Ba wanɩ ba di Raba tɩʋ
20
Kʋ dɛɛn ma yi tweeru punnu kǝm maŋa. Kʋ maa yɩ maŋa kalʋ pwa na yǝni ba nuŋi sɩ ba kɩ jara tɩn. Zoabɩ ma tɔgɩ Yisɩrayɛlɩ jar-kərə bam yigə pa ba vu Amɔn tiinə laŋa kam ba zaŋɩ najara dɩ ba. Ba ma li Raba tɩʋ kʋm. Zoabɩ dɩ o nɔɔna bam ma wanɩ-kʋ ba di. Kʋ daarɩ Davidi tɩtɩ ma maŋɩ Zeruzalɛm nɩ.a 2 Davidi ma dwanɩ səbu-sɩŋa paarɩ yipugə kam ba pɛ wʋm yuu nɩ. O ma maanɩ nɩ ka duuni daga zanzan, nɩnɛɛnɩ kilo fiintɔ-tɩna, yɩ kandwɛ-nyɩɩnɩ mʋ məəli ka yɩra nɩ. Ba ma kwe yipugə kam ba kɩ Davidi yuu nɩ. O dɩ o nɔɔna bam dɛɛn ta ma pɛ tɩʋ kʋm jɩjɩgɩrʋ zanzan ba ja ba viiri. 3 Kʋ nan na yɩ tɩʋ kʋm nɔn-biə bam, o dɛɛn kwe-ba mʋ o dɩ tɩtʋŋ-dɛɛra wʋnɩ. O ma pa ba maɩ pingaasa, dɩ doorə, dɩ sʋnɩ ba tʋŋa. Davidi dɛɛn kɩ Amɔn tiinə tɩɩnɩ dɩm maama kʋntʋ doŋ mʋ. Kʋntʋ kwaga nɩ, Davidi dɩdaanɩ o jar-kərə bam maama ma joori ba vu Zeruzalɛm.Ba kɩ najara dɩ Filisi tiinə bam
4 Kʋ kwaga nɩ, Filisi tiinə bam daa ma kɩ najara dɩ Yisɩrayɛlɩ tiinə bam Gezɛrɩ tɩʋ nɩ. Usati tɩʋ nɔɔnʋ Sibekayi ma gʋ nɔn-sawaara dwi tu wʋdoŋ, o yɩrɩ mʋ Sipayi. Ba ma wanɩ Filisi tiinə bam ba di.
5 Maŋa kadoŋ nɩ Yisɩrayɛlɩ tiinə bam daa ta ma kwaarɩ jara dɩ Filisi tiinə bam. Yayiri bu Elanan dɛɛn gʋ Gatɩ tu Goliatɩ cʋrʋ wʋdoŋ, o yɩrɩ mʋ Lami. Wʋntʋ cicwe dɩm daga dɩ dwe garyi sɔɔna daa na maɩ te tɩn.b
6 Najara yadonnə daa ma kɩ Gatɩ tɩʋ nɩ. Filisi tiinə bam babɩa kadoŋ maa wʋra o dɩ na yɩ nɔn-sawɔrɔ yɩ o nuŋi Rafa dwi dɩm wʋnɩ. O jɩŋa maama dɛɛn jɩgɩ nwa bardʋ mʋ. O namimbiə dɩ maa yɩ bardʋ bardʋ. 7 O maa jɩgɩ Yisɩrayɛlɩ tiinə bam o twɩa. Davidi zɩmbaarʋ Shama bu Zonatan ma zaŋɩ o gʋ-o.
8 Filisi tiinə bam kʋntʋ dɛɛn mʋ yɩ nɔn-sawaara dwi dɩm tiinə na nuŋi Gatɩ nɩ tɩn. Davidi dɩ o nɔɔna bam nan mʋ gʋ-ba.