Levi dwi dɩm taanɩ
23
Pɛ Davidi dɛɛn na maanɩ nɩ o kwɩn o gaalɩ tɩn, o ma pa o bu Solɔmɔn ləri o yuu nɩ o di Yisɩrayɛlɩ tɩʋ paarɩ dɩm.a 2 Davidi ma la Yisɩrayɛlɩ nakwa bam, dɩ kaanɩm tiinə bam, kʋ wǝli dɩ Levi tiinə bam maama o kɩ daanɩ. 3 O ma jeeli Levi tiinə balʋ na yi bɩna fiintɔ ba daŋɩ tɩn ni na maɩ te. Ba maama dɛɛn yɩ baara mʋrrʋ fiintɔ-nana (38,000) mʋ. 4 Davidi ma ta o wɩ: «Levi tiinə baara bam maama wʋnɩ, baara mʋrrʋ fiinle-tɩna (24,000) wʋ́ taa nii Wɛ-digə kam tɩtʋŋa baŋa nɩ. Baara mʋrrʋ bardʋ (6,000) maa wʋ́ taa yɩ dɩdɛɛra, dɩ balʋ na di nɔɔna taanɩ tɩn. 5 Ba baara mʋrrʋ tɩna (4,000) wʋ́ taa yɩ Wɛ-digə kam yɩrɩna. Babam mʋrrʋ tɩna (4,000) maa wʋ́ taa maɩ kwɛɛra zɩla yalʋ a na pɛ-ba tɩn ba maga ba zuli Baŋa-Wɛ.»6 Davidi dɛɛn ma pɔɔrɩ Levi tiinə bam kuni bɩtɔ sɩ kʋ tɔgɩ dɩ ba nabaara kuri na yɩ te tɩn. Ba nabaara bam mʋ yɩ Gɛrsɔnɩ, dɩ Keyatɩ, dɩdaanɩ Merari.
Gɛrsɔnɩ dwi dɩm taanɩ
7 Gɛrsɔnɩ biə bam mʋ tɩntʋ:
Ladan dɩ Simeyi.
8 Ladan dɩ dɛɛn jɩgɩ bəkəri sɩtɔ mʋ. Ba maa yɩ:
O bu-kwɩan Yehiyɛlɩ, dɩ Zetam, dɩ Zowɛlɩ.
9 Simeyi biə batɔ bam maa yɩ:
Selomiti, dɩ Hazeli, dɩ Haran.
Bantʋ maama dɛɛn yɩ Ladan sɔ-yuni tɩm yigǝ tiinǝ mʋ.
10 Simeyi dɛɛn daa lʋgɩ biə bana mʋ. Bantʋ mʋ yɩ:
Yahatɩ, dɩ Ziza, dɩ Yewuki, dɩ Beria.
11 Yahatɩ maa yɩ ba sɔ-yuu kʋm yigə tu, yɩ Ziza dɩ dɛɛn saŋɩ o kwaga. Kʋ nan na yɩ Yewuki dɩ Beria, bantʋ dɛɛn wʋ nɛ dwi zanzan. Ba ma lɛɛrɩ ba nii bantʋ bale bam pa ba yɩ digə dɩdʋa nɔɔna.
Keyatɩ dwi dɩm taanɩ
12 Keyatɩ biə bana bam mʋ tɩntʋ:
Amiram, dɩ Yiseyarɩ, dɩ Ebrɔn, dɩ Uziyɛlɩ.
13 Amiram biə bam maa yɩ:
Arɔn dɩ Moyisi.
Arɔn dɩ o dwi dɩm mʋ ba pɔɔrɩ sɩ ba taa yɩ ba yɩra taan wuu. Ba tɩtʋŋa dɛɛn maŋɩ sɩ ba taa fɔgɩ ba nii Baŋa-Wɛ lʋnnɩ wǝǝnu tɩm mʋ ba pa‑DƖ, sɩ ba daarɩ ba taa tʋŋɩ DƖ kaanɩm tɩtʋŋa, yɩ ba taa tʋŋɩ DƖ yigə nɩ, ba daarɩ ba taa tɔgɩ DƖ yɩrɩ dɩm ŋwaanɩ ba sɔɔlɩ lanyɩranɩ ba yagɩ DƖ nɔɔna yuu nɩ sɩ kʋ taa ve wuu. 14 Ba dɛɛn nii Baŋa-Wɛ tɩntʋŋnʋ Moyisi dwi dɩm pa ba wʋ Levi dwi dɩm wʋnɩ mʋ.
15 Moyisi biə bam mʋ tɩntʋ:
Geresom, dɩ Eliezɛrɩ.
16 Geresom dwi dɩm wʋnɩ:
Sebuɛlɩ mʋ yɩ ba nakwɩ.
17 Eliezɛrɩ dwi dɩm wʋnɩ:
Rehabia mʋ yɩ ba nakwɩ.
Eliezɛrɩ daa wʋ lʋgɩ bəkərə. Rehabia nan dɛɛn lʋgɩ biə zanzan.
18 Yiseyarɩ biə bam wʋnɩ:
Selomiti mʋ yɩ ba nakwɩ.
