22
Davidi laan ma ta o wɩ: «Baŋa-Wɛ digə kam wʋ́ lɔ ka zɩgɩ yo seeni mʋ, sɩ bimbim dɩlʋ Yisɩrayɛlɩ tiinə bam na wʋ́ taa jaanɩ ba pɛɛra ba ma ba kɩ zwɛɛm kaanɩm da tɩn dɩ zɩgɩ yo!»
Ba ti ba yigə sɩ ba lɔ Wɛ-digə kam
2 Davidi dɛɛn ma pa ni sɩ ba la vərə balʋ maama na zʋʋrɩ Yisɩrayɛlɩ tɩʋ wʋnɩ tɩn ba kɩ daanɩ. O dɛɛn kuri ba wʋ nɔɔna mʋ sɩ ba lɔ kandwa-zana ba lɩ pweeru yɩra nɩ yɩ ba daarɩ ba sarɩ-ya ba ma ba lɔ Wɛ-digə kam.a 3 O ma beeri luuru zanzan o tiŋi sɩ ba ma-tɩ ba kɩ cɩna yalʋ na wʋ́ kwɛ ka niə yam bwəəru tɩm tɩn, dɩ zɩla yadonnə. O ta ma la canna zanzan, ka duuni na dwe maŋɩm tɩn. 4 Sidɔn tɩʋ tiinə dɩ Tiiri tɩʋ tiinə dɛɛn ya jaanɩ Sɛdrɩ dɛ zanzan ba ba ba pa Davidi, yɩ o tiŋi-tɩ Wɛ-digə kam lɔɔm ŋwaanɩ. Tɩ na tiini tɩ daga te tɩn gaalɩ garɩm.
5 Bɛŋwaanɩ, Davidi dɛɛn tagɩ mʋ o wɩ: «Amʋ bu Solɔmɔn tiini o muri, yɩ o wʋbʋŋa ta wʋ kwɩɩrɩ. Kʋ nan maŋɩ sɩ digə kalʋ dɩ́ na wʋ́ lɔ sɩ dɩ́ zuli Baŋa-Wɛ da tɩn taa lana lanyɩranɩ mʋ, sɩ ka yɩrɩ yi tɩga baŋa ni maama, yɩ ka nɩnwaŋ-fɔrɔ dɩ nuŋi kʋ yi je maama. Kʋntʋ ŋwaanɩ a nan wʋ́ ti ka zɩla yigə lele sɩ ka lɔɔm maŋa ba ka yi.» Davidi ma da kʋ ŋwaanɩ o la Wɛ-digə kam lɔɔm zɩla zanzan o tiŋi yɩ o laan daarɩ o tɩ.
6 O maa tʋŋɩ o bəŋi o bu Solɔmɔn yɩ o pa‑o ni sɩ o lɔ digə Baŋa-Wɛ dɩm na yɩ Yisɩrayɛlɩ tiinə Wɛ tɩn zulə ŋwaanɩ. 7 O ma ta dɩd-o o wɩ:
«Amʋ bu, amʋ tɩtɩ mʋ ya jaanɩ wʋbʋŋa sɩ a lɔ digə amʋ Tu Baŋa-Wɛ yɩrɩ zulə ŋwaanɩ. 8 Baŋa-Wɛ dɛɛn nan tʋŋɩ DƖ kwǝrǝ mʋ DƖ ta dɩ amʋ nɩ: ‹Nmʋ tiini n gʋ nɔɔna zanzan jara-kǝm baŋa nɩ. Nmʋ nan bá lɔ digə amʋ yɩrɩ zulə ŋwaanɩ, amʋ na maanɩ nɩ n pwəri jana zanzan tɩga nɩ tɩn ŋwaanɩ. 9 Kʋ na yɩ te tɩn, nmʋ wʋ́ lʋ bu na lagɩ bɩcar-zuru dɩ ywəəni yɩranɩ tɩn mʋ. O dʋna maama daa bá taa daanɩ‑o. O yɩrɩ wʋ́ taa yɩ Solɔmɔn mʋ. O na wʋ́ di paarɩ maŋa kalʋ tɩn Yisɩrayɛlɩ tiinə bam wʋ́ jǝni dɩ yazurə dɩ bɩcar-zuru. 10 Wʋntʋ mʋ wʋ́ lɔ digə o zɩgɩ a yɩrɩ dɩm zulə ŋwaanɩ. Oó taa yɩ amʋ bu mʋ, sɩ amʋ dɩ taa yɩ o ko. O paarɩ dɩm wʋ́ nu Yisɩrayɛlɩ tɩʋ kʋm nɩ mʋ sɩ kʋ taa ve wuu.›
