Wɛ na goni ni dɩ Davidi te tɩn
17
Pɛ Davidi dɛɛn laan maa zʋʋrɩ o sɔ-fɔrɔ kʋm nɩ. Dɛ dɩdʋa o ma ta dɩ Wɛ nijoŋnu Natan o wɩ: «Nii amʋ mʋ tɩntʋ! A zʋʋrɩ sɔ-fɔrɔ kʋlʋ ba na kwe Sɛdrɩ da-ŋʋnnʋ ba ma lɔ-kʋ tɩn, yɩ kʋ daarɩ Baŋa-Wɛ ni-gonim daka kam laan zɩgɩ vwe kuri nɩ.» 2 Natan ma ləri o wɩ: «Kɩ n wʋbʋŋa na jaanɩ te maama tɩn, sɩ Wɛ wʋ n tee nɩ.»
3 Dɛ dɩm kʋntʋ tɩtɩɩ nɩ mʋ Wɛ ŋɔɔnɩ dɩdaanɩ Natan DƖ wɩ:
4 «Ve n ta dɩ amʋ tɩntʋŋnʋ Davidi nɩ: ‹Baŋa-Wɛ na tagɩ kʋlʋ tɩn mʋ tɩntʋ: Kʋ daɩ nmʋ mʋ wʋ́ lɔ sɔŋɔ n pa-nɩ sɩ a taa zʋʋrɩ da. 5 Kʋ nan na yɩ te tɩn, kʋ zɩgɩ maŋa kalʋ a na jaanɩ Yisɩrayɛlɩ dwi dɩm a ba yo seeni tɩn, sɩ kʋ ba kʋ yi zɩm, amʋ ta wʋ fɔgɩ a zʋ sɔŋɔ wʋnɩ. Mɛ maama a na jaanɩ-ba a vu, a yǝni a zʋʋrɩ vwe kuri nɩ mʋ. 6 Je sɩlʋ maama amʋ dɩdaanɩ Yisɩrayɛlɩ dwi dɩm na beeri dɩ́ vu tɩn, amʋ ta wʋ fɔgɩ a ta dɩ dɩdɛɛra balʋ a na kuri sɩ ba taa nii a nɔɔna Yisɩrayɛlɩ tiinə bam tɩn nɩ: «Bɛɛ mʋ kɩ yɩ á wʋ kwe Sɛdrɩ da-ŋʋnnʋ á ma á lɔ sɔŋɔ á pa-nɩ?» ›
7 Kʋntʋ tɩn, ta ta dɩ a tɩntʋŋnʋ Davidi nɩ: ‹Paŋwa Tu Baŋa-Wɛ na tagɩ kʋlʋ tɩn mʋ tɩntʋ: Amʋ na lɩ nmʋ tɩn, dɩdaanɩ n dɛɛn yɩ nayɩrʋ mʋ gaa nɩ n nii peeni baŋa nɩ. A ma daarɩ a pa n di paarɩ amʋ nɔɔna Yisɩrayɛlɩ tiinə bam baŋa nɩ. 8 Mɛ maama nmʋ na yǝni n ve tɩn, a dɛɛn tɔgɩ n kwaga kʋntʋ mʋ, yɩ a pa n dʋna dwi maama saarɩ tɩga baŋa nɩ. Lele kʋntʋ, amʋ wʋ́ pa n yɩrɩ zaŋɩ, sɩ n tan tɔgɩ n yɩ lʋgʋ baŋa dɩdɛɛra bam wʋnɩ dɩdʋa. 9 Amʋ laan nan kwe tɩga kalʋ a nɔɔna bam na wʋ́ taa zʋʋrɩ ka wʋnɩ tɩn mʋ a pa-ba. Kʋ lagɩ kʋ taa yɩ ba tɩtɩ kugu je nɔɔn-nɔɔnʋ na bá wanɩ o yaarɩ-ba kʋ wʋnɩ tɩn mʋ. Nɔn-balwaarʋ daa bá bɛɛsɩ-ba nɩnɛɛnɩ kʋ dɛɛn na kɩ te, 10 kʋ zɩgɩ maŋa kalʋ a na pɛ yigǝ tiinǝ nii a nɔɔna Yisɩrayɛlɩ tiinə bam baŋa nɩ tɩn. Amʋ ta lagɩ a wanɩ abam dʋna bam maama mʋ a di.
Amʋ Baŋa-Wɛ nan ta wɩ: amʋ tɩtɩ wʋ́ pa n dwi dɩm puli mʋ pa n sɔŋɔ kʋm jǝni dɩ dam. 11 Nmʋ ŋwɩa kam na ba ka ti yɩ ba kwe‑m ba kɩ mɛ ba dɛɛn na kɩ nmʋ kwə bam tɩn, a ta wʋ́ pa n dwi dɩm wʋnɩ nɔɔnʋ dɩdʋa zaŋɩ sɩ o ləri nmʋ yuu nɩ o ji pɛ. A maa wʋ́ pa o paarɩ dɩm jǝni dɩ dam. 12 Kʋ yɩ wʋntʋ mʋ wʋ́ lɔ sɔŋɔ o pa-nɩ. Amʋ ta wʋ́ pa wʋntʋ dwi dɩm taa di paarɩ dɩm maŋa maama.a 13 Amʋ wʋ́ taa yɩ o ko, sɩ o dɩ taa yɩ amʋ bu. Amʋ nan bá fɔgɩ a dwanɩ a sono kʋm o baŋa nɩ, nɩnɛɛnɩ a dɛɛn na kɩ te dɩdaanɩ Sooli yɩ a lɩ-o paarɩ dɩm wʋnɩ sɩ nmʋ laan ji pɛ tɩn. 14 Amʋ wʋ́ pa n bu wʋm kʋntʋ taa di paarɩ amʋ nɔɔna baŋa nɩ taan wuu. Maŋa maama sɩ kʋ taa ve maŋa kalʋ na ba ti tɩn o paarɩ dɩm wʋ́ fɔgɩ dɩ ja dam.› »
 
