Baŋa-Wɛ bʋrɩ cɩga bʋra
94
Baŋa-Wɛ, nmʋ yɩ dɩlʋna joori DƖ ŋwɩ jɩnɩ
lwarɩm-kərə baŋa nɩ tɩn mʋ.a
Nan pa n paarɩ-zulǝ yam nyɩ
kʋ taa lwarɩ jaja!
2 Nmʋ ma n yɩ wʋlʋ na bʋrɩ cɩga bʋra lʋgʋ baŋa nɩ tɩn.
Kʋntʋ tɩn, zaŋɩ wɛɛnɩ
sɩ n waarɩ kamun-nyɩna bam
sɩ kʋ maŋɩ dɩ ba kikiə.
3 Baŋa-Wɛ, nɔn-balwaarʋ tɩm
wʋ́ taa caka taan
sɩ ba vu ba maŋɩ yən mʋ?
4 Balʋ na tʋŋɩ lwarɩm tɩn
yɔɔrɩ ba ŋɔɔnɩ kamun-ŋwɛ mʋ!
Nii ba na brɩ ba tɩtɩ kamunni te!
5 Baŋa-Wɛ, ba jɩgɩ n tɩtɩ nɔɔna bam mʋ ba bɛɛsa.
Cɩga tɩn, ba kɩ balʋ na yɩ n nɔɔna tɩn mʋ zʋnnɩ.
6 Ba maa jaanɩ kadənə
dɩdaanɩ vərə ba gʋɩ,
yɩ ba ta gʋɩ bɩtara dɩ ba wǝli da.
7 Ba laan maa tɛ ba wɩ:
«Baŋa-Wɛ dɩm na yɩ Zakɔbɩ dwi tiinə Wɛ tɩn
ba naɩ dɩ́ kikiə yam.
DƖ yigə nan tǝrǝ dɩ́ tɩtʋŋa yam wʋnɩ.»
8 Amʋ nɔɔna balʋ wʋbʋŋa
na muri tɩn,
nan fɔgɩ á bʋŋɩ-na á nii!
Á yɩ jwəəru mʋ. Á bá ja swan na?
9 Wʋlʋ wʋm na kɩ zwa
o pa nabiinǝ tɩn tɩtɩ
yɩ zwa-kɔgɔ mʋ na?
Wʋntʋ ta wʋ́ pa-ba yiǝ,
sɩ o tɩtɩ laan daarɩ
o taa yɩ lilwe na?
10 O na yɩ wʋlʋ na vaŋɩ lʋgʋ baŋa tɩɩnɩ dɩm zwa tɩn,
o bá waarɩ abam dɩ mʋ na?
Wʋlʋ wʋm na kwe cɩga
o brɩ nɔɔna tɩn tɩtɩ
wʋ́ ga yiyiu na?
11 Baŋa-Wɛ nan maŋɩ DƖ ye
nabiinǝ na bʋŋɩ ba ja kʋlʋ tɩn.
DƖ ye nɩ ba wʋbʋŋa yam yɩ kafɛ mʋ.b
12 Baŋa-Wɛ, nmʋ na yǝni
n kʋrɩsɩ wʋlʋ maama,
kʋ tu tiini o jɩgɩ yu-yoŋo,
nmʋ na kwe n niə yam
n ma n brɩ-o tɩn ŋwaanɩ.
13 N ta yǝni n pa kʋ tu na siun
dɩ yaara yalʋ na wʋ́ yi‑o tɩn,
sɩ ba laan kʋ goŋo sɩ nɔn-balwaarʋ tʋ kʋ wʋnɩ ba tɩ.
14 Bɛŋwaanɩ, Baŋa-Wɛ bá fɔgɩ
DƖ vɩn DƖ nɔɔna bam.
DƖ bá dʋlɩ-ba DƖ yagɩ,
ba na yɩ DƖ nɔɔna tɩn ŋwaanɩ.
15 Maŋa kam kʋntʋ nɩ, ba daa ta
wʋ́ da cɩga kam ŋwaanɩ
ba bʋrɩ nɔɔna bʋra.
Balʋ maama na yɔɔrɩ cwə-laa wʋnɩ tɩn
wʋ́ sɛ ba tɔgɩ cɩga kam kʋntʋ mʋ.
16 Wɔɔ mʋ wʋ́ zaŋɩ o zɩgɩ o pa amʋ,
sɩ o dwəni dɩ nɔn-balwaarʋ tɩm kʋntʋ?
Wɔɔ mʋ wʋ́ cɩ amʋ
dɩ balʋ na tʋŋɩ lwarɩm tɩn?
17 Kʋ ya na daɩ Baŋa-Wɛ mʋ tu
DƖ wǝli-nɩ,
tɩntʋ amʋ ya tɩga,
yɩ a vu curu a maŋɩ da cɩmm.
18 A nan tɔɔlɩ ni a wɩ:
«A lagɩ a seeri a tʋ tɩga nɩ mʋ!»
A na tagɩ kʋntʋ tɩn, nmʋ Baŋa-Wɛ
tɔgɩ n sono kʋm ŋwaanɩ
n təli-nɩ n joori n ja-nɩ n zɩgɩ.
19 Liǝ na tiini ya jɩgɩ-nɩ,
nmʋ wʋ́ pa a bɩcarɩ joori
dɩ zuri mʋ.
20 Nmʋ dɩdaanɩ tɩʋ kʋm dɩdɛɛra balʋ na kwɩɩlɩ cɩga tɩn
bá wanɩ á mɩ daanɩ.
Bantʋ mʋ yǝni ba tiŋi niə yalʋ
na paɩ pwələ sɩ lwarɩm fɔgɩ
dɩ taa pulǝ tɩn.
21 Ba maa kɩ ni daanɩ
sɩ ba cɩ nɔn-ŋʋna cwǝŋǝ,
yɩ ba daarɩ ba paɩ balʋ na wʋ kɩ kʋlʋkʋlʋ ba cɔgɩ tɩn ga ba ŋwɩa.
22 Kʋ daarɩ, Baŋa-Wɛ nan mʋ yɩ
amʋ dalɩm je.
DƖ maa nyɩ dɩ piu kʋlʋ
amʋ na salɩ kʋ yɩra nɩ tɩn.
23 Dɩbam Tu Baŋa-Wɛ wʋ́ joori
DƖ ŋwɩ ba lwarɩm dɩm jɩnɩ.c
Cɩga tɩn, DƖ lagɩ o yɔɔrɩ
DƖ cɔgɩ-ba mʋ
ba tɩtʋŋ-lwaannʋ tɩm ŋwaanɩ.