11 Kʋntʋ ŋwaanɩ, a bu, n Tu Baŋa-Wɛ dɩm wʋ́ taa wʋ n tee nɩ, sɩ n dɩ kwaanɩ n lɔ DƖ digə kam n ti, nɩ DƖ na pɛ ni sɩ n kɩ te tɩn. 12 N Tu Baŋa-Wɛ dɩm nan wʋ́ pa n jɩgɩ wʋbʋŋa dɩ yǝno lanyɩranɩ sɩ n wanɩ n tɔgɩ DƖ niə yam na brɩ te tɩn baŋa nɩ n tan te Yisɩrayɛlɩ tiinə bam. 13 Nmʋ na sɛ n tɔgɩ Wɛ niə yalʋ dɩ DƖ cullu tɩlʋ DƖ na tɔgɩ Moyisi baŋa nɩ DƖ kwe DƖ pa Yisɩrayɛlɩ tiinə bam tɩn lanyɩranɩ, nmʋ cwe maama wʋ́ kwɛ sɩ pa‑m. Yɔɔrɩ n kɩ dam n kɩ n tɩtɩ kuri nɩ, sɩ n daarɩ n tiini n tan jɩgɩ baarɩ. Yɩ zaŋɩ n ta n wɩ n kwarɩ kʋlʋkʋlʋ, yɩ pa fʋʋnɩ di-m.b
14 Amʋ maŋɩ a la Baŋa-Wɛ digə kam lɔɔm zɩla zanzan mʋ a tiŋi. A lagɩ səbu-sɩŋa a tiŋi sɩ ka duuni maŋɩ dɩ kilo mʋrʋ kuni mʋrrʋ tɩtɔ dɩ biə-yanu (3,500,000). A ta ma la səbu-poŋo tɩlʋ duuni dɩ na yi nɩ kilo mʋrʋ kuni mʋrrʋ fiintɔ-tɩnu (35,000,000) tɩn. A ta ma la canna dɩ luuru zanzan pa tɩ duuni dwe maŋɩm, kʋ wǝli dɩ dɛ dɩ kandwa zanzan a tiŋi. Dɩ kʋ dɩ, nmʋ ta wʋ́ wanɩ n beeri tɩdonnǝ n wǝli da. 15 Nmʋ nan jɩgɩ tɩntʋŋna zanzan n tee nɩ, ba na yɩ kandwa-cɩrna, dɩ lwara, dɩ kapɩnta tiinə, dɩ gwarʋ tɩdonnǝ na waɩ tɩtʋŋa dwi dwi ba tʋŋɩ tɩn. Bantʋ maama tiini ba ye ba tɩtʋŋa lanyɩranɩ. 16 Ba maa wʋ́ wanɩ ba kwe səbu-sɩŋa, dɩ səbu-poŋo, dɩ canna, dɩ luuru ba gɔgɩrɩ wǝǝnu dwi dwi. Cɩga tɩn, gwarʋ tɩm daga zanzan. Nan yɔɔrɩ n puli tɩtʋŋa, sɩ Baŋa-Wɛ wʋ́ taa wʋ n tee nɩ.»
17 Davidi dɛɛn ma pa Yisɩrayɛlɩ tɩʋ yigǝ tiinǝ bam ni sɩ ba wǝli Solɔmɔn. 18 O ma ta dɩ ba o wɩ: «Abam Tu Baŋa-Wɛ wʋ á tee nɩ mʋ, yɩ DƖ pa á je á tɩʋ nɩ dɩ yazurə. Kʋ na yɩ balʋ dɛɛn na zʋʋrɩ tɩga kam nɩ tɩn, DƖ kɩ-ba amʋ dam kuri nɩ mʋ. Baŋa-Wɛ dɩ DƖ nɔɔna bam laan maa te tɩga kam. 19 Kʋntʋ ŋwaanɩ, yɔɔrɩ á taá zuli á Tu Baŋa-Wɛ dɩ á bɩcarɩ maama, kʋ wǝli dɩ á dam maama. Nan puli-na á lɔ Yuutu Baŋa-Wɛ digə kam, sɩ á laan wanɩ á ja DƖ ni-gonim daka kam, dɩ DƖ lʋnnɩ zɩla yam á zʋ da. Ka maa wʋ́ taa yɩ digə kalʋ á na wʋ́ lɔ Baŋa-Wɛ yɩrɩ dɩm zulə ŋwaanɩ tɩn.»c