Wɛ-loro cam ŋwaanɩ
Nɔɔnʋ wʋlʋ na nɛ cam pa o bugi yɩ o tiini o loori Baŋa-Wɛ dɩ kərə tɩn dɛɛn panɩ ləŋə kantʋ.
102
Amʋ Tu Baŋa-Wɛ,cəgi amʋ wɛ-loro kʋm.
Pa cwǝŋǝ sɩ a kərə kam
tʋ n zwa nɩ.
2 Cam na yi amʋ tɩn,
yɩ vri n kwaga n ya-nɩ.
Nan pʋrɩ n zwa n cəgi
a wɛ-loro kʋm.
A na keeri a loori‑m,
sɩ n kɩ lɩla n ləri-nɩ.
3 Bɛŋwaanɩ, da yalʋ a na jɩgɩ tɩn
wʋra ya je mʋ,
nɩnɛɛnɩ nyʋa na yǝni ka je lɩla te tɩn.
A kwi sɩm tɩtɩ dɩ yɔɔrɩ sɩ wɔɛ
nɩnɛɛnɩ mim mʋ jɩgɩ-sɩ
dɩ zwɛ te tɩn mʋ.
4 Amʋ wʋʋ kʋm maama cɔgɩ mʋ
nɩnɛɛnɩ gaarʋ na yǝni
tɩ kwaarɩ te tɩn.
A ni dɩm dɩ nan daa ba ywəmmə
dɩdaanɩ wʋdiu.
5 A maa yɔɔrɩ a suurə,
liǝ na jɩgɩ-nɩ tɩn ŋwaanɩ.
Kʋ maa paɩ a yɩra kwi sɩm yɔɔrɩ
sɩ naɩ jaja.
6 A maa nyɩ dɩ a yɩ
kagʋa wʋ kukoro,
dɩ kʋ na je di-dwəənu wʋnɩ te tɩn.
7 Amʋ yiǝ ba ve dɔɔnɩ seeni.
A nyɩ dɩ zuŋə kalʋ mʋ na jaanɩ
ka vu ka jǝni nayuu nɩ
ka yɩranɩ te tɩn.
8 Dɛ dɩm maama wʋnɩ
a dʋna bam jɩgɩ-nɩ mʋ ba twɩa.
Balʋ na culi-nɩ tɩn ma bəŋi a yɩrɩ
ba sɔɔlɩ lwarɩm
ba yagɩ a baŋa nɩ.
9 Amʋ laan mɛ tɩntwarɩm mʋ
a ma a ji a ni-wʋdiu,
yɩ a yi-na lurə na balʋ
a na jɩgɩ a nyɔ tɩn wʋnɩ.
10 Nmʋ ban-lʋm dɩm ŋwaanɩ mʋ
pɛ kʋ kɩ-nɩ kʋntʋ.
Bɛŋwaanɩ, n gɔgɩ-nɩ mʋ
yɩ n dʋlɩ-nɩ n yagɩ dáa dáa.
11 Amʋ ŋwɩa da yam lagɩ ya ti lɩla,
nɩnɛɛnɩ lunluŋu na yǝni kʋ je
dɩdaan-ni seeni te tɩn.
A ŋwɩa kam daa bá daanɩ
nɩ gaarʋ na yǝni tɩ kwaarɩ te tɩn.
12 Baŋa-Wɛ, kʋ nan na yɩ nmʋ,
nmʋ wʋ́ ta n di n paarɩ dɩm mʋ maŋa maama.
N yɩrɩ dɩm wʋ́ zaŋɩ mʋ wɛ wɛ
sɩ kʋ taa ve maŋa kalʋ na ba ti tɩn.
13 Nń zaŋɩ n duri
Siyɔn tiinə bam ŋwaŋa.
Bɛŋwaanɩ, maŋa kam yɔɔrɩ ka yi mʋ
sɩ n laan duri ba yibwənə.
14 Kʋ na yɩ kandwa yalʋ
ba dɛɛn na mɛ ba lɔ tɩʋ kʋm tɩn,
dɩbam na yɩ n tɩntʋŋna tɩn
yigə wʋ ya wʋnɩ.
