Davidi jeeli Yisɩrayɛlɩ jar-kərə bam ni
21
Sʋtaanɩ pɛa dɛɛn bʋŋɩ sɩ o pa cam yi Yisɩrayɛlɩ tiinə bam mʋ. O ma sʋgɩ Pɛ Davidi sɩ o jeeli o lwarɩ Yisɩrayɛlɩ tiinə bam ni na maɩ te tɩn. 2 Davidi ma ta dɩ Zoabɩ dɩ jar-kərə dɩdɛɛra badonnǝ bam o wɩ: «Ve-na á kaagɩ Yisɩrayɛlɩ tɩʋ kʋm maama, kʋ na zɩgɩ Bɛɛr-Seba nɩ sɩ kʋ yi Dan laŋa kam seeni tɩn sɩ á jeeli nɔn-biə bam ni. Á na kɩ kʋntʋ á ti, sɩ á pa a lwarɩ nɔɔna bam maama ni na maɩ te tɩn.»3 Zoabɩ ma ləri o wɩ: «Pɛ, amʋ loori Baŋa-Wɛ sɩ DƖ pa Yisɩrayɛlɩ kɔgɔ kʋm puli kuni bi sɩ kʋ dwǝni ba zɩm na yɩ te tɩntʋ tɩn. Amʋ tu, ba maama yɩ nmʋ kwaga nɔɔna mʋ. Bɛŋwaanɩ mʋ nmʋ lagɩ sɩ n lwarɩ ba ni na maɩ te? Nmʋ wʋ lwarɩ nɩ kǝm dɩm kʋntʋ wʋ́ pa lwarɩm taa wʋ Yisɩrayɛlɩ tiinə bam yuu nɩ mʋ na?»
4 Dɩ kʋntʋ maama dɩ, Pɛ Davidi nan wʋ sɛ sɩ o za ni dɩlʋ o na pɛ Zoabɩ tɩn. Zoabɩ ma zaŋɩ o vu o kaagɩ Yisɩrayɛlɩ je maama o ga nɔɔna bam ni. O na kɩ kʋntʋ o ti tɩn, o ma joori Zeruzalɛm. 5 Zoabɩ ma lwǝni o brɩ pɛ Davidi Yisɩrayɛlɩ baara balʋ na yi najara kǝm tɩn ni na maɩ te tɩn. Yisɩrayɛlɩ dwiə yam maama wʋnɩ, ba dɛɛn yɩ baara mʋrrʋ kuni mʋrʋ dɩdaanɩ mʋrrʋ-bi-dɩdʋa (1,100,000) mʋ. Zuda dwi dɩm wʋnɩ ba maa yɩ baara mʋrrʋ biə-yana dɩ fusɩrpɛ (470,000).
6 Zoabɩ na wʋ yɔɔrɩ o sɛ Pɛ Davidi ni dɩm tɩn, kʋ ma pa o daa wʋ jeeli Levi dwi dɩm, dɩ Bɛnzamɛn dwi dɩm o wǝli garɩm dɩm wʋnɩ. 7 Wɛ tɩtɩ dɩ banɩ ma zaŋɩ dɩ Davidi na kɩ kʋlʋ tɩn. DƖ ma pa cam ba Yisɩrayɛlɩ tiinə bam baŋa nɩ. 8 Davidi ma ta dɩ Wɛ o wɩ: «Amʋ tiini a kɩ lwarɩm dɩ a kǝm dɩntʋ. Popo a loori‑m sɩ n yagɩ n ma n cɛ-nɩ. Bɛŋwaanɩ, a tiini a tʋŋɩ jwərim zanzan.»
