Amɔn tiinə bam taanɩ
19
Kʋntʋ kwaga nɩ, Amɔn tiinə pɛ Nahasɩ ma tɩ. O bu Hanun ma ləri o yuu nɩ o ji pɛ. 2 Davidi ma ta o wɩ: «Amʋ lagɩ a kɩ Nahasɩ bu Hanun lanyɩranɩ mʋ, nɩnɛɛnɩ o ko dɩ dɛɛn na kɩ amʋ lanyɩranɩ te tɩn.» O ma tʋŋɩ nɔɔna sɩ ba vu ba kɩ Hanun le dɩ o ko luə kam. Davidi nɔɔna bam na yi Amɔn tiinə laŋa kam yɩ ba vu ba kɩ Hanun le tɩn, 3 Amɔn tiinə dɩdɛɛra bam ma ta dɩ Hanun ba wɩ: «Nmʋ pɛ cɩga nɩ Davidi bʋŋɩ lanyɩranɩ mʋ yɩ o tʋŋɩ nɔɔna sɩ ba ba ba kɩ n ko luə kam le na? Lwarɩ nɩ o nɔɔna bam tu sɩ ba ŋɔ ba nii dɩ́ tɩga kam mʋ, sɩ o laan wanɩ o ba o di dɩbam.» 4 Hanun ma pa ba ja Davidi tɩntʋŋna bam ba ceeri ba twana yam. Ba ta ma ja ba gwaarʋ tɩm tɩtarɩ nɩ ba goni ba yagɩ sɩ kʋ yi ba təkərə seeni. Ba laan ma yagɩ-ba sɩ ba viiri dɩ cavɩɩra. 5 Davidi tɩntʋŋna bam ma kwarɩ sɩ ba joori sɔŋɔ, cavɩɩra na jɩgɩ-ba tɩn ŋwaanɩ. Davidi na ni kʋ na kɩ-ba te tɩn, o ma tʋŋɩ nɔɔna sɩ ba jeeri-ba cwǝŋǝ nɩ. O ma pa-ba kwǝrǝ o wɩ: «Maŋɩ-na Zeriko nɩ sɩ á twana yam na nuŋi maama sɩ á laan joori sɔŋɔ.»6 Amɔn tiinə bam ma maanɩ nɩ: ba kikiə maama laan lwe Davidi mʋmwa nɩ mʋ. Hanun dɩ Amɔn tiinə bam ma vu ba kɩ ni-mɔrɔ dɩ Siiri tiinə balʋ na wʋ Aram-Naharam, dɩ Aram-Maaka, dɩ Zoba nɩ tɩn. Ba dɛɛn ŋwɩ səbu-poŋo tɩlʋ duuni na yɩ kilo mʋrrʋ fiintɔ-tɩna (34,000) mʋ ba ma joŋi jara-kǝm tərikooru dɩ sɩ diinǝ bam Siiri tiinə bam tee nɩ. 7 Tərikooru mʋrrʋ fiintɔ-tɩle (32,000), dɩ Maaka pɛ wʋm, dɩ o jar-kərə bam ma wǝli ba wʋnɩ. Ba maama ma vu ba jeeri Medɩba nɩ. Amɔn tiinə bam dɩ ma nuŋi ba tɩɩnɩ dɩm nɩ sɩ ba da ba zaŋɩ najara yam.
8 Davidi na lwarɩ kʋ ni nɩ tɩn, o ma tʋŋɩ Zoabɩ sɩ o ja o pamaŋna bam kɔgɔ kʋm maama o vu o jeeri-ba dɩ najara. 9 Amɔn tiinə bam ma gwɛ ba nuŋi ba toŋi ba zɩgɩ ba tɩʋ kʋm manchoŋo ni nɩ sɩ ba kɩ najara yam. Kʋ daarɩ pwa balʋ dɩ na tu sɩ ba da ba wǝli-ba tɩn laan ma toŋi ba zɩgɩ tɩʋ kʋm pwələ nɩ yɩ ba cǝgǝ.
