Davidi di wɔnɔ najara wʋnɩ
18
Kʋntʋ kwaga nɩ, Davidi dɛɛn ma vu o jeeri Filisi tiinə bam dɩ najara. O ma di-ba pa ba na cavɩɩra. O ma wanɩ o joŋi Gatɩ tɩʋ kʋm dɩ kʋ nawuurə yam maama ba jɩan nɩ. 2 Davidi dɛɛn ma zaŋɩ najara o di Moabɩ tiinə bam dɩ. Moabɩ tiinə bam dɛɛn ma lɛɛrɩ ba zʋ Davidi dam kuri nɩ, yɩ ba tui ba ŋwɩ lampoo ba pa‑o. 3 Rehɔbɩ bu Hadadezerɩ dɛɛn yɩ Zoba tɩʋ pɛ mʋ. O nan ya maa ve sɩ o joŋi Efratɩ bugə laŋa kam tɩɩnɩ dɩm mʋ o taa te. Davidi ma vu Hamatɩ seeni o jeeri Hadadezerɩ dɩ najara o di. 4 Davidi dɩ o nɔɔna bam ma ja Hadadezerɩ jara-kǝm tərikooru mʋrʋ (1,000), dɩ o jar-kərə balʋ na dɔgɩ siseŋ-nɔɔna yuu nɩ tɩn mʋrrʋ tɩrpɛ (7,000) mʋ, kʋ wǝli dɩ o jar-kərə balʋ na ve tɩga nɩ tɩn mʋrrʋ fiinle (20,000). Davidi ma lɩ ba siseŋ-nɔɔna bi (100) sɩ o taa jɩgɩ o vaŋa o jara-kǝm tərikooru, yɩ o daarɩ o bwəri sɩlʋ na daarɩ tɩn nɛ pa sɩ gwarɩgɩ. 5 Siiri tiinə balʋ dɛɛn na zʋʋrɩ Damasɩ laŋa kam nɩ tɩn ma nuŋi ba vu sɩ ba wǝli Hadadezerɩ. Davidi ma jeeri-ba dɩ najara yɩ o gʋ ba nɔɔna mʋrrʋ fiinle-tɩle (22,000) 6 Davidi ma daarɩ o ja o jar-kərə badonnǝ o vu o cɩ Siiri tiinə laŋa kam maama. Damasɩ nɩ mʋ kʋntʋ. Siiri tiinə bam dɛɛn ma zʋ Davidi dam kuri nɩ, yɩ ba ŋwɩ lampoo ba pa‑o. Mɛ maama Davidi na veǝ, Baŋa-Wɛ yǝni DƖ pa o di o dʋna mʋ jara wʋnɩ. 7 Davidi ma vrɩ səbu-sɩŋa ja cɩ-kwɛn sɩlʋ Hadadezerɩ dɩdɛɛra bam ya na jɩgɩ tɩn o ja o joori o vu Zeruzalɛm. 8 Kʋ ta na yɩ Tibatɩ dɩdaanɩ Kuni tɩɩnɩ dɩm Hadadezerɩ na te tɩn, Davidi dɛɛn zʋ dɩ wʋnɩ mʋ o vrɩ canna wǝǝnu zanzan o ja o viiri. Canna kam kʋntʋ mʋ Solɔmɔn dɛɛn mɛ o mɔ war-zʋn-zɔŋɔ kʋlʋ ba na bǝi nɩ ‹Nɩnɩʋ Kʋm› tɩn, dɩ Wɛ-digə kam ywə yam, kʋ wǝli dɩ canna zwɩ sɩdonnǝ.9 Hamatɩ tɩʋ Pɛ Toyi dɛɛn ma ni wɩ Davidi di Zoba tɩʋ Pɛ Hadadezerɩ jar-kərə bam maama. 10 Toyi tɩtɩ dɛɛn ya kɩ najara kuni zanzan mʋ dɩ Hadadezerɩ. O ma tʋŋɩ o bu Zʋram sɩ o vu o jɔɔnɩ Davidi o kɩ o yu-yoŋo le dɩ o na wanɩ Hadadezerɩ o di tɩn. Zʋram ma ja səbu-sɩŋa pɛɛra, dɩ səbu-poŋo pɛɛra, dɩ canna pɛɛra o vu o pa Davidi. 11 Davidi ma kwe pɛɛra yam kʋntʋ o pa ba taa maɩ ba zuli Baŋa-Wɛ. O dɛɛn ya maŋɩ o kɩ kʋntʋ doŋ dɩ səbu-poŋo dɩ səbu-sɩŋa wǝǝnu tɩlʋ o na vrɩ o dʋna bam tee nɩ tɩn mʋ. Bantʋ maa yɩ: Edɔm dwi, dɩ Moabɩ dwi, dɩ Amɔn tiinə, dɩ Filisi tiinə, kʋ wǝli dɩ Amalɛkɩ tiinə bam. 12 Abisayi wʋlʋ nu na yɩ Zeruya tɩn ma vu Yɛ bolo kʋm o zaŋɩ najara dɩ Edɔm tiinə bam o gʋ ba nɔɔna mʋrrʋ fugə-nana (18, 000).a 13 O ma ja o jar-kərə badonnǝ o vu o cɩ Edɔm laŋa kam. Edɔm tiinə bam maama laan ma zʋ Davidi dam kuri nɩ. Mɛ maama Davidi na veǝ, Baŋa-Wɛ yǝni DƖ pa o di o dʋna mʋ jara wʋnɩ.
Davidi tɩntʋŋna bam taanɩ
14 Davidi dɛɛn ma di paarɩ Yisɩrayɛlɩ tiinə bam maama baŋa nɩ. O ma tɔgɩ cwǝŋǝ dɩ o na kɩ o nɔɔna bam te tɩn, o di sarɩya dɩ cɩga, pa kʋ lana kʋ pa-ba. 15 Zeruya bu Zoabɩ mʋ yɩ Davidi jar-kərə bam yigə tu. Ayiludi bu Zʋzafatɩ dɩ ma nii woŋo maama baŋa nɩ sɩ o pʋpʋnɩ-tɩ o tiŋi. 16 Asituba bu Sadoki dɩdaanɩ Abɩatarɩ bu Ayimelɛkɩ dɛɛn yɩ Wɛ kaanɩm tiinə mʋ. Seraya maa yɩ tɔn-pʋpʋnnʋ. 17 Yehoyada bu Benaya mʋ nii Kereti tiinə bam dɩdaanɩ Peleti tiinə bam baŋa nɩ. Davidi bu-baara bam maa wʋ o dɩdɛɛra bam yigə nɩ ba tʋŋɩ ba pa‑o.b