9 Gaadɩ dɛɛn yɩ Wɛ nijoŋnu wʋlʋ na tʋŋɩ o pa Davidi tɩn mʋ. Baŋa-Wɛ ma ta dɩd-o DƖ wɩ: 10 «Ve n ta dɩ Davidi nɩ: ‹Baŋa-Wɛ na tagɩ kʋlʋ tɩn mʋ tɩntʋ: N maŋɩ sɩ n kuri wǝǝnu tɩntʋ tɩtɔ wʋnɩ dɩdʋa mʋ sɩ a kɩ-kʋ sɩ kʋ taa yɩ waarɩm kʋ pa‑m.› »
11 Gaadɩ ma sɩɩnɩ o vu ta dɩ Davidi o wɩ: «Baŋa-Wɛ na tagɩ kʋlʋ tɩn mʋ tɩntʋ: N maŋɩ sɩ n kuri wǝǝnu tɩntʋ tɩtɔ wʋnɩ dɩdʋa. 12 Kɔɔ mʋ nmʋ nan wʋ́ kuri? N lagɩ sɩ kana mʋ zʋ n tɩʋ kʋm bɩna yatɔ, naa sɩ á dʋna mʋ taa jɩgɩ abam ba zələ yɩ ba gʋɩ canɩ sɩtɔ, naa sɩ Baŋa-Wɛ malɛka ba á baŋa nɩ ka pa yawɩ-cɛɛrʋ tʋ n tɩʋ kʋm nɩ tɩ gʋ abam da yatɔ mʋ? Nan bʋŋɩ lanyɩranɩ sɩ n kuri tɩ wʋnɩ n ta n brɩ-nɩ, sɩ amʋ dɩ joori a vu a ta dɩ wʋlʋ na tʋŋɩ-nɩ n tee nɩ tɩn.»
13 Davidi ma lǝr-o o wɩ: «Amʋ bɩcarɩ tiini dɩ di mʋ. Aá kuri kɔɔ sɩ a daarɩ kɔɔ? Amʋ ba lagɩ sɩ nabiinǝ taa jɩgɩ dɩbam ba dam kuri nɩ. Baŋa-Wɛ tɩtɩ nan na waarɩ dɩbam, kʋ gara, Dɩntʋ na tiini DƖ duri nɔɔna yibwənə tɩn ŋwaanɩ.»
14 Baŋa-Wɛ laan ma pa yawɩ-cɛɛrʋ ba kʋ tɩn Yisɩrayɛlɩ tɩʋ kʋm nɩ. Kʋ nɔn-biə mʋrrʋ fusɩrpɛ (70,000) dɛɛn ma tɩ. 15 Wɛ ma daarɩ DƖ tʋŋɩ DƖ malɛka sɩ ka vu ka cɔgɩ Zeruzalɛm tɩʋ kʋm. Malɛka kam na yi da sɩ ka gʋ kʋ nɔn-biə tɩn mʋ Baŋa-Wɛ maanɩ cam dɩlʋ DƖ na tʋŋɩ ba baŋa nɩ tɩn, pa DƖ ləri DƖ wʋbʋŋa yɩ DƖ daarɩ DƖ duri ba ŋwaŋa. DƖ ma ta dɩ malɛka kam DƖ wɩ: «Kʋ maŋɩ! Dwanɩ n jɩŋa n daarɩ tɩʋ kʋm sɩ n daa yɩ cɔgɩ-kʋ!» Kʋntʋ dɩ Baŋa-Wɛ malɛka kam ya zɩgɩ Yebusi tu Aravɩna mɩna tʋa kaporo kʋm nɩ mʋ. 16 Davidi ma kwǝni o yuu o nii o na Baŋa-Wɛ malɛka kam na wʋ wɛyuu nɩ yɩ ka ze sʋ-lɔŋɔ ka jeeri Zeruzalɛm tɩʋ kʋm. Davidi dɩdaanɩ tɩʋ kʋm nakwa bam ya na zʋ gwar-zɩnzwannʋ tɩn ma vin ba yigə tɩga nɩ.
17 Davidi ma warɩ Wɛ o wɩ: «Kʋ yɩ amʋ mʋ tiini a kɩ lwarɩm. Kʋ yɩ amʋ mʋ pɛ ni sɩ ba jeeli nɔɔna bam na maɩ te tɩn. Nɔɔna bantʋ yɩ amʋ kwaga nɔɔna mʋ. Bantʋ nan kɩ bɛɛ mʋ yɩ ba na lɛɛrʋ tɩntʋ? Amʋ Tu Baŋa-Wɛ, nan ma n jɩŋa n waarɩ amʋ dɩ a sɔŋɔ tiinə bam, sɩ n daarɩ n yagɩ nɔɔna bantʋ sɩ yawɩ-cɛɛrʋ yɩ cɔgɩ-ba.»