Dɩ́ wʋʋ kʋm yɔɔrɩ kʋ cɔgɩ mʋ
tɩʋ kʋm ŋwaanɩ,
dɩdaanɩ kʋ na jigi di-dwəənu
te maama tɩn dɩ.
15 Baŋa-Wɛ, dwi-gɛ tiinə bam
wʋ́ ba ba taa kwarɩ n yɩrɩ dɩm.
Lʋgʋ baŋa pwa bam maama
wʋ́ taa tee‑m,
n paarɩ-zulǝ yam ŋwaanɩ.
16 Bɛŋwaanɩ, Baŋa-Wɛ wʋ́ joori
o lɔ Siyɔn tɩʋ kʋm,
pa DƖ vɩɩrɩ DƖ tɩtɩ mʋ
yɩ DƖ paarɩ-zulǝ yam taa brɩ jaja.
17 Yinigə tiinə na loori zǝnǝ
DƖ tee nɩ,
DƖ wʋ́ sɛ ba wɛ-loro kʋm.
DƖ bá vɩn sɩ DƖ wǝli-ba.
18 Nan pʋpʋnɩ wǝǝnu tɩntʋ maama
n tiŋi,
sɩ dwi dɩlʋ maama na wʋ́ saŋɩ kwaga tɩn lwarɩ
Baŋa-Wɛ tɩtʋŋ-kamunnu tɩm
na yɩ te tɩn,
yɩ ba daarɩ ba taa tee‑DƖ.
19 Baŋa-Wɛ zɩgɩ DƖ wɛyuu sɔŋɔ kʋm nɩ mʋ
DƖ dʋlɩ DƖ yiǝ DƖ nii
lʋgʋ kʋm baŋa na yɩ te tɩn.
20 DƖ ma yɔɔrɩ DƖ ni pɩɩna bam
na ŋʋʋsɩ te tɩn,
yɩ DƖ daarɩ DƖ joŋi balʋ
ba na lagɩ ba gʋ tɩn ŋwɩa
DƖ yagɩ sɩ ba taa ŋwɩ.
21 Kʋntʋ tɩn, nɔɔna wʋ́ taa tee‑DƖ Siyɔn nɩ,
pa o yɩrɩ dɩm zaŋɩ
Zeruzalɛm tɩʋ kʋm maama wʋnɩ.
22 Lʋgʋ baŋa tɩɩnɩ dɩm nɔn-biə bam
dɩ dwi dɩlʋ maama na jeeri daanɩ
sɩ ba zuli Baŋa-Wɛ,
kʋʋ́ kɩ kʋntʋ.
23 Amʋ nɔn-dʋnnɩ maŋa kam nɩ mʋ
Baŋa-Wɛ pɛ amʋ dam ti.
DƖ pɛ a ŋwɩa kam tiini ka kɩ kukugə.
24 A ma loori‑DƖ a wɩ: «Amʋ Tu Wɛ,
yɩ pa a tɩ lɩla yɩ a dɛ wʋ yi.
Nmʋ tɩtɩ bɩna yam nan
wʋ́ taa ve yigə mʋ wuu.
25 Faŋa faŋa tɩn, nmʋ dɛɛn mʋ cwi
tɩga kam kuri,
yɩ n ta kwǝri n ma n jɩa
n naanɩ wɛyuu wǝǝnu maama.
26 Wǝǝnu tɩm kʋntʋ maama
wʋ́ ba tɩ cɔgɩ.
Kʋ daarɩ nmʋ ta wʋ́ ta n wʋra taan.
Tɩntʋ maama wʋ́ ba tɩ zarɩmɩ
nɩ gɔrɔ na yǝni kʋ zarɩmɩ te tɩn.
Nmʋ nan wʋ́ lɩ-tɩ n dʋlɩ n yagɩ,
nɩ nmʋ na kwe gwar-doŋo
n tiŋi dáa nɩ te tɩn.
27 Nmʋ nan ta wʋ́ ta n yɩ
nɩ n na maŋɩ n yɩ te tɩn mʋ.
N bɩna yam bá fɔgɩ ya ti.a
28 Dɩbam balʋ na yɩ n tɩntʋŋna tɩn biə bam
wʋ́ taa zʋʋrɩ nmʋ tee nɩ dɩ yazurə,
yɩ ba dwi tiinə bam wʋ́ taa je
n woro kʋm wʋnɩ.»