Pɛ wʋm na goni ni sɩ o kɩ kʋlʋ tɩn
Davidi dɛɛn panɩ ləŋə kantʋ.
101
Amʋ wʋ́ leenia zuli n sono kʋm
dɩ n na bʋrɩ cɩga bʋra te tɩn.
Amʋ wʋ́ leeni a te
nmʋ Baŋa-Wɛ yɩrɩ dɩm.
2 A ta wʋ́ taa cʋ a tɩtɩ mʋ
sɩ a yɩ tusi cwǝŋǝ kam wʋnɩ.
Nmʋ nan bá ba n wǝli-nɩ lɩla na?
Amʋ tɩtɩ sɔŋɔ kʋm nɩ
a wʋ́ taa tʋŋɩ a tɔgɩ cɩga kam.
3 Kʋ nan na yɩ wo-yɔɔrʋ dwi maama,
a bá kɩ-tɩ a wʋbʋŋa nɩ.
A maa culi kǝm-balwaarʋ,
yɩ a ba mɩ dɩ balʋ na kɩ-tɩ tɩn.
4 A ta wʋ́ pwɛ a tɩtɩ
dɩ balʋ wʋbʋŋa na ywəri tɩn,
yɩ a ma a kwaga a ya
lwarɩm kikiə maama.
5 Wʋlʋ maama na baɩ o doŋ bɩbara,
amʋ wʋ́ cɔgɩ kʋ tu a yagɩ.
Kʋ ta na yɩ balʋ
na brɩ ba tɩtɩ kamunni tɩn,
amʋ bá pa-ba pwələ sɩ ba tʋŋɩ.
6 Amʋ yigə nan wʋ́ taa wʋ
balʋ na tʋŋɩ cɩga tɩn wʋnɩ mʋ.
A lagɩ a pa-ba cwǝŋǝ mʋ
sɩ ba taa zʋʋrɩ amʋ tee nɩ.
Wʋlʋ maama na yɔɔrɩ o tɔgɩ cwǝŋǝ,
kʋ tu wʋ́ taa tʋŋɩ o pa-nɩ.
7 Amʋ bá sɛ sɩ kampin-nyɩna
taa zʋʋrɩ a sɔŋɔ kʋm nɩ.
Vwa-fɔra dɩ nan bá taa twɛ-nɩ.
8 Zɩzɩŋa maama wʋnɩ
amʋ wʋ́ cɔgɩ balʋ na tʋŋɩ
pu-sɩŋa tɩga kam nɩ tɩn a yagɩ.
A ta wʋ́ cɩ balʋ na tʋŋɩ
lwarɩm dwi maama tɩn
sɩ ba yɩ zʋ Baŋa-Wɛ tɩtɩ tɩʋ kʋm wʋnɩ.