15 Natan ma ta kʋlʋ maama Baŋa-Wɛ na lɩ DƖ brɩ-o tɩn dɩdaanɩ Davidi.
Davidi kɩ Baŋa-Wɛ le
16 Davidi ma vu o zʋ Baŋa-Wɛ jero-vwe dɩm o jǝni da, yɩ o warɩ Wɛ o wɩ:
«Yuutu Baŋa-Wɛ, amʋ yɩ wɔɔ mʋ, amʋ dwi dɩm dɩ yɩ bɛɛ mʋ, yɩ n zǝni amʋ tɩntʋ sɩ kʋ yi zɩm? 17 Dɩ kʋntʋ maama dɩ, n ta bʋŋɩ sɩ n kɩ-nɩ lanyɩranɩ n wǝli da! Yuutu Baŋa-Wɛ, nmʋ ta ma n tiŋi ni a dwi dɩm ŋwaanɩ sɩ kʋ vu kʋ yi jwa seeni. Nmʋ maŋɩ n garɩ n pa a yɩ nɔn-kamunu mʋ.
18 Nmʋ na pɛ a jɩgɩ yɩrɩ te tɩn, amʋ nan daa jɩgɩ bɛɛ mʋ sɩ a ta? Amʋ yɩ n tɩntʋŋnʋ mʋ yɩ n ye a maama n tiə. 19 Baŋa-Wɛ, kʋ yɩ amʋ ŋwaanɩ dɩ n wʋbʋŋa yam ŋwaanɩ mʋ n kɩ wo-kamunnu tɩntʋ maama, yɩ n daarɩ n pa amʋ lwarɩ-tɩ.
20 Yuutu Baŋa-Wɛ, nmʋ doŋ tǝrǝ! Nmʋ yɩranɩ mʋ yɩ Wɛ. Dɩ́ yɔɔrɩ dɩ́ ye kʋntʋ mʋ lanyɩranɩ. 21 Dɩbam Yisɩrayɛlɩ tiinə bam mʋ yɩ dwi dɩdwɩ lʋgʋ baŋa nɩ. Dwi dɩdoŋ tǝrǝ dɩ na ma dɩ Yisɩrayɛlɩ tiinə bam. Nmʋ dɛɛn joŋi-ba gabɛɛm wʋnɩ mʋ pa ba ji nmʋ tɩtɩ nɔɔna, sɩ n daarɩ n pa n yɩrɩ zaŋɩ wɛɛnɩ. Nmʋ na vrɩ-ba Ezipi tiinə jɩŋa nɩ tɩn, n dɛɛn kɩ wo-kɩnkagɩla na jɩgɩ fʋʋnɩ tɩn mʋ. Kʋ ta na yɩ dwi tiinə balʋ na kwaanɩ sɩ ba cɩ-ba tɩn, n zəli bantʋ mʋ ba yigə nɩ. 22 Nmʋ ma n kuri Yisɩrayɛlɩ dwi tiinə bam sɩ ba taa yɩ nmʋ tɩtɩ nɔɔna sɩ kʋ taa ve maŋa maama. Kʋ daarɩ nmʋ Baŋa-Wɛ dɩ ma ji bantʋ Wɛ dɩm.
23 Baŋa-Wɛ, laan nan pa n ni-gonim dɩm, n na kɩ amʋ dɩ a dwi dɩm ŋwaanɩ tɩn taa jɩgɩ kuri sɩ kʋ taa ve maŋa maama. Sɩɩnɩ n kɩ kʋlʋ nmʋ na tagɩ tɩn, 24 sɩ n yɩrɩ dɩm taa yɩ kamunu maŋa maama yɩ dɩ daa bá je. Nɔɔna laan wʋ́ taa tɛ ba wɩ: ‹Paŋwa Tu Baŋa-Wɛ dɩm na yɩ Yisɩrayɛlɩ tiinə bam Wɛ tɩn mʋ nii Yisɩrayɛlɩ tiinə bam baŋa nɩ.› Kʋ ta wʋ́ pa amʋ wʋlʋ na yɩ n tɩntʋŋnʋ tɩn sɔŋɔ kʋm na dwi sɩ kʋ taa ve wuu.
25 Amʋ Tu Wɛ, nmʋ lɩ wǝǝnu tɩntʋ maama n brɩ-nɩ nɩ: nń pa a dwi dɩm puli mʋ yɩ a sɔŋɔ kʋm jǝni dɩ dam. Kʋntʋ ŋwaanɩ mʋ pɛ a na baarɩ a loori‑m kʋntʋ doŋ. 26 Baŋa-Wɛ, nmʋ sɩɩnɩ n yɩ Wɛ mʋ cɩga cɩga! Nmʋ pooli wo-laarʋ tɩntʋ na yɩ cɩga cɩga tɩn mʋ n pa amʋ wʋlʋ na yɩ n tɩntʋŋnʋ tɩn. 27 Nmʋ nan lagɩ n kɩ a kwaga kam yu-yoŋo mʋ, sɩ n tan kɩ-ba yu-yoŋo maŋa maama. Baŋa-Wɛ, nmʋ na kɩ ba yu-yoŋo kʋntʋ tɩn, n yu-yoŋo wʋ́ sɩɩnɩ dɩ taa tɔgɩ a dwi dɩm mʋ sɩ kʋ taa maŋa maama wuu.»