Kaanɩm tiinə tɩtʋŋa na pɔɔrɩ te tɩn
24
Arɔn dwi dɩm na pɔɔrɩ sɔ-yuu dɩ sɔ-yuu te tɩn mʋ tɩntʋ:Arɔn biə bam ya yɩ Nadabɩ, dɩ Abiyu, dɩ Eleyazaarɩ, dɩ Itamarɩ. 2 Kʋ nan na yɩ Nadabɩ dɩ Abiyu, bantʋ tɩgɩ kʋ loori ba ko tʋʋnɩ. Ba maa wʋ lʋgɩ bəkəri. Kʋntʋ ma pa ba nyaana Eleyazaarɩ dɩ Itamarɩ ji Wɛ kaanɩm tiinə. 3 Davidi ma pɔɔrɩ Arɔn dwi dɩm kɔgɔ kɔgɔ, sɩ kɔgɔ maama taa jɩgɩ kʋ tɩtʋŋa kʋ tʋŋa kʋ paɩ Wɛ. Kʋ nan yɩ Eleyazaarɩ dwi tu Sadoki, dɩ Itamarɩ dwi tu Ayimelɛkɩ mʋ kɩ daanɩ ba wǝli Davidi sɩ o pɔɔrɩ nɔɔna bam. 4 Ba ma maanɩ nɩ Eleyazaarɩ dwi dɩm dɛɛn jɩgɩ dɩdɛɛra zanzan kʋ dwǝni Itamarɩ dwi dɩm na jɩgɩ te tɩn. Kʋntʋ ŋwaanɩ ba dɛɛn pɔɔrɩ Eleyazaarɩ dwi dɩm kuni fugə-bɩrdʋ, yɩ ba daarɩ ba pɔɔrɩ Itamarɩ dwi dɩm kuni nana. 5 Ba ma ta jɔrɔ sɩ ba wanɩ ba pɔɔrɩ tɩtʋŋa yam dɩ cɩga, bɛŋwaanɩ Wɛ-digə tɩntʋŋna dɩ kaanɩm tiinə dɛɛn wʋra ba na nuŋi Itamarɩ dɩ Eleyazaarɩ dwiə yam wʋnɩ mʋ.
6 Ba na pɛ nɔɔna bam pʋpwara maama ba tɩtʋŋa sɩ ba taa tʋŋɩ kʋntʋ tɩn, tɔn-pʋpʋnnʋ Semaya mʋ pʋpʋnɩ ba yɩra yam o tiŋi. Wʋntʋ maa yɩ Levi dwi tu Netaneli bu. Davidi dɩ o dɩdɛɛra bam badonnǝ dɛɛn mʋ nii kǝm dɩm kʋntʋ baŋa nɩ. Dɩdɛɛra bam maa yɩ Wɛ kaanɩm tu Sadoki, dɩ Abɩatarɩ bu Ayimelɛkɩ, kʋ wǝli dɩ kaanɩm tiinə bam, dɩ Levi dwi dɩm sɔ-yuni tɩm nakwa bam maama. Eleyazaarɩ dwi dɩm dɩ Itamarɩ dwi dɩm dɛɛn mʋ jɩgɩ jɔrɔ kʋm ba taɩ ba ləri ba pa daanɩ. 7-18 Nɔɔna bam pɔɔrɩm fiinle-sɩna sɩm na saŋɩ daanɩ te tɩn mʋ tɩntʋ:
| 1. | Yehoyaribi |
| 2. | Yedaya |
| 3. | Harim |
| 4. | Seyorim |
| 5. | Malkiya |
| 6. | Miyamina |
| 7. | Hakoza |
| 8. | Abɩa |
| 9. | Zozwe |
| 10. | Sekanɩa |
| 11. | Eliyasibi |
| 12. | Yakini |
| 13. | Hupa |
| 14. | Yesebebɩ |
| 15. | Biliga |
| 16. | Yimera |
| 17. | Hezira |
| 18. | Hapizezɩ |
| 19. | Petasia |
| 20. | Ezekiɛlɩ |
| 21. | Yakinni |
| 22. | Gamuli |
| 23. | Delaya |
| 24. | Maazɩa |
19 Mʋ ba dɛɛn na pɛ nɔɔna maama pʋpwara dɩ pʋpwara ba tɩtʋŋɩ te tɩn. Ba dɛɛn maŋɩ sɩ ba saŋɩ daanɩ kʋntʋ doŋ mʋ ba taa zʋʋrɩ Baŋa-Wɛ digə kam ba tʋŋa ka wʋnɩ, sɩ kʋ maŋɩ dɩ Yisɩrayɛlɩ tiinə Baŋa-Wɛ dɩm dɛɛn na pɛ ba nabaarʋ Arɔn ni sɩ ba taa tʋŋɩ te tɩn.
