Filemon 1

Filemon

Paulus pe surat for Filemon

Paulus pe salam

1 Ni surat dari kita, Paulus. Kita da dapa tahang di bui lantaran da kase tau tentang Kristus Yesus pa orang-orang. Surat ini lei dari Timotius, tu torang pe sudara yang percaya.

Surat ini for bapak Filemon, tu torang pe tamang karja yang torang dua sayang. 2  Ni surat lei for Apfia, tu torang pe sudara parampuang yang percaya deng lei for Arkhipus tu torang pe tamang yang sama-sama da berjuang for se tau tentang Yesus pa orang-orang, deng lei ni surat for tu jemaat yang biasa ja bakumpul for baibada pa bapak pe ruma.

3 Kita minta pa Tuhan Allah tu torang pe Bapa deng lei pa Tuhan Yesus Kristus supaya kase tunjung tu bae pa ngoni deng lei beking tu ngoni pe hidop jadi tenang.

Paulus snang lantaran bapak Filemon pe percaya deng lei de pe sayang

4 Waktu kita basombayang, kita slalu inga pa bapak kong kita bilang makase pa Tuhan Allah yang kita semba. 5 Soalnya kita so dengar kalu bapak butul-butul percaya pa Tuhan Yesus deng bapak lei sayang pa samua tu Tuhan pe orang-orang. 6 Kita basombayang supaya ngoni yang so percaya bole mo ada hubungan dekat, kong torang samua pe hubungan itu bole jadi kuat sampe torang samua bole lebe mangarti samua hal yang bae tu Tuhan so kase pa torang lantaran torang ja iko pa Kristus. 7 Bapak Filemon, bapak itu kita pe sudara yang percaya, bapak pe sayang for Tuhan pe orang-orang itu bagus skali, bapak so beking dorang pe hati jadi kuat. Tu bapak da beking itu beking kita jadi snang deng kita pe hati lei jadi kuat.

Paulus minta Filemon trima ulang pa Onesimus

8 Bapak Filemon, Kristus da kase kuasa pa kita, so itu kita bole mo suru pa bapak for beking apa tu bapak musti beking, 9 mar kita lei tau kalu bapak sayang pa Tuhan pe orang-orang, so itu kita lebe suka for bamohon pa bapak daripada mo basuru pa bapak. Kita ini Paulus, kita so tua, kong kita lei da dapa se maso di bui lantaran kita ja se tau tentang Kristus Yesus pa orang-orang. 10  Kita bamohon pa bapak tentang Onesimus, tu bapak pe budak. Waktu samantara di bui, kita da se tau tentang Yesus pa dia kong dia jadi percaya pa Yesus. So itu no kita so anggap dia itu sama deng kita pe anak sandiri, kong kita jadi sama deng dia pe papa. 11 Dulu tu bapak pe budak Onesimus itu da lari dari pa bapak, waktu itu dia so nyanda ada guna for bapak. Mar skarang dia so ada guna skali, bukang cuma for bapak mar for kita lei.

12 Kita sayang skali pa dia, mar biar lei bagitu, kita suru pa dia supaya babale pa bapak. 13 Sebenarnya kalu mo iko kita pe mau, kita suka mo tahang pa Onesimus samantara kita ada di bui, supaya dia bole ganti pa bapak for bantu pa kita di sini. Kita ada di bui lantaran kita ja se tau tu Kabar Bae tentang Kristus Yesus pa orang-orang. 14 Mar kalu bapak nyanda stuju, kita nyanda mo suru dia tinggal for bantu pa kita di sini, so itu kita lebe suka kalu bapak sandiri yang suru pa dia, bukang lantaran kita da paksa pa bapak for suru pa dia bagitu. 15 Kita pikir mungkin tu alasan sampe bapak deng dia da se baku pisa for samantara waktu, itu supaya dia bole jadi percaya pa Tuhan Yesus, kong bapak bole trima ulang pa dia for sama-sama deng bapak. 16 Jadi bapak mo trima pa dia skarang ini bukang cuma sbagai bapak pe budak, mar lebe dari itu, bapak trima pa dia sbagai bapak pe sudara yang sama-sama percaya pa Tuhan Yesus. Kita ini so sayang pa dia, pasti lei bapak mo sayang pa dia lebe dari tu kita pe sayang pa dia. Bapak pasti mo sayang pa dia lantaran dia itu bapak pe budak, deng dia itu lei bapak pe sudara yang sama-sama percaya pa Tuhan Yesus.

17 Jadi kalu bapak anggap kita ini bapak pe tamang yang sama-sama ja beking tu karja yang Yesus da suru, kita minta pa bapak supaya kalu Onesimus pulang pa bapak, bapak trima jo ulang pa dia sama deng bapak da trima pa kita. 18 Kalu misalnya dia so beking sala apa-apa pa bapak ato da bautang pa bapak, biar jo itu samua nanti kita yang tanggong. 19 Kita ini Paulus, kong skarang kita tulis ini deng kita pe tangan sandiri bagini, “Kita mo bayar tu Onesimus pe utang pa bapak,” itu jadi jaminan for bapak. Kita stou nyanda perlu mo se inga pa bapak kalu kita yang da bantu pa bapak jadi percaya pa Tuhan Yesus, itu sama deng bapak itu ada utang pa kita. 20 So itu kita minta pa bapak tu kita pe sudara yang percaya pa Tuhan supaya bapak bole trima akang jo pa Onesimus. Kita deng bapak sama-sama percaya pa Kristus, kong kalu bapak trima pa dia, itu mo beking kita pe hati jadi snang.

21 Kita tulis ni surat pa bapak kong kita memang yakin kalu bapak mo beking tu kita da minta, malatare kita tau kalu bapak mo beking itu lebe dari yang kita da minta.

22 Kong kita minta tolong lei supaya sadia akang kamar for kita pa bapak pe ruma. Soalnya kita baharap deng yakin kalu Tuhan Allah mo jawab tu ngoni pe sombayang supaya kita bole mo kaluar dari bui kong mo pigi ulang pa ngoni.

Paulus pe akhir surat

23  Epafras da kirim salam for bapak. Dia itu kita pe tamang yang sama-sama da dapa tahang di bui lantaran dia ja beking tu Kristus Yesus da suru. 24  Trus ada lei tu kita pe tamang-tamang laeng yang nyanda da sama-sama deng kita di bui, dorang da kirim salam for ngoni. Dorang itu Markus, Aristarkhus, Demas deng Lukas. Dorang itu kita pe tamang yang sama-sama ja beking tu karja yang Yesus Kristus da suru.

25 Kita minta supaya Tuhan Yesus Kristus kase tunjung Dia pe bae pa ngoni.