Baŋa-Wɛ tʋŋɩ wo-kɩnkagɩla!
98
Leeni-na ləŋ-dʋŋaá ma á tee Baŋa-Wɛ,
sɩ DƖ yɔɔrɩ DƖ tʋŋɩ wo-kɩnkagɩla mʋ.
DƖ mɛ DƖ tɩtɩ dam-fɔrɔ kʋm
na ba jɩgɩ doŋ tɩn mʋ
DƖ yɔɔrɩ DƖ di wɔnɔ.
2 Baŋa-Wɛ ma pa nabiinǝ lwarɩ nɩ
DƖ jɩgɩ dam sɩ DƖ vrɩ nɔɔna DƖ yagɩ.
Dwi-gɛ tiinə bam ma na
DƖ na zɩgɩ o cɩga wʋnɩ te tɩn.
3 DƖ daa ta jɩgɩ DƖ ni-gonim dɩm nɩ
DƖ wʋ́ taa soe Yisɩrayɛlɩ dwi tiinə bam,
yɩ DƖ tʋŋɩ cɩga dɩ ba.
Lʋgʋ baŋa ni maama nɩ,
nabiinǝ yɔɔrɩ ba lwarɩ
dɩbam Tu Wɛ dɩm na jɩgɩ dam
sɩ DƖ vrɩ nɔɔna DƖ yagɩ te tɩn mʋ.
4 Lʋgʋ baŋa wǝǝnu maama,
kaasɩ-na dɩ wʋpolo á te Baŋa-Wɛ!
Taá caka dɩ ywəəni
yɩ á leeni-na tiə le!
5 Ta-na kwaanʋ á ma á kwɛɛrɩ
Baŋa-Wɛ yigə nɩ,
sɩ á daarɩ á leeni á tee-DƖ.
6 Wu-na nabwaanʋ dwi dwi
sɩ tɩ sɔɔ taa zaŋa.
Ve-na Baŋa-Wɛ dɩm na yɩ á Pɛ tɩn
yigə nɩ,
á kaasɩ dɩ wʋpolo á zuli‑DƖ.
7 Nɩnɩʋ kʋm dɩ kʋ wʋ wǝǝnu tɩm maama
maŋɩ sɩ tɩ taa wuuri tɩ kɩ sɔɔ mʋ!
Lʋgʋ kʋm baŋa dɩ kʋ nɔn-biə
dɩ maŋɩ sɩ ba kaasɩ dɩ baarɩ mʋ.
8 Bu-tʋla dwi maama
wʋ́ magɩ ka jɩn mʋ.
Pweeru tɩm dɩ maa wʋ́ tɔgɩ daanɩ
tɩ leeni wʋpolo le.
9 Ba maama zuli Baŋa-Wɛ,
dɩ DƖ na maa bɩɩnɩ
sɩ DƖ di nabiinǝ taanɩ tɩn.
Wɛ lagɩ DƖ da cɩga ŋwaanɩ mʋ
DƖ bʋrɩ lʋgʋ baŋa dwi maama bʋra.