18 Baŋa-Wɛ malɛka kam ma ta dɩ Wɛ nijoŋnu Gaadɩ sɩ o pa Davidi ni sɩ o vu o lɔ kaanɩm bimbim Aravɩna mɩna tʋa kam nɩ sɩ o ma o zuli Baŋa-Wɛ.b 19 Davidi ma sɛ Baŋa-Wɛ ni dɩm o na pɛ Gaadɩ sɩ o ta dɩd-o tɩn, yɩ o zaŋɩ o vu je sɩm. 20 Aravɩna maa wʋ je sɩm nɩ o magɩ o mɩna. O ma pipiri o na Wɛ malɛka kam. O biə bana na wʋ o tee nɩ tɩn ma duri ba səgi. 21 Aravɩna ma yɔɔrɩ o tʋlɩ o na Pɛ Davidi na maa bɩɩna. O ma yagɩ o mɩna yam kaporo o daarɩ o vu o vin o yibiyə tɩga nɩ o zul‑o. 22 Davidi ma ta dɩd-o o wɩ: «Sɛ sɩ n yəgi n mɩna tʋa kam n pa-nɩ. A lagɩ sɩ a lɔ kaanɩm bimbim mʋ dáanɩ a zuli Baŋa-Wɛ sɩ kʋ pa yawɩ-cɛɛrʋ tɩm ti dɩ́ tɩʋ kʋm nɩ. Amʋ wʋ́ ŋwɩ kʋ səbu kʋm ni maama a pa‑m.»
23 Aravɩna ma lǝr-o o wɩ: «Amʋ tu, nan kwe-ka zaanɩ n ma n kɩ kʋlʋ maama n na lagɩ tɩn. Nii amʋ na-bɛ mʋ tɩntʋ sɩ n wanɩ n ja n zwɛ n ma n kɩ kaanɩm dɩm. Mɩna fɩrɩm dɛ sɩm dɩ maa wʋra sɩ n kwe-sɩ n ma n tarɩgɩ mim n zwɛ vara bam. Mɩna dɩ maa wʋra sɩ n ma n kɩ wʋdiu pɛɛra. Pɛ, amʋ lagɩ a kwe tɩntʋ maama a pa nmʋ zaanɩ.»
24 Davidi ma ləri Aravɩna o wɩ: «Awo! Amʋ wʋ́ ŋwɩ tɩ maama jɩnɩ mʋ a pa‑m. Bɛŋwaanɩ, a ba lagɩ sɩ a kwe nmʋ tɩtɩ jɩŋa wǝǝnu a pa Baŋa-Wɛ, naa sɩ a kwe pɛɛra yalʋ a na joŋi zaanɩ tɩn a zwɛ a kɩ kaanɩm a pa‑DƖ.»
25 Davidi ma jeeli səbu-sɩŋa səbu-dala biə-yardʋ o pa Aravɩna o ma yəgi o mɩna tʋa kam. 26 O ma lɛɛrɩ o lɔ bimbim da sɩ o ma kɩ kaanɩm o zuli Baŋa-Wɛ. O ma daarɩ o kɩ zwɛɛm pɛɛra, dɩ yazurə pɛɛra o ma kaanɩ Baŋa-Wɛ. O ma warɩ Baŋa-Wɛ je sɩm kʋntʋ nɩ. Baŋa-Wɛ ma sɛ o wɛ-loro kʋm, yɩ DƖ pa mim zɩgɩ wɛyuu nɩ dɩ ba dɩ tʋ kaanɩm bimbim dɩm baŋa nɩ.
27 Baŋa-Wɛ ma ta dɩ malɛka kam sɩ ka kwe sʋ-lɔŋɔ kʋm ka joori ka kɩ kʋ polo kʋm nɩ. 28 Davidi ma maanɩ nɩ Baŋa-Wɛ ləri o loro. O ma kɩ kaanɩm o pa Baŋa-Wɛ Aravɩna tʋa kaporo kʋm nɩ.