10 Zoabɩ ma lwarɩ nɩ ba dʋna bam lagɩ ba jeeri-ba yigə dɩ kwaga maama mʋ. O ma kuri Yisɩrayɛlɩ jar-kərə bam wʋnɩ balʋ na tiini ba ye jara laŋa lanyɩranɩ tɩn, sɩ bantʋ yɔɔrɩ ba jeeri Siiri tiinə bam. 11 Jar-kərə balʋ na daarɩ tɩn, o ma kɩ-ba o nyaanɩ Abisayi jɩŋa nɩ sɩ bantʋ maama vu ba jeeri Amɔn tiinə bam. 12 Zoabɩ laan ma ta Abisayi o wɩ: «Nmʋ na nɛ nɩ Siiri tiinə bam tiini ba dana ba dwe amʋ, sɩ n ba n wǝli-nɩ. Amɔn tiinə bam dɩ nan na dana ba dwe nmʋ, amʋ dɩ wʋ́ ba a wəli‑m. 13 Kɩ dam n kɩ n tɩtɩ kuri nɩ sɩ n tan jɩgɩ baarɩ! Pa-na dɩ́ jaŋɩ dɩ́ pa dɩ́ nɔɔna bam, dɩdaanɩ dɩ́ Tu Wɛ dɩm tɩɩnɩ dɩm. Baŋa-Wɛ wʋ́ kɩ kʋlʋ na su DƖ yi tɩn!»
14 Zoabɩ dɩ o jar-kərə bam ma ja jara yam ba jeeri Siiri tiinə bam, yɩ ba duri ba jagɩ. 15 Amɔn tiinə bam na nɛ nɩ Siiri tiinə bam duri ba jagɩ tɩn, mʋ ba dɩ duri ba joori ba zʋ ba tɩʋ kʋm wʋnɩ, yɩ ba daarɩ Abisayi dɩ o jar-kərə kɔgɔ kʋm. Najara yam ma ti pa Zoabɩ joori o vu Zeruzalɛm. 16 Siiri tiinə bam na maanɩ nɩ Yisɩrayɛlɩ tiinə bam wanɩ-ba ba di tɩn, mʋ ba joori ba tʋŋɩ nɔɔna pa ba vu ba la ba jar-kərə balʋ na wʋ Efratɩ bugə kam wa-puli seeni tɩn ba kɩ daanɩ. Pɛ Hadadezerɩ jar-kərə yigə tu Sobakɩ dɛɛn mʋ wʋ ba yigə nɩ.
17 Davidi ma lwarɩ ba na kɩ te tɩn ni nɩ. O dɩ ma la Yisɩrayɛlɩ jar-kərə bam maama o kɩ daanɩ. Ba ma vu ba bɛ Zʋrdɛn bugə kam ba toŋi ba fɔgɩ ba zɩgɩ ba jeeri Siiri tiinə bam. Siiri tiinə bam na nɛ Davidi na kɩ te tɩn, ba ma zaŋɩ najara dɩd-o. 18 Yisɩrayɛlɩ tiinə bam ma fɩn Siiri tiinə bam ba zəli pa ba duri ba jagɩ. Davidi dɩ o nɔɔna bam ma gʋ ba dʋna balʋ na dɔgɩ sise-tərikooru yuu nɩ tɩn mʋrrʋ tɩrpɛ (7,000). Ba ta ma gʋ jar-kərə balʋ na ve tɩga nɩ tɩn mʋrrʋ fiinna (40,000). Kʋ na yɩ ba jar-kərə bam yigə tu Sobakɩ, ba ma gʋ o dɩ. 19 Hadadezerɩ kwaga nɔɔna bam maama ma maanɩ nɩ Yisɩrayɛlɩ tiinə bam mʋ di-ba ba ti. Ba ma loori yibwənə Davidi tee nɩ yɩ ba daarɩ ba sɛ ba pa‑o. Siiri tiinə bam maa ba sɛa sɩ ba daa wǝli Amɔɔrɩ tiinə bam najara kǝm baŋa nɩ.