19 Ebrɔn biə bam mʋ tɩntʋ:
O bu-kwɩan Yeria. Balʋ na saŋɩ tɩn maa yɩ Amari, dɩ Yahazeli, dɩ Yekameam.
20 Uziyɛlɩ biə bam mʋ tɩntʋ:
O bu-kwɩan Mika, dɩ wʋntʋ nyaanɩ Yisiya.
Merari dwi dɩm taanɩ.
21 Merari biə bam mʋ tɩntʋ:
Masili, dɩ Musi.
Masili dɩ biə bam maa yɩ:
Eleyazaarɩ dɩ Kisi.
22 Eleyazaarɩ dɛɛn tɩgɩ yɩ o wʋ lʋgɩ bəkərə, sɩ bukwa yɩranɩ mʋ o lʋga. Bantʋ ma zʋ ba ko wʋm nyaanɩ Kisi biə badonnǝ.
23 Musi biə batɔ bam maa yɩ:
Masili, dɩ Edera, dɩ Zeremɔtɩ.
24 Bantʋ maama dɛɛn yɩ Levi dwi dɩm sɔ-yuni tɩm nakwa mʋ, digə maama dɩ ka yuutu. Ba ma pʋpʋnɩ ba yɩra yam ba tiŋi kʋntʋ dɩdʋa dɩdʋa. Bantʋ maa yɩ balʋ na yi bɩna fiinle ba daŋɩ yɩ ba laan jɩgɩ cwǝŋǝ sɩ ba taa tʋŋa Baŋa-Wɛ digə kam wʋnɩ tɩn mʋ. 25 Bɛŋwaanɩ, Davidi dɛɛn maŋɩ o ta o wɩ: «Baŋa-Wɛ dɩm na yɩ Yisɩrayɛlɩ tiinə Wɛ tɩn pɛ DƖ nɔɔna bam jǝni dɩ wʋ-zuru, yɩ DƖ ba DƖ zʋʋrɩ Zeruzalɛm tɩʋ wʋnɩ taan wuu. 26 Levi dwi tiinə bam daa ba maŋɩ sɩ ba taa zɩŋɩ jero-vwe dɩm dɩ dɩ wʋ zɩla yam ba taa beerǝ jǝgǝ maama.»
27 Davidi na pɛ o ni dɩlʋ o kweeli tɩn brɩ nɩ: Levi dwi tu wʋlʋ maama na yi bɩna fiinle o daŋɩ tɩn jɩgɩ cwǝŋǝ sɩ o taa tʋŋa o pa Wɛ. 28 Levi dwi tiinə tɩtʋŋa yam maŋɩ sɩ ba da ba wǝli Arɔn dwi dɩm dɩ ba na tʋŋɩ Wɛ-digə kam wʋnɩ te tɩn mʋ. Ba maŋɩ sɩ ba taa nii Wɛ-digə kam kʋnkwallʋ tɩm baŋa nɩ, dɩ di-balwa balʋ na wʋ ka wʋnɩ tɩn, sɩ ba daarɩ ba kwɛ Wɛ lʋnnɩ zɩla yam maama digiru seeni, kʋ wǝli dɩ Wɛ-digə kam tɩtʋŋa yalʋ na maŋɩ tɩn dɩ. 29 Ba daa ta wʋ́ taa nii dɩpwa yalʋ ba na yǝni ba tiŋi Wɛ yigə nɩ tɩn baŋa nɩ, dɩdaanɩ mun-bwe dɩlʋ ba na wʋ́ ma ba kɩ wʋdiu pɛɛra ba pa Wɛ tɩn, dɩ dɩpwa yalʋ dabɩlɩ na wʋ wǝli kʋ wʋnɩ tɩn, dɩ maasa fɔgɩm baŋa nɩ. Ba daa ta maŋɩ sɩ ba taa nii wəənu tɩlʋ maama, ba na ma ba maŋɩ woŋo duuni asawɛ kʋ dɩdwarɩm tɩn. 30 Tɩga na yǝni ka pʋʋrɩ, Levi tiinə bam maŋɩ sɩ ba zɩgɩ ba jǝgǝ nɩ ba kɩ Baŋa-Wɛ le mʋ yɩ ba leeni ba zuli‑DƖ. Ba ta wʋ́ kɩ kʋntʋ dɩdaan-ni maama nɩ, 31 kʋ wǝli dɩ dɛ dɩlʋ maama ba na yǝni ba kɩ zwɛɛm kaanɩm ba pa Baŋa-Wɛ tɩn, kʋ na yɩ DƖ siun dɛ, naa can-dʋŋa candiə maŋa nɩ, naa candiə dɩdoŋ maŋa nɩ dɩ.
32 Kʋntʋ doŋ mʋ Levi dwi tiinə bam dɛɛn nii Wɛ jero-vwe dɩm dɩ dɩ je sɩlʋ na yɩ lanyɩranɩ fasɩ tɩn tɩtʋŋa yam baŋa nɩ. Ba ma wǝli ba cʋrrʋ tɩlʋ na yɩ Arɔn dwi dɩm tɩn pa ba tʋŋa Baŋa-Wɛ digə kam wʋnɩ.