Ibrani
Surat for orang Ibrani yang so percaya
Kata Pengantar
Ni kitab Ibrani ini de pe model surat. Tu da batulis ni surat itu nyanda jelas, lantaran pa de pe surat ini nyanda bilang yang da batulis pe nama. Dari ni surat bole dapa lia deng jelas kalu yang da batulis ini orang yang tau butul tentang Perjanjian Lama, deng dia lei bukang satu dari Tuhan Yesus pe murit (Ibr. 2:3). Ni surat da tulis for kase pa orang-orang Ibrani yang so percaya pa Yesus. Tu orang Ibrani itu ja bilang lei orang Yahudi ato keturunan Abraham. Sebenarnya nyanda jelas lei sapa-sapa dari orang Ibrani itu yang trima surat ini deng di mana dorang pe tampa tinggal. Ni penulis surat da tulis ini for orang-orang percaya yang da dapa siksa lantaran dorang pe iman pa Yesus (Ibr. 10:32-34, 13:3, 13).
Penulis pe tujuan da tulis ni surat for se kuat tu orang-orang yang percaya pe iman, lantaran dorang samantara mangada tu siksa sampe dorang amper-amper se tinggal tu dorang pe percaya pa Yesus kong mo babale pa dorang pe kepercayaan seblumnya. Penulis se kuat tu dorang pe percaya deng cara beking dorang tau deng jelas tentang Yesus. Dia se tau pa dorang kalu Yesus Kristus itu no yang bawa tu Tuhan Allah pe firman pa manusia. Ni penulis surat kase tau pa dorang tiga hal tentang Yesus: pertama, Yesus itu Anak Allah tu punya samua yang ada di bumi ini (Ibr. 1:2). Sbagai Anak Allah, Yesus itu jao lebe penting dari tu nabi-nabi di Perjanjian Lama, deng lei lebe penting dari tu malaekat-malaekat, malatare lebe penting lei dari Musa (Ibr. 1:14–7:28). Kadua, Tuhan Allah so se tau kalu Yesus itu imam yang kekal, yang lebe tinggi dari tu imam-imam di Perjanjian Lama (Ibr. 7:28). Katiga, lewat Yesus, tu orang yang percaya pa Dia mo dapa slamat dari hukuman dosa, dari tu rasa tako deng lei dari tu kematian. Yesus itu pengantara antara Tuhan Allah deng manusia (Ibr. 8:6), kong sbagai imam agung Yesus kase tu keslamatan yang sejati. Orang yang percaya pa Dia, tu orang itu mo dapa tubus dari dosa. Tu atoran agama Yahudi for kase korban persembahan, itu nyanda beking orang dapa slamat dari hukuman dosa. Tu atoran-atoran itu cuma gambaran dari apa yang kekal tu orang yang percaya mo dapa. Ni penulis surat lei se tau tentang bebrapa orang pe iman di sejarah orang Israel supaya dorang lei iko tu orang-orang itu pe iman (Ibr. 11). Di Ibrani 12, dia se kuat tu orang-orang yang baca ni surat supaya batahang pa dorang pe percaya pa Tuhan Yesus. Dia se inga pa dorang deng jelas tu hukuman yang orang mo trima kalu dorang so nyanda lei percaya pa Yesus. Dia minta supaya dorang slalu baharap pa Yesus deng lei sabar mangada tu pendritaan deng tu siksa.