Levi dwi dɩlʋ na daarɩ tɩn
20 Levi dwi dɩm sɔ-yuni tɩm nakwa balʋ na daarɩ tɩn mʋ tɩntʋ:
Amiram dwi dɩm wʋnɩ nakwɩ tu wʋm mʋ yɩ Sebuɛlɩ.
Sebuɛlɩ dwi dɩm nakwɩ tu wʋm maa yɩ Yedɩya.
21 Rehabia biə bam wʋnɩ Yisiya mʋ yɩ nakwɩ.
22 Yiseyarɩ dwi dɩm wʋnɩ Selomiti mʋ yɩ nakwɩ.
Selomiti dɩ biə bam wʋnɩ Yahatɩ dɩ maa yɩ nakwɩ.
23 Ebrɔn biə bam wʋnɩ Yeria mʋ yɩ nakwɩ.
Amari dɩ ma saŋɩ bɩle tu.
Yahazeli ma kɩ bɩtɔ tu.
Yekameam ma kɩ bɩna tu.
24 Uziyɛlɩ bu mʋ yɩ Mika.
Mika dɩ biə bam wʋnɩ Samiri mʋ yɩ nakwɩ.
25 Mika nyaanɩ maa yɩ Yisiya.
Yisiya dɩ biə bam wʋnɩ Zakari mʋ yɩ nakwɩ.
26 Merari biə bam wʋnɩ Masili dɩ Musi mʋ yɩ nakwa.
Yazia bu mʋ yɩ Beno.
27 Merari bu Yazia biə bam maama maa yɩ:
Beno, dɩ Soham, dɩ Zakuri, dɩ Yibiri.
28 Masili biə bam wʋnɩ Eleyazaarɩ mʋ yɩ nakwɩ.
Eleyazaarɩ nan wʋ lʋgɩ bəkəri.
29 Kisi biə bam wʋnɩ o bu Yerameliti mʋ yɩ nakwɩ.
30 Musi biə bam wʋnɩ Masili, dɩ Edera, dɩ Yerimoti mʋ yɩ ba nakwa.
Levi dwi dɩm sɔ-yuu dɩ sɔ-yuu mʋ kʋntʋ. 31 Bantʋ dɛɛn tagɩ jɔrɔ mʋ ba tɩtʋŋa dwi maama ŋwaanɩ, nɩnɛɛnɩ ba cʋrrʋ tɩm na yɩ Arɔn biə tɩn dɩ na kɩ te tɩn. Ba kɩ kʋntʋ Pɛ Davidi, dɩ Sadoki, dɩ Ayimelɛkɩ, kʋ wǝli dɩ kaanɩm tiinə bam dɩ Levi dwi dɩm sɔ-yuni tɩm nakwa bam maama yigə nɩ mʋ. Ba dɛɛn na tagɩ jɔrɔ kʋm te tɩn, pʋpwara tǝrǝ dɩ ba na kɩ te nakwɩ maama dɩ o nyaana yɩra nɩ tɩn.