Zuli-na Baŋa-Wɛ á daarɩ á taá sɛ DƖ ni
95
Pa-na sɩ dɩ́ leeni le sɩlʋna ywəmmə tɩn
dɩ́ maa tee Baŋa-Wɛ dɩ wʋpolo!
Dɩ́ maa wʋ́ kaasɩ dɩ kwǝr-dɩa
dɩ́ tee Baŋa-Wɛ,
DƖ na yɩ dɩ́ dalɩm je
yɩ dɩ́ na vrɩm DƖ tee nɩ tɩn ŋwaanɩ.
2 Pa-na sɩ dɩ́ vu DƖ yigə dɩ́ kɩ DƖ le,
yɩ dɩ́ leeni le dɩ́ zuli‑DƖ
dɩ wʋpolo.
3 Bɛŋwaanɩ, Baŋa-Wɛ mʋ sɩɩnɩ
DƖ yɩ Wɛ-kamunu kʋm!
DƖ maa yɩ Pa-farʋ,
yɩ DƖ dwe wa yam maama wuu.
4 Tɩga kam kuri wʋ
wʋntʋ ja-bɔŋɔ nɩ mʋ.
Pweeru tɩm tɩtɩ yupara
maa yɩ DƖ nyɩm.
5 Dɩntʋ mʋ te nɩnɩʋ kʋm,
DƖ na kɩ-kʋ tɩn ŋwaanɩ.
DƖ daa ta mɛ DƖ tɩtɩ jɩa
DƖ kɩ tɩga baŋa maama.a
6 Pa-na sɩ dɩ́ vi dɩ́ yigə tɩga nɩ
dɩ́ zuli Baŋa-Wɛ!
Dɩ́ wʋ́ vu dɩ́ kuni doonǝ DƖ yigə nɩ,
DƖ na yɩ dɩ́ Naanʋ wʋm tɩn ŋwaanɩ.b
7 Bɛŋwaanɩ, DƖ yɩ dɩbam Tu Wɛ mʋ.
Dɩ́ maa yɩ Dɩntʋ nɔn-kɔgɔ kʋm.
DƖ maa yǝni DƖ nii dɩbam baŋa nɩ
nɩ nayɩrʋ na nii o peeni te tɩn.
Abam zɩm nan maŋɩ
sɩ á ni Wɛ kwǝrǝ:
8 «Á yɩ pa á wʋʋ kɩ dam,
nɩ á nabaara dɛɛn na kɩ te
Meriba dɩ Masa nɩ,
maŋa kalʋ ba na wʋ
kagʋa kam yuu nɩ tɩn.c
9 Je sɩm kʋntʋ nɩ mʋ
á nabaara bam dɛɛn kwaanɩ
sɩ ba maŋɩ amʋ ba nii.
Ba dɛɛn nan maŋɩ ba na
amʋ na tʋŋɩ a pa-ba te tɩn.
10 Kʋntʋ ŋwaanɩ mʋ amʋ banɩ zaŋɩ
dɩ á nabaara bam kʋntʋ taan,
sɩ kʋ vu kʋ yi bɩna fiinna.
A maa wɩ: ‹Ba yɩ balʋ na yǝni
ba paalɩ ba cɔgɩ tɩn mʋ.
Ba maa ba sɛa sɩ ba tɔgɩ
amʋ cwe sɩm.›
11 Kʋntʋ ŋwaanɩ amʋ tɔgɩ
a ban-zɔŋɔ kʋm ŋwaanɩ
a du durə a pa-ba a wɩ:
‹Amʋ brɩ a bá pa-ba cwǝŋǝ
sɩ ba zʋ amʋ woro kʋm wʋ ba sin.› »d