Baŋa-Wɛ mʋ yɩ lʋgʋ baŋa maama Pɛ
1 Kɩbarɩ tɔnɔ 16:23-33
96
Leeni-na ləŋ-dʋŋaá ma á te Baŋa-Wɛ.
Nabiinǝ maama, leeni-na á pa-DƖ-na.
2 Leeni-na á zǝŋi DƖ yɩrɩ dɩm.
Dɛ maama wʋnɩ sɩ á tɔɔlɩ-na
DƖ taanɩ nɩ DƖ yɩ vrɩm tu.
3 Ta-na jaja sɩ dwi maama tiinə lwarɩ nɩ
DƖ paarɩ-zulǝ yam gaalɩ.
Pa-na sɩ nɔɔna maama ni
DƖ tɩtʋŋ-kamunnu tɩm ŋwa.
4 Bɛŋwaanɩ, Baŋa-Wɛ jɩgɩ kamunni mʋ.
DƖ ma sɩɩnɩ DƖ maŋɩ dɩdaanɩ tiə.
Nɔɔna maŋɩ sɩ ba taa kwarɩ-DƖ
sɩ kʋ dwǝni wa yam maama.
5 Wa yalʋ dwi-gɛ tiinə na zuli tɩn
yɩ jwǝnǝ mʋ.
Kʋ nan yɩ Baŋa-Wɛ mʋ
naanɩ wɛyuu maama.
6 Kamunni dɩdaanɩ paarɩ mʋ
wʋ DƖ tee nɩ.
Dam dɩ paarɩ-zulə dɩ maa wʋ
DƖ tɩtɩ digə kam nɩ.
7 Lʋgʋ baŋa dwi tiinə maama,
kwe-na zulə á pa Baŋa-Wɛ.
DƖ na jɩgɩ dam dɩ paarɩ-zulǝ tɩn ŋwaanɩ,
kwe-na zulə á pa‑DƖ.
8 DƖ yɩrɩ dɩm na maŋɩ dɩ tiə tɩn ŋwaanɩ,
kwe-na zulə á pa‑DƖ,
Ja-na pɛɛra á zʋ
DƖ digə kam kʋnkɔlɔ wʋnɩ
á ma á zuli‑DƖ.
9 Zuli-na Baŋa-Wɛ
sɩ kʋ tɔgɩ dɩ DƖ na tiini
DƖ jɩgɩ lam te tɩn.
Nabiinǝ maama maŋɩ
sɩ ba taa kwarɩ-DƖ
yɩ ba yɩra saɩ mʋ.
10 Ta-na jaja sɩ dwi maama tiinə ni nɩ:
«Baŋa-Wɛ mʋ yɩ Pɛ!»
DƖ naanɩ lʋgʋ kʋm
pa kʋ zɩgɩ mʋ ga cɛpɩ.
Kʋ bá fɔgɩ kʋ gɔ maŋa dɩ maŋa.
DƖ ta wʋ́ tɔgɩ cɩga mʋ
DƖ ma bʋrɩ nɔɔna maama bʋra.
11 Pa wɛyuu kʋm taa di ywəəni!
Pa tɩga kam baŋa
taa jɩgɩ wʋpolo!
Ta pa nɩnɩʋ kʋm taa wuurǝ,
kʋntʋ dɩ wǝǝnu tɩlʋ maama
na wʋ kʋ wʋnɩ tɩn.
12 Pa karɩ dɩdaanɩ sɩ wʋdiiru tɩm maama taa caka!
Tweeru dɩlʋ maama na wʋ kagʋa nɩ tɩn
laan wʋ́ kaasɩ wʋpolo kaasa.
13 Tɩ maa wʋ́ leeni dɩ tee Baŋa-Wɛ,
Bɛŋwaanɩ, DƖ maa bɩɩnɩ sɩ DƖ di
lʋgʋ baŋa maama taanɩ mʋ.
DƖ na yɩ cɩga Tu tɩn mʋ DƖ lagɩ
DƖ ba DƖ tɔgɩ DƖ cɩga kam
DƖ ma DƖ bʋrɩ lʋgʋ baŋa dwi maama bʋra.