋi
a bɩcarɩ-yi nɩ.
2 Amʋ tɛ a tɩtɩ wʋnɩ mʋ nɩ:
«Tee Baŋa-Wɛ!»
A bá fɔgɩ a swe DƖ na kɩ-nɩ lanyɩranɩ tɩte maama tɩn.
3 Dɩntʋ mʋ yǝni DƖ yagɩ
a lwarɩm maama DƖ ma cɛ-nɩ.
DƖ ta maa pa-nɩ yazurə
a yawɩɩrʋ maama wʋnɩ.a
4 DƖ joŋi amʋ mʋ DƖ ja DƖ nuŋi
tʋʋnɩ dam wʋnɩ.
DƖ maa tɔgɩ DƖ sono kʋm
dɩdaanɩ DƖ yibwənə yam baŋa
DƖ zəni-nɩ sɩ a di paarɩ
nɩ pɛ te tɩn.
5 DƖ yǝni DƖ pa a ŋwɩa kam maama
su dɩ wo-laarʋ,
pa ka joori ka na dam-dʋʋrɩ,
nɩ kaloŋ-zɔŋɔ na jɩgɩ dam te tɩn.
6 Baŋa-Wɛ yǝni DƖ tɔgɩ cɩga mʋ
DƖ pa balʋ nɔɔna na jɩgɩ-ba
ba bɛɛsa tɩn na ba bʋra.
7 DƖ dɛɛn pɛ Moyisi
lwarɩ DƖ cwe sɩm.
DƖ ta ma pa Yisɩrayɛlɩ tiinə bam
lwarɩ DƖ tɩtʋŋ-naga na yɩ te tɩn.
8 Baŋa-Wɛ tiini DƖ jɩgɩ yibwənə
dɩdaanɩ yu-yoŋo DƖ maa zǝni nɔɔna.
DƖ yǝni DƖ pɩɩnɩ DƖ banɩ mʋ.
DƖ sono kʋm maa tiini kʋ daga.
9 Kʋ daɩ nɩ DƖ lagɩ DƖ taa bwɛ nɔɔna
maŋa maama mʋ.
DƖ ban-zɔŋɔ kʋm wʋ́ ba kʋ zuri.
10 Dɩ́ lwarɩm dɩm ya na maŋɩ
sɩ dɩ́ na waarɩm dɩlʋ tɩn,
DƖ wʋ sɛ sɩ DƖ kɩ dɩbam
sɩ kʋ maŋɩ dɩ-ya.
DƖ wʋ sɛ sɩ dɩ́ ŋwɩ
dɩ́ tɩtʋŋ-balwaarʋ jɩnɩ dɩm
nɩ kʋ na maŋɩ sɩ dɩ na te tɩn.
11 Kʋ na yɩ balʋ na kwarɩ Wɛ tɩn,
DƖ sono kʋm tiini kʋ daga
kʋ pa-ba!
DƖ sono kʋm daga kʋ gaalɩ,
nɩnɛɛnɩ wɛyuu kʋm na diini wɛ wɛ
kʋ gaalɩ tɩga kam baŋa te tɩn mʋ.
12 DƖ ta ma yagɩ dɩ́ lwarɩm dɩm
DƖ ma cɛ dɩbam,
DƖ daarɩ DƖ dʋlɩ-ya DƖ yagɩ yigə yigə,
sɩ kʋ yi wa-puli dɩdaanɩ wa-zʋʋrɩ
na yɩ yigə yigə daanɩ te tɩn.
13 Baŋa-Wɛ tiini DƖ jɩgɩ
balʋ na kwarɩ-DƖ tɩn yibwənə,
nɩ ko na yǝni o duri
o biə yibwənə te tɩn.b
14 Bɛŋwaanɩ, DƖ ye lanyɩranɩ nɩ
dɩ́ tiini dɩ́ bwǝnǝ lagɩ lagɩ.
Kʋ yɩ tɩɩrʋ mʋ DƖ mɛ DƖ mɔ dɩbam.
15 Kʋ na yɩ nabiinǝ,
ba da yam yɩ fɩnfɩɩn yɩranɩ mʋ,
nɩ ga-lɛɛrʋ na wʋra
yɩ tɩ je lɩla te tɩn.
Ba yǝni ba jɩgɩ dam
maŋa fɩnfɩɩn yɩranɩ mʋ,
nɩ ga-punnu na yɩ te tɩn.
16 Lʋn-wɩa viu na tu kʋ dʋlɩ tɩ baŋa nɩ,
tɩ wʋ́ kwaarɩ yɩ tɩ je lɩla,
nɩnɛɛnɩ tɩ ya ga maŋɩ
tɩ tǝrǝ mʋ tɩn.
17 Kʋ nan na yɩ balʋ
na kwarɩ Baŋa-Wɛ tɩn,
DƖ sono kʋm wʋ ba tee nɩ mʋ
maŋa maama kʋ pa-ba.
DƖ maa zɩgɩ DƖ cɩga kam kwaga nɩ
DƖ zǝni ba dɩ ba kwaga kam
sɩ kʋ taa ve maŋa maama.
18 DƖ kɩ kʋntʋ DƖ paɩ balʋ na jɩgɩ cɩga dɩ DƖ ni-gonim dɩm
yɩ ba sɛ ba tɔgɩ DƖ zaasɩm dɩm tɩn mʋ.
19 Baŋa-Wɛ je wɛyuu nɩ mʋ
DƖ di DƖ paarɩ.
Dɩ maa te maama wuu!
20 Abam balʋ na yɩ Baŋa-Wɛ malɛsɩ tɩn,
ba-na á tee‑DƖ!
Abam balʋ na tɔgɩ DƖ niə yam
á tʋŋɩ á pa‑DƖ dɩ baarɩ tɩn,
tee-na Baŋa-Wɛ!
21 Abam balʋ na wʋ
DƖ wɛyuu kɔgɔ kʋm wʋnɩ tɩn,
tee-na Baŋa-Wɛ!
Abam balʋ na yɩ DƖ tɩntʋŋna
yɩ á kɩ DƖ wʋbʋŋa na lagɩ kʋlʋ tɩn,
tee-na Baŋa-Wɛ!
22 Baŋa-Wɛ jɩŋa na kɩ
woŋo kʋlʋ maama tɩn,
ba-na á tee‑DƖ,
á na maŋɩ á wʋ DƖ paarɩ dim
je sɩlʋ maama nɩ.
Amʋ tɛ a tɩtɩ wʋnɩ mʋ nɩ:
«Tee Baŋa-Wɛ!»