Baŋa-Wɛ paarɩ dɩm lana!
97
Baŋa-Wɛ mʋ yɩ Pɛ.Lʋgʋ baŋa maama di-na ywəəni!
Tɩɩnɩ dɩlʋ na wʋ nɩnɩʋ ni nɩ tɩn
wʋ́ taa caka dɩ wʋpolo.
2 Kunkwən-luluru mʋ kaagɩ‑DƖ
tɩ kɩ tɩtarɩ nɩ.a
DƖ paarɩ dɩm jɩgɩ dam,
DƖ na tɔgɩ cɩga DƖ te nɔɔna tɩn ŋwaanɩ.
3 DƖ na maa ve mɛ maama,
mim mʋ wʋ́ taa tɔgɩ DƖ yigə,
pa balʋ maama na yɩ DƖ sɩbara tɩn na cɔgɩm.
4 DƖ na paɩ dʋa pɩpɩlɩ te tɩn
maa paɩ pooni yi
lʋgʋ baŋa je maama.
Tɩga kam baŋa maa naɩ
yɩ ka sisiŋi.
5 Baŋa-Wɛ yigə nɩ mʋ
lʋgʋ baŋa pweeru tɩm saarɩ
tɩ tʋ buri buri,
DƖ na te tɩga kam baŋa maama tɩn ŋwaanɩ.
6 Wɛyuu kʋm tɩtɩ tɔɔlɩ
Wɛ cɩga kam taanɩ mʋ,
sɩ nabiinǝ maama taa naɩ
DƖ paarɩ-zulǝ yam.
7 Balʋ maama na zuli jwǝnǝ tɩn
lagɩ ba di ba cavɩɩra mʋ.
Ba jɩgɩ kamun-ŋwɛ ba ŋɔɔna
ba jwə-yɔɔrʋ tɩm ŋwaanɩ mʋ.
Wa-yɔɔrʋ tɩm maama nan maŋɩ
sɩ tɩ pipiri tɩ ba
tɩ zuli Baŋa-Wɛ mʋ!b
8 Balʋ na zʋʋrɩ Siyɔn dɩ Zuda
tɩɩnɩ dɩdonnǝ dɩm nɩ tɩn
laan wʋ́ ni kʋ kuri yɩ ba di ywəəni,
Baŋa-Wɛ na bʋrɩ cɩga bʋra tɩn ŋwaanɩ.
9 Bɛŋwaanɩ, nmʋ Baŋa-Wɛ
yɩ Yuutu Wɛ dɩm na te
lʋgʋ kʋm baŋa maama tɩn mʋ.
Nmʋ tiini n jɩgɩ yɩrɩ n dwe
wa yadonnə yam maama wuu.
10 Abam balʋ maama
na soe Baŋa-Wɛ tɩn,
taá culi-na lwarɩm tɩtʋŋa.
Kʋ na yɩ Wɛ tɩtɩ nɔɔna bam,
DƖ yǝni DƖ cʋ-ba mʋ,
yɩ DƖ vrɩ-ba nɔn-balwaarʋ jɩŋa nɩ
DƖ yaga.c
11 Pooni mʋ wʋ́ nyɩ nɔn-ŋʋna yigə nɩ.
Ywəəni maa wʋ́ yi balʋ
na yɔɔrɩ cwə-laa tɩn.
12 Abam balʋ na jɩgɩ cɩga
Wɛ yigə nɩ tɩn
kɩ-na wʋpolo dɩ Baŋa-Wɛ
na kɩ kʋlʋ tɩn,
sɩ á daarɩ á kɩ DƖ le,
DƖ na yɩ wʋ-poŋo tu tɩn ŋwaanɩ.